1. Ki èspérans Jéova ban-nou ?

 JÉOVA ban-nou on bèl èspérans toubònman. Nou ni lèspwa dè viv pou touttan. Ni sèwten ki k’ay viv an syèl-la pou touttan. Yo ké ni on kò pou ay viv an syèl-la é yo pé’é jen pé mò (1 Kor. 15:50, 53). Men lamajorité a moun ké viv asi latè pou touttan, yo ké ni tchè-kontan é yo ké ni on santé ki ké pawfè (Rév. 21:3, 4). Ki nou ni lèspwa dè ay viv an syèl-la pou touttan, ki nou ni lèspwa dè viv asi latè pou touttan, nou ka ba èspérans an nou onlo valè toubònman.

2. Asi ki biten èspérans an nou bazé é poukwa nou pé di sa ?

² Adan Labib, yo pé sèvi èvè mo-la yo tradui la é ki bay « èspérans » pou palé dè bon biten ki pou fèt é kè nou ka atann. Nou pé sèten kè sa nou ka èspéré la ké réyalizé pas sé Jéova ki ka ban-nou èspwa-lasa (Wom. 15:13). Nou konnèt pwomès a Jéova é nou sav kè i toujou ka tchenn a mo a-y (Nonb 23:19). Nou sèten osi kè non sèlman i vlé fè tousa i pwomèt men i pé fè-y osi. Èspérans an nou a pa enki on biten kè nou ka imajiné an tèt an nou oben kè nou présé vwè. Èspérans an nou bazé asi dé prèv é dé biten ki byen réyèl.

3. Ka nou ké vwè adan awtik-lasa ? (Sòm 27:14).

³ Pap’an nou ki an syèl-la enmé-nou é i vé kè nou ni konfyans adan-y (li Sòm 27:14). Si nou ka mèt èspwa an nou adan-y é si èspwa-lasa byen fon an tèt an nou, kèlkèswa éprèv-la nou ké jwenn la, nou ké pé andiré, nou ké ni kouraj é nou ké ni tchè-kontan. An-nou vwè kijan èspérans an nou ka pwotéjé-nou. Pou sa, nou ké vwè poukwa nou pé konparé èspérans an nou èvè on lank a bato é èvè on kas. É aprésa, nou ké vwè kijan nou pé fè èspérans an nou rantré pi fon an tèt an nou.

4. Poukwa nou pé di kè èspérans an nou kon on lank a bato ? (Ébré 6:19).

⁴ Adan lèt-la Pòl maké ba sé Ébré-la, i konparé èspérans an nou èvè on lank a bato (li Ébré 6:19). Konm souvantfwa i té  ka vwayajé pa bato, i té sav kè yo té ka sèvi èvè on lank a bato pou anpéché lanmè-la pati èvè bato-la. Dayè pou yonn, pannan on vwayaj i té ka fè, on gwo tanpèt tonbé asi yo é lanmè-la vin mové. Kifè, fò sé maren-péchè-la té voyé lank a bato-la an lanmè-la pou bato-la pa té ay fwayé asi sé wòch-la (Akt 27:29, 39-41). Menmjan on lank a bato ka anpéché lanmè-la pati èvè bato-la, èspérans an nou ka édé-nou rété anba zèl a Jéova magré nou ka jwenn pwoblèm ki kon tanpèt é ki pé fè-nou ay lwen lwen lwen a Jéova. Anplisdisa, èspérans an nou ka édé-nou rété kalm lèwvwè nou ka jwenn difikilté paskè nou sèten kè biten-la ké vin pibon apré. On biten pou nou sonjé, sé kè Jézi té ja di kè yo té’é pèwsékité-nou (Jan 15:20). Alò, si nou ka kontinyé médité asi sé pwomès-la Jéova fè-nou la, sa ké édé-nou kontinyé sèvi-y.

5. Kijan èspérans-la Jézi té ni la édé-y fasadé èvè lanmò ?

⁵ An-nou palé dè ègzanp a Jézi. Grasa èspérans-la i té ni la, i té byen désidé a rété fidèl menmsi i té sav kè i té kay soufè onlo avan i té mò. Lè jou a Lapannkòt 33 rivé, lapòt Pyè palé dè on pwofési nou ka touvé adan liv a lé Sòm. I ka èspliké byen menm kijan Jézi té ni konfyans é kijan i té kalm. Mi sa pwofési-la ka di : « É an ké pozé kò an mwen èvè èspwa ; pas ou pé ké lésé-mwen adan Tonm-la é ou pé ké lésé kò a sèwvitè fidèl a-w pouri. [...] Ou ké fè-mwen ni tchè-kontan toubònman lèwvwè an ké douvan-w » (Akt 2:25-28 ; Sòm 16:8-11). Jézi té sav i té kay mò men grasa èspérans-la i té ni la, i té sèten kè Pap’a-y té’é résisité-y, kè i té’é wouvwè-y an syèl-la é kè i té’é ni onlo jwa (Ébr. 12:2, 3).

