LAFWA ni on pouvwa èstraòwdinè. Pa ègzanp, i ka pèwmèt-nou « étenn tout flèch plen difé » kè Satan ka voyé pou éséyé détwi lanmityé an nou èvè Jéova (Éféz. 6:16). Grasa lafwa, nou pé rivé sipòté difikilté ki pé gwosè a on montangn. Jézi di disip a-y : « Si ou ni lafwa gwosè a on grenn moutad, ou ké pé di montangn-lasa : “Sòti-w la, ay an ba-la”, é i ké fè-y » (Mat. 17:20). Piskè lafwa pé rann-nou fò èspirityèlman, sa té’é byen si nou té ka chèché répons a sé kèsyon-lasa : Lafwa, ka sa yé ? Kijan sa ki andidan tchè an nou pé aji si fwa an nou ? Ka nou pé fè pou fwa an nou vin pli fò ? An kimoun pou nou ni fwa ? (Wom. 4:3).

Lafwa, a pa enki kwè an Bondyé é adan sa Labib ka di. Men sé plis ki sa. Pas lè ou rété gadé, « sé démon-la ka kwè [kè Bondyé ka ègzisté] osi é lafrous ka pran yo » (Jak 2:19). Alò, lafwa, ka sa yé ?

Pou èspliké ka ki lafwa, Labib ka palé dè 2 biten. Prèmyèwman, lè nou ni lafwa, « sé lè nou plis ki sèten kè sa nou ka èspéré ké rivé » (Ébr. 11:1a). On moun ki ni lafwa sèten a san pou san kè tousa Jéova ka di sé vérité é kè, asiré pa pétèt, sa ké fèt. Pa ègzanp, Jéova di sé Izraélit-la : « Ès on jou zò ké pé koupé alyans-la an fè la pou lajouné é alyans-la an fè la pou lannuit, pou anpéché lajouné é lannuit vin lè pou yo vin ? Anponjan ! Menmjan-la, ayen pé’é pé koupé alyans-la an fè èvè David sèwvitè an mwen » (Jér. 33:20, 21). Jou po’o jen pa wouvè é solèy toujou ka kouché. Ès sa ja rivé-w dè mandé-w si Solèy ké lévé dèmen maten é si i ké kouché ? Anponjan ! Sa té’é vlé di pa ni, ni lajouné ni lannuit ankò. Ni sèwten lwa Jéova mété adan lanati ki ka fè kè Latè pò’ò jen pa touné si-y menm é i pò’ò jen pa touné alantou a Solèy-la. É ou sèten sa pé’é jen arété. Alò si ou ni konfyans adan sé lwa natirèl lasa, ou pa’a di fò’ò ni konfyans a san pou san kè Kréyatè a sé lwa-lasa kapab dè fè sa i pwomèt ? (Iz. 55:10, 11 ; Mat. 5:18).

Dézyèmman, lafwa sé « on prèv ki klè ki ka fè-nou kwè adan biten nou pa’a vwè ». Labib ka di kè lafwa sé « on prèv ki klè », ou « on prèv solid » ki ka montré kè sèwten biten nou pa’a vwè ka ègzisté poubon (Ébr. 11:1b ; nòt). Kijan sa ? Imajiné kè on timoun ka mandé-w : « Kijan nou pé sav kè lèr-la ki alantou an nou la ka ègzisté ? » Menmsi ou po’o jen vwè lèr-la, sèten ou ké palé timoun-la dè biten ki ka montré kè lèr-la ka ègzisté. Pa ègzanp ou ké palé-y dè jan nou ka rèspiré oben dè déga van a siklòn pé fè. Dépi timoun-la ké sèten dè sa ou èkspliké-y la, i ké dakò pou di kè menmsi i pa’a vwè sèwten biten, yo ka ègzisté poubon. Menmjan-la, sé prèv solid ki ka pèwmèt on moun ni lafwa (Wom. 1:20).

