1. Poukwa Jéova mété-y ka kréyé ?

 ODÉPA, Jéova té tousèl a-y. Men i pa té tris. Jéova pa té bizwen ponmoun pou tchè a-y té kontan. É poutan, i té vé fè dòt moun pwofité dè lavi. Jéova mété-y ka kréyé pas i plen lanmou (Sòm 36:9 ; 1 Jan 4:19).

2. Ka Jézi é sé zanj-la té ka rèsanti chakfwa Jéova té ka kréyé on biten ?

² Prèmyé moun Jéova kréyé sé Jézi. É sé-y ki té ka kolaboré èvè-y. Aprésa, i travay ansanm èvè Gason a-y pou kréyé tout sélézòt biten-la, pa ègzanp pou kréyé tout sé zanj-la (Kol. 1:16). Jézi té kontan travay èvè Pap’a-y (Pwov. 8:30). Sé zanj-la té kontan osi. É pou plizyè rézon. Sé konsi yo té sizé prèmyé douvan ka gadé Jéova é Jézi, ‘zouti filé la’, ka fè syèl-la é tè-la. Kijan sé zanj-la réyaji ? Yo ‘hélé woulo-bravo’ tèlman yo té kontan. É chakfwa Jéova té ka kréyé on biten, sèten yo té ka aplodi-y ! Kanta lè i fè lòm, pa menm palé ! (Job 38:7 ; Pwov. 8:31, nòt). Chak biten Jéova té ka kréyé té ka montré kè i plen lanmou é kè i plen sajès (Sòm 104:24 ; Wom. 1:20).

3. Dapré sa 1 Korentyen 15:21, 22 ka di, ka nou pé ni grasa ranson-la ?

³ Jéova té vé kè lézòm viv pou touttan asi bèl planèt-la i té fè la. Men Adan é Èv ba Jéova do, kifè, yo pa té pé viv pou touttan ankò. Ki yo ki timoun a yo té’é fin pa mò (Wom. 5:12). Alò ka Jéova fè ? Onfwa-onfwa, i di kijan i ké sové limanité (Jén. 3:15). Jéova désidé kè i té’é sakrifyé gason a-y, Jézi, pou woté désandan a Adan é Èv anba jouk a péché-la é anba jouk a lanmò. Konsa, i té’é pé ba moun ki désidé sèvi-y lavi étèwnèl (Jan 3:16 ; Wom. 6:23 ; li 1 Korentyen 15:21, 22).

4. A ki kèsyon nou ké réponn adan awtik-lasa ?

⁴ Lè nou ka tann kè Bondyé ké résisité moun-mò, nou  pé ka pozé-nou onpakèt kèsyon. Pa ègzanp, kijan larézirèksyon ké fèt ? Lèwvwè fanmi an nou oben zanmi an nou ké résisité, ès nou ké rèkonnèt-yo ? Ki jwa nou ké rèsanti an tchè an nou lèwvwè ké ni larézirèksyon ? É ka larézirèksyon ka aprann-nou asi lanmou a Jéova, asi sajès a-y é asi pasyans a-y ? An-nou réponn a sé kat kèsyon-lasa.

5. I ka sanmsa toutmoun pé’é résisité anmenmtan. Ka ki ka fè-nou di sa ?

⁵ Lèwvwè larézirèksyon ké ka fèt, Jéova ké sèvi èvè Jézi pou résisité plizyè milyon moun. Men ès sa vé di kè yotout ké résisté anmenmtan ? Nou pa’a gè kwè. Poukwa nou ka di sa ? Pas siwvwè ni twòp moun asi latè onsèl kou, sa ké difisil a jéré. É nou sav kè Jéova sé on moun ki byen òwganizé. I sav kè si toutbiten pa byen òwganizé, pé ké ni lapé (1 Kor. 14:33). Avan Jéova té fè lézimen, i préparé latè piti-a-piti èvè Jézi. Sa ka montré kè i plen sajès é plen pasyans. Jézi ké aji èvè sajès é pasyans lèwvwè i ké ka gouvèné pannan sé 1 000 an la. I ké travay èvè moun ki pasé Awmagédon vivan pou préparé latè pou pé sa akéyi moun ki ké résisité.

