Sé Izraélit-la té ka fè lagè. Poukwa nou nou pa’a fè sa ?
« SI YONN adan zòt vé pa goumé èvè Lafrans oben èvè Langlètè, zòtout ké mo ! » Sé sa on chèf a lawmé a sé Nazi la di on gwoup a Témwen a Jéova pannan 2èm Gè mondyal la. É i hélé asi yo lè i di-yo sa. Menmsi té ni onpakèt sòlda Nazi ki té ni zàm pou tann é konprann asi yo, pa menm yonn adan sé frè-la pa démòd. Mi kouraj mi ! Bèl ègzanp-lasa ka montré kijan nou ki Témwen a Jéova nou ka vwè lagè : nou vé pa pawtisipé adan sé lagè-la ki ka fèt la adan mond-lasa. Menmsi yo ka mennasé-nou é kè yo paré a tchouyé-nou, nou pa ka mélanjé-nou adan sé lagè-la yo ka fè la.
Men, a pa tout sé moun-la ki ka di kè yo krétyen-la ki dakò èvè nou. Pou onlo adan yo, on krétyen pé fè lagè pou défann péyi a-y é yo jous ka di kè sé sa pou i fè. Mi konsa yo ka rézonné délè : « Sé Izraélit-la sé té pèp a Bondyé é yo té ka fè lagè. Alò poukwa sé krétyen-la pé pa fè lagè ? » Ka ou té ké réponn siwvwè yo té ka pozé-w kèsyon-lasa ? Ou té’é pé èspliké kè sitiyasyon a sé Izraélit-la pa ni ayen a vwè èvè sitiyasyon a sèwvitè a Bondyé jòdijou. An-nou vwè 5 biten ki ka pèwmèt-nou di sa.
1. SÈWVITÈ A BONDYÉ TÉ KA FÈ PAWTI A ONSÈL NASYON
An tan-lasa, Jéova té chwazi onsèl pèp pou vin pèp a-y : nasyon a Izrayèl. I kriyé nasyon-lasa « byen èspésyal an mwen pawmi tout sé pèp-la » (Ègz. 19:5). Anplisdisa, i té ba sé Izraélit-la on péyi ki té ta yo. Sé pousa, lè Bondyé té ka mandé-yo ay fè lagè èvè dòt nasyon, a pa té ni pou goumé èvè moun ki té ka adoré Jéova kon yo, ni pou tchouyé-yo a.
Jòdijou, sèwvitè a Jéova « ka sòti adan tout nasyon, adan tout tribi, adan tout pèp é adan tout lang » (Rév. 7:9). Alò, siwvwè yo té ka pawtisipé adan on lagè, yo té’é pé touvé-yo ka goumé èvè moun ki ka sèvi Jéova kon yomenm é yonn té’é pé jous rivé a tchouyé lòt.
2. SÉ JOVA KI TÉ KA VOYÉ SÉ IZRAÉLIT-LA FÈ LAGÈ
An tan-lasa, sé Jéova ki té ka désidé a ki moman é pou ki rézon fò sé Izraélit-la té ay fè lagè. Pa ègzanp, lèwvwè i mandé Izrayèl ay goumé èvè sé Kananéyen-la sé pas i té ja jijé-yo. Nasyon-lasa té ni on mové répitasyon pas yo té ka adoré démon, yo té ka fè onlo malpwòpté é yo té ka sakrifyé timoun a yo pou sé démon-la. Jéova mandé sé Izraélit-la détwi pèp-lasa ki té ka fè onlo mové biten adan péyi-la Jéova té pwomèt sé Izraélit-la, konsa sé pèp-lasa pa té’é détenn asi yo (Lév. 18:24, 25). Lèwvwè sé Izraélit-la rantré adan péyi-la Bondyé té pwomèt-yo la, dépawfwa, Bondyé pèwmèt-yo fè lagè pou yo té pé sa défann-yo lèwvwè on lènmi té ka ataké-yo (2 Sam. 5:17-25). Men, yo pa té pé pran asi yo pou ay fè lagè, Jéova pa té ba-yo dwa-lasa. Lèwvwè yo té ka fè sa, pli souvan ki rarman, malè té ka rivé-yo (Nonb 14:41-45 ; 2 Kron. 35:20-24).
