1. An tan a Labib, kijan Jéova ba plizyè sèwvitè a-y ki té fidèl fòs ?

 SOUVANTFWA, lèwvwè yo ka palé dè moun ki té fidèl a Bondyé adan Labib, yo ka di kè sé dé moun ki té ni bon fòs. Men a pa toutlè yo té ka santi-yo fò. Pa ègzanp, délè wa David té ka santi-y fò kon on montangn, men délè i té ka santi-y fèb é i té pè (Sòm 30:7). Kanta Sanson, lèwvwè lèspri a Jéova té ka aji asi-y, i té ni onlo onlo fòs toubònman. Men poutan, i té sav kè si a pa Bondyé ki té ka ba-y fòs-lasa, i té’é vin fèb é i té’é kon nenpòt kimoun (Jij 14:5, 6 ; 16:17). Sé Jéova ki té ka ba sèwvitè a-y ki té fidèl fòs-lasa.

2. Poukwa Lapòt Pòl di konsa kè lè i fèb sé lè i ni bon fòs ? (2 Korentyen 12:9, 10).

² Lapòt Pòl osi té sav kè fòs-la i té ni la, sé Jéova ki té ka ba-y li (li 2 Korentyen 12:9, 10). I pa té ni on bon santé, kon onlo adan nou (Gal. 4:13, 14). Anplisdisa, délè i té ni dimal a fè sa ki byen (Wom. 7:18, 19). Dépawfwa, i té enkyèt toubònman é i té pè pou dèmen (2 Kor. 1:8, 9). Poutan lè i té fèb, sé a moman-lasa i té ni bon fòs. Poukwa nou ka di sa ? Pas Jéova té ka ba-y fòs-la i té bizwen la pou andiré sé pwoblèm-la i té ka jwenn la.

3. A ki kèsyon nou ké réponn adan awtik-lasa ?

³ Nou osi, Jéova ka pwomèt kè i ké ban-nou fòs pou nou pé sa andiré (1 Pyè 5:10). Men fò pa nou mèt an tèt an nou kè nou ké rété la lébwa-kwazé é kè Jéova ké ban-nou fòs-lasa. Pou nou konprann sa pibyen, an-nou pran on ègzanp. Motè a on vwati ka pèwmèt-li vansé men si on moun bizwen ay on koté, fò i pijé asi aksélératè-la pou vwati-la vansé. Menmjan-la, Jéova dakò pou ban-nou fòs-la nou bizwen la. Men pousa, nou ni dé biten a fè. Èvè ki biten Jéova ka sèvi pou ban-nou fòs-la nou bizwen la ? É ka pou nou fè pou nou  pé sa ni fòs-lasa ? Pou nou konprann sa byen, an-nou ègzaminé ègzanp a plizyè moun adan Labib ki rèsèvwa fòs a Jéova : pwofèt Jonas, Mari (manman Jézi) é lapòt Pòl. Jéova ka kontinyé ba sèwvitè a-y fòs jòdijou é nou ké vwè kijan i ka fè sa.

4. Kijan nou pé ni puisans-la Jéova ka bay la ?

⁴ Nou pé fè plizyè biten pou Jéova pé sa ban-nou fòs. Pa ègzanp, nou pé priyé-y. Jéova ka réponn a priyè an nou lè i ka ban-nou « puisans-la ki ka dépasé sa ki nòwmal » (2 Kor. 4:7). Nou pé ni fòs-la nou bizwen la osi lè nou ka li Pawòl a-y é lè nou ka pran tan réfléchi asi sa nou ka li (Sòm 86:11). Mésaj-la Jéova ka ban-nou la adan Labib ‘puisan toubònman’ (Ébr. 4:12). Si ou ka priyé Jéova é si ou ka li Pawòl a-y, ou ké ni fòs-la ou bizwen la pou ou pé sa andiré, pou ou toujou ni tchè-kontan é pou ou fè nenpòt ki travay yo ka ba-w fè menmsi travay-lasa rèd. Gadé kijan Jéova ba pwofèt Jonas fòs.

