1. Ka sé krétyen-la dwètèt fè pou fin kous-la pou ni lavi ?

SÉ KRÉTYEN-LA ka kouri on kous pou ni lavi. Ki nou sòti koumansé kouri oben ki nou ja koumansé kous-la dépi plizyè lanné, fò-nou kontinyé kouri jiskatan nou pasé lign-darivé-la. Konsèy-la lapòt Pòl ba sé krétyen Filip la pé ankourajé-nou a fin kous-la. O prèmyé syèk, sèwten frè é sè adan lasanblé-lasa té ja ka sèvi Jéova dépi plizyè lanné lè yo risivwè lèt-la Pòl voyé ba yo la. Yo té ja ka sèvi Jéova fidèlman, men Pòl fè-yo sonjé kè yo bizwen kontinyé kouri èvè andirans. I té vlé yo imité ègzanp-la i lésé ba yo la, kivédi « kouri pou ni rékonpans-la » (Filip. 3:14).

2. Poukwa konsèy-la Pòl ba sé krétyen Filip la té ka tonbé byen toubònman ?

² Konsèy-la Pòl ba sé krétyen Filip la té ka tonbé byen toubònman. Yo té sòti fòwmé lasanblé-lasa, men sé krétyen-la té ja ka sibi pèwsékisyon. Tout biten koumansé an lan 50, lè Jéova té mandé Pòl é Silas « vin an Masédwàn ». Yo obéyi é yo ay a Filip pou préché bon nouvèl-la (Akt 16:9). An vil-lasa, yo kontré on madanm non a-y sé té Lidi. É « Jéova wouvè tchè a-y byen gran » pou i kouté bon nouvèl-la (Akt 16:14). Aprésa, li é tout moun ki té ka rété akaz a-y pran batèm. Men Dyab-la pa té ka dòmi, i koumansé ba-yo gaz onfwamenm. Sé boug-la ki té an vil-la trenné Pòl é Silas douvan sé chèf a vil-la é yo manti anlè yo. Yo di kè yo té ka mété enpé pwoblèm adan vil-la. Kifè, yo ba Pòl é Silas bon kou, yo mété-yo lajòl é plita, yo mandé-yo sòti an vil-la (Akt 16:16-40). Ès Pòl é Silas abandoné ? Anponjan ! É sé frè é sè a nouvo lasanblé-la ? Ka yo fè ? Yo lésé on bèl ègzanp ban nou, paskè yo osi, yo andiré ! Sèten ègzanp-la Pòl é Silas lésé ba yo la ankourajé-yo toubònman.

3. Ka Pòl byen konprann, é ki kèsyon nou kay ègzaminé ?

³ Pòl pa té pati pou abandoné (2 Kor. 4:16). Men i té sav  kè pou kontinyé kouri kous-la jiskatan i rivé an bout a-y, fò i té rété konsantré anlè òbjèktif-la. Ka ègzanp a Pòl ka aprann-nou ? A épòk an nou, ni onlo moun ki andiré fidèlman magré difikilté yo jwenn. Ka ègzanp a yo ka aprann-nou ? É kijan èspérans an nou pé édé-nou pou nou pa jen abandoné ?

4. Pòl kontinyé travay pou Jéova kèlkèswa sitiyasyon a-y. Kijan i fè sa ?

⁴ Gadé tousa Pòl té ka fè lè i maké lèt-la i voyé ba sé krétyen Filip la. I té fèmé adan on kaz ki té a Wòm. I pa té pé sòti pou i ay préché. Magrésa, i toujou kontinyé préché ba moun ki té ka vin vwè-y é i ékri plizyé lèt ba déotwa lasanblé ki té lwen. Menmjan-la, jòdijou, onlo krétyen ki pa annéta sòti akaz a yo ka fè tousa yo pé pou pawtajé bon nouvèl-la èvè moun ki ka vin vwè-yo. Anplisdisa, yo ka ékri lèt pou ankourajé moun nou pa’a rivé jwenn lè nou ka préché dè kaz an kaz.