Jòdijou, Jéova pa’a ba ponmoun dwa fè lagè. Lèwvwè sé nasyon-la k’ay an lagè, sé pou yomenm yo k’ay, a pa pou Bondyé. Pli souvan ki rarman, lèwvwè sé péyi-la ka rantré an lagè, sé pas yo vé fè téritwa a péyi a yo vin pi gran, yo vé ni plis lajan é yo vé kè dòt moun aksèpté politik a yo. Anplisdisa, ni sèwten adan yo ki ka di kè sé Bondyé ki ka voyé-yo fè lagè pou pwotéjé rèlijyon a yo oben pou tchouyé lènmi a Bondyé. Men talè Jéova ké pwotéjé sèwvitè a-y é i ké détwi lènmi a-y adan on lagè, é lagè-lasa sé Awmagédon (Rév. 16:14, 16). Adan lagè-lasa, pé’é ni pon sèwvitè a Bondyé ki ka viv asi latè ki ké goumé, men sé enki kréyati ki an syèl-la ki ké goumé pas yo ka fè pawti a lawmé a Bondyé (Rév. 19:11-15).
3. SÉ IZRAÉLIT-LA PA TÉ KA TCHOUYÉ SÉ MOUN-LA KI TÉ KA MONTRÉ KÈ YO TÉ NI FWA AN JÉOVA
Lèwvwè Jéova té an lagè èvè moun Jériko, i ba Raab é fanmi a-y on favè. Men jòdijou, ès lézimen ka ba moun ki fidèl a Bondyé on favè lèwvwè yo ka fè lagè ?
An tan-lasa, lèwvwè on moun té ka montré kè i té ni fwa an Jéova, pli souvan ki rarman lawmé a Izrayèl té ka ba moun-lasa on favè é yo pa té ka tchouyé-y pas pou Jéova i pa té mérité mò. An-nou vwè 2 ègzanp. Sé vré kè Jéova té mandé pèp a-y détwi vil a Jériko men konm Raab é fanmi a-y té ni fwa an Bondyé, sé Izraélit-la pa tchouyé-yo (Joz. 2:9-16 ; 6:16, 17). Plita, yo pa tchouyé sé moun-la ki té ka viv adan vil a Gabaon nonplis pas sé moun-lasa té ka krenn Bondyé (Joz. 9:3-9, 17-19).
Jòdijou, lèwvwè sé nasyon-la an lagè, yo pa’a gadé si on moun ka adoré Bondyé oben si i pa ni ayen a vwè adan lagè a yo. Souvantfwa, yo ka tchouyé onlo inosan.
4. FÒ SÉ IZRAÉLIT-LA TÉ SUIV SÉ LWA-LA JÉOVA TÉ BA-YO LA ANRAPÒ ÈVÈ LAGÈ
An tan-lasa, Jéova té ka di sé Izraélit-la kijan pou yo té fè lagè é sé sa pou yo té suiv. Pa ègzanp, délè Jéova té ka voyé sé Izraélit-la koté lènmi a yo pou di-yo ka pou yo té fè pou yo té fè lapé èvè yo (Dét. 20:10). I té vlé osi kè sé sòlda izraélit-la rété pwòp ki sé anrapò èvè kò a yo, ki sé anrapò èvè lèspri a yo é i té vlé kè koté-la yo té ka kanpé la té rété pwòp osi (Dét. 23:9-14). Lèwvwè sélézòt nasyon-la té ka ataké on péyi, souvantfwa, yo té ka vyolé sé madanm-la ki té la la men li Jéova té ka entèwdi sé Izraélit-la fè dé biten konsa. An réyalité, lèwvwè yo té pran on vil, fò-yo té atann on mwa avan yo té mayé èvè on madanm yo té pran adan vil-lasa (Dét. 21:10-13).
Jòdijou, ni onlo péyi ki ka mèt-yo dakò pou suiv sèwten lwa lèwvwè yo ka fè lagè. Magré sé lwa-lasa fèt pou pwotéjé pèp-la, malérèzman, sé nasyon-la pa gè ka suiv sé lwa-lasa.
5. BONDYÉ TÉ KA GOUMÉ POU PÈP A-Y
Ès jòdijou Bondyé ka goumé pou on nasyon kon i fè-y pou Izrayèl lèwvwè Izrayèl té ka goumé a Jériko ?
