1. Ki bèl privilèj noutout ni ?

NOU ka fè pawti a lasanblé a Jéova é sé on bèl privilèj toubònman ! Nou ka adoré Jéova èvè frè é sè an nou adan lasanblé-la, é nou ni lenprésyon kè nou adan on paradi pas nou lantouré èvè moun ki pa’a chèché pwoblèm é ki ni tchè-kontan. Men ki wòl ou ka jouwé adan lasanblé-la ?

2. Ki ègzanp Pòl itilizé adan plizyè lèt i maké ?

² Pou sav ki wòl nou ka jouwé adan lasanblé-la, an-nou pran tan ègzaminé on ègzanp lapòt Pòl itilizé a plizyè rèpriz adan sé lèt-la Bondyé pousé-y maké la. Adan sé lèt-lasa, Pòl di kè lasanblé-la ka touvé-y kon kò a on moun. É pou-y, sé konsi chakmoun an lasanblé-la sé on manb a kò-lasa (Wom. 12:4-8 ; 1 Kor. 12:12-27 ; Éféz. 4:16).

3. Ka nou ké vwè adan awtik-lasa ?

³ Adan awtik-lasa, nou ké vwè 3 biten enpòwtan kè ègzanp a Pòl ka aprann-nou. Prèmyèwman, nou ké vwè kè nouchak ni plas * an nou adan lasanblé a Jéova. Dézyèmman, nou ké ègzaminé ka nou pé fè si nou ni dimal a vwè ki wòl nou ni adan lasanblé-la. É twazyèmman, nou ké vwè kè fò nou fè tousa nou pé pou fè travay-la Jéova ban-nou fè la adan lasanblé-la.

4. Ka Pòl té vé di an Women 12:4, 5 ?

⁴ Ègzanp a Pòl ka aprann-nou on 1^é biten : nouchak ni  on plas enpòwtan adan fanmi a Jéova. Mi sa Pòl ka èspliké : « Pas menmjan adan onsèl kò ni plizyè pawti, men yotout pa’a sèvi menm biten-la, sé konsa osi, menmsi nou onlo, nou ka fòwmé onsèl kò ki byen soudé èvè Kris, men, nouchak pèwsonèlman, nou sé diféran pawti a kò-la é yonn soudé èvè lòt » (Wom. 12:4, 5). Ka Pòl té vé di pa la ? I té vé di kè noutout pa’a jouwé menm wòl-la an lasanblé-la men kè noutout ni onlo valè.

5. Ki kado Jéova fè lasanblé-la ?

⁵ Pétèt kè an tèt a-w, moun ki ni on plas adan lasanblé-la, sé sé frè-la ki ka dirijé-y la (1 Tés. 5:12 ; Ébr. 13:17). Sé vré kè Jéova pasé pa Jézikris pou i té fè lasanblé-la kado déotwa nonm pou dirijé-y (Éféz. 4:8). Pawmi sé nonm-lasa nou ka touvé sé frè-la ki an Komité santral la, sé asistan a Komité santral la, sé frè-la ki adan sé komité a filyal la, sé rèsponsab a siwkonskripsyon la, sé frè-la ki ka dirijé sé lékòl biblik la, sé ansyen-la é sé asistan-la. Konm mouton a Jéova ni onlo valè pou-y, i nonmé tout sé frè-lasa èvè lèspri sen a-y pou yo pé sa okipé dè mouton a-y é pou yo pé sa édé lasanblé-la vin pi fò (1 Pyè 5:2, 3).

6. Dapré 1 Tésalonisyen 2:6-8, poukwa lèspri sen nonmé sé frè-la i nonmé la ?

⁶ Sé frè-la lèspri sen nonmé la ka fè plizyè travay diféran. Menmjan diféran pawti a kò an nou, kon men an nou é pyé an nou, ka jouwé on wòl pou fè tout kò an nou maché byen, menmjan-la, sé frè-la lèspri sen nonmé la ka travay rèd pou fè tout lasanblé-la dibyen. Yo pa’a chèché a fè ponmoun pòté-yo anlè. Okontrè, yo vé ankourajé frè é sè a yo é yo vé rann-yo pi fò (li 1 Tésalonisyen 2:6-8). Jéova ban-nou dé nonm èspirityèl ki pa ka atann ayen anrètou pou dirijé-nou. A pa ti kontan nou kontan-yo !

7. Ki bénédisyon onlo sèwvitè aplentan ka trapé ?

⁷ Adan lasanblé-la, yo nonmé sèwten moun misyonè, pyonyé èspésyal oben pyonyé pèwmanan. Toupatou si latè, ni plizyè frè é sè ki ka préché aplentan é ki ka anségné. Konsa, yo ka ni lokazyon édé onlo moun vin disip a Jézi. An jénéral, sé sèwvitè-lasa pa ni onlo byen matéryèl, men Jéova ka vidé onlo bénédisyon asi yo (Mawk 10:29, 30). Nou enmé sé frè é sè-lasa onlo é a pa ti kontan nou kontan kè yo an menm lasanblé ki nou !