5. Dapré sa nou ka touvé an Filipyen 3:12-14, ka ki édé Pòl rété konsantré anlè òbjèktif a-y ?

⁵ Pòl pa té ka lésé pon biten i fè dan lèpasé, ki i té bon ki i té mové, distrè-y pou anpéché-y sèvi Jéova. An réyalité, i di kè fò i té « oubliyé sa ki dèyè » pou i té pé « kouri dèyè sa ki douvan », é sé konsa i té’é pé rivé fin kous-la (li Filip. 3:12-14). Ki kalté biten ki té pé distrè Pòl ? Prèmyèwman, Pòl sé té on granjan dè moun adan rèlijyon a sé Juif-la é i fè onlo biten adan rèlijyon-lasa avan i té vin krétyen. Magrésa, pou-y, sé biten-lasa sé té « on pil zòdi » (Filip. 3:3-8). Dézyèmman, menmsi i té ka santi-y koupab pas i té fè sé krétyen-la soufè, i pa lésé sé santiman-lasa anpéché-y sèvi Jéova. É twazyèmman, i pa jen mété an tèt a-y kè i té ja travay asé pou Jéova é kè i té’é pé pran rètrèt a-y. Pòl fè onlo adan prédikasyon-la magré tousa i andiré. I fè lajòl, yo ba-y bon kou, yo lapidé-y, i fè nofraj, i té konnèt ka sa vlé di lè ou pa ni asé manjé é lè ou pa ni lenj (2 Kor. 11:23-27). Men kèlkèswa sa Pòl té ja fè, é kantité soufè i té ja soufè, i té sav fò-y té kontinyé sèvi Jéova. Fò-nou fè menm biten-la.

6. Fò-nou oubliyé « sa ki dèyè ». Ka sa pé yé ?

⁶ Ka nou pé fè pou « oubliyé sa ki dèyè » kon Pòl té ka fè ? Ni onlo adan nou ki ka santi-yo koupab parapòt a péché yo fè avan. Si sé ka an nou, nou té’é pé fè rèchèch asi ranson-la lè nou ké ka étidyé tousèl an nou. Si nou ka pran tan étidyé sijé-lasa, ki vréman ankourajan, si nou ka réfléchi asi-y é si nou ka priyé anrapò èvè-y, sa pé édé-nou pa santi-nou koupab initilman. Pétèt nou pé’é jen santi-nou koupab ankò parapòt a péché Jéova ja oubliyé. An-nou vwè ondòt lèson ègzanp a Pòl pé aprann-nou. Pétèt sèwten adan nou lésé on travay ki té’é pé fè-yo gangné onpakèt lajan pou sèvi Jéova plis. Si nou adan ka-lasa, pétèt fò-nou oubliyé sa ki dèyè, kivédi fo pa nou anvi viré dèyè sa nou té’é pé ni (Nonb 11:4-6 ; Ékl. 7:10). « Sa ki dèyè » pé vé di osi sa nou fè adan sèwvis a Jéova oben difikilté nou andiré avan. On biten ki sèten, sé kè lè nou ka réfléchi asi sa Jéova ja fè ban nou, nou pé fè lanmityé an nou èvè Pap’an nou vin pi fò. Men fo pa nou jen mèt an tèt an nou kè nou ja fè asé pou Jéova (1 Kor. 15:58).

