1. Ka noutout té’é swété pou fanmi an nou ?

MI SA on sè, non a-y sé Pauline * ka di : « Dépi an vin konnèt lavérité, an té vlé tout fanmi an mwen viv an Paradi-la èvè mwen. Sa an té vlé menm, sé kè mari an mwen, Wayne, é tigason an nou sèvi Jéova ansanm èvè mwen. » Ès ni moun an fanmi a-w ki po’o konnèt é ki po’o enmé Jéova ? Sèten ou ka rèsanti menm biten ki Pauline é ou té’é vlé vwè-yo owa-w ka sèvi Jéova ansanm èvè-w.

2. A ki kèsyon nou k’ay réponn adan awtik-lasa ?

² Nou pé pa fòsé fanmi an nou aksèpté bon nouvèl la pou yo pé sa ni lavi étèwnèl. Men ni mwayen nou ankourajé-yo pou yo lésé mésaj-la ki an Bib-la rantré an lèspri a yo é an tchè a yo (2 Tim. 3:14, 15). Poukwa nou fò-nou préché ba fanmi an nou ? Poukwa fò-nou fè éfò pou konprann sa yo ka rèsanti ? Ka nou pé fè pou édé fanmi an nou enmé Jéova kon nou ? Ka tout sé frè é sè a lasanblé-la pé fè pou édé-nou ?

3. Sèlon 2 Pyè 3:9, poukwa fò-nou préché pou fanmi an nou ?

³ Talè, Jéova ké détwi mond méchan-lasa. É sé yenki moun ki « ni mantalité-la ki fo la pou ni lavi étèwnèl » ki ké rété vivan (Akt 13:48). La nou ka rété la, nou ka pasé onpakèt tan é nou ka fè onlo éfò pou préché ba moun nou pa menm konnèt. Donk sa toutafè natirèl si nou anvi préché ba moun ki an fanmi an nou pou yo pé sa sèvi Jéova ansanm èvè nou. Pap’an nou, Jéova, ki plen lanmou, « vé  pa ponmoun détwi, men i vé kè toutmoun rivé rèpanti-yo » (li 2 Pyè 3:9).

4. Ki érè nou pé rivé a fè lè nou ka préché pou fanmi an nou ?

⁴ Fò pa nou oubliyé kè ni on bon métòd é on mové métòd pou nou fè mésaj-la ki ka sové la pasé. Pa ègzanp, pétèt lè nou ka préché pou on moun nou pa konnèt, nou ka palé ba-y jantiman, alòskè lè nou ka préché ba fanmi an nou, sa pé rivé kè nou two dirèk.

5. Ka pou nou pa jen oubliyé avan nou ay palé dè lavérité èvè fanmi an nou ?

⁵ Ni onlo adan nou, ki ka règrété jan yo palé, prèmyé fwa yo préché ba fanmi a yo. É franchman, nou té’é préféré fè sa ondòt jan. Lapòt Pòl ba sé krétyen-la konsèy-lasa : « Fò pawòl a zòt toujou ni dousin adan-y, fò yo sézonné èvè sèl, pou sav kijan pou zòt réponn chakmoun » (Kol. 4:5, 6). Sa té’é byen kè nou sonjé konsèy-lasa lè nou ka préché ba fanmi an nou. Sinon, nou pé rivé a farouché-yo olyé nou ba-yo anvi kouté-nou.

6-7. Bay on ègzanp ki ka montré kè sa enpòwtan kè sé krétyen-la mèt-yo an plas a moun-la yo mayé èvè-y la si i pa’a sèvi Jéova.

⁶ Mété-w an plas a yo. Talè-la nou palé dè Pauline. Mi sa i ka di : « Lè an té sòti konnèt lavérité, sé enki dè Labib é dè Bondyé an té vlé palé èvè mari an mwen. Nou pa jen té ka ni on konvèwsasyon nòwmal. » Men, Wayne, mari a Pauline, pa té konnèt granzafè asi Labib é i pa té ka konprann ayen adan sa Pauline té ka di-y. Pou-y, onsèl biten ki té antèt a Pauline sé rèlijyon a-y. I té pè pas i konpranndèdi sé adan on sèkt danjéré madanm a-y rantré é kè yo té’é pran tèt a-y.

