1. Ka Jéova ka ba chak sèwvitè a-y ki fidèl ?

KONM Jéova enmé tout sèwvitè a-y ki fidèl, i ka ba yochak on plas adan lasanblé a-y. Noutout pa’a jouwé menm wòl-la men noutout itil é yonn bizwen lòt. Lapòt Pòl té vé fè-nou konprann lidé-lasa pas sé on biten ki enpòwtan toubònman.

2. Dapré sa Éfézyen 4:16 ka di, poukwa fò-nou rèkonnèt kè toutmoun ni valè a yo é poukwa fò-nou kolaboré èvè yo ?

² Awtik-lasa bazé asi 1 Korentyen 12:21, é adan pasaj-lasa, Pòl montré kè ponyonn adan nou pa ni dwa di ondòt sèwvitè a Jéova : « An pa bizwen-w ». Si nou vé antann-nou byen èvè toutmoun adan lasanblé-la, fò-nou rèkonnèt kè toutmoun ni valè a yo é fò-nou kolaboré èvè yo (li Éfézyen 4:16). Lè on lasanblé byen soudé, i ka vin pi fò é yonn ka enmé lòt fò.

3. Ka nou ké vwè adan awtik-lasa ?

³ Kijan nou pé montré frè é sè a lasanblé an nou kè nou ni rèspé pou yo ? Adan awtik-lasa, nou ké vwè : 1) ka sé ansyen-la pé fè pou montré kè yo ni rèspé yonn pou lòt, 2) kijan nou pé montré frè é sè an nou ki sélibatè kè nou ka aprésyé-yo é 3) lè on moun ni dimal a palé lang an nou, ka nou pé fè pou montré-y kè nou enmé-y.

4. Sèlon sa ki maké an Women 12:10, ka pou chak ansyen fè ?

⁴ Sé lèspri sen a Jéova ki ka nonmé tout sé ansyen-la adan lasanblé-la. Men yotout pa ni sé menm kapasité-la é  yotout pa ni menm don-la (1 Kor. 12:17, 18). Ni sa yo sòti nonmé, kifè yo pa ni menm èkspéryans ki sélézòt-la. Ni dòt aprézan, ki pa kapab fè sa yo té ka fè avan pas yo ja ni on bèl laj é pas santé a yo pa two flanbo. Men magré tousa, fò pa pon ansyen ba ondòt ansyen lenprésyon kè i pa ni valè. Si i fè sa, sé konsi i ka di frè a-y : « An pa bizwen-w. » Okontrè, fò chak ansyen suiv sa Pòl di an Women 12:10 (li-y).

5. a) Kijan sé ansyen-la ka montré kè yonn ka rèspèkté lòt ? b) Lè sé ansyen-la ni on réinyon, poukwa sa enpòwtan kè yonn kouté lòt ?

⁵ On ansyen ka montré kè i ka rèspèkté sélézòt ansyen-la si i ka pran tan kouté sa yo ka di. Sa vréman nésésè siwtou lèwvwè yo ka réini-yo pou palé dè on sijé ki enpòwtan. Poukwa nou ka di sa ? Mi sa Tou dè Gad a 1^é òktòb 1988 (an fransé) té ka di : « Sé ansyen-la ka admèt kè Jézikris pé sèvi èvè lèspri sen pou fè nenpòt adan yo vwè ki prensip ki itil adan on sèwten sitiyasyon oben ki prensip ki pé édé komité a sé ansyen-la pran on désizyon ki enpòwtan (Akt 15:6-15). A pa yenki onsèl ansyen lèspri sen ka édé. I ka édé yotout. »