6. Dapré sa Akt 24:15 ka di, ès Jéova ké résisité yenki moun ki jis ?

⁶ Men ni on biten pi enpòwtan ankò kè nou ké ni a fè. Moun ki pasé Awmagédon vivan ké fè sé résisité-la konnèt ka ki Wayòm a Bondyé é ka Jéova ka atann dè yo. Poukisa ? Pas majorité a sé résisité-la ka fè pawti a sa Labib ka kriyé « moun ki pa jis » (li Akt 24:15). Fò sé moun-lasa chanjé pou yo pé sa pwofité dè tout bénédisyon ranson-la ké pòté pou nou. Fò-nou ké aprann plizyè milyon moun lavérité asi Bondyé pas yo pa konnèt ayen  asi-y. Mésyé, a pa ti travay ké ni ! Alèkilé, chak étidyan ni on moun ka anségné-y, men ès sé konsa sa ké pasé pannan sé 1 000 an la ? Ès yo ké voyé sé résisité-la adan diféran lasanblé lokal é ès yo ké fowmé-yo osi pou yo pé sa fè étid a dòt moun ki ké résisité ? Nou po’o sav ! Men sa nou sav aprézan, sé kè lèwvwè Jézi ké fin gouvèné, « konésans a Jéova ké ranpli latè » (Iz. 11:9). Ké ni onpakèt bèl biten a fè pannan sé 1 000 an la !

7. Poukwa sèwvitè a Bondyé ké anségné sé résisité-la èvè onlo konpasyon ?

⁷ Pannan sé 1 000 an la, toutmoun ki ka adoré Jéova ké ni chanjman a fè pou fè-y plézi. Yo ké édé sé résisité-la goumé èvè péché-la ki an kò a yo la é yo ké édé-yo suiv prensip a Jéova adan vi a yo. Yo ké fè sa èvè onlo konpasyon (1 Pyè 3:8). Sé résisité-la ké vwè kè sèwvitè a Bondyé ni onlo imilité é kè yo ka fè onlo chanjman pou fè Jéova plézi. Sé pousa, sé résisité-la ké vé adoré Jéova èvè yo (Filip. 2:12).

8. Poukwa nou pé sipozé kè lè zanmi an nou é fanmi an nou ké résisité nou ké rèkonnèt-yo ?

⁸ Ni plizyè rézon ki ka fè-nou di kè moun ki ké akéyi sé résisité-la ké rèkonnèt fanmi a yo é zanmi a yo. Pa ègzanp, lè nou ka ègzaminé sé rézirèksyon-la ki fèt an tan a Labib, nou pé sipozé kè lè Jéova ké résisité moun, nou ké pé rèkonnèt-yo pas yo ké palé menmjan-la, yo ké ni menm mantalité-la, é lè nou ké gadé-yo sé menm moun-la nou ké vwè. Sonjé kè Jézi di kè lè on moun mò, sé konsi i ka dòmi, é lè on moun résisité, sé konsi sé lévé yo ka lévé-y an sonmèy a-y (Mat. 9:18, 24 ; Jan 11:11-13). Lèwvwè on moun sòti lévé, sé toujou menm moun-la ou ka vwè lè ou ka gadé-y é i toujou ka palé menmjan-la. Anplisdisa, sa ki an mémwa a-y pa ka éfasé nonplis. An-nou palé dè ègzanp a Laza. Sa té jé ka fè 4 jou i té mò, é kò a-y té ja koumansé pouri. É poutan, lèwvwè Jézi résisité-y, sè a-y rèkonnèt-li tousuit é Laza limenm a-y, pa oubliyé kimoun yo té yé (Jan 11:38-44 ; 12:1, 2).