Piskè sé prèv solid ki ka pèwmèt on moun ni lafwa, fò nou ni « on konésans ègzak a lavérité » pou nou pé sa ni lafwa (1 Tim. 2:4). Men sa pa ka sifi. Mi sa lapòt Pòl maké : « Sé èvè tchè an nou kè nou ka montré nou ni lafwa » (Wom. 10:10). Sé vré, fò-nou kwè adan sé vérité-la ki an Bib-Ia, men  fò-nou ba-yo on gran valè osi. Sa ké pousé-nou montré kè nou ni lafwa é nou ké aji kon Bondyé vlé (Jak 2:20). Lè on moun pa ni on rèkonésans ki sensè pou sé vérité-la ki an Bib-la, menmsi i ni prèv solid anba zyé a-y, i pa jen oblijé tonbé dakò èvè yo, pas ni sèwten lidé i vé pa woté an tèt a-y oben i vé fè sa i vé (2 Pyè 3:3, 4 ; Jid 18). Sé pousa, antan a Labib, onlo moun té ka vwè sé mirak-la men a pa pousa yotout té ni lafwa (Nonb 14:11 ; Jan 12:37). Lèspri a Bondyé ka pwodui lafwa yenki an tchè a moun ki enmé lavérité é ki hay mansonj (Gal. 5:22 ; 2 Tés. 2:10, 11).

Ni sèwten moun ki té ni on fwa èstraòwdinè. David, sé yonn adan yo (Ébr. 11:32, 33). Men tout fanmi a-y pa té ni menm fwa ki-y. Pa ègzanp, lè Golyat té ka provoké lawmé a Izrayèl, sa té ka anbété David toubònman. Men lè Élyab, pi gran frè a-y vwè-y, i enn tonbé an zo a-y. Sa té ka montré kè Élyab pa té ni asé fwa (1 Sam. 17:26-28). Ponmoun pa’a fèt èvè lafwa, é a pa paskè fanmi an nou ni-y kè nou ni-y osi. Dayè, fwa-la David té ni la té ka vin dè lanmityé a-y èvè Bondyé.

Adan Sòm 27 la, David ka di-nou kijan i fè pou ni on fwa fò konsa (v. 1). I té ka pran tan réfléchi asi sa i té ja viv é asi jan Jéova té ja pwotéjé-y kont lènmi a-y (v. 2, 3). Jéova té pran dispozisyon pou moun té adoré-y é David té kontan-yo toubònman (v. 4). David té ka adoré Bondyé adan tabèwnak-la èvè dòt sèwvitè a Bondyé (v. 6). I té ka priyé Jéova pou vin pi bon zanmi èvè-y (v. 7, 8). É i té vlé Bondyé montré-y ki chimen pou i té pran (v. 11). Tèlman Lafwa té ni enpòwtans pou David, mi sa i di : « Ola an té’é yé si an pa té sèten kè an té’é bénéfisyé dè bonté a Jéova toutotan kè an vivan ? » (v. 13).

Ou pé ni on fwa kon ta David si ou ka fè éfò pou-w ni menm labitid ki-y é si ou ka pansé menmjan ki-y. Sòm 27 la ka palé dè jan i té ka fè. Sé konésans ègzak la ki ka pèwmèt on moun ni lafwa. Donk pi ou ké étidyé Pawòl a Bondyé é piblikasyon an nou é pi sa ké fasil ba-w dè manifèsté kalité-lasa ki ka touvé-y adan fwi a lèspri sen la (Sòm 1:2, 3). Lè ou ka étidyé, pran tan réfléchi asi sa ou li. Si ou ka pran tan réfléchi asi sa ou ka li, ou ké ni plis rèkonésans pou Jéova. Pi ou ké ni rèkonésans pou Jéova é pi ou ké anvi montré kè ou ni lafwa : ou ké ay adoré-y adan sé réinyon a lasanblé-la, é ou ké palé lézòt dè èspérans a-w (Ébr. 10:23-25). Ondòt jan ankò ou pé montré ou ni lafwa, sé lè ou ka kontinyé ‘priyé é lè ou pa’a jen lagé’ (Lik 18:1-8). Sé pousa, fò-w ‘priyé Jéova toutlè’, é lè ou ka fè-y, fò-w sèten kè ‘i ka sousyé-y dè-w’ (1 Tés. 5:17 ; 1 Pyè 5:7). Lafwa ka pousé-nou aji é lè nou ka aji, sa ka rann fwa an nou pli fò (Jak 2:22).

