1. Kimoun ki édé pou fòwmé lasanblé a Filip ?

LÈ LAPÒT Pòl, Silas, Lik, é Timoté rivé a Filip, on koté sé Women-la té ka gouvèné, yo touvé enpé moun ki té vlé konnèt bon nouvèl-la plibyen. Sé té kat frè ki té ka travay rèd pou Jéova é yo édé pou fòwmé on lasanblé. É tout sé disip-la koumansé réini ansanm, pétèt aka on sè yo té ka kriyé Lidi, ki té byen enmé akéyi moun (Akt 16:40).

2. Ki éprèv lasanblé-lasa pa tadé a jwenn tibwen plita ?

² Men jenn ti-lasanblé-la pa tadé a jwenn difikilté. Satan pousé moun ki té hay lavérité aji èvè onlo vyolans pou anpéché sé krétyen fidèl la préché. Yo arété Pòl é Silas, yo ba-yo bon kou é yo mèt-yo lajòl. Apré Pòl é Silas sòti lajòl, yo ay vwè sé nouvo disip-la é yo ankourajé-yo. Aprésa, Pòl, Silas, é Timoté kité vil-la men i ka sanm sa Lik rété la. Kijan lasanblé-la, ki té toufré fòwmé, té k’ay fè ? Èvè èd a lèsprisen a Jéova, sé nouvo disip-la kontinyé travay rèd pou Jéova (Filip. 2:12). Pòl té fyèw dè yo toubònman ! Nou ka tou konprann poukwa !

3. An Filipyen 1:9-11, dè ki biten Pòl té ka palé adan priyè a-y ?

³ Apépré 10 an plita, Pòl maké on lèt pou lasanblé a Filip. Lè ou ka li lèt-lasa, ou ka rann-vou kont fasilman kè Pòl té enmé frè a-y toubònman. Mi sa i maké : « An anvi vwè-zòt toubònman pas, an ni on lanmou ki plen tandrès pou zòt, on lanmou ki kon ta Kris Jézi » (Filip.  1:8). I di-yo adan lèt a-y kè i té ka priyé ba yo. I mandé Jéova édé-yo pou lanmou a yo vin pi fò, pou yo pé sa vérifyé sa ki pi enpòwtan, é pou yo san pon défo. I mandé Jéova édé-yo osi pou yo pa fè lézòt tribiché, é pou yo pé sa pòté fwi a lajistis. Sèten ou ké dakò pou di kè pawòl sensè a Pòl pé pòté onlo pou nou jòdila. Donk, an-nou li sa Pòl maké ba sé Filipyen-la (li Filipyen 1:9-11). Apré, nou ké vwè dè ki lidé enpòwtan i palé é nou ké ègzaminé yochak yonn pa yonn.

4. a) Dapré sa 1 Jan 4:9, 10 ka di, kijan Jéova ka montré kè i enmé-nou fò ? b) Ki kalté lanmou fò-nou ni pou Jéova ?

⁴ Jéova montré tout lanmou i ni pou nou lè i voyé Gason a-y si latè mò pou péché an nou (li 1 Jan 4:9, 10). Lanmou-la Bondyé ni pou nou la ka pousé-nou enmé-y an rètou (Wom. 5:8). Ki kalté lanmou fò-nou ni pou Jéova ? Jézi réponn a kèsyon-lasa lè i di on farizyen : « Fò-w enmé Jéova Bondyé a-w èvè tout tchè a-w, èvè tout nanm a-w, é èvè tout entélijans a-w » (Mat. 22:36, 37). Nou vé enmé Jéova èvè tout tchè an nou. É nou vé kè lanmou an nou pou-y vin pi fò chakjou. Pòl di sé Filipyen-la kè fò lanmou a yo « kontinyé vin pi fò ». Ka nou pé fè pou lanmou an nou pou Bondyé vin pi fò ?

5. Kijan nou pé fè lanmou an nou vin pi fò ?

⁵ Nou bizwen konnèt Bondyé pou nou pé sa enmé-y. Labib ka di : « Si on moun pa ni lanmou, i pa aprann konnèt Bondyé, pas Bondyé sé lanmou » (1 Jan 4:8). Lapòt Pòl èspliké kè lanmou an nou pou Jéova ké vin pi fò si nou ka fè éfò pou konnèt-li plibyen é pou konprann sa i ka pansé (Filip. 1:9). Lè nou koumansé étidyé Labib, nou koumansé enmé Jéova menmsi nou poto’o konnèt toutbiten si-y. Men apré, pi nou aprann konnèt-li, pi lanmou an nou pou-y vin pi fò. Sé pousa sa enpòwtan toubònman kè nou pran labitid étidyé Labib é kè nou pran tan réfléchi si sa nou ka li osi (Filip. 2:16).