7. Sèlon 1 Korentyen 9:24-27, ka nou bizwen pou gangné kous-la pou ni lavi ? Bay on ègzanp.

⁷ Pòl byen konprann sé pawòl-la Jézi di la : « Fè gwo éfò » (Lik 13:23, 24). Pòl  té sav kè fò i té fè gwo éfò tout vi a-y menmjan ki Jézi. Sé pousa i di kè vi-la nou ni la antankè krétyen kon on kous (li 1 Korentyen 9:24-27). On moun ki ka kouri on kous dwètèt rété konsantré asi lign-darivé-la é fo pa i lésé ayen distrè-y. Pa ègzanp, kous-la pé ka pasé adan on lari ki plen magazen é ki plen dòt biten ki pé rivé a distrè sé kourè-la. Ou ka di kè toupannan on moun ka kouri on kous, i ké arété pou gadé sa ki adan sé magazen-la ? I pé’é jen fè sa si i vlé gangné ! Adan kous-la nou ka kouri la pou nou ni lavi, nou osi fò-nou évité sa ki pé distrè-nou. Si nou ka rété konsantré anlè òbjèktif an nou é si nou ka fè gwo éfò pou sèvi Jéova, menmjan ki Pòl, nou ké gangné pri-la !

8. Nou k’ay ègzaminé 3 pwoblèm nou pé kontré. Kilès la ?

⁸ An-nou ègzaminé 3 pwoblèm ki pé ralanti-nou. Prèmyé-la, sé lè désèrten biten pa’a fèt a moman-la nou té ka èspéré la. Dézyèm-la, sé lè fòs an nou ka diminyé. É dènyé-la, sé lè pwoblèm an nou pa’a fin menm. Ni onlo moun ki andiré sitiyasyon kon séla. Ègzanp a yo ké aprann-nou onlo biten (Filip. 3:17).

9. Lè nou ka atann on biten ki pa’a vin a moman-la nou té ka èspéré la, ki éfé sa pé ni asi nou ?

⁹ Lè on biten pa’a fèt a moman-la nou té ka èspéré la. Nou ka atann sé bon biten-la Bondyé pwomèt-nou la, é sa toutafè nòwmal. Lè Abakik di Jéova kè i anvi vwè-y fin èvè tout méchansté-la ki té ni la an Jida, Jéova di-y « kontinyé atann-li » (Abak. 2:3). Men lè sa nou ka atann pa’a vin a moman-la nou té ka èspéré la, sa pé rivé a fè-nou pèd balan. Sa pé jous dékourajé-nou (Pwov. 13:12). Sé sa ki rivé sèwten frè koté 1914. A moman-lasa, onlo krétyen wen konpranndèdi yo té’é rèsèvwa rékonpans a yo an syèl-la an 1914. Men a pa sa ki pasé. Kijan séla ki rété fidèl la rivé jéré sitiyasyon-lasa ?

10. Lè sa yo té ka atann pa fèt a moman-la yo té ka èspéré la, ka on frè é madanm a-y fè ?

¹⁰ An-nou pran ègzanp a 2 krétyen  fidèl ki jwenn pwoblèm-lasa. Frè Royal Spatz pran lèbatèm an 1908 a 20 an. I té sèten kè sa pa té’é tadé pou i rèsèvwa rékonpans a-y an syèl-la. Kifè, lè an 1911, i mandé on sè, non a-y sé Pearl, si i té vlé mayé èvè-y, i di-y konsa : « Ou sav ka ki ké rivé an 1914 ? Donk si ou dakò pou nou mayé, an-nou pa tadé ! » Ès frè-la é madanm a-y abandoné kous a yo lèwvwè yo pa rèsèvwa rékonpans a yo an syèl-la an 1914 ? Non, sa ki té pli enpòwtan pou yo, a pa té rékonpans-la an syèl-la, men sé té plito sèvi Jéova fidèlman. Yo té byen désidé a kouri èvè andirans pou gangné kous-la. É, sé sa yo fè. Royal é Pearl kontinyé sèvi Jéova é yo rété fidèl pannan plizyè lanné, jiskatan yo mò. Sèten ou ka atann kè moman-la rivé pou Jéova lavé non a-y, pou i montré kè sé-y ki andwa gouvèné é pou i réyalizé tout pwomès a-y. Ou pé sèten kè tousa ké rivé a moman-la Jéova chwazi la. Jiskatan sa rivé, an-nou rété okipé ka sèvi Bondyé. Lè on biten pa’a fèt a moman-la nou té ka èspéré la, an-nou pa jen lésé sa dékourajé-nou oben ralanti-nou.