6. Ka on frè di anrapò èvè èspérans an nou ?

⁶ Antankè krétyen, nou ni on bèl èspérans toubònman. Èspérans-lasa édé onlo frè é sè an nou andiré. An-nou palé dè Leonard Chinn, on frè ki fidèl é ki té ka viv an Anglètè. Pannan 1^é Gè mondyal la, yo mété-y lajòl pas i rèfizé fè lawmé. Yo fèmé-y adan on ti pyès tousèl a-y pannan 2 mwa é aprésa yo oblijé-y fè sèwten travay ki té rèd toubònman. Kèlkè tan apré, mi sa i maké : « Sa an viv la édé-mwen konprann kijan èspérans an nou enpòwtan toubònman pou nou pé sa andiré. Adan Labib nou ka touvé ègzanp a Jézi, ta sé apòt-la é ta sé pwofèt-la. Nou ka touvé osi sé pwomès-la Jéova fè-nou la ki ni onlo valè pou nou toubònman. Tout sé biten-lasa ka ban-nou on bèl èspwa pou dèmen é yo ka ban-nou fòs-la nou bizwen la osi pou nou pé sa andiré. » Pou Leonard, èspérans a-y té ka touvé-y kon on lank a bato é èspérans an nou pé touvé-y konsa pou nou osi.

7. Lèwvwè nou ka jwenn éprèv, poukwa sa ka édé-nou kwè pi fò ankò adan èspérans an nou ? (Women 5:3-5 ; Jak 1:12).

⁷ Lèwvwè nou ka jwenn éprèv é lèwvwè nou ka vwè jan Jéova ka soutyenn-nou, nou ka rann-nou kont kè nou ka fè Jéova plézi. É sa ka fè-nou kwè pi fò ankò adan èspérans an nou (li Women 5:3-5 ; Jak 1:12). Sa vé di kè konnyéla la, nou ka kwè pi fò adan èspérans an nou ki lèwvwè nou té toufré aksèpté lavérité. On biten Satan té’é vé, sé kè nou néyé anba éprèv nou ka jwenn. Men konm Jéova ka soutyenn-nou, nou pé rivé andiré chak sé éprèv-la nou ka jwenn la.

8. Poukwa nou pé konparé èspérans an nou èvè on kas ? (1 Tésalonisyen 5:8).

⁸ Labib ka konparé èspérans an nou èvè on kas osi (li 1 Tésalonisyen 5:8). On sòlda ka pòté on kas pou pwotéjé-y siwvwè lènmi a-y ka éséyé ba-y kou an tèt. Menmjan-la, konm nou an lagè èvè Satan, fò-nou pwotéjé lèspri an nou pou i pa ban-nou kou an tèt. Toulongalé i ka mèt diféran tantasyon douvan nou é i ka éséyé mèt  onpakèt lidé ki pa bon an lèspri an nou pou anpéché-nou rézonné byen konm i fo. Menmjan on kas ka pwotéjé tèt a on sòlda, èspérans an nou ka pwotéjé lèspri an nou é an menm balan-la i ka édé-nou rété fidèl a Jéova.

9. Lèwvwè on moun pa ni pon èspérans, kijan i ka viv ?

⁹ Nou ni lèspwa dè viv pou touttan é sa ka pousé-nou aji èvè sajès é èvè bon jijman adan vi an nou. Men si piti-a-piti nou ka koumansé oubliyé bèl èspwa-la nou ni la é kè nou ka mèt-nou ka sonjé enki sa nou anvi, anfinaldikont nou pé rivé a pèd èspérans an nou. Sé sa ki rivé sèwten krétyen ki té ka rété Korent. Yo pa té ka kwè ankò adan on pwomès enpòwtan Jéova té fè-yo : yo pa té ni fwa adan larézirèksyon ankò (1 Kor. 15:12). Pòl maké kè sé moun-la ki pa ka kwè adan larézirèksyon ka viv enki pou fè yomenm a yo plézi (1 Kor. 15:32). Jòdijou, ni onlo moun ki pa ni fwa adan pwomès a Bondyé. Yo ka chèché a fè enki sa ki ka fè-yo plézi. Men nou, a pa konsa nou ka viv ! Adan tousa nou ka fè nou ka montré kè nou ni konfyans adan sé pwomès-la Bondyé fè-nou la. Èspérans an nou ka touvé-y kon on kas, i ka pwotéjé lèspri an nou é i ka édé-nou pou nou pa sonjé enki nou. Konsa, nou pé’é pèd lanmityé an nou èvè Jéova (1 Kor. 15:33, 34).