5. Poukwa Jonas té bizwen kouraj ?

⁵ Jonas té bizwen kouraj. Konm i té pè ay la Jéova té ka voyé-y la, i monté adan on bato ki té k’ay ondòt koté. Akòz dè sa, li é sé moun-la ki té an bato-la manké pèd vi a yo adan on tanpèt. Lèwvwè yo jété-y an lanmè-la, Jonas vin touvé-y on koté ki ka fè moun pè toubònman ; i vin touvé-y an vant a on gwo manman pwason. Dapré-w, ka Jonas rèsanti ? Pétèt i di an tchè a-y : « Gay la an kay pran mò an mwen ! » É pétèt i pansé osi kè Jéova té lagé-y. Antouka, Jonas dwèt té angwasé bon angwasé la.

6. Dapré Jonas 2:1, 2, 7, ka ki ba Jonas fòs lèwvwè i touvé-y adan vant a pwason-la ?

⁶ Lèwvwè Jonas touvé-y tousèl adan vant a pwason-la, ka ki ba-y fòs ? Prèmyé biten i fè, sé priyédyé (li Jonas 2:1, 2, 7). Menmsi Jonas pa té kouté Bondyé, i rèpanti-y é i té sèten kè Jéova té’é kouté priyè a-y. Jonas mété-y ka réfléchi asi sèwten pasaj ki té adan Lézékriti osi. Ka ki ka montré sa ? Adan Jonas chapit 2, nou ka touvé priyè-la i fè la, é adan priyè-lasa, i sèvi èvè plizyè mo é plizyè èksprésyon nou ka touvé adan sé sòm-la (pa ègzanp, konparé Jonas 2:2, 5 èvè Sòm 69:1 ; 86:7). Nou ka tou konprann kè Jonas té konnèt sé sòm-lasa byen. Pannan i té adan gwo éprèv-lasa, i mété-y ka réfléchi asi sé vèwsé-lasa é grasa sa, i vin sèten kè Jéova té’é sové-y. É konmdi-konmfèt, Jéova sové-y é kèlkè tan apré, i té paré pou fè travay-la i té ba-y fè la (Jonas 2:10–3:4).

7-8. Lèwvwè on frè ki ka rété Taywann touvé-y anba on éprèv, ka ki ba-y fòs ?

⁷ Lèwvwè nou ka jwenn diféran kalté éprèv, istwa a Jonas pé édé-nou toubònman. An-nou pran ègzanp a Zhiming b, on frè ki ka rété Taywann. Santé a-y pa bon menm men anplisdisa, fanmi a-y ka aji mal èvè-y pas i ka adoré Jéova. Alò, pou Jéova pé sa ba-y fòs, i ka priyé-y é i ka étidyé Pawòl a-y. Mi sa i ka di : « Délè, lèwvwè an ka jwenn difikilté, tèlman an angwasé, an pa’a rivé trankilizé-mwen pou an pé sa étidyé. » Men Zhiming pa’a lagé. Mi sa i ka di ankò : « Prèmyé biten an ka fè, sé priyé Jéova. Aprésa, an ka mèt ékoutè an mwen an zorèy an mwen é an ka kouté sé kantik-la. Délè an ka jous chanté sé kantik-la touba joustan sa trankilizé-mwen. É a moman-lasa, an pé koumansé étidyé. »

⁸ Lèfètkè Zhiming ka étidyé tousèl a-y, sa ka ba-y fòs é sa ja édé-y plizyè fason diféran.  Pa ègzanp, apré i té fè on gwo opérasyon, i pèd onlo globil wouj. Alò, on enfirmyèz vin owa a-y é i di-y kè yo ké ba-y san. Men lavèy a opérasyon-la, lèswa-la, Zhiming té li istwa a vi a on sè ki fè menm opérasyon ki-y. É sè-lasa té pèd onlo globil wouj osi, i jous té pèd plis ki-y. Men magrésa, sè-la pa pran san é i jous woufè kò a-y. Ègzanp a sè-lasa ba Zhiming onlo fòs pou i té pé sa rété fidèl a Jéova.