6. Dapré sa ki maké adan 1 Jan 4:11, 20, 21, ka nou pé fè pou lanmou an nou vin pi fò ?

⁶ Bondyé enmé-nou fò toubònman é fò lanmou-lasa pousé-nou enmé frè é sè an nou (li 1 Jan 4: 11, 20, 21). Pétèt nou ka pansé kè sa ké fasil dè enmé frè é sè an nou paskè nou ka adoré Jéova é kè nou ka éséyé imité-y. Anplisdisa, nou ka suiv ègzanp a Jézi ki té tèlman enmé-nou kè i bay vi a-y pou nou. Nou sav kè fò yonn enmé lòt, men défwa nou pé touvé sa rèd dè obéyi a komandman-lasa. An-nou gadé sa ki fèt adan lasanblé Filip.

7. Pòl ba Évodi é Sentich on konsèy. Ka konsèy-lasa ka aprann-nou ?

⁷ Évodi é Sentich té ka travay rèd pou Jéova é yo té ka travay ansanm-ansanm èvè lapòt Pòl. Men pétèt kè yo trapé dézagréman é yo pa té zanmi ankò. Adan lèt-la i maké la pou lasanblé a sé sè-lasa, Pòl nonmé non a Évodi é Sentich èspésyalman, pou ba-yo on konsèy ki té klè. I di-yo kè fò-yo té rété ini (Filip. 4:2, 3). Pòl santi kè sa té nésésè dè di tout lasanblé-la : « Tousa zò ka fè, kontinyé fè-y san plenn-zòt é san wouspété » (Filip. 2:14). Sèten kè konsèy-lasa édé Évodi é Sentich é tout lasanblé-la enmé frè é sè a yo plis ankò.

8. Ka ki té’é pé anpéché-nou enmé frè é sè an nou, é ka ki pé édé-nou ?

 ⁸ Dépawfwa, sa pé rèd pou nou dè enmé frè é sè an nou pas, menmjan ki Évodi é Sentich, sé yenki sé défo-la nou ka gadé. Chakjou noutout ka fè érè. Si nou ka kontinyé sonjé érè a lézòt, sa ké difisil pou nou enmé-yo. Pa ègzanp, si on frè ka oubliyé édé-nou pannan nou ka nétwayé Sal di Wayòm la, sa pé rivé a égri-nou. Men si nou koumansé ka sonjé tousa frè-la fè ki mové, nou ké pi égri ankò é nou pé’é enmé-y osi fò ki avan. Si ou ka touvé-w adan on sitiyasyon kon sila, sa té’é byen kè ou sonjé vérité-lasa : Jéova okouran a érè an nou é i okouran a ta frè an nou osi. Men magré nou enpawfè, i ka kontinyé enmé-noutout, ki nou ki frè an nou. Sé pousa, fò nou imité lanmou a Jéova é fò-nou kontinyé rété konsantré si bèl kalité a frè é sè an nou. Lè nou ka fè onlo éfò pou enmé frè é sè an nou, nou ka pi soudé ankò (Filip. 2:1, 2).

9. Pòl palé dè « sa ki pli enpòwtan » adan lèt-la i voyé ba sé Krétyen Filip la. Dè ki biten i té vé palé ?

⁹ Jéova gidé Pòl pou i té di sé krétyen Filip la : « vérifyé sa ki pli enpòwtan » (Filip. 1:10). Pawmi sa ki pli enpòwtan, nou ka touvé : fè sa ki fo pou non a Jéova vin pwòp, pwomès a-y ki ké réyalizé é lapé é linité adan lasanblé-la (Mat. 6:9, 10 ; Jan 13:35). Lè sé sé biten-lasa ki ni plis enpòwtans adan vi an nou, nou ka montré kè nou enmé Jéova.