8. Poukwa Jéova ka ba chak pwoklamatè ki ka préché bon nouvèl-la onlo valè ?

⁸ Ès sé yenki sé frè nonmé la oben sé sèwvitè aplentan la ki ni on wòl a jouwé adan lasanblé-la ? Awa ! Chakmoun ki ka préché bon nouvèl-la ni onlo valè pou Jéova é pou lasanblé-la (Wom. 10:15 ; 1 Kor. 3:6-9). Dayè pou yonn, on rézon enpòwtan ki fè si lasanblé-la ka ègzisté sé kè fò-nou fè moun vin disip a Jézikris, Sényè an nou (Mat. 28:19, 20 ; 1 Tim. 2:4). Tout sé pwoklamatè-la ki an lasanblé-la, ki yo ja pran lèbatèm ki yo po’o pran-y, ka fè tousa yo pé pou mèt aktivité-lasa prèmyé douvan an vi a yo (Mat. 24:14).

9. Poukwa nou pé di kè chak sè an nou ni onlo valè ?

⁹ Jéova ka montré sé sè-la kè yo ni onlo valè adan lasanblé-la pas i ka ba-yo fè on travay ki enpòwtan. Ni onlo madanm-mayé, onlo manman-zanfan, onlo sè ki pèd mari a yo oben ki sélibatè ki ka sèvi Jéova fidèlman. É yo ni on gran plas an tchè a Jéova. Adan Labib, yo ka palé-nou dè plizyè madanm ki té ni onlo  bèl kalité é ki té ka fè Bondyé plézi. Sé madanm-lasa té plen sajès, yo té ni onlo fwa, yo té ka pòté bon mannèv an prédikasyon, yo té plen kouraj, yo té donan é lè sé té pou édé lézòt, ayen pa té two fò pou yo (Lik 8:2, 3 ; Akt 16:14, 15 ; Wom. 16:3, 6 ; Filip. 4:3 ; Ébr. 11:11, 31, 35). Jòdijou, adan lasanblé an nou, nou ka touvé onlo sè ki ni menm kalité ki sé madanm-lasa. Nou ka di Jéova mèsi pas yo sé on bénédisyon pou nou !

10. Poukwa nou enmé frè é sè an nou ki ni on bèl laj ?

¹⁰ Anplisdisa, nou kontan toubònman davwa adan lasanblé an nou, ni onlo frè é sè ki ja ni on ti laj. Pawmi yo, ni sèwten ki sèvi Jéova fidèlman pannan tout vi a yo. Ni dòt aprézan ki toufré adan lavérité. Ni sa ki malad pas laj-la ka bat-yo. Sitiyasyon a yo pa’a pèwmèt-yo fè tousa yo té’é vlé an prédikasyon oben adan lasanblé-la. Men magrésa, yo ka fè tousa yo pé an prédikasyon, é yo ka itilizé tout fòs a yo pou ankourajé lézòt é pou fòwmé-yo ! É sa yo ka aprann-nou ka édé-nou pwogrésé. Pou Jéova, a pa ti bèl yo bèl ! É pou nou osi, yo bèl ! (Pwov. 16:31).

11-12. Kijan jenn a lasanblé an nou ka ankourajé-nou ?

¹¹ Konnyéla, an-nou palé dè jenn an nou. Lavi pa fasil pou yo pas yo ka grandi adan on mond kè Dyab-la ka dominé é i ka chèché a kouyonné-yo èvè onpakèt mansonj (1 Jan 5:19). Ni onlo jenn ki ka réponn lasal, ki ka préché é ki ka défann sé vérité-la ki an Bib-la èvè onlo kouraj. A pa ti fyèw nou fyèw dè yo ! Jenn, mèt sa fon an tèt a zòt : zòtout ka jouwé on wòl enpòwtan adan lasanblé a Jéova ! (Sòm 8:2).

¹² Sèwten frè é sè ni dimal a kwè kè yo itil adan lasanblé-la. Ka ki pé édé-nou mèt fon an tèt an nou kè nouchak ni plas an nou adan lasanblé-la ? Sé sa nou kay vwè konnyéla.

13-14. Poukwa sèwten moun ni dimal a kwè kè yo ni onlo valè an lasanblé-la ?

