1-2. Ka nou ké vwè adan awtik-lasa ?

 IMAJINÉ kè ou komandé on biten, é kè ou vréman bizwen biten-lasa. Men pi ou ka atann, pi ou ka vwè koli-la pa’a rivé menm. Kijan ou ka santi-w ? Ès sa ka anbété-w ? Pwovèb 13:12 ka di : « Lè on moun ka atann on biten é kè biten-lasa ka pran tan pou rivé, sa ka fè-y pèd èspwa ». Men si yo ka di-w kè si koli-la po’o rivé sé pou on bon rézon, a moman-lasa ou ké pé atann-li pli fasilman.

² Adan awtik-lasa nou ké vwè déotwa prensip ki ké édé-nou kontinyé ‘atann Jéova èvè pasyans’ (Mich. 7:7). Nou ké vwè osi kè adan sèwten sitiyasyon, fò-nou atann kè Jéova aji. Nou ké ègzaminé 2 adan yo. Aprésa, nou ké palé dè tout bon biten nou ké ni si nou kontinyé pran pasyans.

3. Ka Pwovèb 13:11 ka aprann-nou ?

³ Pwovèb 13:11 ka èspliké-nou poukwa fò-nou ni pasyans. Mi sa nou ka li adan vèwsé-lasa : « Lè on moun vin rich onsèl kou, sa i vin ni ké fonn, men lè on moun ka vin rich piti-a-piti sa i ni ké gwosi ». Ka vèwsé-lasa ka aprann-nou ? On moun ki ni sajès ké aji èvè pasyans é i ké fè biten a-y piti-a-piti.

4. Ki prensip nou ka touvé an Pwovèb 4:18 ?

⁴ Mi sa nou ka li an Pwovèb 4:18 : « Chimen a moun ki jis, sé kon lè limyè ka kléré lèmaten, i ka kléré piti-a-piti jistan jou wouvè ». Vèwsé-lasa ka montré-nou kijan Jéova  ka édé pèp a-y konprann pwojé a-y piti-a-piti. Men vèwsé-la ka édé-nou konprann osi kijan on krétyen ka fè chanjman adan vi a-y pou pwogrésé adan lavérité. Pou vin bon zanmi èvè Jéova sa ka mandé tan. Si nou ka pran tan étidyé é si nou ka mèt sé konsèy-la ki an Bib-la é sé konsèy-la kè lòwganizasyon ka ban-nou la an pratik, piti-a-piti nou ké ni menm kalité ki Jézi. É pi tan-la ké ka pasé é pi nou ké konnèt Bondyé byen. An-nou vwè kijan Jézi sèvi èvè on ègzanp pou montré sa.

5. Jézi sèvi èvè on ègzanp pou montré kè sa ka pran tan pou on moun pwogrésé. Ki ègzanp ésa ?

⁵ Jézi sèvi èvè on ègzanp pou èspliké kijan mésaj a Wayòm-la kè nou ka préché la kon dé ti grenn ki ka pousé piti-a-piti adan tchè a moun ki sensè. Mi sa i di : ‘Sé grenn-la ka pété, yo ka pousé é moun-la ki ka simé la pa’a menm sav kijan. Li tè-la, piti-a-piti i ka pwodui tousèl a-y : an prèmyé tij-la ka pousé, aprésa tèt a tij-la ka fè grenn, é an dènyé sé grenn-la ka mi an tèt a tij-la’ (Mawk 4:27, 28). Men ka Jézi té vlé di pa la ? On plant sé piti-a-piti i ka pousé, menmjan-la osi lèwvwè mésaj a Wayòm-la ka touché tchè a on moun, sé piti-a-piti moun-lasa ka pwogrésé. É sé sa ki ka pasé pou on étidyan a Labib : pi i ka vin bon zanmi èvè Jéova é pi i ka fè chanjman an vi a-y (Éféz. 4:22-24). Men on biten pou nou pa jen oubliyé, sé kè sé Jéova ki ka fè ti grenn-lasa pousé (1 Kor. 3:7).

6-7. Jan-la Jéova kréyé latè ka montré-nou on biten. Ki biten ésa ?

⁶ Jéova ni pasyans, lè i ni on biten a fè i ka fè-y atètipo. É anplisdisa, lè i ka fè on biten, sé pou fè lézòt dibyen, é sé pou non a-y vin sen osi. Pa ègzanp, lè nou ka pran on ti tan pou réfléchi, nou ka rann-nou kont kè Jéova préparé latè pou lézòm piti-a-piti.