10. Ka fò-nou fè pou Jéova vwè-nou konm dé moun ki san défo ?

¹⁰ Pòl di osi kè fò-nou « san défo ». Sa pa vé di fò-nou pawfè. Nou pé pa san défo a menm nivo ki Jéova. Men pou Jéova, nou san défo si nou ka fè tousa nou pé pou lanmou an nou vin pi fò é si nou ka vérifyé sa ki pli enpòwtan. Ni ondòt jan ankò nou pé montré lanmou an nou, sé lè nou ka fè tousa nou pé pou nou pa fè lézòt tribiché.

11. Poukwa fò-nou fè atansyon pou nou pa fè ponmoun tribiché ?

¹¹ Lè Jéova ka di kè fò-nou fè atansyon pou pa fè moun tribiché fò pa nou pran sa alaléjè. Kijan nou pé fè on moun tribiché ? Sa pé rivé si nou pa’a fè atansyon lè nou ka chwazi anmizman an nou, jan nou ka abiyé oben travay-la nou ké fè la. Pétèt nou pa fè ayen Jéova ka kondanné. Men si sé chwa-lasa ka choké konsyans a on moun, sa pé fè-y tribiché. Sa grav toubònman. Jézi di kè si sé akòz dè nou on moun ka pèd lanmityé a-y èvè Jéova, nou adan on sitiyasyon ki pi mové ki ta on moun yo jété an lanmè-la èvè on gwo wòch maré an kou a-y (Mat. 18:6).

12. Ka ègzanp a on frè ki té pyonyé ansanm èvè madanm a-y ka aprann-nou ?

¹² An-nou gadé kijan on frè ki té pyonyé ansanm èvè madanm a-y mèt an pratik sa Jézi di. Adan lasanblé a yo, té ni on misyé é madanm a-y ki té sòti pran batèm. Ki misyé-la ki madanm-la lévé adan on fanmi ki té rèd. Pou yo, sé Krétyen-la pa té dwèt ay sinéma menmsi pa té ni ayen ki mové adan fim-la. Lè yo vin sav kè frè-la é sè-la ki té pyonyé la ay vwè on fim, sa choké-yo. Kifè, sé pyonyé-la désidé arété ay gadé fim pannan on tan. Yo atann kè sé nouvo disip-lasa fè on travay asi konsyans a yo pou yo konprann pi byen ka ki bon é ka ki pa bon (Ébr. 5:14). Grasa bèl jès-la yo fè la,  sé pyonyé-la montré kè a pa yenki an bouch sèlman yo enmé nouvo frè é sè a yo (Wom. 14:19-21 ; 1 Jan 3:18).

13. Kijan nou té’é pé rivé a fè on moun péché ?

¹³ Ondòt jan nou pé fè on moun tribiché, sé si nou ka pousé-y fè on péché. Kijan sa té’é pé rivé ? An nou imajiné on sitiyasyon. Apré i byen lité, on étidyan a Labib réyisi arété bwè. I ka rann-li kont kè fò pa i jen bwè alkòl ankò. I ka fè onlo chanjman an vi a-y é i ka pran batèm. Kèktan apré, on frè ka envité-y adan on tifèt é i ka propozé-y tibwen alkòl. I ka di-y : « Men timal ou krétyen aprézan, ou ni lèspri sen a Jéova èvè-w. Lèspri sen ka pèwmèt-vou ni métriz. Alò si ou ni métriz ou pé’é bwè a dépasé ! » Nou ja tou konprann sa ki ké pasé si frè-la kouté mové konsèy-lasa é i woutonbé an alkòl !

14. Kijan réinyon an nou ka édé-nou apliké sa Jéova ka di-nou an Filipyen 1:10 ?

¹⁴ Grasa réinyon an nou, nou pé apliké sa Jéova ka mandé adan Filipyen 1:10 plizyè mannyè diféran. Prèmyèwman, sa nou ka vwè an réinyon ka montré-nou ka ki pi enpòwtan pou Jéova. Dézyèmman, nou ka vwè kijan pou nou mété an pratik sa nou ka aprann é sa ka pèwmèt-nou vin san défo. É twazyèmman, yo ka ankourajé-nou «ni lanmou é fè sa ki bèl » (Ébr. 10:24, 25). Pi frè é sè an nou ka ankourajé-nou, é pi lanmou an nou pou yo é pou Bondyé ka vin fò. Anplisdisa, si nou enmé Bondyé onlo é nou enmé frè é sè an nou osi, nou ké fè  tousa nou pé pou pa fè ponyonn adan yo tribiché.

