1. Lèwvwè nou ka rakonté kijan nou vin konnèt lavérité, poukwa sa ka fè-nou dibyen ?

 « KIJAN ou vin konnèt lavérité ? » Sèten ou ja ni lokazyon réponn a kèsyon-lasa a plizyè rèpriz. Sa nòwmal pas sé yonn adan sé prèmyé biten-la nou ké mandé on frè oben on sè lèwvwè nou vé konnèt-li pibyen. Nou tèlman enmé kouté frè é sè an nou rakonté kijan yo aprann konnèt lavérité é kijan yo aprann enmé Jéova. Nou enmé èspliké-yo osi tousa lavérité ka pòté dè bon ban nou (Wom. 1:11). Lèwvwè nou ka fè dé ti kozé konsa, sa ka fè-nou sonjé jan nou enmé lavérité. Anplisdisa, sa ka ban-nou plis balan pou nou « kontinyé maché adan lavérité », kivédi pou nou kontinyé viv kon Jéova ka mandé pou nou pé sa fè-y plézi é pou i pé sa béni-nou (3 Jan 4).

2. Ka nou ké vwè adan awtik-lasa ?

² Nou enmé lavérité pou plizyè rézon. Adan awtik-lasa, nou ké vwè déotwa adan yo. Aprésa, nou ké vwè ka nou pé fè pou nou kontinyé montré kè nou enmé lavérité. Lèwvwè nou ké wouvwè sé biten-lasa, nou ké ni plis rèkonésans pou Jéova ankò davwa i fè-nou vin owa a-y (Jan 6:44). Anplisdisa, nou ké anvi fè lézòt konnèt lavérité plis ankò.

3. Nou ni onlo rézon pou nou enmé lavérité. Men kilès la ki pi enpòwtan la ?

³ Nou ni onlo rézon pou nou enmé lavérité. Men rézon-la ki pi enpòwtan la sé kè nou enmé Jéova, é sé grasa-y si lavérité ka ègzisté. Lèwvwè nou ka étidyé Pawòl a Bondyé, Labib, nou ka aprann kè sé Bondyé ki kréyé syèl-la é tè-la é kè i toupuisan. Men nou ka aprann osi kè Jéova sé Pap’an nou ki an syèl-la é i ka pran swen an nou èvè onlo tandrès (1 Pyè 5:7). Nou vwè osi kè sé « on Bondyé ki ka aji èvè pityé é ki ka pran penn a moun, ki pa ka fè kòlè vit, ki  plen lanmou, on lanmou ki fidèl é ki toujou ka di lavérité » (Ègz. 34:6). Jéova enmé lajistis (Iz. 61:8). Lèwvwè Jéova ka vwè-nou ka soufè, sa ka fè-y lapenn. Non sèlman i anvi fè on biten ban nou men i présé fè sa, é lèwvwè moman-la ké rivé i ké fè-y (Jér. 29:11). Mésyé, a pa ti bèl sa bèl ! Lè nou ka réfléchi asi tout sé biten-lasa, pa ni mwayen nou pa enmé Jéova.

4-5. Poukwa lapòt Pòl konparé èspérans an nou èvè on lank a bato ?

⁴ Pou ki dòt rézon nou enmé lavérité ? Pas i ka fè-nou dibyen toubònman. An-nou pran ègzanp a èspérans an nou. Nou ka touvé bèl èspérans-lasa adan sé vérité-la ki an Bib-la. Pou montré jan èspérans-lasa ni onlo valè, mi sa lapòt Pòl maké : « Nou ni èspérans-lasa ki ka touvé-y kon lank pou nanm an nou. I sèten é anmenmtan i solid » (Ébr. 6:19). Menmjan lank a on bato ka anpéché-y chalviré, sé menmjan-la osi èspérans-la Bib-la ka ban-nou la pé trankilizé-nou lè nou ka jwenn difikilté.