¹³ Adan ègzanp-la Pòl pran la nou ka aprann on 2^èm biten. Ki biten ésa ? Pòl palé dè on biten onlo moun ka rèsanti jòdijou : yo ni dimal a vwè itilité a yo adan lasanblé-la. Mi sa Pòl ékri : « Si pyé-la té ka di : “Konm an pa on men, an pa’a fè pawti a kò-la”, apapousa i pa té’é fè pawti a kò-la. Si zòrèy-la té ka di : “Konm an pa on zyé, an pa’a fè pawti a kò-la”, apapousa i pa té’é fè pawti a kò-la » (1 Kor. 12:15, 16). Ka Pòl té vé di-nou pa la ?

¹⁴ Si ou ka konparé-w èvè sélézòt moun-la ki an lasanblé-la ou ké ni dimal a vwè kè ou ni onlo valè. Ni sa ki ka fè diskou byen menm, ni dòt ki enmé òwganizé é yo ka fè sa byen é ni dòt ankò ki ka konsolé é ki ka ankourajé sé mouton-la byen konm i fo. Pétèt ou ka di kè kò a-w pa bon kon ta yo adan sé domenn-lasa. Sa ka montré kè ou ni imilité é kè ou ka rèkonnèt limit a-w (Filip. 2:3). Men fè atansyon ! Si ou toujou ka konparé-w èvè moun ki plen kapasité, sa ké kasé 2 bra a-w. Kon Pòl té ka di, ou pé jous rivé a kwè kè ou sé on manb initil an lasanblé-la. Ka pou ou fè pou woté vyé lidé-lasa an tèt a-w ?

15. Sèlon 1 Korentyen 12:4-11, si kò an nou pibon ki ta lézòt adan on domenn, ka fò-nou rèkonnèt ?

¹⁵ Réfléchi asi sa : o 1^é syèk, Jéova té ba sèwten krétyen pouvwa pou yo té fè mirak. Men tout sé krétyen-la pa té ni menm don-la (li 1 Korentyen 12:4-11). Sé vré, Jéova pa ba sé krétyen-la menm don-la é menm kapasité-la, men pou-y, yochak ni onlo valè. A épòk an nou, Jéova pa’a ban-nou lèspri sen a-y pou nou fè mirak kon sé 1^é krétyen-la. Men toujou étil, jousalè, Jéova ka ba noutout onlo valè menmsi noutout pa ni sé menm kapasité-la.

16. Ki konsèy a Pòl pou nou mèt an pratik ?

 ¹⁶ Olyé nou konparé-nou èvè lézòt, pisimé nou kouté konsèy a Pòl. Mi sa i di : « Fò chakmoun pran on tan pou réfléchi asi jan i ka aji, konsa i ké kontan parapòt a sa limenm fè, men i pé’é kontan pas i konparé-y èvè ondòt moun » (Gal. 6:4).

17. Si nou ka suiv konsèy a Pòl, sé ké on bon biten pou nou. Poukwa nou ka di sa ?

¹⁷ Si nou ka fè sa Pòl di-nou é si nou ka réfléchi asi jan nou ka aji, nou ké rann-nou kont kè nou osi, nou ni sèwten don é sèwten kapasité kè lézòt pa oblijé ni. Pa ègzanp, on ansyen pa oblijé ka fè bèl diskou, men pétèt kè i ka fè on bèl travay an prédikasyon pas i ka édé onlo étidyan a-y pran lèbatèm. Pétèt osi, on ansyen pa byen òwganizé kon sélézòt ansyen-la, men i sé on moun ki vréman janti é ki ka akéyi lézòt byen. I plen lanmou é sé frè é sè-la ka santi-yo alèz èvè-y. Kifè, yo pa pè ay owa-y pou mandé-y on konsèy (Ébr. 13:2, 16). Si nou konnèt adan ki domenn kò an nou bon, nou ké sèvi èvè don an nou pou édé lasanblé an nou é nou ké kontan dè sa nou fè. É konsa, nou pé’é jalou frè é sè an nou davwa yo ka rivé fè sèwten biten kè nou pa’a rivé fè.

18. Ka nou pé fè pou anségné pibyen ?

¹⁸ Kèlkèswa wòl-la nou ka jouwé la adan lasanblé-la é kèlkèswa kapasité an nou, fò noutout anvi pwogrésé pou nou sèvi Jéova pibyen. Pou édé-nou fè sa, Jéova ka sèvi èvè òwganizasyon a-y pou fòwmé-nou. É a pa nenpòt ki fòwmasyon i ka ban-nou ! Pa ègzanp, adan réinyon a simenn-la, yo ka ban-nou konsèy pou nou pé sa vin dé zouti ki pi filé an prédikasyon. Ès ou ka éséyé apliké sé konsèy-la yo ka ba-w la ?

