1. Lèwvwè nou ka sonjé tousa Jéova kréyé, ka nou ka rèsanti ?

 LÈ OU ka sonjé tousa Jéova kréyé, ka ou ka rèsanti ? Pétèt kè ou ka rèsanti menm biten ki David. Mi sa i maké : « Lè an ka vwè syèl a-w, tousa ou fè èvè men a-w, lalin-la é sé zétwal-la ou fè la, an ka mandé-mwen ka lòm yé pou ou sonjé-y, é ka pitit a lòm yé pou ou pé sa okipé dè-y ? » (Sòm 8:3, 4). Kon David, lèwvwè nou ka vwè jan nou piti parapòt a tousa Jéova kréyé, nou ka touvé sa fò ké i ka entérésé-y a nou. Lèwvwè Jéova kréyé Adan é Èv, i okipé dè yo é i akéyi-yo bra gran wouvè adan fanmi a-y, é sé sa nou ké vwè adan awtik-lasa.

2. Ki pwojé Bondyé té ni pou Adan é Èv ?

² Prèmyé timoun a Jéova asi latè, sé té Adan é Èv, é sé-y ki té Pap’a yo an syèl-la é i té enmé-yo onlo. I té ba-yo on travay a fè é sa té toutafè nòwmal pou-y kè yo fè-y. Mi sa i té mandé-yo : « Fè timoun é miltipliyé-zòt, ranpli latè é dominé asi-y » (Jén. 1:28). Sa vé di ké fò Adan é Èv té ni timoun é fò-yo té okipé-yo dè latè. Si yo té kouté Bondyé é si yo té fè sa i té mandé-yo fè, yo té’é fè pawti a fanmi a Bondyé pou touttan.

3. Poukwa nou pé di kè Adan é Èv té ni on bèl plas adan fanmi a Jéova ?

³ Jéova té ba Adan é Èv on bèl plas adan fanmi a-y. Mi sa David di Jéova lèwvwè i palé dè lòm : « Ou pa fè-y menm hotè ki sé zanj-la, ou fè-y tibwen pi ba ki yo é ou ba-y glwa é lonnè konm kouwòn » (Sòm 8:5). Sé vré, lézimen pa puisan kon sé zanj-la, yo pa ni menm entélijans ki yo é yo pa ni menm kapasité ki yo nonplis (Sòm  103:20). Men menmsi Jéova pa fè lézimen menm hotè ki sé zanj-la, i pa fè-yo tèlman « pi ba » ki yo. Ou ka imajiné-w ! Lé Jéova kréyé Adan é Èv, yo té adoumanman !

4. a) Konm Adan é Èv pa kouté Jéova, ka ki rivé-yo ? b) Ka nou ké vwè adan awtik-lasa ?

 ⁴ Men malérèzman, Adan é Èv pa kouté Jéova, kifè yo pa fè lonfé adan fanmi a-y. É adan awtik-lasa nou ké vwè kè sa menné onlo pwoblèm ba désandan a yo. Men pwojé a Jéova pa chanjé. I vlé kè moun ki ka kouté-y rété timoun a-y pou touttan. Adan awtik-lasa, nou ké vwè ka Jéova fè pou ban-nou lonnè. Aprésa, nou ké vwè ka nou pé fè pou montré kè nou anvi fè pawti a fanmi a Jéova. É pou fin, nou ké palé dè tout bon biten Jéova ké ba timoun a-y si latè pou touttan.

5. Ka nou pé fè pou ba Jéova lonnè ?

⁵ Jéova fè-nou pòtré a-y é sé on bèl lonnè toubònman (Jén. 1:26, 27). Kifè grasa sa, nou pé imité-y. Pa ègzanp, nou pé aji èvè lanmou, èvè konpasyon, èvè fidélité é èvè jistis (Sòm 86:15 ; 145:17). Lè nou ka fè éfò pou imité kalité a Jéova, nou ka ba-y lonnè é nou ka montré-y kè nou ni onlo rèkonésans pou-y (1 Pyè 1:14-16). Lè sa nou ka fè ka fè Pap’an nou ki an syèl-la plézi, tchè an nou ka kontan. Jéova sav ki jan dè moun i vlé an fanmi a-y. Konm i fè-nou pòtré a-y, nou ni tousa ki fo pou fè pawti a fanmi a-y.