10. Kijan èspérans an nou ka pwotéjé-nou dè mové rézònman ?

¹⁰ Èspérans an nou ka pwotéjé-nou pou nou pa mèt an tèt an nou kè sé tan an nou nou ka pèd lèwvwè nou ka fè éfò pou fè Jéova plézi. Ni sèwten moun ki pé di an tchè a yo : « Jéova pé’é jen ban-mwen lavi étèwnèl. An pa mérité sa. An pé’é jen rivé fè sa Jéova ka mandé-mwen fè. » Men on biten pou ou sonjé sé kè sé dé pawòl konsa kè Élifaz, on boug ki té swadizan vin pou konsolé Jòb, di Jòb. Mi sa i di-y : « Ka on nonm ki pé mò yé, pou i pwòp douvan Bondyé ? » É mi sa i di apré : « Gadé ! Bondyé pa menm ka fè zanj a-y konfyans, é pou-y, pa menm syèl-la pa pwòp » (Jòb 15:14, 15). Mi on manti mi ! On biten pou ou sonjé osi sé kè sé Satan ki vé kè ou mèt dé lidé konsa an tèt a-w. I sav byen kè siwvwè ou ka sonjé sa toutlè, ou ké oubliyé èspérans a-w. Sé pousa, ba tout sé kalité manti-lasa do é konsantré-w asi pwomès a Jéova. I vé kè ou viv pou touttan é i vé édé-w atenn òbjèktif-lasa. Pa jen douté dè sa ! (1 Tim. 2:3, 4).

11. Toupannan nou ka atann kè Bondyé réyalizé sé pwomès-la nou ka èspéré la, poukwa fò-nou ni pasyans ?

¹¹ Fò-nou fè ansòt pou èspérans an nou rété byen fon an tèt an nou men dépawfwa nou pé ni dimal a fè sa. Toupannan nou ka atann kè Jéova réyalizé pwomès a-y, nou pé rivé a pèd pasyans. Men konm Jéova ka ègzisté dépi touttan, on biten ki ka pran onlo tan pou nou, sé on titak tan pou-y (2 Pyè 3:8, 9). Lè Jéova ké réyalizé pwojé a-y, i ké fè sa byen konm i fo é pé’é ni méyè mannyè pou fè sa. Men pétèt kè sa pé’é fèt a moman-la nou ka pansé la. Toupannan nou ka atann Bondyé réyalizé pwomès a-y, ka ki ké édé-nou fè èspérans an nou rété byen fon an tèt an nou ? (Jak 5:7, 8).

12. Dapré Ébré 11:1, 6, kijan lèspérans é lafwa lyanné yonn èvè lòt ?

¹² Nou ké kontinyé mèt èspérans an nou byen fon an tèt an nou si nou ka rété bon bon zanmi èvè Jéova, pas sé li ki ké fè sa nou ka èspéré la réyalizé. An réyalité, Labib ka montré-nou kè pou nou pé sa ni lèspérans, fò-nou ni lafwa kivédi fò-nou sèten kè Jéova ka ègzisté é kè i sé « sila ki ka rékonpansé moun ki ka chèché-y vréman » (li Ébré 11:1, 6). Pi nou ké bon bon zanmi èvè Jéova é pi nou ké sèten kè i ké réyalizé pwomès  a-y. Aprézan, an-nou vwè ka nou pé fè pou nou vin pibon zanmi èvè Jéova é pou nou kwè pi fò ankò adan bèl èspérans-la i ban-nou la.

13. Ka nou pé fè pou nou vin pibon zanmi èvè Jéova ?

¹³ Priyé Jéova é li Pawòl a-y. Menmsi nou pa’a vwè Jéova, nou pé vin bon zanmi èvè-y kanmenm. Nou pé palé èvè-y lèwvwè nou ka priyé-y é nou pé sèten kè i ka kouté-nou (Jér. 29:11, 12). Nou pé kouté-y lèwvwè nou ka li Pawòl a-y é lèwvwè nou ka pran tan pou médité asi sa nou ka li. Lè nou ka vwè jan Jéova pran swen a sèwvitè a-y ki té fidèl an tan lontan, sa ka fè-nou kwè pi fò adan èspérans an nou. Tousa Bondyé fè-yo maké adan Pawòl a-y, i fè-yo « maké-y pou enstwi-nou. Konsa nou pé ni lèspwa grasa andirans an nou é grasa konsolasyon-la ki adan Lézékriti » (Wom. 15:4).

