CHAK lanné, onlo timouton a Jéova ki té èskominyé ka wouvin adan lasanblé-la. Ou ja imajiné jan toutmoun kontan an syèl-la lèwvwè onsèl pitit a Jéova ka wouvin an 2 bra a-y ? (Lik 15:7, 10). Si sa pa’a fè lontan kè ou wouvin Témwen a Jéova, ou pé sèten kè Jézi, sé zanj-la é Jéova kontan toubònman kè ou ka woufè pawti a lasanblé-la. Men, toupannan ou ka wouvin bon bon zanmi èvè Jéova ou pé jwenn sèwten difikilté. Ki difikilté ésa ? É ka ki pé édé-w rivé about a yo ?

Ni onlo frè é sè ki ka kontinyé santi-yo dékourajé menmsi aprézan yo ka woufè pawti a lasanblé-la. Pétèt ou ka rèsanti menm biten ki David. Menm lè Jéova té ja padoné fòt a-y, i di konsa kè sé érè-la kè i té fè la té ka pézé tèlman asi-y kè sa té ka krazé-y (Sòm 40:12 ; 65:3). On moun ki wouvin a Jéova pé wont é pé santi-y koupab pannan plizyè lanné. Isabelle a, sé on sè ki rété èskominyé pannan plis ki 20 an. Mi sa i ka di : « An té ni di mal a kwè kè Jéova té’é pé padonné mwen. » Si ou ka dékourajé-w ou ka riské dè pèd lanmityé a-w èvè Jéova (Pwov. 24:10). Alò, fè tousa ou pé pou sa pa jen rivé.

Ni dòt frè é sè aprézan, lèwvwè yo ka vwè tousa yo ni a fè pou wouvin bon zanmi èvè Jéova, dépawfwa, sa ka dékourajé-yo. Antoine sé on frè kè yo té èskominyé. Lè i wouvin adan lasanblé-la, i èspliké sa i rèsanti. Mi sa i di : « An té ni lenprésyon kè an té oubliyé tousa an té fè lèwvwè an té Témwen a Jéova avan. » Lèwvwè on moun ka rèsanti dé biten konsa, sa pé anpéché-y fè lèmaksimòm pou sèvi Jéova.

An-nou pran on ègzanp : Imajiné kè on siklòn pasé é kè i krazé on kaz. Lè mèt a kaz-la ka vwè tousa biten i ni a fè é kantité tan sa ké pran-y pou réparé kaz-la, sa pé kasé 2 bra a-y. Menmjan-la osi, lèwvwè on moun pa bon bon zanmi èvè Jéova ankò pas i fè on péché ki grav, i pé ni lenprésyon kè pou i wouvin bon bon zanmi èvè Jéova  sa ké mandé-y onlo onlo éfò é sa pé kasé 2 bra a-y. Si sé ka a-w fò pa ou pè pas ou pa tousèl.

Mi sa Jéova ka di-noutout : « Konnyéla vini-zòt é an-nou woumèt zafè an nou annòd » (Iz. 1:18). Ou ja fè onlo biten pou « woumèt zafè a-w annòd » é Jéova enmé-w pou tout sé éfò-la ou ja fè la. Anplisdisa, pa oubliyé kè konm ou viré adan 2 bra a Jéova, Jéova pé sèvi èvè ègzanp a-w pou montré Satan i sé on mantè ! (Pwov. 27:11).

Lè ou wouvin an 2 bra a Jéova, ou raproché-w dè-y é i ka pwomèt vou kè anrètou, i ké raproché-y dè-w (Jak 4:8). Anplisdisa, pou tout sélézòt frè é sè a lasanblé-la, ou wouvin frè a-yo oben sè a-yo é sé on bèl biten. Men sa pa’a sifi ! Jéova sé Pap’a-w é Zanmi a-w é fò ou fè tousa ou pé pou ou pé sa enmé-y pi fò. Kijan ou pé fè sa ?

Lè ou ka chwazi òbjèktif a-w, chwazi òbjèktif kè ou pé atenn. Sèten tousa ou aprann asi Jéova é asi pwomès a-y adan lèspri a-w toujou. Men alèla, fò ou ké ni on bon ti pwogram. Pa ègzanp, fò ou ké pran labitid préché, fò ou ké pran labitid ay réinyon é pasé tibwen tan èvè frè é sè a-w. An-nou vwè déotwa òbjèktif kè ou té’é pé chèché a ni.

