1. Pou nou ni tchè-kontan, fò nou rann-nou kont kè nou bizwen Bondyé gidé-nou. Poukwa nou ka di sa ?

 LÈ OU ni tchè-kontan poubon, sa pa vé di kè jòdla ou kontan é kè dèmen ou pa ni tchè-kontan ankò. An réyalité, sé on biten kè ou pé rèsanti pannan tout vi a-w. Adan Sèwmon-la i fè asi montangn-la, mi sa Jézi èspliké : « Tchè-kontan pou séla ki ka rann-yo kont kè yo bizwen Bondyé gidé-yo » (Mat. 5:3). Jézi té sav kè lè Bondyé kréyé lézimen, i mèt on biten adan yo pou yo anvi konnèt Jéova toubònman é pou yo anvi adoré Kréyatè a yo, Jéova. É konm Jéova sé Bondyé-la ki ni tchè-kontan la, sé moun-la ki ka adoré-y la pé ni tchè-kontan osi (1 Tim. 1:11).

2-3. a) Dapré Jézi, kimoun ankò ki pé ni tchè-kontan ? b) Ka nou ké vwè adan awtik-lasa, é poukwa noutout bizwen ègzaminé sé lidé-lasa ?

² Si on moun ni pwoblèm, ès i pé ni tchè-kontan kanmenm ? Wi. Adan Sèwmon-la i fè asi montangn-la, Jézi ni lokazyon di on biten ki ka siwprann onlo moun. I di kè menmsi ‘on moun andèy’, pétèt pas i ka santi-y koupab akòz dè péchè kè i fè oben pas i ni pwoblèm ki grav, moun-lasa pé ni tchè-kontan kanmenm. Jézi di menm biten anrapò èvè « moun yo ka pèwsékité pas yo ka fè sa ki jis » é ‘moun yo ka jiré’ pas yo sé disip a Kris. I di kè yo osi yo pé ni tchè-kontan (Mat. 5:4, 10, 11). Men kijan nou pé ni tchè-kontan lèwvwè nou ka viv dé biten konsa ?

³ Lè Jézi té ka anségné, i montré-nou kè a pa sitiyasyon a on moun ki ka fè si i ni lakontantman poubon. Nou pé ni tchè-kontan si nou ka rann-nou kont kè nou bizwen Bondyé gidé-nou é si nou ka fè tousa nou pé pou nou vin zanmi a-y (Jak 4:8). Men kijan nou pé fè sa ? Adan awtik-lasa, nou ké vwè 3 biten pou nou fè si nou vlé ni tchè-kontan poubon.

4. Ki prèmyé biten pou nou fè si nou vlé ni tchè-kontan poubon ? (Sòm 1:1-3).

⁴ PREMYÈWMAN, pou nou pé sa ni tchè-kontan poubon, fò-nou li Labib é fò-nou étidyé-y osi. Jézi konparé Pawòl a Bondyé èvè on manjé. Lézimen é sé zannimo-la bizwen manjé pou yo rété vivan. Men sé yenki lézimen ki pé li Pawòl a Bondyé é sé on biten toutmoun bizwen. Sé pousa, Jézi ni lokazyon di : « A pa pen tousèl on moun bizwen pou i viv, men i bizwen tout pawòl ki ka sòti an bouch a Jéova » (Mat. 4:4). Alò, fò pa nou lésé onsèl jou pasé pou nou pa li Pawòl a Bondyé ki ni onlo valè toubònman. Mi sa moun-la ki maké Sòm 1 la ni lokazyon di : « Plézi a-y sé adan lwa a Jéova i yé, é i ka li lwa-lasa touba lajouné kon lannuit » (li Sòm 1:1-3).

5-6. a) Ka Labib ka aprann-nou ? b) Lè nou ka étidyé Labib, ki bon biten sa pé pòté pou nou ?

⁵ Konm Jéova enmé-nou, i ka èspliké-nou adan Pawòl a-y ka nou pé fè pou nou pé sa ni tchè-kontan touléjou a vi an nou. Adan Labib, nou ka vin konnèt kijan Jéova vlé kè nou menné vi an nou, kijan nou pé vin bon zanmi èvè-y é ka pou nou fè pou i padonné péché an nou. Nou ka vin sav osi kè i ka ban-nou on bèl èspwa pou dèmen (Jér. 29:11). Lèwvwè nou ka étidyé Labib é kè nou ka dékouvè sé vérité-lasa, a pa ti kontan nou ka kontan !