11-12. Poukwa nou pé kontinyé fè douvan menmsi fòs an nou ka diminyé ? Bay on ègzanp.

¹¹ Lè nou pa ni fòs kon avan. On moun ki ka kouri on kous bizwen onlo énèrji. Pawkont nou, menmsi fòs an nou ka diminyé, ni mwayen nou kontinyé pwogrésé é vin pli fò èspirityèlman. An réyalité, ni onlo adan nou ki pa ni fòs kon avan men ki toujou ka kontinyé ba Jéova sa yo ni dè méyè (2 Kor. 4:16). Pa ègzanp, lè Frè Arthur Secord * té ni 88 an, sa té ja ka fè 55 an kè i té ka sèvi adan Bétèl-la. Men konnyéla, i pèd fòs é santé a-y pa flanbo. On jou, on enfirmyèz vin owa kouch a-y pou okipé dè-y. Madanm-la gadé-y é i di-y jantiman : « Frè Secord, kò-lasa ja fè onlo onlo biten pou Jéova. » Men li Arthur, pa té ka konsantré-y asi sa i té fè avan. I gadé-y, i souri ba-y, é i réponn : « Wi, ou ni rézon a-w. Men a pa sa nou té ka fè ki enpòwtan. Sa ki enpòwtan, sé sa nou ka fè konnyéla. »

¹² Pétèt kè ou pasé lanné é lanné ka sèvi Jéova é kè konnyéla, santé-la pa’a pèwmèt ankò pou fè kon ou té ka fè avan. Si ou adan ka-lasa, pa dékourajé-w. Ou pé sèten kè, non sèlman Jéova ka sonjé tousa ou ja fè, men anplis i ni rèkonésans pou sa (Ébr. 6:10). É sonjé kè a pa kantité biten nou ka fè pou Jéova ki ka montré kijan nou enmé-y. An réyalité, nou ka montré fondè a lanmou an nou pou  Jéova, lè nou ka rété pozitif é lè nou ka fè tousa kò-la ka pèwmèt-nou fè (Kol. 3:23). Jéova ka konprann limit an nou é i pa’a mandé plis ki sa nou pé bay (Mawk 12:43, 44).

13. Ka ki rivé Anatoly é Lidya, é kijan ègzanp a yo ka ankourajé-nou a kontinyé fè douvan, menmsi nou ka jwenn onlo éprèv ?

¹³ Lè pwoblèm an nou pa’a fin menm. Sèwten sèwvitè a Jéova andiré onpakèt éprèv é yo sibi pèwsékisyon pannan plizyè lanné. An-nou pran ègzanp a Anatoly Melnik *. Lè Anatoly té ni 12 an, yo arété papa-y, yo mété papa-y lajòl é aprésa yo voyé papa-y jis an Sibéri a pliski 7 000 kilomèt a fanmi a-y ki té an Moldavi. On lanné apré, yo voyé Anatoly, manman-y, granpè a-y é granmè a-y an Sibéri osi. Onlè, yo lésé-yo ay réinyon adan ondòt vilaj, men fò-yo té maché 30 kilomèt an nèj-la é té ka fè fwèt oséryé menm. Plita, Anatoly fè 3 an jòl. I té lwen madanm a-y Lidya, é lwen tifi a-yo, ki té ni 1 an. Magré tout sé éprèv-la i andiré la, Anatoly é fanmi a-y kontinyé sèvi Jéova fidèlman. Aprézan, a 82 an, Anatoly ka sèvi adan Komité a filyal a Lazi santral. Kon Anatoly é Lidya, an-nou fè tousa nou pé pou sèvi Jéova é an-nou kontinyé andiré kon nou té ka fè-y avan (Gal. 6:9).