An tan-lasa, Jéova té ka goumé pou sé Izraélit-la é souvantfwa, i té ka fè mirak pou yo té pé sa gangné lènmi a yo. Pa ègzanp, kijan Jéova édé sé Izraélit-la pran vil a Jériko ? A moman-la Bondyé té di-yo la, yo mèt-yo ka kriyé kon moun ki adan on lagè é miray a vil-la tonbé atè. Sa ba-yo on bèl pal pou yo té réyisi pran vil-lasa (Joz. 6:20). É lèwvwè yo té ka goumé èvè sé Amorit-la, kijan yo fè pou gangné ? « Jéova fè on gwo lagrèl sòti an syèl-la é i fè-y tonbé asi yo […]. An réyalité, ni plis sòlda ki mò akòz dè lagrèl-la ki anba épé a sé Izraélit-la » (Joz. 10:6-11).
Jòdijou, Jéova pa’a goumé pou pon nasyon. I chwazi Jézi pou vin Wa a wayòm a-y é wayòm a-y « pa adan mond-lasa » (Jan 18:36). Tout sé gouvènman-la ki asi latè la anba dominasyon a Dyab-la é lè nou ka vwè jan sé lagè-lasa ka fè moun soufè, sa ka montré jan Dyab-la mové (Lik 4:5, 6 ; 1 Jan 5:19).
SÉ VRÉ KRÉTYEN-LA KA ÉSÉYÉ VIV ANPÉ ÈVÈ LÉZÒT
Kon nou vwè-y, sitiyasyon a sé krétyen-la jòdijou pa ni ayen a vwè èvè sitiyasyon a sé Izraélit-la. Men nou pa’a fè lagè pou dòt rézon ankò. Pa ègzanp, Bondyé té ja anonsé kè pannan sé dènyé jou-la, moun i té’é anségné ‘pa té’é aprann fè lagè’ ankò é nou ka tou konprann kè yo pa té’é pawtisipé adan pon lagè nonplis (Iz. 2:2-4). Anplisdisa, Jézi di kè disip a-y ‘pa té’é adan mond-lasa’. Kifè, yo pa té’é mélanjé-yo adan pon lagè mond-lasa ka fè (Jan 15:19).
Jézi ankourajé sé disip-la fè plis ki sa ankò. I di-yo kè fò-yo woté an lèspri a yo tousa ki té’é pé fè-yo ni rankin an tchè a yo, tousa ki té’é pé fè-yo fè kòlè èvè lézòt é tousa ki té’é pé fè-yo rantré an lagè èvè dòt moun (Mat. 5:21, 22). Anplisdisa, i té vé kè yo fè tousa yo pé pou viv anpé èvè lézòt é i té vé kè yo enmé lènmi a yo (Mat. 5:9, 44).
Kijan nou pé suiv sé prensip-lasa adan vi an nou ? Asirésèten nou vé pa pawtisipé adan pon lagè, men pétèt kè nou ni on frè oben on sè asi tchè é lèwgadé sé dé biten ki pé mèt zizanni adan lasanblé-la é ki pé fè kè yonn an lagè èvè lòt. An-nou kontinyé fè tousa nou pé pou nou woté sé kalté biten-lasa an tchè an nou (Jak 4:1, 11).
Nou pa ka mélanjé-nou adan pon lagè a mond-lasa é nou ka travay rèd pou yonn anpé èvè lòt é pou yonn enmé lòt (Jan 13:34, 35). Nou vé pa pran pawti adan zafè a mond-lasa jiskatan Jéova woté tout kalté lagè ki asi latè é nou byen désidé a fè sa (Sòm 46:9).
a Délè, Sa rivé kè sèwten tribi a Izrayèl té ka goumé yonn èvè lòt, men lèwvwè sa té ka fèt, sa pa té ka fè Jéova plézi (1 Wa 12:24). Men ni sèwten lagè konsa ki fèt é Jéova aksèpté sa pas té ni sèwten tribi ki té ba Bondyé do oben ki té fè dé péché ki té grav toubònman (Jij 20:3-35 ; 2 Kron. 13:3-18 ; 25:14-22 ; 28:1-8).