⁵ Lè nou ka gadé tout liv a Ébré, nou ka vwè kè Pòl té ka palé dè bèl èspwa-la sé krétyen wen la ni la, kivédi lèwvwè yo ké ay viv an syèl-la pou touttan. Men sa i di la valab osi pou sé krétyen-la ki ni lèspwa dè viv asi latè pou touttan (Jan 3:16). Sé vré, lèfètkè nou sav kè nou ké pé viv asi latè pou touttan, sa ka ba vi an nou on sans toubònman !

6-7. Ka Yvonne rèsanti lèwvwè i dékouvè lavérité anrapò èvè sa ki ké fèt dèmen ?

⁶ An-nou palé dè Yvonne. I pa lévé adan lavérité é lè i té timoun i té pè lanmò. I ka sonjé kè on jou, i li on ti fraz on koté, é i pa jen oubliyé ti fraz-lasa. Ti fraz-lasa té ka di : « On jou nou pé’é vwè dèmen. » Mi sa i ka rakonté : « Lè an té ka sonjé sa, an pa té ka rivé dòmi. An té ka pasé tout lannuit ka mandé-mwen ka ki ké fèt dèmen. » Yvonne té ka mandé-y : « Poukwa sé on ti moman tousèl nou ka pasé asi latè é aprésa nou ka mò ? » I pa té ka konprann poukwa i té la men i pa té anvi mò nonplis.

⁷ Lèwvwè Yvonne grandi, i jwenn èvè Témwen a Jéova. Mi sa i ka èspliké : « An dékouvè kè an té’é pé viv asi latè pou touttan adan on paradi, é an koumansé mèt sa fon an tèt an mwen. » Lè i dékouvè vérité-lasa, ka i rèsanti ? Mi sa i ka di : « An té pè sa ki ké rivé dèmen é an té pè lanmò men aprézan an mèt sa dèyè do an mwen é an ka rivé dòmi byen lannuit. » Nou ka tou konprann kijan Yvonne ka ba lavérité onlo valè é kijan i kontan fè lèmaksimòm dè moun konnèt bèl èspérans-la i ni la (1 Tim. 4:16).

8-9. a) Adan istwa a misyé-la ki té touvé trézò-la ki té kaché la, ki sakrifis misyé-la té paré a fè ? b) Ki valè ou ka ba lavérité ?

⁸ Adan sé vérité-la ki an Bib-la, nou ka touvé bon nouvèl a wayòm a Bondyé. Jézi konparé bon nouvèl-lasa èvè on trézò yo kaché. Sé sa nou pé vwè an Matyé 13:44. Mi sa Jézi di : « Wayòm-la ki an syèl-la kon on trézò yo kaché adan on jaden. On nonm ka touvé-y é i ka viré kaché-y. Tèlman i kontan, i k’ay vann tousa i ni é i ka achté jaden-la. » Si nou ka byen gadé, odépa, misyé-lasa pa té ka chèché on trézò. Men lèwvwè i touvé trézò-lasa, i lagé onlo biten pou i té pé sa ni-y. I vann tousa i té ni. Poukwa i fè sa ? Pas i rann-li kont kè trézò-lasa té ni onlo valè. Trézò-lasa té ni plis valè ki tousa i mèt dèyè do a-y pou i té pé sa ni-y.

⁹ Ès ou ka ba lavérité onlo valè osi ? Sèten ou ké réponn wi. Lè nou ka sèvi Jéova, tchè an nou ka kontan toubònman ! Anplisdisa, nou ni lèspwa dè viv anba dominasyon a wayòm a-y pou touttan. Alò,  kèlkèswa sa mond-lasa té’é pé ban-nou, nou sav kè sa pé’é jen rann tchè an nou pi kontan ki sa. Anplisdisa, vin zanmi èvè Jéova sé on bèl lonnè, é sa ni tèlman valè kè kèlkèswa sakrifis nou té’é pé fè, sa vo lapenn toubònman ! Nou ni tchè-kontan lèwvwè nou ka « fè-y vréman plézi » é nou pé pa pi kontan ki sa (Kol. 1:10).

10-11. Ka ki pousé Michael fè gwo chanjman adan vi a-y ?