 ⁷ Pauline ka rèkonnèt kè, pannan on tan, sé èvè frè é sè a lasanblé lokal a-y i té ka pasé près tout swaré a-y é tout wikenn a-y, ki sé an réinyon, an prédikasyon oben adan dé ti moman détant. Mi sa Pauline ka di : « Ni dé fwa, pa té ka ni ponmoun akaz lè Wayne té ka rantré, kifè i té ka santi-y tousèl. » Nou ka tou konprann, madanm a Wayne é gason a-y té ka manké-y. I pa té konnèt sé moun-la yo té ka frékanté la, é i té ni lenprésyon kè konnyéla, Pauline té ka ba nouvo zanmi a-y plis valè ki-y. Wayne pa pran sa é i di Pauline i ké divòsé èvè-y. Ès zò ka vwè ka Pauline té’é pé fè pou mété-y an plas a mari a-y ?

8. Sèlon sa ki maké an 1 Pyè 3:1, 2, ka ki pé touché tchè a fanmi an nou plis ?

⁸ Lésé konpòwtèman a-w palé an plas a-w. Souvan, sa nou ka fè ka aji si fanmi an nou plis ki sa nou ka di (li 1 Pyè 3:1, 2). Pauline fin pa konprann sa. Mi sa i di : « An té sav byen Wayne té enmé-nou é kè i pa té vréman anvi divòsé. Men mennas-la i fè la, fè-mwen pran konsyans kè fò an té koumansé fè sa Jéova ka mandé adan mennaj an mwen. Olyé an té plen tèt a Wayne èvè onpakèt pawòl, vométan an té ni on bon konpòwtèman. » Pauline arété fè présyon asi Wayne pou obiljé-y palé dè Labib, é i mété-y ka palé dè tout kalté biten èvè-y. Wayne vwè kè Pauline vin pli dous, é kè gason a-y té pli janti (Pwov. 31:18, 27, 28). Lè Wayne konstaté kè mésaj-la ki an Bib-la té ka fè fanmi a-y dibyen, i lésé mésaj-lasa rantré an lèspri a-y é désann an tchè a-y (1 Kor. 7:12-14, 16).

9. Poukwa fò-nou toujou chèché a édé fanmi an nou ?

 ⁹ Toujou chèché a édé fanmi a-w. Jéova ka ban-nou lègzanp. I ka « kontinyé » fè sé moun-la konnèt bon nouvèl-la pou yo pé sa ni lavi (Jér. 44:4). É lapòt Pòl di Timoté kontinyé fè éfò pou édé lézòt. Poukwa ? Pas si i té ka kontinyé fè sa i té ké sové ki li, ki sé moun-la ki té’é kouté-y la (1 Tim. 4:16). Nou enmé fanmi an nou, alò nou anvi yo konnèt sé vérité-la ki adan Pawòl a Bondyé. Sa Pauline di é sa i fè fin pa aji an byen asi fanmi a-y. Konnyéla i kontan pas mari a-y ka sèvi Jéova ansanm èvè-y. Yo toulédé pyonyé é Wayne ansyen aprézan.

