1. Délè, poukwa nou ni dimal a obéyi ?

 ÈS DÉLÈ ou ni dimal a obéyi ? Sé sa ki rivé wa David. Sé pousa limenm mandé Jéova : « Fè-mwen anvi obéyi-w » (Sòm 51:12). Menmsi i té enmé Jéova, délè pou i té obéyi-y sa pa té mòl é sé menm biten-la pou nou osi. Poukwa sa ka rivé-nou ? Prèmyèwman, sé pas nou ni on mové tandans ki ka pousé-nou a pa kouté Bondyé. Sa ka fè pawti a éritaj-la Adan é Èv lésé ban nou la. Dézyèmman, sé pas toutlè Satan dèyè do an nou pou fè-nou ba Jéova do kon li i fè-y (2 Kor. 11:3). Twazyèmman, sé pas adan mond-la nou ka viv adan-y la, sé moun-la ni on létadèspri ki ka pousé-yo rèbélé-yo, on lèspri « ki ka aji konnyéla asi sé moun-la ki ka dézobéyi la » (Éféz. 2:2). Alò fò-nou travay rèd pou nou pé sa goumé èvè défo an nou é fò-nou goumé pou nou pa lésé Satan é mond a-y pran lanmen asi nou. Pou sa, nou ké kouté Jéova é sé moun-la i bay on otorité la.

2. Fò-nou ‘paré pou obéyi’. Ka sa vé di ojis ? (Jak 3:17).

² (Li Jak 3:17.) Lèspri sen pousé Jak maké kè on moun ki ni sajès « paré pou i obéyi ». Ka sa vé di ojis ? Sa vé di kè lèwvwè Jéova ka ba on moun on otorité, fò-nou anvi é fò-nou dakò pou nou kouté moun-lasa. Nou ka tou konprann kè Jéova pa ka mandé-nou kouté on moun ki ka di-nou fè on biten ki pa k’ay an sans a sa li i ka mandé-nou fè (Akt 4:18-20).

3. Poukwa sa enpòwtan pou Jéova kè nou kouté sé moun-la ki ni on otorité ?

³ Pétèt pou nou, obéyi Jéova sa pi fasil ki obéyi on moun kon noumenm. É sa toutafè nòwmal pas sé lwa-la Jéova ka ban-nou la pawfè (Sòm 19:7). Anplisdisa, noutout dakò pou di kè lwa a lézòm pa pawfè. Magrésa Pap’an nou ki an syèl-la ba sé paran-la, sé fonksyonnè-la ki ka travay pou sé gouvènman-la é sé ansyen-la on sèwten otorité (Pwov. 6:20 ; 1 Tés. 5:12 ; 1 Pyè 2:13, 14). Lèwvwè nou ka kouté-yo, an réyalité,  sé Jéova nou ka kouté. An-nou vwè kijan nou pé kouté sé moun-la Jéova bay on otorité la menm lèwvwè nou pa dakò èvè sa yo ka mandé-nou fè oben lè nou pa anvi suiv dirèksyon-la yo ka ban-nou la.

4. Poukwa onlo jenn pa’a kouté fanmi a yo ?

⁴ Souvantfwa, adan mond-la, sé jenn-la pa ka « kouté fanmi a yo » (2 Tim. 3:1, 2). Poukwa yo ka aji konsa ? Sèwten jenn ka touvé kè fanmi a yo ipokrit pas sa fanmi a yo ka mandé-yo fè, yomenm a yo pa ka fè-y. Ni dòt ki ka di kè épòk a fanmi a yo é épòk a yo pa menm biten. Alò, yo ka touvé kè sé konsèy-la fanmi a yo ka ba-yo la pasé dimòd oben yo ka touvé kè fanmi a yo two karé. Si ou sé on jenn, ès délè sé sa ou ka rèsanti osi ? Gadé sa Jéova ka mandé : « Kouté fanmi a zòt annakò èvè Ségnè-la, pas sé on biten ki jis » (Éféz. 6:1). Onlo jenn ni dimal a suiv komandman-lasa. Men vou, ka ki pé édé-w fè sa ?