9. Poukwa moun ki ké résisité pé’é pawfè tousuit ?

⁹ Jéova pwomèt kè lè Jézikri ké ka gouvèné, ponmoun pé’é di : « An malad » (Iz. 33:24 ; Wom. 6:7). Kifè, lè sé moun-la ké résisité, yo ké byen pòtan. Men sa pa vé di kè yo ké pawfè tousuit, sinon fanmi a yo é zanmi a yo pé’é rèkonnèt-yo. I ka sanm sa kè pannan sé 1 000 an la, sé piti-a-piti sé moun-la ké vin pawfè. É sé sèlman lè sé 1 000 an la ké bout kè Jézi ké woumèt Pap’a-y Wayòm-la. A moman-lasa, Wayòm-la ké ja fè tousa Jéova té vé i fè, konm pa ègzanp, fè toutmoun vin pawfè (1 Kor. 15:24-28 ; Rév. 20:1-3).

10. Ka ou ka di ou ké rèsanti lèwvwè larézirèksyon ké fèt ?

¹⁰ Imajiné on moun an fanmi a-w oben on zanmi a-w sòti résisité é kè ou ka vin pou akéyi-y ! Ka ou ka rèsanti ? Pétèt dlo ka sòti an zyé a-w oben ou ka soté anlè, pa vré ? É tèlman ou kontan, pétèt ou ka chanté pou Jéova ? Ou pé di-mwen sa ou vlé, men sèten ou ké di Jéova é Jézi : « Mwen enmé-zòt toubònman, pas zò enmé-mwen, pas sé grasa zòt si ni moun ka résisité é sa, sé on bèl kado toubònman zò fè-mwen la ! »

11. Dapré sa Jézi di an Jan 5:28, 29, ka Jéova ké fè pou moun ki ka rèspèkté prensip a-y ?

¹¹ Ès ou ja imajiné jan sé résisité-la ké  kontan lèwvwè yo pé’é ni pon vyé mantalité ankò é kè yo ké ka mèt prensip a Bondyé an pratik an vi a yo ! A pa ti kontan yo ké kontan ! Sé yenki séla ki ké fè sé chanjman-lasa ki ké pé viv pou touttan adan paradi-la. Pawkont, si on moun ba Bondyé do, i pé’é rété la lébwa kwazé ka gadé-y mèt dézòd an paradi-la ! (Iz. 65:20 ; li Jan 5:28, 29).

12. Ki bénédisyon Jéova ké vidé asi limanité ?

¹² Lè Wayòm a Bondyé ké ka gouvèné latè, toutmoun ki ka adoré Bondyé ké pé vwè an 2 zyé a-y kè sé « bénédisyon a Jéova ki ka fè moun vin rich » é kè « i pa ka mèt pon doulè asi-y » (Pwov. 10:22). Grasa lèspri sen a Jéova, yo ké vin pibon zanmi èvè Jéova kivédi kè pi nou ké ay, pi yo ké ka sanm Jézikris é pi yo ké pwogrésé pou yo vin pawfè (Jan 13:15-17 ; Éféz. 4:23, 24). Piti-a-piti, santé a yo é pèwsonalité a yo ké vin pi bèl. Nou ké adoumanman ! (Jòb 33:25). Men konnyéla, an-nou réponn a kèsyon-lasa : lè nou ka pran tan réfléchi asi larézirèksyon, ka sa ka aprann-nou asi lanmou a Jéova, asi sajès a-y é asi pasyans a-y ?

13. Dapré sa Sòm 139:1-4 ka di, kijan larézirèksyon ka montré kè Jéova konnèt-nou byen menm ?

¹³ Kon nou vwè tibwen pi ho, lè Jéova ké résisité on moun, moun-la ké viré sonjé tousa ki té an mémwa a-y é i ké ni menm mantalité-la i té ni la. Ou ka rann-vou kont ! Tèlman Jéova enmé-w, i ka vwè é i ka anrèjistré tout ti lidé ki ka pasé an tèt a-w, tousa ou ka rèsanti, tousa ou ka di é tousa ou ka fè. Wa David té ja byen konprann kè Jéova ka sousyé-y dè nou pèwsonèlman é kè i pa’a fè sa a dèmi (li Sòm 139:1-4). Jéova konnèt-nou patchè. Fò-nou mèt sa fon an tèt an nou pas sa enpòwtan é pas sa ka konsolé-nou. An-nou vwè poukwa.