10. Poukwa fò-nou ni pasyans ?

¹⁰ Pran pasyans. Lè nou ka désidé fè sa Bondyé ka mandé, nou ka fè chanjman adan vi an nou, kwayans an nou ka chanjé osi é fanmi an nou pé ni dimal a aksèpté tout sé chanjman-lasa. Byensouvan, prèmyé biten yo ka konstaté sé kè nou pa’a fété pon fèt kon Nwèl é Pak èvè yo ankò, é kè nou pa’a mélanjé-nou an politik nonplis. Odépa, pétèt ni sèwten moun an fanmi an nou ki ké kòlè èvè nou (Mat. 10:35, 36). Men fò pa nou mèt an tèt an nou yo pé’é jen chanjé. Si nou ka arété fè éfò pou édé-yo konprann kwayans an nou, sé konsi nou ka jijé-yo é nou ka èstimé kè yo pa mérité ni lavi étèwnèl. Jéova pa mandé-nou jijé pon moun. Sé Jézi i bay fè sa (Jan 5:22). Si nou ni pasyans, pétèt on jou, fanmi an nou ké vlé kouté mésaj an nou (gadé ti karé-la «  Sèvi èvè sit entèwnèt an nou pou aprann moun ka Labib ka di »).

11-13. Nou sòti vwè kijan Alice aji èvè fanmi a-y. Ka sa ka aprann-nou ?

¹¹ Fò-w janti, men fò pa ou démòd (Pwov. 15:2). An-nou pran ègzanp a Alice. Lè i aprann konnèt Jéova, i té ka viv lwen fanmi a-y. Yo pa té ka kwè an Bondyé é yo té afon an politik. I rann-li kont kè fò pa i tadé pou palé fanmi a-y dè tout bon biten i té ka aprann. Mi sa i di : « Si ou atann two lontan avan ou fè fanmi a-w sav kè kwayans a-w chanjé é kè ou ka menné ondòt vi konnyéla, sa pé rivé a kontraryé-yo plis ankò. » Alò, Alice voyé déotwa lèt ba papa-y é manman-y. Adan sé lèt-lasa i té ka palé-yo dè sa Labib ka di asi sèwten sijé ki té’é pé entérésé-yo, kon lanmou pa ègzanp. É i té ka mandé-yo ka yo ka pansé dè sa (1 Kor. 13:1-13). I di fanmi a-y mèsi padavwa yo lévé-y byen é yo pran swen a-y byen é i voyé kado pou yo. Lè i té k’ay vwè-yo i té ka fè tousa i pé pou édé manman-y nétwayé kaz-la. Odépa, fanmi a Alice pa té kontan lè i palé-yo dè nouvo kwayans a-y.

¹² Lè Alice té k’ay aka fanmi a-y, i toujou té ka kontinyé li Bib a-y chak jou. Mi sa i ka di : « Sa édé manman konprann kè Bib-la ni onlo enpòwtans pou mwen. » Pannansitan, papa Alice désidé aprann sèwten biten an Bib-la pou konprann poukwa fi a-y chanjé konsa. Men i fè sa osi, pas i té vlé touvé déotwa biten pou i pé sa kritiké Bib-la. Alice ka di : « An ba-y on Bib, é an mété on ti mo pou-y adan-y. » Ki rézilta sa bay ? Papa Alice pa touvé pon érè adan Pawòl a Bondyé, men olyé dè sa, sa i li la touché tchè a-y onlo.

¹³ Fò-nou montré fanmi an nou kè nou sav ka nou vlé, men anmenmtan, fò-nou aji èvè dousè épi yo menm lè yo ka ban-nou gaz (1 Kor. 4:12b). Alice, pa ègzanp, jwenn bon opozisyon akòz dè manman-y. Mi sa i di : « Lè an pran  batèm, manman di-mwen an sé on ‘mové fi.’ » Kijan Alice réyaji ? « Olyé an té fè konsi an pa tann ayen, èvè onlo rèspé, an èspliké manman kè an désidé vin Témwen a Jéova é kè an pa ni lentansyon wouvin asi désizyon an mwen. An trankilizé lèspri a manman é an di-y an enmé-y toubònman. Nou toulédé mété pléré atè, é an préparé on bon ti manjé pou-y. Dépi sa, manman rèkonnèt kè Labib ka fè-mwen vin on pibon moun. »