5. Jézi obéyi fanmi a-y é pa ni pi bèl ègzanp ki-y adan domenn-lasa. Poukwa nou ka di sa ? (Lik 2:46-52).

⁵ Si ou ka suiv ègzanp a Jézi, ou ké pé aprann obéyi pas sé méyè ègzanp ou pé tini (1 Pyè 2:21-24). Jézi té pawfè men manman-y é pap’a-y pa té pawfè. Magrésa, i toujou ba-yo lonnè menm lèwvwè yo té ka fè érè oben kè yo pa té ka konprann-li (Ègz. 20:12). An-nou vwè sa ki pasé lè i té ni 12 an (li Lik 2:46-52). Jézi té ay Jérizalèm èvè fanmi a-y pou fété Lapak. Lè fèt-la fin, Jozèf é Mari pati men yo pa sonjé gadé si tout timoun a yo té la. É sé lèwvwè yo té ja an chimen pou viré akaz a yo, yo konstaté kè Jézi pa té èvè yo. Lè yo fin pa touvé Jézi, manman-y pa té kontan é i di-y kè yo té enkyèt toubònman pou-y ! Jézi té pé di fanmi a-y kè jan-la yo ka aji èvè-y la pa jis. Men a pa sa i fè ! Èvè onlo rèspé, i èspliké fanmi a-y poukwa i pa té èvè yo. É menmsi Jozèf é Mari pa konprann sa Jézi té ka di-yo, Jézi « kontinyé kouté-yo ».

6-7. Ka ki pé édé sé jenn-la kouté paran a yo ?

⁶ Léjenn, délè paran a zòt ka fè érè oben yo pa’a konprann-zòt. Lè sa ka rivé, ès zò ni dimal a kouté-yo ? Ka ki pé édé-zòt ? Prèmyé biten zò pé fè, sé sonjé sa Jéova ka rèsanti. Labib ka di kè lèwvwè zò ka kouté paran a zòt, « sa ka fè Ségnè-la plézi » (Kol. 3:20). Lèwvwè fanmi a zòt pa’a konprann-zòt byen oben lèwvwè yo ka mandé-zòt fè dé biten ki pa fasil a fè, Jéova ka vwè sa. Men si magrésa, zò ka kouté-yo, sa ka fè Jéova plézi.

⁷ On dézyèm biten pou zò fè, sé sonjé ka fanmi a zòt ka rèsanti. Lè zò ka kouté-yo, tchè a yo ka kontan é yo ka fè-zòt konfyans pi fasilman (Pwov. 23:22-25). Zò ka vin pi bon zanmi èvè yo osi. Mi sa Alexandre, on frè ki ka viv an Bèljik konstaté : « Lèwvwè an mèt-mwen ka fè sa fanmi an mwen té ka mandé-mwen, nou koumansé antann-nou pibyen é nou té ni tchè-kontan b. » Ondòt biten pou zò sonjé sé kè si zò ka aprann kouté fanmi a zòt, plita sa ké itil pou zòt. Paulo, sé on jenn ki ka viv o Brézil. Mi sa i ka di : « Lèfètkè an aprann kouté fanmi an mwen, jòdijou sa ka édé-mwen kouté Jéova é kouté sé moun-la i bay on otorité la. » Pawòl a Bondyé ka di-zòt pou ki rézon sa enpòwtan kè zò kouté fanmi a zòt. Mi sa i ka di : « Pou tout biten maché byen ba-w é pou ou rété lontan asi latè » (Éféz. 6:2, 3).

8. Poukwa onlo jenn désidé kouté fanmi a yo ?

⁸ Ni onlo jenn ki konstaté kè tout biten a yo ka touné won lèwvwè yo ka kouté fanmi a  yo. Luiza, sé on jenn ki ka viv o Brézil é i pa té ka konprann poukwa i pa té ni dwa ni on téléfòn alòskè lamajorité a sé jenn-la té ni yonn. Men aprésa, i rann-li kont kè sa paran a-y té vé, sé té pwotéjé-y. Aprézan, i sav kè lè i ka kouté fanmi a-y, sa pa ka anpéché-y viv pas sé konsèy-la yo ka ba-y la sé ègzaktèman sa i bizwen. Elizabeth, sé on jennsè ki ka rété o Zétazini. Délè, i ni dimal a obéyi fanmi a-y. Mi sa i ka èspliké : « Lèwvwè fanmi an mwen ka di-mwen fè on biten oben pa fè on biten é kè an pa’a konprann poukwa yo ka mandé-mwen sa, an ka sonjé jan sa pwotéjé-mwen lè an kouté-yo adan dòt sitiyasyon avan. » Monica, on sè ki ka viv an Awméni ka di kè lè i ka kouté fanmi a-y, zafè a-y toujou ka maché pibyen ki lèwvwè i pa’a kouté-yo.