⁶ Nou sav kè adan Labib, nou pé touvé onlo onlo konsèy ki pé itil pou nou touléjou a vi an nou. Si nou ka suiv sé konsèy-lasa, nou ké ni tchè-kontan. Lèwvwè ou dékourajé akòz dè sé pwoblèm-la ou ka jwenn la, gadé pou vwè kijan ou pé pasé  plis tan ka li Labib é ka médité asi sa ou li. Mi sa Jézi èspliké : « Tchè-kontan [...] pou séla ki ka tann pawòl a Bondyé é ki ka mété-y an pratik ! » (Lik 11:28).

7. Lèwvwè ou ka pran on ti tan pou li Bib a-w, ka ki pé édé-w pou ou pé sa pwofité dè ti moman-lasa ?

⁷ Lè ou ka li Labib, ès ou ka pran tan aprésyé sa ou ka li ? An-nou pran on ègzanp. Imajiné kè on moun préparé on manjé ba-w é sé manjé-la ou pli enmé la. Men lèwgadé, konm ou présé oben kè ni on biten ki ka trakasé-w ou ka enn valé manjé-la é sé lè zasyèt-la ja vid ou ka rann-vou kont kè ou pa menm ni tan pran gou a ti manjé-la. Ès sé on biten ki ja rivé-w ? Sé on biten ki pé rivé osi lèwvwè nou ka li Labib. Délè nou ka li Labib ogalo é nou pa menm ni tan pran gou a tousa ki adan-y. Sé pousa sa enpòwtan kè ou pran tan a-w pou li Pawòl a Bondyé. Imajiné jan sa ka pasé, pran tan tann vwa a sé moun-la ki adan istwa-la é pran on ti tan pou réfléchi asi sa ou sòti li la. Lè ou ké fè sa, tchè a-w ké pli kontan ankò.

8. Jézi ba « èsklav fidèl é prévwayan la » on bèl rèsponsabilité. Kijan i ka fè travay-lasa ? (gadé nòt-la).

⁸ Jézi ba « èsklav fidèl é prévwayan la » on bèl rèsponsabilité toubònman. I mandé-y ba pèp a Bondyé manjé-la i bizwen la a bon moman-la pou i pé sa rété bon zanmi èvè Jéova é nou ni manjé-lasa pou tann é konprann b (Mat. 24:45). Adan tousa èsklav fidèl é prévwayan la ka préparé la, prèmyé biten i ka mèt sé Pawòl a Bondyé (1 Tés. 2:13). Adan Pawòl a-y, Labib, Jéova ka di-nou kijan i ka pansé. É grasa sa èsklav fidèl é prévwayan la ka pwodui la, nou ka rivé konprann sa i ka pansé. Sé pousa, nou ka li sé Tou dè Gad la, sé Réveillez-vous ! la é sé awtik-la yo ka pibliyé la asi jw.org. Sé pousa osi nou ka préparé sé réinyon-la nou ni an simenn-la é an wikenn-la é kè nou ka gadé émisyon a JW Télédifizyon ki ka parèt chak mwa adan lang an nou si yo disponib. Lè nou ka pran tan pou li é pou nou étidyé Labib byen konm i fo, antoutjan sa ka édé-nou fè dézyèm biten-la pou nou pé sa ni lakontantman poubon. An-nou vwè ki biten ésa.

9. Ki dézyèm biten pou nou fè pou nou pé sa ni tchè-kontan poubon ?

⁹ DÉZYÈMMAN, pou nou pé sa ni lakontantman poubon, fò-nou rèspèkté prensip a Jéova. Mi sa nonm-la ki maké Sòm 128 la ni lokazyon di : « Tchè-kontan pou tout moun ki ka krenn Jéova, ki ka maché asi chimen a-y » (Sòm 128:1). Lè ou ka krenn Jéova, sa vlé di kè ou ni onlo onlo rèspé pou-y. É tèlman ou ni rèspé pou-y, lèwvwè on biten ki ka fè Jéova lapenn ka parèt douvan a-w, ou ka halé fren a men a-w (Pwov. 16:6). Si nou ka krenn Jéova, nou ké fè éfò pou suiv prensip a-y anrapò èvè sa ki byen é sa ki mal é sé adan Labib nou ka touvé sé prensip-lasa (2 Kor. 7:1). Tchè an nou ké kontan siwvwè nou ka fè sa ki ka fè tchè a Jéova plézi é si nou ka rèfizé fè tousa Jéova hay (Sòm 37:27 ; 97:10 ; Wom. 12:9).