14. Nou byen konprann kè Jéova konnèt-nou patchè. Poukwa fò pa sa fè-nou pè ?

¹⁴ On lidé kè nou ja byen konprann sé kè Jéova konnèt-nou patchè, men ès fò sa fè-nou pè ? Awa ! Poukwa ? Pas i ka sousyé-y dè nou èvè onlo tandrès. Pou Jéova, nouchak ka touvé-nou kon koko a zyé a-y. I ka rètyenn tousa ki ka fèt an vi an nou é tousa ki ka aji asi pèwsonalité an nou. Lè ou ka réfléchi asi lidé-lasa, sa pa’a trankilizé lèspri a-w ? Pa pè, ou pa tousèl ! Pa ni on sègond ka pasé pou Jéova pa akoté an nou é dépi nou mélé, i toujou ka chèché on mwayen pou édé-nou (2 Kron. 16:9).

15. Larézirèksyon ka montré kè Jéova ni sajès. Poukwa nou ka di sa ?

¹⁵ Lè on moun pè mò, dépi ou di-y ou ké tchouyé-y, ou ka rivé fè-y fè nenpòt biten. É sèwten moun ka sèvi èvè pè-lasa pou fè dòt moun vann zanmi a yo oben pou fè-yo fè sa Jéova pa enmé. Byensouvan, sé Satan ki dèyè do a sa. Men nou, nou pa’a démòd lèwvwè yo ka mennasé-nou konsa. Pas nou sav kè menmsi lènmi an nou tchouyé-nou, Jéova ké résisité-nou (Rév. 2:10). Nou sèten kè kèlkèswa sa yo fè-nou, pa ni ayen ki ké anpéché-nou sèvi Jéova (Wom. 8:35-39). Larézirèksyon sé on bèl èspwa é sa ka montré kè Jéova ni onlo sajès toubònman ! Sé vré, Satan é bannélo a-y ka mennasé-nou, men nou pa pè yo ! Okontrè, nou ni plis fòs ankò grasa bèl èspwa-la Jéova ban-nou la é nou byen désidé a rété fidèl a-y.

16. a) Ki kèsyon fò ou pozé-w ? b) Kijan sé kèsyon-lasa pé édé-w sav si ou ka fè Jéova konfyans ?

 ¹⁶ Si on jou, moun ki hay Jéova ka di-w kè yo ké tchouyé-w, ès ou ni konfyans kè Jéova ké résisité-w ? Kijan ou pé sav si ou ké fè Jéova konfyans a moman-lasa ? Pa ègzanp, ou pé mandé-w : « Lè an ka pran on désizyon, menmsi a pa granzafè, ès an ka montré kè an ka fè Jéova konfyans ? » (Lik 16:10). Anplis, Jéova ka pwomèt-vou kè i ké ba-w sa ou bizwen si ou ka mèt wayòm a-y prèmyé douvan an vi a-w. Alò, ou pé pozé-w kèsyon-lasa : « Ès jan an ka sèvi èvè tan an mwen é èvè lajan an mwen ka montré kè an ni konfyans adan pwomès-lasa ? » (Mat. 6:31-33). Si ou ka réponn wi a sé 2 kèsyon-lasa, sa ka montré kè ou ka fè Jéova konfyans é kè ou paré pou andiré nenpòt ki éprèv ou ké jwenn (Pwov. 3:5, 6).

17. a) Kijan larézirèksyon ka montré kè Jéova ni pasyans ? b) Kijan nou pé montré kè nou ka aprésyé pasyans a Jéova ?

