1. Onlo jenn rivé atenn on bèl objèktif. Ki objèktif ésa é kijan yo fè pou atenn-li ?

 CHAK lanné, ni plizyè milyé jenn ki ka pran lèbatèm. É vou ès ou ja pran lèbatèm ? Si sé ka a-w, frè é sè a-w adan lasanblé-la kontan ba-w toubònman é Jéova osi (Pwov. 27:11). Réfléchi tibwen asi tout sé éfò-la ou fè la pou-w té rivé atenn objèktif-lasa. Ou pran tan étidyé Labib é ou ay an nannan a-y. Pétèt ou fè sa pannan plizyè lanné, é grasa sa ou vin sèten kè Labib sé Pawòl a Bondyé. Men pli bèl la, sé kè ou aprann konnèt Jéova, moun-la ki fè-yo maké Bib-la é ou vin enmé-y osi. Tèlman lanmou-la ou té ni la pou Jéova la vin fò kè ou désidé ba Jéova vi a-w é pran lèbatèm. Sa bèl toubònman !

2. Ka nou ké vwè adan awtik-lasa ?

 ² Avan ou té pran lèbatèm, sèten ou jwenn onlo difikilté é pou ou té rété fidèl a Jéova, a pa té on ti afè ! Men difikilté dèyè poko mannyé, pas pli ou ké pran laj, pli ké ni dòt. Satan ké éséyé fè tousa i pé pou ou pa enmé Jéova ankò é pou ou arété sèvi-y (Éféz. 4:14). Panga ou lésé-y pran lanmen asi-w. Ka ki ké édé-w pou-w pé sa rété fidèl a Jéova é pou-w pé sa tchenn a mo a-w, kivédi pwomès-la ou fè la lèwvwè ou ba Jéova vi a-w ? Ében sé si ou ka kontinyé pwogrésé pou vin on moun ki byen doubout adan lavérité (Ébr. 6:1). Kijan ou pé rivé fè sa ? Sé sa nou ké vwè adan awtik-lasa.

3. Ka fò tout sé krétyen-la kontinyé fè apré yo pran lèbatèm ?

³ Lapòt Pòl té ba sé frè é sè Éfèz-la on konsèy é fò tout sé krétyen-la suiv konsèy-lasa apré batèm a yo. I di-yo kè fò yo  té fin grandi pou yo té vin dé krétyen ki byen doubout adan lavérité (Éféz. 4:13). Sa vlé di kè fò-yo té kontinyé pwogrésé. I konparé jan on krétyen ka pwogrésé èvè jan on timoun piti ka vin gran. Lèwvwè sé paran-la ni on ti bébé, a pa ti enmé yo enmé-y é a pa ti kontan yo kontan-y, men i pé pa rété ti bébé tout vi a-y. I ké grandi é onlè, fò i ké arété aji kon timoun (1 Kor. 13:11). Sé menm biten-la pou sé krétyen-la, fò-nou kontinyé pwogrésé apré nou pran lèbatèm. An-nou vwè déotwa konsèy ki ké édé-nou fè sa.

4. Ki kalité ki pé édé-w pou ou pé sa pwogrésé adan lavérité ? Bay on ti èsplikasyon (Filipyen 1:9).

⁴ Fè ansòt pou enmé Jéova pli fò. Sèten ou enmé Jéova onlo, men ou pé enmé-y pli fò ankò. Kijansa ? An Filipyen 1:9 lapòt Pòl ka palé dè on biten ki pé édé-nou fè sa (li-y). Pòl priyé pou lanmou a sé Filipyen-la « kontinyé vin pi fò ». Sa vlé di kè nou pé enmé Jéova pi fò ankò ! Nou pé rivé fè sa si nou ka fè sa ki fo pou nou ni on « konésans ki ègzak » é si nou ka fè sa ki fo pou nou rivé « konprann tout biten byen menm ». Pi nou ka aprann konnèt Jéova, pi nou ka vin enmé-y é pi nou ka aprésyé sé kalité-la i ni la é jan i ka aji. É a moman-lasa, nou ka anvi fè-y plézi plis ankò é nou pa anvi fè pon biten pou nou fè-y lapenn. Nou ka fè onlo éfò osi pou konprann volonté a Bondyé pibyen é pou nou pé sa fè tousa i ka mandé nou fè.

5-6. Ka nou pé fè pou enmé Jéova pi fò ?

⁵ Jézi imité Pap’a-y on mannyè ki pawfè. Kifè, pi nou ké aprann konnèt Jézi, pi nou ké vin enmé Pap’a-y (Ébr. 1:3). Méyè mwayen nou ni pou nou aprann konnèt Jézi, sé lèwvwè nou ka étidyé sé 4 liv-la ki adan Bib-la yo ka kriyé Lézévanjil. Pétèt kè ou po’o ni labitid li Labib touléjou. Sa té’é byen si ou té ka koumansé pa li sé istwa-la ki ka palé dè vi a Jézi. É lè ou ké fè sa, éséyé konsantré-w asi sé bèl kalité-la i ni la. Jézi té toujou paré a kouté lézòt, kifè sé moun-la té enmé pasé tan èvè-y, é lèwvwè déotwa timoun té ka vin owa a-y, i té ka pran-yo an 2 bra a-y (Mawk 10:13-16). Lèwvwè sé moun-la té èvè Jézi, yo té alèz a yo. Pa ègzanp, sé disip-la pa té pè di-y sa yo té ka pansé (Mat. 16:22). Yo té sav kè Jézi té ka imité Pap’a-y. Sa vlé di kè Jéova toujou paré a kouté lézòt é i ka fè sa èvè plézi. Nou pé palé ba-y lè nou ka priyé é nou pé di-y tousa nou ka pansé é tousa nou ka rèsanti. Nou pé sèten kè i pé’é jen jijé-nou. I enmé-nou é i ka sousyé-y dè nou (1 Pyè 5:7).