⁷ Lè Labib ka palé dè jan Jéova kréyé latè, i ka di kè ‘i miziré tè-la’, kè ‘i fè  fondasyon a-y’, é kè ‘i mèt wòch-la ki k’ay an kwen a fondasyon-la’ (Jòb 38:5, 6). Jéova jous pran tan ègzaminé travay a-y (Jén. 1:10, 12). Ès ou ka imajiné sa sé zanj-la té ka rèsanti, lè yo té ka vwè chak nouvo biten Jéova té ka kréyé ? A pa ti kontan yo dwèt té kontan ! Sa jous rivé yo hélé tèlman yo té kontan (Jòb 38:7). Sa ka montré-nou kè Jéova pran milyé é milyé lanné pou i té kréyé latè, men lè i pran tan gadé sa i fè, i di kè ‘sa té bon menm’ (Jén. 1:31).

8. Ka nou kay ègzaminé aprézan ?

⁸ Nou sòti vwè kè adan Labib, ni onlo prensip ki ka montré kè sa enpòwtan kè nou aji èvè pasyans. Aprézan, an-nou vwè 2 sitiyasyon ki ka montré kè fò-nou byen désidé a atann Jéova èvè pasyans.

9. Adan ki sitiyasyon fò-nou byen désidé a atann Jéova ?

⁹ Dépawfwa fò-nou atann kè Jéova réponn a priyè an nou. Pétèt kè nou ka mandé Jéova fòs pou nou pé sa andiré on pwoblèm, oben nou ka mandé-y édé-nou pou nou pé sa arété fè on biten kè i pa enmé. Nou pé ni lenprésyon kè Jéova ka pran tan pou réponn-nou. Men dépawfwa, poukwa Jéova pa’a réponn a priyè an nou tousuit ?

10. Poukwa fò-nou ni pasyans lè nou ka atann kè Jéova réponn a priyè an nou ?

¹⁰ Jéova ka pran tan kouté priyè an nou byen (Sòm 65:2). Lè nou ka priyé-y, pou-y sa vlé di kè nou ni fwa adan-y (Ébr. 11:6). Men i vlé vwè osi si nou byen désidé a fè éfò pou fè sa nou ka mandé-y adan priyè an nou é si nou byen désidé a fè volonté a-y (1 Jan 3:22). Alò lè nou ka mandé Jéova édé-nou arété fè on biten kè i pa enmé, fò-nou ni pasyans é fò-nou fè tousa nou pé pou chanjé. Jézi byen fè-nou konprann kè a pa tousa nou mandé Jéova kè i ké ban-nou tousuit. Mi sa i di : « Kontinyé mandé, é yo ké ba-w. Kontinyé chèché, é ou ké touvé. Kontinyé kongné, é yo ké wouvè ba-w. Pas sila ki ka mandé ké risivwè, sila ki ka chèché ké touvé é sila ki ka kongné, yo ké wouvè ba-y » (Mat. 7:7, 8). Si nou ka kontinyé fè sa Jézi mandé-nou fè é si nou ka priyé akontinyé, nou pé sèten kè Pap’an nou ki an syèl-la ka kouté priyè an nou é kè i ké réponn-nou (Kol. 4:2).

11. Kijan Ébré 4:16 ka rasiré-nou lèwvwè nou ni lenprésyon kè Jéova ka pran tan pou réponn a priyè an nou ?

¹¹ Défwa ès nou ni lenprésyon kè Jéova ka pran tan pou réponn a priyè an nou ? Si sé sa nou ka pansé, fò-nou toujou sonjé kè Jéova ké réponn ‘lè bon moman-la’ ké rivé (li Ébré 4:16). Pétèt kè nou ka atann on biten é nou pa’a vwè-y ka rivé. Si sé sa, fò pa nou fè kòlè èvè Jéova pousa. Pa ègzanp, ni sèwten moun ki présé vwè lafen rivé, é sa ka fè lanné é lanné kè yo ka priyé pou wayòm a Bondyé vini (Mat. 6:10). Sa té’é byen domaj si fwa an nou té ka fébli pas lafen pa rivé lè nou té ka atann-li la ! (Abak. 2:3 ; Mat. 24:44). Vométan nou kontinyé atann Jéova èvè pasyans, é kè nou priyé-y èvè onlo fwa. Lafen ké vin lè bon moman-la ké rivé pas Jéova ja chwazi jou-la é lè-la. É jou-lasa, toutmoun ké vwè kè Jéova chwazi bon moman-la pou i aji (Mat. 24:36 ; 2 Pyè 3:15).