15. Ka sa vé di « bénéfisyé anplen dè fwi a lajistis » ?

¹⁵ Pòl priyé Jéova èvè tout tchè a-y pou sé Filipyen-la té pé sa « bénéfisyé anplen dè fwi a lajistis » (Filip. 1:11). Asiré pa pétèt, adan «fwi a lajistis » ou ka touvé lanmou a yo pou Jéova é pou pèp a-y. Men anplisdisa, yo té ka palé dè fwa a yo an Jézikris é dè bèl èspérans-la yo té ni la. É tousa té ka fè pawti a fwi a lajistis osi. An Filipyen 2:15 nou ka touvé ondòt imaj. Pòl ka palé dè « kléré kon limyè adan mond-la ». Sé mo-lasa an plas a yo pas yo ka fè-nou sonjé jan Jézi té ka kriyé disip a-y : « limyè a mond-la » (Mat. 5:14-16). Anplisdisa, i mandé moun ki té ka suiv-li « fè disip », é i di-yo yo té’é vin « témwen [a-y] [...] jous dé koté ki pi lwen asi latè » (Mat. 28:18-20 ; Akt 1:8). Nou ka montré kè nou ka « bénéfisyé anplen dè fwi a lajistis » lè nou ka fè tousa nou pé adan travay-la ki pi enpòwtan la.

16. Kijan Filipyen 1:12-14 ka montré kè nou pé kléré kon limyè menmsi nou adan on sitiyasyon ki difisil ? (gadé prèmyé imaj a awtik-la).

¹⁶ Kèlkèswa sitiyasyon an nou, pa ni ayen ki pé anpéché-nou kléré kon limyè. Dépawfwa, on biten pé ka sanm sa i ké anpéché-nou palé dè bon nouvèl-la, alòskè an réyalité, sé pé on lokazyon pou nou préché. Pa ègzanp, lapòt Pòl té lajòl adan on kaz a Wòm lè i maké lèt a-y pou sé Filipyen-la. Men menmsi i té lajòl, sa pa anpéché-y préché ba sé gad-la é ba sé moun-la ki té ka vin vwè-y la. Pòl  préché rèd magré sitiyasyon a-y, é sa ba sélézòt frè é sè la konfyans é kouraj pou « yo pa pè palé dè pawòl a Bondyé » (li Filipyen 1:12-14 ; 4:22).

17. Kijan sé frè é sè la ka fè pou kontinyé préché menm lè yo ka jwenn difikilté ?

¹⁷ Onlo frè é sè an nou ka montré yo ni menm kouraj ki Pòl. Adan péyi-la yo ka viv la, yo pé pa préché an piblik oben dè kaz an kaz. Men yo ka touvé dòt mwayen pou palé dè bon nouvèl-la (Mat. 10:16-20). Adan yonn adan sé péyi-lasa, on rèsponsab a siwkonskripsyon ba sé frè-la on konsèy. I di-yo sa té’é byen si chakmoun ni « téritwa a-y ki ta-y » kivédi fanmi a-y, moun ki ka rété owa kaz a-y, kanmarad-lékòl a-y, kolèg-travay a-y é dòt moun yo konnèt. An 2 an sèlman, kantité lasanblé-la monté an flèch adan siwkonskripsyon-lasa. Pétèt la nou ka viv la, nou ka préché alèz an nou. Men ègzanp a frè é sè an nou ki toujou ka pòté mannèv pou touvé on jan pou yo préché ka aprann-nou on gran lèson. Nou osi, an-nou fè tousa nou pé pou préché, é nou pé sèten Jéova ké ban-nou fòs-la nou bizwen la pou nou kontinyé préché menmsi sa difisil (Filip. 2:13).

18. Ka fò-nou byen désidé a fè ?

¹⁸ Pi nou k’ay, é pi fò-nou byen désidé a suiv sé konsèy-la Pòl ba sé Filipyen-la. Fò-nou rivé konprann ki biten ki pi enpòwtan, fò-nou san défo, fò-nou fè tousa nou pé pou nou pa fè lézòt tribiché é fò-nou fè sa ki fo pou bénéfisyé anplen dè fwi a lajistis. A moman-lasa, lanmou an nou ké vin pi fò é nou ké onoré Pap’an nou Jéova, on Papa ki plen lanmou.