14. Pòl byen konprann kè i té ni on biten a fè pou-y té rivé atenn òbjèktif a-y. Ki biten ésa ?

¹⁴ Pòl té sèten kè i té’é pé fin kous-la é pasé lign-darivé-la. Konm sé té on krétyen wen, i té présé pou i té rèsèvwa rékonpans a-y, kivédi « lavi an syèl-la ». Men pou atenn òbjèktif-lasa, i byen konprann kè fò-y té kontinyé « kouri » (Filip. 3:14). Pòl pran on bèl ègzanp pou sé krétyen Filip la pou édé-yo rété konsantré anlè òbjèktif a yo.

15. Pòl pran ègzanp a on moun ki sitwayen pou ankourajé sé krétyen Filip la kontinyé « kouri ». Kijan i fè sa ?

¹⁵ Pòl fè sé krétyen Filip la sonjé kè sé an syèl-la yo té’é viv (Filip. 3:20). Men poukwa fò-yo té sonjé sa ? An tan-lasa, onlo moun té vlé vin sitwayen Women pas yo té ni onlo entéré adan sa *.  Men, sé krétyen wen la té sitwayen a on gouvènman ki lontan méyè, é ki té’é pwokiré-yo lontan plis. Si Bondyé chwazi on moun pou i ay an syèl-la, i adan on sitiyasyon ki lontan pli entérésan ki on moun ki ka vin sitwayen Women. Sa pa ni ayen a vwè menm ! Sé pousa, Pòl ankourajé sé krétyen Filip la a ‘aji kon on sitwayen, on mannyè ki annakò èvè bon nouvèl-la asi Lèkris’ (Filip. 1:27, nòt). Jòdijou, sé krétyen wen la ka ban-nou on bèl ègzanp pas yo ka rété konsantré asi òbjèktif a yo, ki sé dè viv pou touttan an syèl-la.

16. Dapré sa nou ka li an Filipyen 4:6, 7, ka fò-nou kontinyé fè, ki nou k’ay viv an syèl, ki nou k’ay viv asi latè ?

¹⁶ Ki nou ni lèspérans dè viv pou touttan an syèl-la, ki nou ni lèspérans dè viv pou touttan adan paradi-la si latè, fò-nou kontinyé kouri pou ni rékonpans-la. Kèlkèswa sa nou ka andiré, fò pa nou gadé biten ki dèyè; é fò pa nou lésé ayen anpéché-nou sèvi Jéova (Filip. 3:16). Pètèt kè sa ka fè lontan nou ka atann kè pwomès a Jéova réyalizé. Pétèt kè nou pa jenn ankò é kè nou pa ni fòs kon avan. Pétèt osi nou andiré onpakèt éprèv é yo pèwsékité-nou pannan plizyè lanné. Kèlkèswa sitiyasyon an-nou, fò ‘pa nou enkyété-nou dè ayen’. Okontrè, an-nou fè Bondyé konnèt sa nou vlé é an-nou sipliyé-y, é i ké ban-nou lapé ki ka dépasé tousa nou pé imajiné (li Filipyen 4:6, 7).

17. Ka nou ké vwè adan awtik-la ki ka vin la ?

¹⁷ Menmjan on kourè ka rété konsantré asi fen a kous-la lè i ka rivé toupré lign-darivé-la, menmjan-la, an-nou rété konsantré anlè òbjèktif an nou : fin kous-la nou ka kouri la pou nou ni lavi. Nou vlé kontinyé fè sa konnyéla, èvè fòs-la ki ka rété-nou la é sèlon sa sitiyasyon an nou ka pèwmèt. Ka pou nou fè pou nou kontinyé kouri èvè andirans ? Adan awtik-la ki ka vin la, nou ké vwè kijan nou pé sav ka fò-nou mété an prèmyé adan vi an nou é kijan nou pé « vérifyé sa ki pli enpòwtan » (Filip. 1:9, 10).