12. Défwa fò-nou pran pasyans. A ki moman sa pé rèd pou nou ?

¹² Dépawfwa, lèwvwè yo ka aji mal èvè  nou, fò-nou atann kè Jéova réponn. Adan mond-lasa, sèwten moun ka pèwsékité dòt moun pas yo pa menm jan ki yo, yo pa menm ras ki yo, yo pa ni menm kilti ki yo, yo pa fèt an menm péyi ki yo. Yo ka pèwsékité osi sèwten moun ki enfim oben ki malad an tèt. Anplisdisa, yo ka pèwsékité sèwvitè a Jéova pas yo ka kwè adan Labib. Men lèwvwè nou ka sibi dé biten ki enjis konsa, fò-nou sonjé sa Jézi té di : « Moun-la ki ké andiré jous a lafen ké sové » (Mat. 24:13). Si ou vin sav kè on moun a lasanblé-la vin fè on biten ki grav, ka pou ou fè ? Jéova ka di sé ansyen-la kijan pou yo réglé sé sitiyasyon-lasa dépi yo okouran dè pwoblèm-la. Ès ou ké lésé sa an men a yo ? Ès ou ké atann é ou ké lésé sé ansyen-la réglé sitiyasyon-lasa ? An-nou vwè ka pou sé ansyen-la fè lèwvwè on moun fè on péché ki grav.

13. Lè on moun fè on péché ki grav ka Jéova ka mandé sé ansyen-la fè ?

¹³ Lè sé ansyen-la ka aprann kè ni on moun adan lasanblé-la ki fè on péché ki grav, yo ka priyé Jéova pou i ba-yo « sajès-la ki ka sòti anhola ». Konsa, yo ka chèché a vwè sitiyasyon-la kon Jéova ka vwè-y (Jak 3:17). Òbjèktif a yo sé édé moun-la ki péché la ‘woté kò a-y adan mové chimen-la’ i pran la (Jak 5:19, 20). An menm balan-la, yo vlé fè tousa yo pé pou pwotéjé lasanblé-la é yo vlé konsolé moun ki ka soufè adan sa (2 Kor. 1:3, 4). Lè sé ansyen-la ka ègzaminé ka a on moun ki fè on péché grav, prèmyé biten yo ka fè sé chèché a sav ka ki pasé ègzaktèman. Men pou fè sa, sa pé pran tibwen tan. Aprésa, yo ka priyé pou chèché dirèksyon a Jéova, é fò-yo ay vwè moun-la ki péché la, pou ba-y déotwa konsèy ki sòti adan Labib (Jér. 30:11). Fò-yo korijé-y men fò pa yo two mòl èvè-y é fò pa yo two rèd èvè-y nonplis. Sé ansyen-la pa’a tadé pou aji, men yo pa’a pran pon désizyon présé-présé. Lè yo ka fè sa Jéova ka mandé-yo fè, sa ka fè tout lasanblé-la dibyen. Men menmsi sé ansyen-la jéré on sitiyasyon konm i fo, ni dé moun ki ka kontinyé soufè akòz dè sa moun-la ki péché la fè la. Si sé ka a-w, ka ou pé fè pou ou santi-w myé ?

14. Adan Labib, ki ègzanp ki pé konsolé-w si on frè oben on sè fè on biten ki fè-w mal ?

 ¹⁴ Ès sa ja rivé-w kè on moun fè on biten ki fè-w mal ? Pétèt kè moun-lasa sé on frè oben on sè. Adan Labib, ou ké touvé onlo bèl ègzanp a moun ki atann èvè onlo pasyans kè Jéova aji pou réglé pwoblèm a yo. An-nou palé dè Jozèf. Sé frè a-y la fè-y bon méchansté men i pa vin égri akòz dè sa. Okontrè, i kontinyé fè tousa i té pé pou sèvi Jéova é Jéova béni-y toubònman pas i té ni pasyans é pas i andiré (Jén. 39:21). Piti-a-piti Jozèf rivé padonné frè a-y, é i vwè jan Jéova béni-y (Jén. 45:5). Menmjan ki Jozèf, si nou ka rété bon bon zanmi èvè Jéova, i ké konsolé-nou. Nou pé sèten kè i ké réglé tout kalité enjistis (Sòm 7:17 ; 73:28).