14. Poukwa fò pa nou démòd lè fanmi an nou ka fè présyon asi nou pou fè-nou arété sèvi Jéova ?

¹⁴ Sa pé pran tan avan fanmi an nou konprann kijan sa enpòwtan pou nou dè sèvi Jéova. Pa ègzanp, lè Alice désidé vin pyonyé, manman-y woumété pléré atè pas i pa pran chimen-la yo té vlé i pran la. Men Alice pa jen démòd. Mi sa i ka di : « Si lè fanmi a-w ka fè présyon asi-w pou on biten, ou ka lagé on ti may ba yo, yo ké pran on pli é yo ké viré anbété-w pou dòt biten ankò. Men si ou janti èvè fanmi a-w é anmenmtan ou ka montré-yo ou sav ka ou vlé, sèwten adan yo pé jous rivé a kouté-w. » Sé sa ki rivé Alice. Konnyéla, papa-y é manman-y pyonyé, é papa-la ansyen.

15. Sèlon Matyé 5:14-16 é 1 Pyè 2:12, kijan « bèl biten » chakmoun an lasanblé-la ka fè pé édé fanmi an nou ?

¹⁵ Jéova ka sèvi èvè « bèl biten [pèp a-y] ka fè » pou fè moun vin bon zanmi èvè-y (li Matyé 5:14-16 ; 1 Pyè 2:12). Si madanm a-w oben mari a-w pa Témwen a Jéova, ès i ja ni lokazyon rankontré déotwa frè é sè ki an lasanblé a-w ? Talè-la  nou palé dè Pauline. Ében li, i té ka envité sé frè é sè la akaz a-y. Konsa, sa té ka pèwmèt mari a-y fè konésans èvè yo. Wayne ka sonjé jan on frè édé-y konprann kijan on Témen a Jéova yé vréman. Mi sa i rakonté : « I pran on jou-konjé yenki pou gadé on match èvè mwen. An tchè an mwen an di : “Men sé on moun kon toutmoun !” »

16. Poukwa fò-nou envité fanmi an nou vin réinyon ?

¹⁶ On bon mwayen pou édé fanmi an nou, sé envité-yo vin réinyon èvè nou (1 Kor. 14:24, 25). Prèmyé fwa Wayne vin lasal, sé té pou Mémoryal, pas réinyon-lasa té ka fèt apré i fin travay é anplisdisa sa pa té ka diré lontan. Mi sa i ka di : « An pa byen konprann tousa yo di an diskou-la, men an ka sonjé sé moun-la ki té la la. Yo vin owa an mwen pou di-mwen yo kontan vwè-mwen é yo ban-mwen on bèl lanmen. An té ka santi kè yo té vréman sensè ». Ni on frè é madanm a-y ki té vréman janti èvè Pauline. Yo té ni labitid édé-y okipé dè gason a-y an réinyon é an prédikasyon. Kifè, lè Wayne touvé-y anvi konnèt plis asi nouvo kwayans a Pauline, i mandé frè-lasa étidyé Labib èvè-y.

17. Pou ki rézon fò pa nou santi-nou koupab, é poukwa fò pa nou mèt an tèt an nou kè fanmi an nou pé’é jen chanjé ?

¹⁷ Noutout té’é vlé kè toutmoun an fanmi an nou sèvi Jéova ansanm èvè nou. Sèlman, nou pé ka fè tout éfò ki tini pou édé-yo sèvi Bondyé, délè, a pa pousa yo ka aksèpté lavérité. An ka-lasa, fò pa nou santi-nou koupab, pas sé yo ki pran désizyon a yo. Lè nou byen gadé, nou pé pa fòsé ponmoun aksèpté kwayans an nou. Men on biten pou nou pa oubliyé, sé kè, si fanmi an nou ka konstaté kè tchè an nou kontan padavwa nou ka sèvi Jéova sa pé aji asi yo onlo. Priyé pou yo. Palé ba yo jantiman. Pa jen arété édé-yo ! (Akt 20:20). Fò-w ni konfyans kè Jéova ké béni éfò a-w. É si fanmi a-w désidé kouté-w, yo ké sové !