6. Jéova ka ba lézimen lonnè ondòt jan ankò. Kilès ?

⁶ Jéova fè on bèl ti koté pou nou pé sa rété. Jéova ranjé latè byen konm i fo pou lézimen té pé sa rété asi-y. É i fè sa byen lontan avan i té kréyé prèmyé misyé-la (Jòb 38:4-6 ; Jér. 10:12). Konm i janti é i donan, i mété tout kalté biten asi latè pou lézimen ni tchè-kontan (Sòm 104:14, 15, 24). Lè i té ka pran tan sonjé tousa i kréyé, i té ka « vwè kè sa té bon » (Jén. 1:10, 12, 31). I ba lézimen lonnè pas i ba-yo « pouvwa » asi tousa i kréyé (Sòm 8:6). Jéova vé kè lézimen vin pawfé é kè yo pran swen a tousa i kréyé é i vé yo fè sa èvè onlo jwa tout vi a yo. Jéova prévwa on bèl landèmen pou nou. Men ès ou ni labitid di-y mèsi pousa ?

7. Dapré Joziyé 24:15, poukwa nou pé di kè lézimen lib dè fè pwòp chwa a yo ?

⁷ Nou pé pran pwòp désizyon an nou pas Jéova ban-nou libèté-lasa. Nou pé désidé noumenm an nou ka nou ké fè adan lavi (li Joziyé 24:15). Nou ka tou konprann kè Jéova kontan lèwvwè nou ka chwazi sèvi-y (Sòm 84:11 ; Pwov. 27:11). Men nou pé sèvi èvè libèté-lasa adan dòt domenn a vi an nou. An-nou vwè ka ègzanp a Jézi ka aprann-nou asi sa.

8. Jézi té pé chwazi sa i vlé fè. Kijan i té ka sèvi èvè libèté-lasa ?

⁸ Menmjan ki Jézi, nou pé chwazi fè entéré a lézòt pasé avan tan nou. On jou, Jézi é apòt a-y té byen las, é yo chèché on ti koté trankil pou yo pozé kò a yo. Men yo pa ni tan pozé pas on foulmoun rivé touvé-yo é sé moun-lasa té vlé Jézi anségné-yo. Ès Jézi fè kòlè pousa ? Awa ! Okontrè, sa fè-y lapenn pou tout sé moun-lasa. Ka Jézi fè ? « I koumansé aprann-yo onlo biten » (Mawk 6:30-34). Lè nou ka sèvi èvè tan an nou é énèwji an nou pou fè lézòt dibyen, kon Jézi té ka fè, sa ka ba Pap’an nou ki an syèl-la lonnè (Mat. 5:14-16). Nou ka montré Jéova osi kè nou vlé fè pawti a fanmi a-y.

9. Ki bèl kado Jéova ba lézimen ?

 ⁹ Jéova ka pèwmèt lézimen fè timoun, men i ba-yo on rèsponsabilité osi. Fò-yo aprann sé timoun-la enmé Jéova é sèvi-y. Si ou ni timoun, ès ou ka di Jéova mèsi pou bèl kado-lasa ? Jéova ba sé zanj-la onpakèt bénédisyon, men i pa pèwmèt-yo ni timoun. Alò, fò sé paran-la ni onlo rèkonésans pou sé timoun-la yo ni la é fò-yo lévé sé timoun-la byen konm i fo. Yo ni on rèsponsabilité ki enpòwtan : fò-yo kontinyé lévé timoun a yo « sèlon édikasyon é avèwtisman a Jéova » (Éféz. 6:4 ; Dét. 6:5-7 ; Sòm 127:3). Lòwganizasyon ka ba sé paran-la tousa yo bizwen pou édé-yo. I ka ba-yo piblikasyon, vidéo, chanson é yo jous ka touvé awtik asi Entèwnèt osi. Sa ka montré vréman kè Pap’an nou ki an syèl-la é Gason a-y enmé sé timoun-la (Lik 18:15-17). A pa ti kontan Jéova ka kontan lè i ka vwè sé paran-la ka fè fon asi-y pou yo lévé timoun a yo é lè i ka vwè tousa yo ka fè pou yo pé sa pran swen a sé timoun-la ! Anplisdisa, lèwvwè yo ka fè sa, sé chimen yo ka trasé pou pèwmèt sé timoun-la fè pawti a fanmi a Jéova pou touttan !

10-11. Ki pòt Jéova wouvè grasa ranson-la ?

¹⁰ Pou nou té pé sa woufè pawti a fanmi a Jéova, i bay Gason-la i té pi enmé la. Kon nou vwè-y adan  paragraf 4 la, Adan é Èv pèd plas a yo adan fanmi a Jéova é yo anpéché timoun a yo fè pawti a fanmi-lasa osi (Wom. 5:12). Yo désidé pa kouté Bondyé, kifè Bondyé woté-yo adan fanmi a-y. Men ka ki té’é rivé timoun a yo ? Konm Jéova enmé-nou, i désidé adòpté moun ki té’é obéyi-y. Pou i té pé fè sa, fò i té ba-y vi a sèl Gason-la i té ni la, Jézikris (Jan 3:16 ; Wom. 5:19). Grasa sakrifis-lasa, Jéova adòpté 144 000 moun ki fidèl pou vin gason a-y (Wom. 8:15-17 ; Rév. 14:1).