¹⁰ Ni onlo adan nou ki fè bon enpé sakrifis pou yo té pé sa fè Jéova plézi. Ni sèwten adan nou ki lagé on travay ki té’é pé fè-yo vin on granjan dè moun. Ni dòt aprézan ki té vé vin rich men yo pa’a kouri dèyè sa ankò. Ni dòt ankò ki fè onlo chanjman adan vi a yo lèwvwè yo vin konnèt lavérité. Kifè, vi a yo vin chanjé bout-pou-bout. Sé sa ki rivé Michael. Fanmi a-y pa té Témwen a Jéova, é lèwvwè i té jenn, i té ka fè karaté. A pa ti enmé i té enmé sa ! Mi sa i ka rakonté : « Sa ki té pi enpòwtan pou mwen sé té fè ansòt pou kò-la té toujou anfòm. Dépawfwa, an té ni lenprésyon kè ayen pa té’é pé rivé-mwen. » Men lèwvwè Michael koumansé étidyé Labib, i dékouvè ka Jéova ka pansé dè lavyolans (Sòm 11:5). On frè é madanm a-y té ka fè étid a-y, é lèwvwè i palé dè yo, mi sa i ni lokazyon di : « Yo pa jen di-mwen kè fò an arété fè karaté. Yo kontinyé édé-mwen konnèt lavérité. »

¹¹ Pi Michael té ka aprann konnèt Jéova, pi i té enmé-y. Sa ki touché-y plis, sé lè i vwè jan Jéova ni konpasyon pou sèwvitè a-y. Piti-a-piti, i rann-li kont kè i té ni on désizyon enpòwtan a pran. Mi sa i ka èspliké : « Fò an té arété fè karaté é pa ni biten ki té pi rèd ki sa pou mwen. Men an té sav osi kè sa té’é fè Jéova plézi, é menmsi sa té ka mandé-mwen fè sakrifis pou adoré Jéova, sa té vo lapenn toubònman. » Michael té touvé lavérité é i té sav jan sa té ni valè. Sé pousa, i té paré a fè onlo chanjman adan vi a-y (Jak 1:25).

12-13. Kijan lavérité mèt limyè adan vi a Mayli ?

¹² Pou montré-nou kè Lavérité ni onlo valè, Labib ka konparé-y èvè on lanp ki ka kléré an nwèsè (Sòm 119:105 ; Éféz. 5:8). É sé konsa on sè non a-y sé Mayli té ka vwè Pawòl a Bondyé. I lévé an Azèwbaydjan é i konstaté jan Pawòl a Bondyé édé-y adan vi a-y. Pap’a-y té mizilman é manman-y té juif. Mi sa i ka rakonté : « An sav Bondyé ka ègzisté é an pa jen ni pon dout asi sa. Men an té ka pozé-mwen onlo kèsyon. An té ka mandé-mwen : “Poukwa Bondyé kréyé lézimen ? É si lézimen ka soufè pannan tout vi a yo é kè aprésa lè yo mò, yo ka kontinyé soufè adan on lanfè ki pa’a jen fin, ki entéré ni adan sa ?” Konm onlo moun ka di kè tousa ki ka fèt sé volonté a Bondyé, an té ka mandé-mwen : “Ès sèl biten Bondyé enmé sé fè lézimen fè sa i vé pou gadé-yo soufè apré ?” »

¹³ Mayli rété plizyè lanné ka chèché répons a sé kèsyon-la i té ka pozé-y la. On jou, i aksèpté étidyé Labib é i vin Témwen a Jéova. Mi sa i ka èspliké : « Lè an vwè jan Labib té lojik, an touvé sa èstraòwdinè é an pa té ka vwè lavi menmjan-la ankò. Sé èsplikasyon-la an touvé adan Bib-la solid é ou pé fè-yo konfyans. Sa trankilizé-mwen. » Kon Mayli, noutout ka ba Jéova louwanj, li ki sé ‘sila ki kriyé-nou pou nou sòti an nwèsè pou vin adan bèl limyè a-y’ (1 Pyè 2:9).