9. Ka onlo moun ka pansé dè sé lwa-la séla « ki ni otorité-la » ka mèt anplas la ?

⁹ Onlo moun ka di kè sé gouvènman-la ni itilité a yo é yo ka di osi kè fò ou obéyi a sèwten lwa séla « ki ni otorité-la » mèt anplas la (Wom. 13:1). Men lèwvwè sé moun-lasa ka touvé kè on lwa pa jis oben kè i pa agou a yo, yo pa’a suiv-li. An-nou palé dè sé enpo-la pa ègzanp. Yo fè on ankèt adan on péyi ki an Éwòp é 25% a sé moun-la yo entérojé la di konsa kè « lèwvwè yo ka mandé-yo péyé on enpo é kè pou yo, sa pa jis, yo pa’a péyé sa é pou yo, yo pa’a fè ayen dè mal. » Sé pousa adan péyi-lasa, sé moun-la pa’a péyé tout sé enpo-la gouvènman-la ka mandé-yo péyé la.

10. Poukwa nou ka suiv sé lwa-la menmsi nou pa enmé-yo ?

¹⁰ Adan Labib yo ka di-nou kè sé gouvènman-la ka fè moun soufè, kè sé Satan ki an tèt a tout sé gouvènman-la é kè talè, Bondyé ké fè-youtout fè papiyòt (Sòm 110:5, 6 ; Ékl. 8:9 ; Lik 4:5, 6). Men Labib ka di osi kè « on moun ki ka viré kont otorité-la ka viré kont dispozisyon-la Bondyé pran la ». Pou lèmoman Jéova ka pèwmèt sé gouvènman-la gouvèné sé péyi-la pou ni tibwen lòd asi latè é li Jéova, sa i vé, sé kè nou kouté-yo. Fò-nou ‘ba toutmoun sa nou ni a ba-yo’, kivédi fò-nou ba-yo enpo a yo, fò-nou rèspèkté-yo é fò-nou kouté-yo (Wom. 13:1-7). Pétèt kè pou nou on lwa pa bon, kè i pa jis oben kè i ké oblijé-nou dépansé onpakèt lajan siwvwè nou ka suiv-li. Men sé Jéova ki ka mandé-nou obéyi é fò-nou fè sa dépi yo pa ka mandé-nou fè on biten ki pa annakò èvè sa Jéova ka mandé-nou fè (Akt 5:29).

11-12. Ka Jozèf é Mari fè pou yo té suiv on lwa é ki rézilta sa bay ? (lik 2:1-6 ; gadé sé imaj-la osi).

¹¹ Ègzanp a Jozèf é Mari pé aprann-nou onlo biten. Yo té paré pou obéyi sé gouvènman-la menm lèwvwè sa yo té ka mandé-yo fè té rèd menm (li Lik 2:1-6). Mari té ansent gwovant lèwvwè gouvènman-la  mandé li é Jozèf fè on biten ki té difisil toubònman. Anprè women la Ogis fè on lwa ki té ka mandé tout sé moun-la ki té ka viv anba dominasyon a-y la ay adan vil a yo pou yo té pé sa anrèjistré-yo. Fò Jozèf é Mari té ay Bétléèm é nou ka tou konprann kè vwayaj-lasa pa té’é mòl siwtou pou Mari pas té ni onlo mòn é fò-yo té maché 150 kilomèt apépré. Sèten yo dwèt té ka enkyété-yo pou santé a Mari é pou ta tibébé-la é sa toutafè natirèl. Men vinvwè tibébé-la té fèt an chimen, ka ki té’é pasé ? A pa té nenpòt kimoun Mari té ni an vant a-y, sé té timoun-lasa ki té’é vin Mési-la. Men ès sa té ka ba-yo dwa dézobéyi a lwa-la Ogis té bay la ?

¹² Menmsi tout sé biten-lasa té’é pé enkyété-yo, Jozèf é Mari pa lésé sa anpéché-yo suiv lwa-la Séza té bay la. Jéova té kontan davwa yo té obéyi é i pran swen a yo. Mari rivé Bétléèm byen, ayen pa rivé timoun a-y é i jous fè dé biten ki pèwmèt sèwten pwofési ki adan Bib-la réyalizé ! (Mich. 5:2).