¹¹ Anplisdisa, ni milyon é milyon moun ki ka sèvi Jéova fidèlman. Yo ké pé fè pawti a fanmi a Bondyé apré dènyé éprèv-la yo ké travèsé la an bout a sé 1000 an-la (Sòm 25:14 ; Wom. 8:20, 21). Konm yo ni èspérans-lasa, dépi konnyéla yo pé kriyé Jéova « Papa » (Mat. 6:9). Sé résisité-la osi ké pé aprann sa Jéova ka atann dè yo. Si yo ka kouté-y, yo osi yo ké pé fè pawti a fanmi a-y.

12. Konnyéla, a ki kèsyon nou ké réponn ?

¹² Nou sòti vwè kè Jéova ka ba lézimen lonnè plizyè fason diféran. I adòpté sé krétyen wen la pou yo pé sa vin gason a-y, é adan mond nouvo la ‘gran-foulmoun-la’ ké pé vin timoun a-y (Rév. 7:9). Men ka nou pé fè pou montré Jéova kè nou anvi fè pawti a fanmi a-y pou touttan ?

13. Dapré Mawk 12:30, ka pou nou fè pou Jéova akéyi-nou bra gran wouvè adan fanmi a-y ?

¹³ Sèvi Jéova èvè tout tchè a-w pou montré-y kè ou enmé-y (li Mawk 12:30). Jéova tèlman janti kè i ka ban-nou onlo bèl kado. É yonn adan sé pli bèl kado-la i ka ban-nou la, sé kè nou pé adoré-y. Nou ka montré Jéova kè nou enmé-y si nou ka fè sa i ka « mandé-nou fè » (1 Jan 5:3). Jéova sèvi èvè Jézi pou di-nou ka pou nou fè. I di-nou fè disip é batizé-yo (Mat. 28:19). Anplisdisa, i di-nou kè fò yonn enmé lòt (Jan 13:35). Si nou ka fè sa Jéova mandé-nou fè, i ké akéyi-nou bra gran wouvè adan gran fanmi a-y (Sòm 15:1, 2).

14. Dapré Matyé 9:36-38 é Women 12:10, kijan nou pé montré lézòt kè nou enmé-yo ?

 ¹⁴ Montré lézòt kè ou enmé-yo. Lanmou sé pi bèl kalité a Jéova (1 Jan 4:8). I montré-nou kè i enmé-nou avan menm nou té konnèt-li (1 Jan 4:9, 10). Lè nou ka montré lézòt kè nou enmé-yo sé Jéova nou ka imité (Éféz. 5:1). Yonn adan sé pi bèl mannyè-la nou pé montré lézòt kè nou enmé-yo, sé lè nou ka édé-yo konnèt Jéova avan two ta maré-yo (li Matyé 9:36-38). Konsa, nou ka ba-yo lokazyon fè pawti a fanmi a Bondyé. É lèwvwè on moun pran lèbatèm, fò-nou kontinyé enmé-y é fò-nou kontinyé rèspèkté-y (1 Jan 4:20, 21). Men kijan pou nou fè sa ? Pa ègzanp, lè nou pa’a rivé konprann on biten kè on moun fè oben on biten kè on moun di, nou pé’é jijé-y é nou pé’é di kè i té ni mové lentansyon. Okontrè, nou ké fè-y konfyans, nou ké ba-y lonnè é nou ké montré-y kè i ni plis valè ki nou (li Women 12:10 ; Filip. 2:3).

15. Èvè kimoun pou nou aji épi bonté é mizérikòd ?

¹⁵ Aji épi bonté é mizérikòd èvè toutmoun. Pou nou kriyé Jéova Papa, a pa konsa ! Fò-nou mérité-y. Pousa, fò-nou apliké tout sé konsèy-la i ka ban-nou la adan Pawòl a-y. Pa ègzanp, Jézi ka mandé-nou aji èvè bonté é èvè mizérikòd épi toutmoun, menm èvè lènmi an nou osi (Lik 6:32-36). Men konfèdmanti, sa pa toujou fasil. Kifè, fò nou fè on travay asi nou pou nou ni menm mantalité ki Jézi é pou nou aji kon i té ka aji. Lè nou ka fè tousa nou pé pou kouté Jéova é pou imité Jézi, nou ka montré Pap’an nou ki an syèl-la kè nou anvi fè pawti a fanmi a-y pou touttan.