9. Siwvwè ou ka santi-w fèb akòz dè on éprèv ou ka jwenn, ka ou pé fè ? (gadé sé imaj-la osi).

⁹ Délè, lèwvwè ou anba on éprèv, tèlman ou ka santi-w angwasé, ou pa menm ni fòs pou priyé oben pou étidyé. Ès sé ka a-w ? Si sé sa, sonjé kè pa ni ponmoun ki ka konprann sitiyasyon a-w pibyen ki Jéova. Alò, menmsi ou ka fè on ti priyè tousenp, ou pé sèten kè i ké ba-w ègzaktèman sa ou bizwen (Éféz. 3:20). Si ou ni dimal a li Labib oben a étidyé-y pas ou malad, pas ou fatigé oben pas ou ka santi-w angwasé, ou pé kouté on anrèjistrèman a Bib-la oben ta ondòt piblikasyon. Ou pé kouté on chanson, on kantik oben ou pé gadé vidéo ki asi jw.org. Sa osi, sa pé ba-w bon fòs. Jéova vé ba-w fòs é i ké fè sa siwvwè ou ka priyé-y é siwvwè ou ka gadé pou vwè kijan i ka réponn-vou adan Labib é adan tousa i ka mèt anba men a-w.

10. Kijan frè é sè an nou ka ban-nou fòs ?

¹⁰ Jéova pé sèvi èvè frè é sè an nou pou ban-nou fòs. Lèwvwè nou ka jwenn on éprèv oben lè nou ni dimal a fè on travay yo ka ban-nou fè pas nou ka touvé sa rèd menm, frè é sè an nou pé « vin on gran sous a konsolasyon » pou nou (Kol. 4:10, 11). « Lè malè ka rivé », sé a moman-lasa nou bizwen zanmi toubònman (Pwov. 17:17). Lèwvwè nou ka santi-nou fèb, frè é sè an nou pé ban-nou sa nou bizwen, yo pé konsolé-nou é yo pé ankourajé-nou pou nou kontinyé sèvi Jéova é pou nou rété fidèl a-y. An-nou vwè kijan Mari, manman Jézi, touvé fòs owa dòt moun ki té ka sèvi Bondyé.

11. Poukwa Mari té bizwen fòs ?

¹¹ Mari té bizwen fòs. Imajiné sa i rèsanti  lèwvwè zanj Gabriyèl vin owa a-y é i di-y ki rèsponsabilité i té’é ni. A pa té on ti afè ! I pa té mayé men i té kay ni on timoun. Anplisdisa, i poto’o jen lévé on timoun é i té kay lévé timoun-la ki té kay vin Mési-la. Ondòt biten ankò, sé kè i té fiyansé èvè Jozèf. Alò kijan i té kay èspliké Jozèf kè i té ansent alòskè i poto’o jen ni pon rèlasyon sèksyèl ? (Lik 1:26-33).

12. Dapré Lik 1:39-45, kijan Mari fè pou ni fòs-la i té bizwen la ?

¹² Misyon-la yo té ba Mari la té vréman èspésyal é a pa té on piti travay. Ola i pran fòs pou i té rivé about a travay-lasa ? I chèché èd owa dòt moun. Pa ègzanp, i mandé Gabriyèl ba-y plis détay asi travay-la i té ni a fè la (Lik 1:34). Tibwen plita, i ay jous adan réjyon a sé montangn-la ki adan téritwa a Jida pou ay vwè Élizabèt, on fanmi a-y. I pa règrété i té fè vwayaj-lasa. Élizabèt félisité Mari é anplisdisa Jéova voyé lèspri sen a-y asi Élizabèt pou i té anonsé on pwofési ki té ankourajan toubònman. Pwofési-lasa té ka konsèwné timoun-la Mari té kay ni la (li Lik 1:39-45). Aprésa, Mari di konsa kè Jéova té aji èvè bra a-y ki puisan toubònman (Lik 1:46-51). É sé vré, Jéova té sèvi èvè Gabriyèl é èvè Élizabèt pou ba-y bon fòs.