10. Dapré Women 12:2, ka pou nou fè ?

¹⁰ (Li Women 12:2.) On moun pé sav kè sé Jéova ki andwa désidé ka ki byen é ka ki mal, men i pa oblijé rèspèkté sa. Sé moun-la tousèl ki pé désidé si i ké suiv prensip a Jéova. Pa ègzanp, on moun pé sav kè gouvènman-la ni dwa di a ki vitès pou nou woulé asi lawout men moun-lasa pé di konsa kè i pa anvi rèspèkté sa é i pé désidé kè i ka woulé woulé a-y é kè i pa ka okipé-y dè sa. Rèspèkté prensip a Jéova sé méyè biten nou pé fè é lè nou ka fè sa, nou ka montré kè nou sèten dè sa (Pwov. 12:28). É sé sa  David té ka pansé. Sé pousa, mi sa i di anrapò èvè Jéova : « Ou ka fè-mwen konnèt chimen a lavi. Lè ou la, ni lajwa annabondans. Adwat a-w ni tchè-kontan pou touttan » (Sòm 16:11).

11-12. a) Lèwvwè nou enkyèt oben lèwvwè nou dékourajé, a ki biten pou nou fè atansyon ? b) Kijan Filipyen 4:8 pé édé-nou chwazi anmizman an nou byen ?

¹¹ Lèwvwè nou enkyèt oben lèwvwè nou dékourajé, délè nou ka santi kè nou té’é chapé kò an nou on koté pou nou pa sonjé pwoblèm an nou ankò. Sa toutafè nòwmal, men fò-nou fè atansyon pou sa pa fè-nou fè on biten kè Jéova hay (Éféz. 5:10-12, 15-17).

¹² Adan lèt-la Pòl maké ba sé krétyen Filip la, i ka ankourajé-yo kontinyé réfléchi asi biten « ki jis », biten « ki pwòp », biten ‘ki mérité yo enmé-yo’ é biten « ki anrapò èvè bèl kalité » (li Filipyen 4:8). Menmsi i pa té ka palé vréman dè sa ki anrapò èvè anmizman, sa i maké la pé édé-nou lèwvwè nou ni on chwa a fè adan domenn-lasa. Sé konsi i té ka di-nou kè fò mizik nou ka kouté, fim nou ka gadé, liv nou ka li é jé vidéo nou ka jouwé annakò èvè sa i di an Filipyen 4:8. Si nou ka réfléchi konsa, sa ké édé-nou chwazi anmizman ki ka fè Jéova plézi. Nou vlé fè sa pas nou vlé viv annakò èvè prensip a Jéova é nou sav kè sé prensip-lasa ho toubònman (Sòm 119:1-3). Si nou ka rèspèkté prensip a Jéova, nou ké ni on konsyans ki pwòp é tou natirèlman sa ké ban-nou anvi fè twazyèm biten-la nou kay vwè la pou nou pé sa ni tchè-kontan poubon (Akt 23:1).

13. Si nou vlé ni tchè-kontan poudèbon, ki twazyèm biten pou nou fè ? (Jan 4:23, 24).

¹³ TWAZYÈMMAN, fè ansòt pou sa ki pli enpòwtan adan vi a-w sé adoré Jéova. Konm sé Jéova ki kréyé-nou, i mérité kè nou adoré-y (Rév. 4:11 ; 14:6,7). Alò, prèmyé biten pou nou fè sé adoré Jéova men fò-nou fè-y kon i ka mandé kivédi fò-nou adoré-y « èvè lèspri é lavérité » (li Jan 4:23, 24). Nou vlé lésé lèspri sen a Jéova gidé-nou lèwvwè nou ka adoré-y é nou vlé kè jan-la nou ka adoré-y la annakò èvè sé vérité-la nou ka touvé adan Pawòl a-y. É menmsi ou vwè nou ka viv adan on péyi yo ka anpéché-nou sèvi Jéova kon nou vlé, oben yo ka entèwdi-nou fè sa, nou vlé kontinyé adoré Jéova pas sé sa ki pli enpòwtan adan vi an nou. Nou ni plis ki 100 frè é sè ki lajòl enki pas yo Témwen a Jéova c. Magrésa, yo ka priyé, yo ka étidyé é yo ka fè tousa yo pé pou yo palé dè Bondyé an nou é dè wayòm a-y alantou a yo ! É lè yo ka fè sa, sa ka mèt onlo jwa an tchè a yo. Lèwvwè yo ka di-nou bétiz oben lèwvwè yo ka pèwsékité-nou, nou ni tchè-kontan pas nou sav kè Jéova èvè nou é kè i ké rékonpansé-nou (Jak 1:12 ; 1 Pyè 4:14).