13. Poukwa nou ka di kè lèwvwè nou ka obéyi, sa ka fè frè é sè an nou dibyen ?

¹³ Lèwvwè nou ka kouté séla ki ni otorité-la, sa ka fè-nou dibyen é sa ka fè frè é sè an nou dibyen osi. Poukwa nou ka di sa ? On prèmyé biten ki ka fè-nou di sa, sé kè yo pé’é pini-nou pas nou pa suiv lwa-la (Wom. 13:4). Anplisdisa, lè nou ka obéyi, sé otorité-la ka vwè kè nou sé dé bon moun. Pa ègzanp, ni plizyè lanné dè sa, o Nijérya, onpakèt sòlda rantré adan on sal di Wayòm pannan on réinyon. Yo té ka chèché moun ki ka lévé gaoulé pas yo vé pa péyé enpo a yo. Men chèf a yo di-yo sòti an sal-la. Mi sa i èspliké-yo : « Sé Témwen a Jéova la toujou ka péyé enpo a yo. » Chakfwa ou ka obéyi sé lwa-la, sé Témwen a Jéova la ka kontinyé ni on bèl répitasyon é pétèt grasa sa, on jou sa ké pwotéjé frè é sè a-w (Mat. 5:16).

14. Pou Joanna té byen désidé a kouté sé otorité-la, sa pa té fasil. Ka ki édé-y fè sa ?

¹⁴ Konfèdmanti, a pa toutlè nou anvi kouté  sé otorité-la. Mi sa Joanna on sè ki ka rété o Zétazini ka rèkonnèt : « Pou mwen té kouté sé otorité-la, a pa ti rèd sa té rèd pas yo fè sèwten moun an fanmi an mwen dé biten ki pa té jis menm. » Men Joanna désidé fè on travay asi-y pou chanjé mannyè i té ka rézonné. Prèmyé biten i fè, sé arété gadé asi sé rézo sosyo la, sé mové biten-la sé moun-la té ka mèt asi sé otorité-la pas pi i té ka gadé sa é pi i té ni sé otorité-la asi tchè (Pwov. 20:3). Aprésa, i mandé Jéova édé-y pou i fè-y konfyans plis ankò olyé i mèt an tèt a-y kè sé lézòm ki ké chanjé on biten adan mond-lasa (Sòm 9:9, 10). É dènyé biten i fè, sé fè rèchèch adan sé piblikasyon-la ki ka èspliké jan sa enpòwtan kè nou pa pran pawti adan zafè a politik (Jan 17:16). Jòdijou, Joanna ka rèspèkté sé otorité-la é i ka kouté-yo. Lèspri a-y trankil é i ni tchè-kontan oséryé menm.

15. Délè, poukwa nou pé ni dimal a obéyi lèwvwè òwganizasyon a Jéova ka ban-nou on dirèksyon ?

¹⁵ Jéova ka mandé-nou ‘obéyi séla ki ka dirijé-nou la’ (Ébr. 13:17). Jézi, chèf an nou, pawfè men sé moun-la i ka sèvi èvè-y la pou dirijé-nou la enpawfè. Kifè, nou pé rivé a ni dimal a obéyi-yo siwtou lèwvwè yo ka mandé-nou fè on biten é kè nou pa anvi fè sa menm. On jou, yo mandé lapòt Pyè fè on biten men odépa, i pa té anvi obéyi. Lwa a Moyiz té ka palé dè zannimo ki pa té pwòp é lèwvwè on zanj vin owa Pyè pou mandé-y manjé sé zannimo-lasa, i rèfizé fè sa é a pa onsèl fwa i fè-y. I rèfizé 3 fwa (Akt 10:9-16). Poukwa ? Pas i pa té ka konprann poukwa zanj-la té ka mandé-y fè on biten konsa. Dabitid, i pa jen té ka manjé sé zannimo-lasa. Si Pyè ki Pyè té ni dimal a suiv dirèksyon-la on zanj té ka ba-y la, alòskè zanj-la té pawfè, nou ka tou konprann kè sa pé rivé kè délè nou ni dimal a suiv dirèksyon-la moun ki enpawfè ka ban-nou.