6. Ka ki pé édé sé ansyen-la rété soudé lè yo ka travay ansanm, é poukwa sa ké fè lasanblé-la dibyen ?

⁶ Si on ansyen ka rèspèkté sélézòt ansyen-la, i ké fè atansyon pou a pa toujou li ki palé an prèmyé lè komité a sé ansyen-la ka réini. I ké lésé lézòt palé é i pé’é kwè kè sé li ki toujou ni rézon. Lè i ka di sa i ka pansé, i ka fè sa èvè imilité é i ka rèkonnèt kè a pa toutbiten i konnèt. I ka pran tan kouté sa lézòt ka di. Men sa ki pi enpòwtan sé kè, i ka éséyé vwè ki prensip ki itil é i paré a suiv tout enstriksyon kè « èsklav fidèl é prévwayan » la ka bay (Mat. 24:45-47). Lè sé ansyen-la ka kozé adan on anbyans ki plen lanmou é ki plen rèspé, lèspri sen a Bondyé anmitan a yo é i ka édé-yo pran désizyon ki ké fè lasanblé-la vin pi fò (Jak 3:17, 18).

7. Ka Jézi té ka pansé dè moun ki sélibatè ?

⁷ Adan lasanblé-la, ni onlo moun ki mayé é pawmi yo ni sa ki ni timoun. Ni enpé sélibatè osi. Men ki valè pou nou ba moun ki sélibatè ? Fò nou imité Jézi adan domenn-lasa. Lè Jézi té si latè, i pa mayé. I té préféré rété konsa pou i té pasé tout tan a-y ka akonpli misyon a-y é pou i té rété konsantré asi travay-la Pap’a-y té ba-y fè la. I pa jen di kè sa té nésésè kè on krétyen mayé oben kè i rété sélibatè. Men pawkont, i di kè ni sèwten ki té’é chwazi dè rété sélibatè (Mat. 19:11, 12 ; adan Bib-la ki fèt pou étidyé la, gadé nòt-la « se sont faits eunuques eux-mêmes » ki k’ay èvè Matyé 19:12). Jézi té ni onlo rèspé pou moun ki sélibatè. Pou-y, yo pa té ni mwens valè ki moun ki mayé, é pou-y, pa té ka manké-yo ayen an vi a yo.

8. Dapré 1 Korentyen 7:7-9, ki ankourajman Pòl ka ba sé krétyen-la ?

⁸ Lapòt Pòl fè menm biten ki Jézi ; i rété sélibatè pou i té konsantré-y asi ministè a-y. I pa jen di kè on krétyen pa ni dwa mayé. I èspliké kè sé chakmoun ki konnèt zafè a-y. Men, i ankourajé sé krétyen-la a gadé si yo pé rété sélibatè pou kontinyé sèvi Jéova (li 1 Korentyen 7:7-9). Pòl pa té ka méprizé sé krétyen sélibatè la. Dayè pou yonn, i ba Timoté plizyè misyon ki té difisil toubònman. Poutan, sé té on jenn frè sélibatè * (Filip. 2:19-22). Sa ka montré kè a pa paskè on frè sélibatè kè i pé pa ni rèsponsabilité adan lasanblé-la menmjan ki on moun-mayé (1 Kor. 7:32-35, 38).

9. Kijan pou nou vwè moun ki mayé é moun ki sélibatè ?

⁹ Ni Jézi, ni Pòl pa jen di kè fò sé krétyen-la mayé oben kè fò-yo rété sélibatè. Alò, kijan pou nou vwè moun-mayé é moun ki sélibatè ? Tou dè Gad a 1^é òktòb 2012 (an fransé) ka réponn a kèsyon-lasa. Mi sa i ka èspliké : « An réyalité, ki on moun mayé, ki i sélibatè, sé on kado Bondyé fè-y. [...] Pou Jéova, fò pa on moun wont paskè i pa mayé é fò pa i mèt an tèt a-y kè vi a-y fin. » Sé pousa, fò-nou rèspèkté frè é sè an nou ki sélibatè é fò-yo santi kè yo ni plas a yo adan lasanblé-la.