14. Ka ki rivé on jenn frè ki té ka viv o Tadjikistan é poukwa sa rivé-y ?

¹⁴ Ni onlo adan frè é sè an nou ki viv on sitiyasyon ki té difisil men magrésa yo té ni tchè-kontan poubon pas yo fè sé 3 biten-la nou sòti vwè la. An-nou vwè ègzanp a Djovidòn Bobodjonov, on frè ki ka viv o Tadjikistan. Lè 4 òktòb 2019, sé militè-la vin arété-y é yo menné-y alé pas i pa té vlé ay fè lawmé. I té ni 19 an. Aprésa, yo mété-y lajòl pannan kèlkè mwa é yo aji èvè-y konsi i té on kriminèl. Yo palé dè enjistis-lasa adan plizyè péyi. Yo èspliké kè yo ba frè-la kou pou yo té pé sa fòsé-y mèt lenj a sé  militè-la asi-y é pou yo té pé sa fòsé-y fè on pwomès konmkwa i té ka soutyenn lawmé. Aprésa, yo di kè i té koupab é yo voyé-y adan on kan yo ka fòsé moun travay. I rété la jistan prézidan a Tadjikistan grasyé-y é kè prézidan-la mandé kè yo libéré-y. Men pannan tout tan-lasa, frè-la pa jen lagé Jéova é i toujou té ni tchè-kontan. Men ka ki édé-y kenbé konsa ? Sé pas i toujou té ka mèt an tèt a-y kè i bizwen Jéova gidé-y.

15. Kijan Djovidòn kontinyé aprann asi Jéova lè i té lajòl ?

¹⁵ Lè Djovidòn té lajòl, i pa té ni Bib é i pa té ni pon piblikasyon nonplis. Men i kontinyé aprann asi Jéova. Kijan i rivé fè sa ? Déotwa frè ki té ka rété koté-la lajòl-la té yé la té ka menné manjé ba-y. É lèwvwè yo té ka fè sa, yo té ka ékri tèks-di-jou-la asi sé sak-la yo té ka mèt manjé-la. Sé konsa i rivé li é médité asi Bib-la chak jou. Lèwvwè i sòti lajòl, mi konsèy-la i bay la : « Si zò po’o jwenn pon éprèv adan vi a zòt, pwofité pannan zò lib konnyéla la pou zò pé sa aprann konnèt Jéova plibyen. Pou sa, li Pawòl a-y é li piblikasyon an nou. »

16. Asi ki biten Djovidòn konsantré-y ?

¹⁶ Djovidòn rèspèkté prensip a Jéova. Olyé i té lésé mové lanvi pran lanmen asi-y é olyé i té fè mové biten, i konsantré-y asi Jéova é asi sa ki enpòwtan ba Jéova. Lè i  té ka rété gadé jan tousa Jéova kréyé té bèl, i té ka rété èstèbèkwè. Chak maten, lèwvwè i té ka lévé, i té ka tann sé ti zozyo-la ka chanté. Lannuit, i té ka pran tan gadé lalin-la é sé zétwal-la. Mi sa i ka di : « Pou mwen, sé biten-lasa sé té dé kado Jéova té ka fè-mwen. Sa té ka fè tchè an mwen kontan é sa té ka ankourajé-mwen ». Lèwvwè nou ni rèkonésans pou tousa Jéova ka ban-nou, ki sé pou nou rété zanmi èvè-y, ki sé pou nou ni sa nou bizwen chak jou, nou ka ni tchè-kontan. É pli nou ni tchè-kontan pli nou byen désidé a andiré.

17. Kijan 1 Pyè 1:6, 7 pé édé on moun ki ka viv menm sitiyasyon ki Djovidòn ?

¹⁷ Anplisdisa, Djovidòn toujou té ka mèt Jéova prèmyé douvan adan vi a-y. I té sav kè sa té enpòwtan kè i té rété fidèl a Jéova a san pou san. Mi sa Jézi di : « Sé Jéova, Dyé a-w, ou dwèt adoré, é sé yenki li ou dwèt sèvi » (Lik 4:8). Ni sèwten adan sé komandan-la é adan sé solda-la ki té bizwen fè Djovidòn lagé Jéova. Men lajouné kon lannuit, Djovidòn té ka mèt jounou atè é i té ka mandé Jéova édé-y pou i pa jen lagé-y. Magré tousa yo fè-y, Djovidòn rété fidèl. Sé vré, yo malmenné Djovidòn, yo menné-y alé é yo mété-y lajòl. Men jòdijou, i ni lontan plis fwa ki avan pas yo mété fwa a-y a léprèv (li 1 Pyè 1:6, 7).

18. Ka nou pé fè pou nou toujou ni tchè-kontan ?

¹⁸ Jéova sav byen sa nou bizwen pou nou pé sa ni lakontantman poubon. Si ou ka mèt sé 3 lidé-la nou vwè la adan awtik-lasa an pratik, ou ké ni tchè-kontan menmsi ou ka jwenn éprèv. Konsa, vou osi ou ké pé di : « Tchè-kontan pou pèp-la Jéova sé Dyé a-y la ! » (Sòm 144:15).