14. Ka nou pé fè pou nou enmé lavérité plis ankò ? (gadé ti karé-la «  Nou pé konparé lavérité èvè dòt biten ankò »).

¹⁴ Nou pran yenki déotwa ègzanp ki ka montré jan lavérité ni valè. Sèten ou ka sonjé dòt ègzanp ankò. Pétèt kè adan étid  pèwsonèl a-w ou té’é pé chèché pou ki rézon ankò fò-nou enmé lavérité. Pi nou ké enmé lavérité é pi nou ké touvé diféran mannyè pou nou montré kè nou enmé-y.

15. Nou pé montré kè nou enmé lavérité plizyè fason diféran. Bay yonn adan yo.

¹⁵ Nou pé montré kè nou enmé lavérité lè nou ka pran labitid étidyé Labib é piblikasyon an nou. An réyalité, ki nou toufré adan lavérité ki nou konnèt lavérité dépi bon enpé tan, nou toujou ké dékouvè dé bon ti biten adan Bib-la. Prèmyé niméwo a Tou dè Gad la té ka èspliké-nou kè ni tèlman manti adan mond-lasa kè nou pé ni dimal a touvé lavérité. Pou nou touvé-y, fò-nou toujou véyatif, fò-nou fè éfò pou nou pé sa ni-y. Fò pa nou kontanté-nou dè onsèl vérité é fò-nou toujou éséyé touvé dòt vérité ankò. Étidyé ka mandé onlo éfò men sa vo lapenn !

16. Èvè ki métòd ou préféré sèvi pou étidyé Labib ? (Pwovèb 2:4-6).

¹⁶ A pa noutout ki enmé li é étidyé. Men Jéova ka mandé noutout « kontinyé chèché » a konprann lavérité pibyen é « pa jen arété » fè sa (li Pwovèb 2:4-6). Lèwvwè nou ka fè éfò-lasa, sa toujou ka pwokiré-nou  onlo byenfé. An-nou palé dè on frè, non a-y sé Corey. Lè i ka li Bib a-y, i ka pran tan pou i réfléchi asi sé vèwsé-la yonn apré lòt é i byen enmé fè sa. Mi sa i ka èspliké : « An ka li tout sé nòt-la, an ka pran tout sé vèwsé-la yo ka pwopozé la é an ka fè rèchèch. Grasa métòd-lasa, a pa ti enmé an enmé lèkti an mwen ! » Ki nou ka sèvi èvè métòd-lasa, ki nou ka sèvi èvè ondòt métòd, lèwvwè nou ka pran tan étidyé Labib byen konm i fo, nou ka montré kè nou ka ba lavérité onlo valè (Sòm 1:1-3).

17. Ka sa vé di maché adan lavérité ? (Jak 1:25).

¹⁷ Sa byen kè nou étidyé sé vérité-la ki an Bib-la. Men nou sav byen kè a pa sa tousèl pou nou fè. Fò-nou maché adan lavérité, kivédi fò-nou mèt an pratik sa nou ka aprann adan étid an nou. Sé sèlman siwvwè nou ka fè sa kè lavérité ké pwokiré-nou onlo byenfé é kè nou ké ni tchè-kontan poubon (li Jak 1:25). Men kijan nou pé sèten kè nou ka maché adan lavérité ? On frè té ka ankourajé moun a pran tan analizé vi a yo pou gadé adan ki domenn yo ja ka mèt sa yo ka aprann an pratik, é i té ka ankourajé-yo osi gadé adan ki domenn fò-yo kontinyé pwogrésé. É konsèy-la i bay la annakò èvè sa lapòt Pòl ni lokazyon di. Mi sa i di : « Kèlkanswa kantité pwogré nou ja fè, an-nou kontinyé maché annòd adan menm dirèksyon-la » (Filip. 3:16).

18. Poukwa nou vé « kontinyé maché adan lavérité » ?

¹⁸ Lè nou ka fè éfò pou « kontinyé maché adan lavérité », sa ka pòté onlo bon biten pou nou ! Nou ni on vi ki pi bèl men a pa sa tousèl nou ni. Nou ka mèt jwa an tchè a Jéova é nou ka mèt jwa an tchè a frè é sè an nou osi (Pwov. 27:11 ; 3 Jan 4). Asirésèten, sé pi bèl rézon nou ni pou nou enmé lavérité é pou nou kontinyé maché adan-y !