10. Ka nou pé fè pou montré kè nou ka rèspèkté frè é sè an nou ki sélibatè ?

 ¹⁰ Kijan nou pé montré kè nou ka rèspèkté sa frè é sè an nou ki sélibatè ka rèsanti ? Fò pa nou oubliyé kè yo pé sélibatè pou plizyè rézon diféran. Pa ègzanp, sèwten krétyen désidé pa mayé. Ni dòt aprézan ki té’é byen vé mayé men yo po’o touvé moun-la ki fo la. É ni dòt ki pèd moun-la yo té mayé èvè-y la. Kèlkèswa rézon-la ki ka fè kè on moun sélibatè, ès nou ni dwa mandé-y poukwa i pa mayé oben ès fò-nou di-y kè nou ké chèché on moun ba-y ? Sé vré, sa pé rivé kè on moun ki sélibatè mandé-nou on ti konsèy an domenn-lasa. Men imajiné kè i pa mandé-w tanprisouplé a-w, é kè ou ka pwopozé-y dè touvé on moun ba-y, ka ki pé rivé ? (1 Tés. 4:11 ; 1 Tim. 5:13). An-nou vwè ka déotwa frè é sè sélibatè ki fidèl ka di asi sa.

11-12. Si nou pa fè atansyon, kijan nou té’é pé dékourajé on sélibatè ?

¹¹ On rèsponsab a siwkonskripsyon ki sélibatè é ki ka fè on bèl travay ka touvé kè lè ou sélibatè ou pé fè onlo biten. Men limenm ka di kè lè plizyè frè é sè ka vin mandé-y poukwa i pa mayé, sa ka dékourajé-y, menmsi sé dibyen yo vé pou-y. Mi sa on frè sélibatè ki ka travay adan on Bétèl ka di : « Sèwten frè é sè ka ban-mwen lenprésyon kè dépi yo vwè on moun ki sélibatè sa ka fè-yo lapenn. É anfinaldikont, ou té’é di kè lè ou sélibatè, a pa on kado Jéova fè-w men sé on gwo chaj i mèt asi zépòl a-w. »

¹² Mi sa on sè sélibatè ki ka travay adan on Bétèl ka rakonté : « Ni sèwten pwoklamatè ki ka konpranndèdi kè dépi ou sélibatè, ou ka chèché on moun, oben yo ka kwè kè a chakfwa on sélibatè ka pasé on moman èvè dòt frè é sè, sé chèché i ka chèché on moun. On jou, an ay adan ondòt réjyon pou fè on travay ba Bétèl-la. An rivé lèswa-la é sé té jou a réinyon. An té ka rété owa on sè ki di-mwen kè adan lasanblé a-y, ni 2 frè sélibatè ki ni menm laj ki mwen. I di-mwen kè a pa chèché i ka chèché on moun ban mwen. Men, pwenté nou pwenté Lasal, i menné-mwen dirèk owa sé 2 frè-la. A pa ti jenné an té jenné ! Kanta sé frè-la, pa menm palé ! »

13. Ki bèl ègzanp ki ankourajé on sè ki sélibatè ?

¹³ Mi sa ondòt bétélit ka di : « An konnèt enpé pyonyé ki sélibatè dépi plizyè lanné é yo ka santi-yo byen an po a yo. Sé sèwvis a yo ki pi enpòwtan an vi a yo, yo enmé édé lézòt, yo kontan sa yo ka fè é yo sé on bénédisyon pou lasanblé-la. É a pa paskè yo sélibatè é kè yo pa ni timoun kè sa ka pran tèt a yo ! É yo pa’a konpranndèdi nonplis kè pas yo sélibatè, yo ni plis valè ki lézòt. » Sa bèl toubònman, lèwvwè adan on lasanblé, yonn ka rèspèkté lòt é yonn ka konsidéré lòt ! Sa pa’a fè ponmoun lapenn pas ou sélibatè. Ponmoun pa jalou sitiyasyon a-w. Ponmoun pa’a fè konsi yo po’o jen vwè-w la. Ponmoun pa’a pòté-w anlè. Onsèl biten ou sav sé kè toutmoun enmé-w.