Avan jou-la i mò la, lavèy oswa, Jézi di disip a-y : « Fò-zò montré kè zò ni fwa an Bondyé ; fò-zò montré kè zò ni fwa adan mwen osi » (Jan 14:1). Donk non sèlman fò-nou ni fwa an Jéova, men fò-nou ni fwa an Jézi osi. Kijan nou pé montré kè nou ni fwa an Jézi ? An-nou vwè 3 fason nou pé fè sa.

Prèmyèwman, fò-w konsidéré ranson-la konm on kado Jéova fè-w pèwsonèlman. Lapòt Pòl di : « An ka viv [...] grasa fwa-la an ni la adan Gason a Bondyé, ki té enmé-mwen é ki bay vi a-y pou mwen » (Gal. 2:20). Si ou ni fwa an Jézi, ou sèten a san pou san kè ranson-la sé ba-w osi, é kè grasa-y Bondyé pé padonné péché a-w. Anplisdisa, ou sèten kè ranson-la ka pèwmèt-vou ni lèspérans dè viv pou touttan é kè sé pli bèl mannyè Bondyé ka montré-w kè i enmé-w (Wom. 8:32, 38, 39 ; Éféz. 1:7). Sa ké rann-vou pli fò, sa ké anpéché-w santi-w koupab é ou pé’é pansé ou pa vo ayen (2 Tés. 2:16, 17).

Dézyèmman, priyé Jéova pou pé sa vin pli pré ay, é toupannan ou ka fè sa, sonjé kè sé sakrifis a Jézi ki fè si sa posib. Grasa ranson-la, nou pé priyé Jéova « èvè konfyans, pou i ni pityé dè nou é pou nou pé ni favè a-y kè nou pa mérité lè nou bizwen èd » (Ébr. 4:15, 16 ; 10:19-22). Grasa lapriyè, nou ké ni plis volonté pou lité kont tantasyon ki pé pousé-nou péché (Lik 22:40).

Twazyèmman, fò-w fè sa Jézi ka di-w. Lapòt Jan maké : « Sila ki ka montré i ni fwa adan Gason-la ni lavi étèwnèl. Sila ki pa ka kouté Gason-la pé ké ni lavi, men i ké sibi kòlè a Bondyé » (Jan 3:36). Jan ka di kè ni lafwa é dézobéyi, sé dé biten ki pa k’ay ansanm. Kifè, lè ou ni lafwa an Jézi savédi ou ka fè sa i ka di. Ou ka fè sa i ka di-w lè ou ka suiv « lwa a Kris », kivédi tousa i anségné é tousa i mandé-nou fè (Gal. 6:2). Ou ka fè sa i ka di-w osi lè ou ka pran dirèksyon-la i ka ba-w la grasa « èsklav fidèl é prévwayan la » (Mat. 24:45). Si ou ka fè sa Jézi di, ou ké ni fòs pou sipòté éprèv ki fòs a on tanpèt (Mat. 7:24, 25).

On jou, on misyé di Jézi : « An ni lafwa ! Édé-mwen a ni plis fwa la ou ka vwè an mérité fwa ! » (Mawk 9:24). Misyé-lasa té ja ni tibwen fwa, men limenm a-y rèkonnèt i té bizwen plis fwa ankò. Kon misyé-lasa, on moman an vi an nou, noutout ké bizwen ni plis fwa. É dépi aprézan nou pé fè fwa an nou vin pi fò. Kon nou vwè, nou pé fè sa si nou ka étidyé Bib-la é si nou ka pran tan réfléchi asi-y. Sa ké fè-nou ni plis rèkonésans pou Jéova. Nou pé fè fwa an nou vin pli fò osi, lè nou ka adoré Jéova ansanm èvè frè é sè an nou, lè nou ka palé dè èspérans an nou èvè moun ki alantou an nou é lè nou ka priyé akontinyé. Anplisdisa, lè nou ka fè éfò pou fwa an nou vin pi fò, nou ké pé ni pli bèl rékonpans ki ni. Dayè, Labib ka di-nou : « Zòt kè an byen enmé, fè fwa a zòt ki sen toubònman vin pli solid, [...] pou rété adan lanmou a Bondyé » (Jid 20, 21).