14. Lè nou ka pran tan réfléchi asi sa Jéova ja fè pou sèwvitè a-y, poukwa sé on bon biten ?

¹⁴ Médité asi jan Jéova ja tchenn pwomès a-y. Sonjé tousa i fè pou Abraam é Sara. Yo té ja ni on bèl laj é yo pa té pé ni timoun ankò. Men poutan Bondyé pwomèt-yo kè yo té’é ni on timoun (Jén. 18:10). Kijan Abraam réyaji ? Labib ka di : Abraam té « ni fwa kè i té’é vin papa a onlo nasyon » (Wom. 4:18). Menmsi i pa té ka vwè kijan pwomès a Jéova té ké réyalizé, i té sèten kè Bondyé a-y té’é fè sa i té di. É Bondyé pa désèvwa sèwvitè a-y ki fidèl (Wom. 4:19-21). Dé istwa konsa ka montré-nou kè Jéova toujou ka tchenn pwomès a-y menmsi i ka sanm sa sé dé biten ki pé pa fèt.

15. Poukwa fò-nou réfléchi asi sa Jéova ja fè ban nou ?

¹⁵ Réfléchi asi sa Jéova ja fè ba-w. Pannan sé pwomès-la ki an Bib-la ka réyalizé, pran tan sonjé tout sé byenfé-la kè voumenm a-w ja jwenn. Pa ègzanp, Jézi pwomèt-vou kè Pap’a-y ké ba-w sa ou bizwen pou viv  (Mat. 6:32, 33). I di-w osi kè ou pé sèten kè Jéova ké ba-w lèspri sen a-y si ou ka mandé-y li (Lik 11:13). Sèten ou ja vwè sé pwomès-lasa réyalizé adan vi a-w é pétèt kè ni dòt pwomès ki ka vin an lèspri a-w. Pa ègzanp, pétèt ou ka sonjé kè Jéova pwomèt-vou kè i ké padonné-w, kè i ké konsolé-w é kè i ké ba-w sa ou bizwen pou ou rété byen doubout adan lavérité (Mat. 6:14 ; 24:45 ; 2 Kor. 1:3). Lè ou ka médité asi sa Jéova ja fè ba-w, ou ka vin pi sèten ankò kè ou ké kontinyé vwè men a Bondyé adan vi a-w.

16. Poukwa èspérans an nou sé on kado ki ni onlo valè toubònman ?

¹⁶ Nou ni lèspwa dè viv pou touttan é sé on bèl kado Jéova fè-nou toubònman. Sé on bèl èspwa toubònman é nou pé sèten kè i ké réyalizé. Èspérans-lasa kon on lank a bato ki ka anpéché-nou pèd lakat lèwvwè nou ka jwenn éprèv, lèwvwè nou ka jwenn pèwsékisyon é menm lèwvwè nou douvan lanmò. I ka touvé-y osi kon on kas ki ka pwotéjé lèspri an nou é ki ka pèwmèt-nou mèt sa ki mal akoté é fè sa ki byen. Èspérans-la Bib-la ka ban-nou la ka édé-nou konnèt Jéova pibyen é ka édé-nou vwè jan i enmé-nou fò. Siwvwè nou ka mété èspérans-lasa byen fon an tèt an nou, sa ké pwokiré-nou onlo byenfé toubònman.

17. Poukwa nou pé ni tchè-kontan grasa èspérans an nou ?

¹⁷ Mi sa Pòl ankourajé sé krétyen-la ki té ka rété Wòm la fè : « Mèt jwa an tchè a zòt grasa a èspérans-la » (Wom. 12:12). Limenm osi té ni on bon rézon pou ni tchè-kontan. I té sav kè siwvwè i té ka rété fidèl, i té’é ni lavi étèwnèl an syèl-la. Nou osi, nou pé ni tchè-kontan grasa èspérans an nou. Wi nou ni on bon rézon pou sa pas nou sèten kè Jéova ké réyalizé tout pwomès a-y. Nou pé di menm biten ki yonn adan sé nonm ki maké sé Sòm-la : « Tchè-kontan pou moun-la [...] ki ka mèt èspwa a-y an Jéova Bondyé a-y, [...] sila ki toujou ka rété fidèl » (Sòm 146:5, 6).