14. Ka nou pé fè pou montré kè nou ka rèspèkté sé sélibatè-la ?

¹⁴ Frè é sè an nou ki sélibatè té’é byen kontan si nou té ka rapwoché-nou dè yo pas nou ka aprésyé bèl kalité a yo. Men si nou ka rapwoché-nou dè yo pas sitiyasyon a yo ka fè-nou lapenn, sa pé’é fè-yo plézi. Pisimé nou sonjé kè sé dé moun ki fidèl é sa ké édé-nou ba-yo onlo valè. Konsa, yo pé’é jen ni lenprésyon nou ka  di-yo : « An pa bizwen-w » (1 Kor. 12:21). Okontrè, yo ké vwè kè nou ka rèspèkté-yo é kè nou kontan toubònman kè yo an lasanblé-la ansanm èvè nou.

15. Pou fè plis an prédikasyon, ka sèwten moun ka désidé fè ?

¹⁵ Dépi déotwa lanné, onlo pwoklamatè désidé aprann ondòt lang pou fè plis an prédikasyon. Pou té rivé fè sa, fò yo té fè sèwten chanjman an vi a yo. Adan lasanblé-la yo té yé la, sé lang a manman yo yo té ka palé, men yo désidé lésé lasanblé-lasa pou ay adan on lasanblé ki ka préché adan ondòt lang é ki ni mwens pwoklamatè (Akt 16:9). A pa ponmoun ki oblijé-yo fè sa men si sé krétyen-lasa fè chwa-lasa, sé pas yo té vé fè plis pou Jéova. Dépawfwa, yo ka pran plizyè lanné avan yo aprann palé lang-lasa byen, men apapousa yo pa’a fè on bèl travay adan lasanblé-la. Tout èkspéryans-la é tout sé bèl kalité-la yo ni la ka édé lasanblé-la vin pi fò é ka édé-y rété byen doubout. Sé frè é sè-lasa ka fè onlo sakrifis é nou kontan-yo toubònman !

16. Asi ki biten sé ansyen-la ka bazé-yo pou sav si on frè pé vin ansyen ou asistan ?

¹⁶ A pa paskè on frè po’o ka palé lang a lasanblé-la byen kè sé ansyen-la ké désidé kè i po’o bon pou vin ansyen oben asistan. Pou sav si yo pé nonmé on frè, sé ansyen-la ka gadé an Bib-la, ki kalité on ansyen oben on asistan dwèt ni ; yo pa’a rété gadé si i ka palé lang a lasanblé-la byen (1 Tim. 3:1-10, 12, 13 ; Tit 1:5-9).

17. Ki désizyon sé paran-la ni a pran lè yo k’ay viv adan ondòt péyi èvè fanmi a yo ?

¹⁷ Konm lavi rèd an péyi a yo, sèwten krétyen désidé ay viv ondòt koté pou yo pé sa touvé on travay. Kifè, pi souvan ki rarman, timoun a yo k’ay adan on lékòl ki ka palé lang a péyi-la yo yé la. É pétèt osi, sé paran-la oblijé aprann lang-lasa pou yo pé sa touvé on travay. Dépawfwa, ni on gwoup ou on lasanblé ki ka palé lang a sé fanmi-lasa. Kifè, fò sé krétyen-lasa chwazi ka ki ké méyè pou yo : si sé ay adan on lasanblé ki ka palé lang a péyi-la oben si sé ay adan on lasanblé ki ka palé lang a yo.

18. Sé chèf a chak fanmi ki ka pran désizyon pou fanmi a-y. Dapré sa Galat 6:5 ka di, kijan nou pé montré kè nou ka rèspèkté désizyon a-y ?