19. Si ou anvi fè Lékòl pou évanjélizatè a Wayòm-la, ka pou ou fè ?

¹⁹ Grasa Lékòl pou évanjélizatè a Wayòm-la, nou ka rèsèvwa on bèl fòwmasyon osi. Pou fè lékòl-lasa, fò ou ja ka sèvi aplentan é fò ou ni ant 23 é 65 an. Pétèt ou ja mèt an tèt a-w kè ou pé’é jen pé ay an lékòl-lasa. Men olyé ou rété ka sonjé ka ki té’é pé anpéché-w fè lékòl-lasa, fè on lis é maké pou ki rézon ou anvi fè-y. Aprésa, éséyé vwè ka pou ou fè pou ou kapab fè lékòl-lasa. Si ou fè bon éfò, Jéova ké édé-w, é sa ou konpranndèdi ou pa té’é pé fè, ou ké fè-y !

20. Ka Women 12:6-8 ka aprann-nou ?

²⁰ Adan ègzanp-la Pòl pran la nou ka aprann on 3^èm biten. Nou ka touvé-y an Women 12:6-8 (li-y). Adan pasaj-lasa osi, Pòl ka montré kè touséla ki an lasanblé-la ni don ki diféran. Men la, i ka montré-nou ondòt biten ankò : fò-nou sèvi èvè sé don-lasa pou fè lasanblé an nou vin pi fò é pou ayen pa soukwé-y.

21. Ka ègzanp a Wobè ka aprann-nou ?

²¹ An-nou pran ègzanp a on frè nou ké kriyé Wobè. I sèvi adan on péyi étranjé pannan on tan é aprésa, yo fè-y viré an péyi a-y pou travay an Bétèl-la. Yo byen èspliké-y kè si yo fè-y viré, a pa paskè i pa té ka fè travay a-y byen la i té yé la. É poutan, mi sa i di : « Pannan plizyè mwa, an té ni lenprésyon kè sé échwé an échwé. Dépawfwa, an té jous anvi kité Bétèl-la. » Men Wobè pa rété an léta-lasa touttan. Ka ki édé-y woufè kò a-y é ni tchè-kontan ? Ni on ansyen ki fè-y sonjé kè tout travay Jéova ka ba-w fè ka fòwmé-w pou tout travay ou ké ni a fè  plita. É grasa fòwmasyon-la Jéova ba-w la, ou ka pi itil adan travay-la ou ka fè konnyéla la. Sa édé Wobè konprann kè lèpasé sé lèpasé é kè fò i konsantré-y asi sa i pé fè konnyéla.

22. Ka ègzanp a Felice ka aprann-nou ?

²² Frè Felice Episcopo touvé-y adan on sitiyasyon ki té ka sanm ta Wobè. Li é madanm a-y fè Lékòl a Galaad an 1956 é apré yo ba-yo diplòm a yo, yo ay sèvi adan on siwkonskripsyon an Bolivie. Men an 1964, yo vin ni on timoun. Mi sa Felice ka rakonté : « Nou té tris toubònman pas fò nou té arété sa nou té ka fè la é nou té enmé sèwvis-lasa onlo. É an ka rèkonnèt kè pannan on lanné, moral an mwen té a zéro. Men Jéova édé-mwen é an chanjé bout-pou-bout. An byen konprann kè sa ki té pi enpòwtan konnyéla la, sé okipé dè timoun an mwen. » Ès sa ja rivé-w dè santi-w kon Wobè ou kon Felice ? Ès ou on ti jan dékourajé pas ou pa ni menm rèsponsabilité ki avan ? Si sé sa, pou ou ni tchè-kontan, fò ou ké chanjé mannyè ou ka rézonné é fò ou ké konsantré-w asi sa ou pé fè konnyéla pou sèvi Jéova é frè é sè a-w. Kontinyé pòté bon mannèv é kontinyé sèvi èvè kapasité a-w é èvè don a-w pou ou pé sa édé lézòt. Konsa ou ké ni tchè-kontan pas ou ké édé lasanblé a-w vin pi fò.

23. a) Fò nou pran tan fè on biten. Ki biten ésa ? b) Ka nou ké vwè adan awtik-la ki ka vin la ?

²³ Jéova ka ba nouchak onlo valè. I vé kè noutout santi kè nou ni on plas enpòwtan an fanmi a-y. Alò, an-nou pran tan réfléchi asi sa nou pé fè pou édé frè é sè an nou vin pi fò. É dépi nou vwè sa pou nou fè, fò-nou fè-y. Konsa, nou pé’é ni tan mèt an tèt an nou kè nou pa ni plas an nou an lasanblé-la. Men ki valè nou ka ba frè é sè an nou ? Ka nou pé fè pou montré-yo kè nou enmé-yo é kè nou ka rèspèkté-yo ? Sé sa nou ké vwè adan awtik-la ki ka vin la.