15. Yo fè on sè on biten ki pa jis. Ka ki édé-y sipòté sa ?

¹⁵ Pétèt kè nou pé’é jen sibi sa Jozèf viv, men lè on moun ka fè-nou on biten ki pa jis, sa ka fè-nou mal. Adan on ka konsa, fò-nou suiv sé prensip-la kè Jéova ka ban-nou la menmsi moun-lasa pa Témwen a Jéova (Filip. 2:3, 4). An-nou pran ègzanp a on sè. On kolèg-travay a-y mété-y ka di enpé bétiz asi-y. Lè i tann sa, sa fè-y mal, men i pa lévé cho. I sonjé ègzanp a Jézi. Lèwvwè yo té ka jiré-y, i pa té ka viré jiré moun-la (1 Pyè 2:21, 23). Kifè, i lésé kolèg a-y bat kò a-y. Kèlkè tan apré, i vin sav kè kolèg-la té ni on maladi ki grav é kè sa té ka pran tèt a-y. A moman-lasa, sè-la di an tchè a-y érèzman i pa té fè on istwa èvè sa, pas kolèg a-y pa té ka pansé vréman sa i té ka di. Konm i andiré sitiyasyon-lasa, i té kontan é lèspri a-y té trankil.

16. Ki lidé nou ka touvé an 1 Pyè 3:12 ki pé konsolé-nou lèwvwè nou ka viv on sitiyasyon ki pa jis ?

¹⁶ Si ou ka soufè pas yo fè-w on biten ki pa jis, oben pas ou ka viv ondòt sitiyasyon difisil ankò, sonjé kè Jéova toupré moun « tchè a yo fann » (Sòm 34:18). I enmé-w pas ou ka montré kè ou ni pasyans é pas ou ka lagé sa ki two lou ba-w asi-y (Sòm 55:22). Sé-y ki Jij a tout latè. I ka vwè tousa ki ka fèt (li 1 Pyè 3:12). Alò, lèwvwè ou ka jwenn difikilté  kè ou pé pa rézoud, sonjé kè sa enpòwtan kè ou atann kè Jéova aji.

17. Dapré Izayi 30:18, dè kibiten nou pé sèten ?

¹⁷ Talè, grasa wayòm a-y, Pap’an nou ki an syèl-la ké vidé onpakèt bénédisyon asi nou. Mi sa nou ka li an Izayi 30:18 : « Jéova ka atann èvè pasyans pou aji èvè konpasyon épi zòt, i ké mété-y doubout pou aji èvè mizérikòd épi zòt. Pas Jéova sé on Bondyé ki ni jistis. Tchè-kontan pou tout moun ki ka kontinyé atann-li ». Tout moun ki ka kontinyé atann Jéova pé sèten kè yo ké risivwè onpakèt bénédisyon dépi konnyéla é adan mond nouvo la osi.

18. Ki byenfé ki ka atann-nou ?

¹⁸ Adan mond nouvo la nou pé’é ka enkyété-nou ankò é tout difikilté nou pé ni ké disparèt (Rév. 21:4). Pé’é ni pon enjistis ankò é pé’é ni pon doulè nonplis. Pé ké ni ayen pou pran tèt an nou ankò é nou ké ni tousa nou bizwen agogo (Sòm 72:16 ; Iz. 54:13). Aaa ! A pa ti bèl sa ké bèl !

19. Jéova ka préparé-nou pou on biten. Ki biten ésa ?

¹⁹ Dépi konnyéla, Jéova ka préparé-nou pou nou viv anba dominasyon a-y. Pousa, i ka édé-nou lagé mové labitid kè nou ni é i ka édé-nou ni onlo bèl kalité. Alò pa dékourajé é kontinyé sèvi Jéova. Bénédisyon dèyè poko mannyé ! On bèl landèmen ka atann-nou ! Alò, an-nou kontinyé atann èvè pasyans kè Jéova fè tout pwomès a-y réyalizé.