13. On sè ki ka rété Bolivi mandé frè é sè a-y édé-y. Ki byenfé sa pwokiré-y ?

¹³ Kon Mari, vou osi, ou pé touvé fòs owa dòt sèwvitè a Bondyé. Dasuri, sé on sè ki ka rété Bolivi. I té bizwen fòs-lasa. Pap’a-y té malad bon malad la é i pa té ka rété-y onlo tan a viv ankò. Lèwvwè i té lopital, Dasuri té vé rété èvè-y dépi sa té posib (1 Tim. 5:4). Men, sa pa té toujou fasil. Mi sa i ka rèkonnèt : « An konprann an té’é lagé a plizyè rèpriz. » Ès Dasuri mandé sé frè é sè la édé-y ? A pa sa i fè odépa. Mi sa i ka èspliké : « An pa té vé anbété frè é sè an mwen. An té ka di an tchè an mwen : “Sé Jéova ki ké édé-mwen”. Men an rann-mwen kont kè lèwvwè an té ka rété tousèl an mwen, an té ka éséyé réglé pwoblèm an mwen mwenmenm an mwen » (Pwov. 18:1). Alò, Dasuri désidé fè on lèt pou déotwa frè é sè é i èspliké-yo sitiyasyon a-y. Mi sa i ka di ankò : « An pé’é jen pé èspliké kijan frè é sè an mwen ban-mwen fòs. Yo menné manjé ban mwen lopital é yo pawtajé plizyè vèwsé èvè mwen pou konsolé-mwen. Lèwvwè nou sav kè nou pa tousèl, sa ka fè-nou dibyen toubònman. Nou ka fè pawti a on gran fanmi, fanmi a Jéova, é frè é sè an nou toujou paré pou édé-nou lèwvwè nou bizwen èd. Yo ka soufè èvè nou lèwvwè nou ka soufè é yo anvi ankourajé-nou pou nou kontinyé sèvi Jéova èvè yo. »

14. Poukwa fò-nou aksèpté èd-la sé ansyen-la ka ban-nou la ?

¹⁴ Jéova ka ban-nou fòs-la nou bizwen la osi grasa sé ansyen-la. Sé dé nonm ki ni èkspéryans é Jéova ka sèvi èvè yo pou ban-nou fòs é pou édé-nou lè moral an nou a zéwo (Iz. 32:1, 2). Alò lèwvwè ni dé biten ki ka pran tèt a-w, pa ézité palé èvè yo. É lèwvwè yo ka pwopozé-w édé-w, aksèpté èvè onlo rèkonésans. Jéova pé sèvi èvè yo pou ba-w fòs.

15. Tout sé krétyen-la ni on bèl èspérans. Ki èspérans ésa ?

¹⁵ Èspérans-la nou ni la grasa sé pwomès-la ki an Bib-la pé ban-nou fòs pou kontinyé sèvi Jéova (Wom. 4:3, 18-20). Tout sé krétyen-la ni on bèl èspwa toubònman. Ni sèwten ki ké viv pou touttan an syèl-la é ni dòt ki ké viv pou touttan asi latè adan on bèl paradi. Èspérans-la nou ni la ka ban-nou fòs  pou tchenbé rèd anba éprèv, pou préché bon nouvèl-la é pou nou rivé fè sé diféran biten-la nou ni a fè la adan lasanblé-la (1 Tés. 1:3). Sé èspérans-lasa osi ki ba Pòl bon fòs.

16. Poukwa lapòt Pòl té bizwen fòs ?

¹⁶ Pòl té bizwen fòs. Adan 2^èm lèt-la i maké ba sé Korentyen-la, i konparé-y limenm a-y èvè on ja ki fèt an tè é ki frajil toubònman. ‘Yo mété-y a léto an tout sans’, ‘i pa té sav ka pou i té fè’, ‘yo pèwsékité-y’ é ‘yo jété-y atè’. I jous vwè mò a-y (2 Kor. 4:8-10). I maké sé pawòl-lasa toupannan i té ka fè 3^èm vwayaj a-y antankè misyonè. É apré i maké sé pawòl-lasa, i jwenn sitiyasyon ki té pi difisil ki sa ankò. On foulmoun ataké-y é yo arété-y. Anplisdisa, on bato koulé èvè-y é yo mété-y lajòl.