Fò ou palé ba Jéova souvan. Pap’a-w Jéova sav byen kè konm konsyans a-w ka bat-vou ou pé ni dimal a priyé-y (Wom. 8:26). Menmsi sé sa, « kontinyé priyé » Jéova é di-y kè ou anvi vin zanmi a-y vréman (Wom. 12:12). Mi sa on frè non a-y sé Andrej ka sonjé : « An té wont toubònman é konsyans an mwen té ka bat-mwen. Men chakfwa an té ka priyé, an té ka santi-mwen myé. Sa té ka trankilizé lèspri an mwen. » Si ou pa sav ka pou ou di Jéova adan priyè a-w, Sòm 51 la é Sòm 65 la pé édé-w. Adan sé sòm-lasa ou ké touvé déotwa priyè wa David fè apré i rèpanti-y.

Pran labitid étidyé Pawòl a Bondyé. Si ou ni labitid fè sa, sa ké konsolidé fwa a-w é sa ké édé-w enmé Jéova pi fò (Sòm 19:7-11). Mi sa on frè non a-y sé Felipe ka di : « Konm an pa té ni labitid li Labib é étidyé-y pas an pa té ni on bon pwogram, piti-a-piti fwa an mwen fébli é aprésa an fin pa lagé Jéova. An vé pa fè Jéova lapenn ankò. Sé pousa, an òwganizé-mwen pou mwen pé sa ni on bon pwogram é pou an pé sa suiv pwogram-lasa. » Pétèt kè vou osi ou té’é pé fè menm biten-la. Si ou pa’a vwè ka pou ou étidyé, pétèt ou té’é pé mandé on zanmi a-w ki byen doubout adan lavérité édé-w.

Wouvin bon zanmi èvè frè é sè a-w adan lasanblé-la. Sèwten frè é sè ki wouvin adan lasanblé-la pé rivé a pè kè dòt frè é sè pansé mové biten asi yo. Mi sa Larissa ka di : « An té wont ! Pou mwen, sé konsi an té trayi frè é sè an mwen. A pa tibwen tan an pran pou mwen pé sa woté sé vyé santiman-lasa an tchè an mwen ! » Ou pé sèten kè sé ansyen-la é sélézòt frè é sè-la vlé édé-w wouvin bon bon zanmi èvè Jéova (gadé ti karé-la «  Sa sé ansyen-la pé fè »). A pa ti kontan yo kontan kè ou wouvin an 2 bra a Jéova, é sa yo vlé sé kè ou santi-w byen adan lasanblé-la ! (Pwov. 17:17).

Ka ou pé fè pou ou wouvin bon bon zanmi èvè frè é sè a lasanblé a-w ? Pran labitid vin an réinyon é préché èvè yo. Ka sa ké pòté dè bon ba-w ? Mi sa on frè non a-y sé Felix ka di :« A pa ti présé sé frè-la té présé vwè mwen wouvin an 2 bra a Jéova ! Yo akèyi-mwen bra gran wouvè ! Yo montré-mwen kè an ni plas an mwen adan lasanblé-la, yo édé-mwen vwè kè Jéova padonné-mwen, é yotout édé-mwen pwogrésé. » (Gadé ti karé-la «  Sa ou pé fè »).

Satan ké kontinyé mèt baton an wou a-w pou dékourajé-w é pou i pé sa anpéché-w wouvin bon bon zanmi èvè Jéova (Lik 4:13). Dépi aprézan, fè on éfò pou ou wouvin bon bon zanmi èvè Jéova é pou konsolidé fwa a-w, konsa, lè ou ké jwenn pwoblèm ou ké pé andiré.

Mi pwomès-lasa Jéova ka fè timouton a-y : « An ké ay chèché mouton-la ki pèd la, an ké viré èvè sila ki pa sav ola pou i ay, an ké mèt on bandaj pou sila ki blésé la é an ké ba tala ki fèb la fòs » (Ézék. 34:16). Jéova ja édé onlo timouton ki té pèd viré owa a-y. Jéova vé ou wouvin bon bon zanmi èvè-y, alò ou pé sèten kè i ké édé-w fè sa !