¹⁸ Sé chèf a fanmi-la ki dwètèt désidé adan ki lasanblé i ké ay èvè fanmi a-y. Sé-y ka vwè ka ki méyè pou fanmi a-y (li Galat 6:5). Konm sé on désizyon ki pèwsonèl, kèlkèswa désizyon-la i pran la, fò-nou rèspèkté désizyon-lasa. Fò-nou akéyi fanmi-lasa bra gran wouvè é fò-nou fè-y santi kè nou enmé-y (Wom. 15:7).

19. Fò sèwten chèf a fanmi pran tan a yo pou réfléchi asi on biten. Ki biten ésa ?

 ¹⁹ Délè, sèwten fanmi k’ay adan on lasanblé ki ka palé lang a sé paran-la alòskè sé timoun-la pa’a gè ka konprann lang-lasa. Si lasanblé a yo ka touvé-y on koté lamajorité a sé moun-la ka palé lang a péyi-la, sé timoun-la ké ni dimal a konprann sé réinyon-la é yo ké ni dimal a vin zanmi èvè Jéova. Poukwa nou ka di sa ? Pas an lékòl a yo sé lang a péyi-la yo ka palé ; yo pa’a palé lang a fanmi a yo. Adan on ka kon sila, fò chèf a fanmi-la réfléchi byen é fò i mandé Jéova sajès pou i pran on désizyon ki ké édé timoun a-y vin zanmi èvè Jéova é èvè sé frè é sè la. I ni on chwa a fè : swa fò i édé timoun a-y aprann lang a fanmi-la byen oswa fò i ké ay adan on lasanblé ki ka palé on lang kè sé timoun-la ka konprann byen. Kèlkèswa désizyon-la i pran la, fò lasanblé-la akéyi-yo byen é fè-yo santi kè yo ka aprésyé-yo.

20. Ka nou pé fè pou montré kè nou ka rèspèkté frè é sè an nou ki ka aprann palé ondòt lang ?

²⁰ Pou tout sé rézon-la nou sòti vwè la, ni onlo frè é sè ki ka fè onlo éfò pou aprann ondòt lang. Jousalè, ni déotwa ki pò’ò ka rivé palé lang-lasa byen. Men a pa sa pou nou gadé. Sa ki ka entérésé-nou sé kè yo enmé Jéova é kè yo anvi sèvi-y. Si nou ka pran tan gadé bèl kalité a frè é sè an nou, nou ké enmé-yo fò é nou ké rèspèkté-yo onlo osi. É nou pé’é jen di-yo : « An pa bizwen-w » davwa yo pa’a palé lang an nou byen.

21-22. Ki bèl privilèj nou ni ?

²¹ Nou kontan toubònman davwa Jéova ba chak sèwvitè a-y on wòl entérésan a jouwé adan lasanblé a-y. Ki ou sé on frè, ki ou sé on sè, ki ou sélibatè, ki ou mayé, ki ou jenn, ki ou ja ni on ti laj, ki ou sé on mèt-a-mannyòk adan ondòt lang, ki sé dé ti mo tousèl ou sav di adan-y, ou ni onlo valè pou Jéova é pou frè é sè a-w ! (Wom. 12:4, 5 ; Kol. 3:10, 11).

²² Nou ni lokazyon vwè kè lapòt Pòl konparé lasanblé-la èvè kò a on moun. Nou aprann onlo bèl biten èvè ègzanp-lasa. Alò, an-nou kontinyé fè tousa nou pé pou mèt sé lidé-lasa an pratik. An-nou chèché a vwè ka nou pé fè pou ankourajé frè é sè an nou, pou montré-yo kè nou enmé-yo é kè nou ka rèspèkté-yo. Si nou fè sa, nou ké montré kè nou enmé plas an nou adan lasanblé-la toubònman é kè nou ka ba plas-la lézòt ni la onlo valè osi !