¹⁷ Jéova ja désidé kitan i ké détwi mond méchan lasa (Mat. 24:36). Men i pé’é pèd pasyans é i pé’é aji avan lè. Sé vré, Jéova vréman anvi résisité sé mò-la, men i ni pasyans (Jòb 14:14, 15). I ka atann bon moman-la pou résisité-yo (Jan 5:28). Ni plizyè rézon ki ka fè kè nou ka aprésyé pasyans a Jéova. Sé pas i ni pasyans kè onlo moun, é noumenm osi, « rivé rèpanti » (2 Pyè 3:9). Jéova vé kè on maksimòm dè moun trapé lavi étèwnèl. Kijan nou ka montré kè nou ka aprésyé pasyans a Jéova ? Nou ka montré sa, lè nou ka fè tousa nou pé pou chèché « tout moun ki ni mantalité-la ki fo la pou ni lavi étèwnèl », lè nou ka édé-yo enmé Jéova é lè nou ka montré-yo kijan pou yo sèvi-y (Akt 13:48). Sé konsa sé moun-lasa ké pé bénéfisyé dè pasyans a Jéova, kon noumenm an nou ni lokazyon bénéfisyé dè-y.

18. Poukwa fò-nou pran pasyans èvè lézòt ?

¹⁸ Jéova pé’é mandé-nou vin pawfè avan sé 1 000 an la fin ; i ké pran pasyans èvè nou. Annatandan, i ka padonné péché an nou volontyé. Kifè, sa té’é byen si nou té ka suiv ègzanp a-y, si nou té ka konsantré-nou yenki asi bèl kalité a lézòt é si nou té ka pran pasyans èvè yo. An-nou vwè ègzanp a on sè. Mari a-y pa té ka vin réinyon ankò, pas délè, tèlman i té ka  angwasé, sa té ka rann-li malad. Mi sa i ka rakonté : « Sitiyasyon-la té rèd pou mwen toubònman. Èvè fanmi an mwen, nou té ni onlo pwojé, men tout krab-la mò an bari-la. » Men konm sè-lasa té enmé mari a-y onlo, i pran pasyans èvè-y. I fè fon asi Jéova é i pa jen lagé. Menmjan ki Jéova, i pa rété gadé yenki maladi-la men i té ka konsantré-y asi bon koté a mari a-y. Mi sa i ka èspliké : « Mari an mwen ni onlo bèl kalité, i ka fè tousa i pé pou i pé sa géri piti-a-piti. » Nou osi, an fanmi an nou oben an lasanblé an nou, ni moun ki ka goumé pou rivé about a onlo sitiyasyon difisil. Alò, sa enpòwtan toubònman kè nou pran pasyans èvè yo !

19. Ki biten fò nou byen désidé a fè ?

¹⁹ A pa ti kontan Jézi é sé zanj-la té kontan lèwvwè Jéova kréyé latè ! Alò éséyé imajiné kijan yo ké kontan lè yo ké vwè tout latè plen èvè onpakèt moun pawfè ki enmé Jéova é ki ka sèvi-y ! Yo ké pi kontan ankò, ou pa’a di sa ? Konnyéla, an-nou palé dè sé moun-la ki ké gouvèné èvè Jézi an syèl-la. Lè yo ké vwè kè jan-la yo ka dirijé la ka pwokiré limanité onpakèt bénédisyon, a pa ti kontan yo ké kontan ! (Rév. 4:4, 9-11 ; 5:9, 10). É éséyé imajiné lèwvwè ponmoun pé’é tris ankò é kè tchè a toutmoun ké kontan ! Éséyé imajiné kijan lavi ké yé lè ayen pé’é fè ponmoun lapenn ankò é lè lamaladi é lanmò ké disparèt pou touttan ! (Rév. 21:4). Toupannan nou ka atann sa rivé, fò nou byen désidé a imité Jéova, Pap’an nou ki plen lanmou, ki plen sajès é ki plen pasyans osi. Si ou fè sa, tchè a-w ké kontan menmsi ou ka jwenn toutkalté éprèv (Jak 1:2-4). « Ké ni on rézirèksyon » ! Nou pa ni pon dout asi sa ! (Akt 24:15). Alò, an-nou montré Jéova rèkonésans an nou pou bèl pwomès-la i fè-nou la !