16. Ka Pòl fè magré i té ni lenprésyon kè sa yo té ka mandé-y fè la pa té rézonab ? (Akt 21:23, 24, 26).

¹⁶ Lapòt Pòl té paré pou i obéyi menm lèwvwè i té ni lenprésyon kè yo té ka mandé-y fè dé biten ki pa té rézonab. Sé krétyen-la ki té juif la té tann-di kè i té ka pousé tout sé Juif-la ki adan sé nasyon-la lagé Lwa a Moyiz é kè i pa té ka rèspèkté lwa-lasa (Akt 21:21). Alò, sé ansyen-la ki té Jérizalèm la mandé-y menné 4 nonm adan Tanp-la pou i té pé sa fè sa ki fo pou i vin pwòp anmenmtan ki yo. Konsa sa té’é montré kè i ka suiv Lwa a Moyiz. Men Pòl té sav kè sé krétyen-la pa té oblijé suiv Lwa a Moyiz ankò é anplisdisa i pa té fè ayen dè mal. Men poutan i obéyi é i pa pèd tan pou fè sa. « Lèlandèmen-la, Pòl menné sé misyé-lasa èvè-y é i fè sa ki té fo pou i té vin pwòp anmenmtan ki yo » (li Akt 21:23, 24, 26). Davwa Pòl fè sa yo té mandé-y fè, sa édé lasanblé-la rété soudé (Wom. 14:19, 21).

17. Ka sa Stéphanie di la ka aprann-nou ?

¹⁷ An-nou palé dè on sè non a-y sé Stéphanie. I té ni dimal a aksèpté on désizyon kè sé frè-la ki té adan filyal a péyi a-y la té pran. Li é mari a-y té adan on gwoup ki té ka palé ondòt lang é yo té kontan travay-la yo té ka fè la toubònman. Men Bétèl-la désidé fèmé gwoup-lasa é yo voyé-yo adan on lasanblé ki té adan lang a yo. Mi sa Stéphanie ka di : « An pa té kontan menm é an pa té ka vwè kijan té ni plis travay adan lang a téritwa-la, la yo té ka voyé-nou la. » Men magrésa i soutyenn désizyon-lasa. Mi sa i ka èspliké : « Piti-a-piti, an rann-mwen kont kè sé té on désizyon ki té plen sajès. Adan nouvo lasanblé  an mwen, té ni onlo frè é sè ki té tousèl adan lavérité. Alò, nou vin on fanmi pou yo é nou té ka ankourajé-yo. An koumansé étidyé èvè on sè ki té inaktif. É alèla, an ni plis tan pou an pé sa étidyé tousèl an mwen. » Mi sa i ka di ankò: « Konsyans an mwen pwòp pas an sav an fè tousa an pé pou an té obéyi. »

18. Konm nou ka obéyi, ki bon biten sa ka pwokiré-nou ?

¹⁸ Nou pé aprann obéyi. Jézi « aprann ka sa vé di obéyi parapòt a tousa i soufè » (Ébr. 5:8). Menmjan-la, pi souvan ki rarman, sé lèwvwè nou adan on sitiyasyon difisil nou ka aprann ka sa vé di obéyi. Pa ègzanp, lèwvwè pandémi a Covid-19 la koumansé, yo mandé-nou arété fè réinyon an nou adan sé sal di Wayòm la é yo mandé-nou arété ay préché dè kaz-an-kaz. Ès ou té ni dimal a fè sa ? Men alèla ou ka rann-vou kont kè davwa ou obéyi sa pwotéjé-w, sa édé lasanblé-la rété soudé é sa fè Jéova plézi. Jòdila, nou pibyen préparé pou suiv dirèksyon-la yo ké ban-nou la pannan gwo tribilasyon-la. Siwvwè nou obéyi, sa ké sové vi an nou (Jòb 36:11).

19. Poukwa ou vé obéyi ?

¹⁹ Adan awtik-lasa, nou vwè kè lèwvwè nou ka obéyi, sa ka pwokiré-nou onlo byenfé. Men prèmyé biten ki ka fè si nou ka obéyi Jéova sé kè nou enmé-y é kè nou vé fè-y plézi (1 Jan 5:3). Jéova ja fè tèlman biten ban nou é si fò-nou té péyé-y, nou pa té’é jen rivé péyé-y pou tousa (Sòm 116:12). Pawkont nou pé obéyi-y é obéyi séla i ba-y on otorité la. Si nou ka obéyi, nou ké aji èvè sajès. É lèwvwè on moun ka montré kè i ni sajès, tchè a Jéova ka kontan (Pwov. 27:11).