17. Dapré 2 Korentyen 4:16-18, ka ki ba Pòl fòs-la i té bizwen la pou andiré éprèv i té ka jwenn ?

¹⁷ Konm Pòl té ka konsantré-y asi èspérans a-y, sa ba-y fòs pou i pé sa andiré sé éprèv-la i té ka jwenn la (li 2 Korentyen 4:16-18). I di sé Korentyen-la kè menmsi kò a-y té ka « désann piti-a-piti », sa pa té ka dékourajé-y. Okontrè, sé douvan i té ka gadé. Pòl té k’ay viv an syèl-la é èspérans a-y té ka vin « dè plizanpli èstraòwdinè » é menmsi i pasé penn-é-péripési, sa pa té ayen koté èspérans-lasa. Konm i té ka pran tan réfléchi asi èspérans a-y, i té ka santi kè tout andidan a-y ‘té ka vin nèf jou apré jou’.

18. Kijan èspérans a Tihomir é fanmi a-y ka ba-yo fòs ?

¹⁸ Tihomir, sé on frè ki ka rété an Bilgari é èspérans a frè-lasa ka ba-y bon fòs. Ni kèlkè lanné dè sa, i pèd tifrè a-y adan on aksidan é sa fann tchè a-y. Non a ti frè a-y sé té Zdravko. Kijan i réyaji ? Li, madanm a-y é gason a yo mèt-yo ka imajiné jou-la sé mò-la ké résisité la. Mi sa i ka èspliké : « Nou ka éséyé imajiné jan sa ké pasé lè nou ké wouvwè Zdravko. Pa ègzanp, nou ka imajiné kikoté sa ké fèt, ki manjé nou ké préparé ba-y, kimoun nou ké envité pou vin fété sa èvè nou é tousa nou ké ni a rakonté-y anrapò  èvè sé dènyé jou-la ». Tihomir é fanmi a-y ka konsantré-yo asi èspérans a yo é sa ka ba-yo fòs pou yo andiré é pou yo kontinyé atann jou-la Jéova ké résisité frè a Tihomir.

19. Kijan ou pé fè èspérans a-w rantré pi fon an tèt a-w ? (gadé imaj-la osi).

¹⁹ Kijan ou pé fè èspérans a-w rantré pi fon an tèt a-w ? Pa ègzanp, si ou ni lèspwa dè viv asi latè, li é médité asi sa Labib ka di anrapò èvè paradi-la (Iz. 25:8 ; 32:16-18). Éséyé imajiné kijan lavi ké yé adan nouvo mond-la. Imajiné sé moun-la ou ké vwè la, imajiné sa ou ké tann é sa ou ké rèsanti. Pou ou pé sa imajiné kijan lavi ké yé adan paradi-la, ou pé gadé sé imaj-la ki adan piblikasyon an nou oben gadé sé klip vidéo la kon Le monde nouveau, Juste à notre porte ou Imagine ce jour. Si nou ka pran labitid imajiné jan lavi ké yé adan nouvo mond-la, sé difikilté-la nou ka jwenn la ‘ké pou on ti moman é yo ké léjè’ (2 Kor. 4:17). Grasa èspérans-la Jéova ka ba-w la, Jéova ké fè-w vin fò.

20. Lèwvwè nou ka santi-nou fèb, ka nou pé fè pou nou pé sa ni fòs ?

²⁰ Lèwvwè nou ka santi-nou fèb, ‘Bondyé pé ban-nou fòs’ (Sòm 108:13). Sé vré pas Jéova ka ban-nou tousa nou bizwen pou nou pé sa ni fòs. Alò lèwvwè ou bizwen fòs pou ou pé sa fè on biten kè yo mandé-w fè, oben pou ou pé sa andiré on éprèv ou ka jwenn oben pou ou kontinyé ni tchè-kontan, ka pou-w fè ? Priyé Jéova èvè tout tchè a-w é chèché dirèksyon a-y toupannan ou ka étidyé tousèl a-w. Aksèpté sé ankourajman-la frè é sè a-w ka ba-w la. Ondòt biten pou ou fè osi, sé mèt èspérans a-w byen fon an tèt a-w. Si ou fè tousa, alò ‘fòs a Bondyé ki plen glwa ké rann-vou puisan é ké ba-w tout fòs-la ou bizwen la pou-w andiré anplen, èvè pasyans é jwa’ (Kol. 1:11).