16. Ka nou pé fè pou répitasyon a fanmi a Jéova rété pwòp ?

¹⁶ Fè ansòt pou fanmi a Jéova pa pèd bon répitasyon-la i ni la. Souvantfwa, adan on fanmi, sé pli piti timoun-la ni labitid imité gran frè a yo oben gran sè a yo. Si sé pli gran-la ka suiv prensip ki an Bib-la, yo ké vin dé bon ègzanp pou ti frè a yo oben ti sè a yo. Men pawkont, si sé pli gran-la ka fè mové biten, sé pli piti-la ka riské dè pran mové pli-la osi. Adan fanmi a Jéova sé menm biten-la. Si on krétyen ka vin apòsta oben kè i ka menné on vi ki pa annakò èvè prensip a Bondyé, pétèt dòt moun an lasanblé-la ké anvi fè menm biten ki-y. É akòz dè konpòwtèman a yo, sa ké sali répitasyon a fanmi a Jéova (1 Tés. 4:3-8). Fò pa yo suiv sé mové ègzanp-lasa é fò pa nou lésé ayen fè-nou pèd lanmityé an nou èvè Pap’an nou ki an syèl-la.

17. Ki mové rézònman pou nou woté an tèt an nou, é poukwa fò-nou fè sa ?

¹⁷ Mèt konfyans a-w an Jéova olyé ou mèt konfyans a-w adan byen matéryèl. Jéova ka pwomèt-nou kè i ké ban-nou tousa nou bizwen ki sé manjé, ki sé lenj pou nou mèt asi nou, ki sé on koté pou nou pé sa rété. Men pousa, fò nou mèt wayòm a-y prèmyé douvan an vi an nou é fò nou suiv prensip a-y ki jis (Sòm 55:22 ; Mat. 6:33). Si nou ni konfyans adan pwomès-lasa, nou pé’é mèt an tèt an nou kè sé byen matéryèl an nou ki ké pwotéjé-nou é kè sé sa ki ké ban-nou tchè-kontan. Poukwa ? Pas nou sav kè sèl mannyè nou pé viv anpé, sé si nou ka fè volonté a Jéova (Filip. 4:6, 7). Menmsi a pa lajan ka manké-nou pou nou achté onlo biten, fò-nou mandé-nou si nou ké ni asé tan é asé fòs pou nou sèvi èvè  sé biten-lasa é pou nou okipé dè yo. Ès nou ka ba sa nou ni twòp enpòwtans ? On biten pou nou pa jen oubliyé sé kè Jéova vlé kè moun an fanmi a-y rété byen okipé adan travay-la i ba-yo fè la. Sa vé di kè fò pa nou lésé ayen anpéché-nou fè travay-lasa. Penga nou pa vin kon jennboug-la ki rèfizé suiv Jézi ! I té’é pé vin timoun a Bondyé men konm i té twòp enmé byen matéryèl a-y, i lésé lokazyon-lasa pasé (Mawk 10:17-22).

18. Ki gran lonnè é ki bénédisyon moun ki ka fè volonté a Jéova ké jwenn pou touttan ?

¹⁸ Moun ki ka fè volonté a Jéova ké pé enmé-y é adoré-y pou touttan. Pa ni pli gran lonnè ki sa ! Séla ki ni lèspwa dè viv asi latè ké kontan toubònman. Jéova ké ba-yo okipé dè bèl koté-la i préparé èspésyalman ba yo la : latè. Talè, anba dominasyon a wayòm a Bondyé, latè é tousa ki anlè-y ké wouvin nèf. Jézi ké réparé tout déga Adan é Èv fè lèwvwè yo désidé ba fanmi a Jéova do. Jéova ké résisité milyon é milyon moun é i ké pèwmèt-yo viv pou touttan asi latè. Yo ké ni on santé ki pawfé é anplisdisa latè ké touné an paradi (Lik 23:42, 43). Lè moun ki ka sèvi Jéova ké vin pawfé, Jéova ké ba-yo « glwa é lonnè konm kouwòn » (Sòm 8:5).

19. Ka fò pa nou jen oubliyé ?

¹⁹ Si ou ka fè pawti a ‘gran-foulmoun-la’, ou ni on bèl èspwa toubònman. Bondyé enmé-w onlo é i vlé kè ou fè pawti a fanmi a-y. Alò, fè tousa ou pé pou fè-y plézi. É chakjou Bondyé fè jou, sonjé sé bèl pwomès-lasa. Jéova ka ban-nou on bèl lonnè toubònman : nou pé adoré-y. Men anplisdisa, i ka ban-nou on bèl èspérans : talè nou ké pé ba-y louwanj pou touttan ! Alò, ba sé 2 biten-lasa onlo valè.