⁶ Jézi té ni onlo konpasyon pou lézòt. Dayè, mi sa Matyé di asi Jézi : « Lè i vwè sé foul-la, sa fè-y lapenn pou yo, pas yo té kòché é yo té adwat-agòch kon mouton ki pa ni bèwjé » (Mat. 9:36). É Jéova, ka i ka rèsanti pou lézimen ? Mi sa Jézi di : « Pap’an mwen ki an syèl-la vé pa ponyonn adan sé piti-lasa mò » (Mat. 18:14). Mésyé, a pa ti rasiré sé pawòl-lasa ka rasiré-nou ! Lèwvwè nou ka aprann konnèt Jézi pibyen, nou ka enmé Jéova pi fò.

7. Si ou ka pasé tibwen tan èvè frè é sè ki byen doubout adan lavérité, ki byenfé sa ké pwokiré-w ?

⁷ Ou pé aprann montré Jéova kè ou enmé-y pi fò é ou pé vin pibon zanmi èvè-y osi si ou ka pasé tibwen tan èvè frè é sè ki adan lasanblé a-w é ki byen doubout adan lavérité. Gadé kijan yo kontan sèvi Jéova. Dépi yo pran désizyon-lasa, yo po’o jen règrété sa. Alò pa pè mandé sé frè é sè lasa, rakonté-w déotwa biten yo ja viv dépi yo ka sèvi Jéova. É lè ou ni on désizyon enpòwtan a pran, pa ézité mandé-yo konsèy. Fò pa ou jen oubliyé kè « tout biten ka maché byen lè ni onlo moun pou bay konsèy » (Pwov. 11:14).

8. Siwvwè on jou ou ni sèwten dout asi sa Labib ka di, ka ou pé fè ?

 ⁸ Woté tout dout ki an tèt a-w. Kon nou vwè-y adan  paragraf 2 la, Satan ké éséyé anpéché-w pwogrésé adan lavérité. On biten i pé éséyé fè, sé fè-w ni dout asi sa ou aprann adan Labib. Pa ègzanp, pétèt kè sèwten moun ké vé fè-w kwè kè a pa Bondyé ki kréyé toutbiten men kè tousa ki ka ègzisté vwè jou grasa lévolisyon. Pétèt kè lèwvwè ou té piti, ou pa jen té ka entérésé-w a sé biten-lasa. Men konnyéla ou pli gran é pétèt kè lékòl yo ké palé-w dè sa. Lè ou ké gadé sa yo ké di-w asi sa, pétèt kè ou ké touvé sa lojik. Men pétèt kè pwofésè a-w po’o jen chèché a sav si Bondyé ka ègzisté. On biten pou ou sonjé, sé sa nou ka touvé an Pwovèb 18:17. Mi sa i ka di : « Prèmyé moun-la ki ka rakonté jan on biten pasé ka sanm sa i ni rézon, jiskatan lòt moun-la ka vin é ka mandé-y montré kè sa i ka di la vré. » Olyé ou pran pou lajan kontan tousa yo ka di-w lékòl, vométan ou pran tan étidyé sa Pawòl a Bondyé ka di. Fè rèchèch adan sé piblikasyon-la é pran tan diskité èvè frè é sè ki té ka kwè adan lévolisyon avan b. Mandé-yo ka ki fè si alèla yo sèten kè ni on Kréyatè ki ka ègzisté é ki plen lanmou. Lèwvwè ou ka palé dè biten ki ka édé-w kwè kè tin on Kréyatè, sa ka fè-w dibyen.

9. Ka ègzanp a Melissa ka aprann-vou ?

⁹ On sè non a-y sé Melissa, fè déotwa rèchèch asi lakréyasyon é sa édé-y toubònman c. Mi sa i ka èspliké : « Lékòl, lèwvwè yo ka palé-w dè lévolisyon, ou té’é di kè sa yo ka di-w la sé lavérité. Odépa, an pa té anvi ay fè rèchèch pas an té pè dékouvè kè sa yo ka di asi lévolisyon sé lavérité, men an réfléchi é an di-mwen kè Jéova vé pa nou enn kwè adan-y zyé-fèmé, alò, an fè rèchèch. An li liv-la Y a-t-il un Créateur qui se soucie de vous ? é an li sé bwochi-la La vie a-t-elle été créée ? é Cinq questions à se poser sur l’origine de la vie. Sé ègzaktèman sa an té bizwen. Franchman, ni lontan an té dwèt fè sa. »

10-11. Ka ki pé édé-w pou-w pa fè pon péché sèksyèl ? (1 Tésalonisyen 4:3, 4).

 ¹⁰ Fò ou rèfizé fè toutkalté péché sèksyèl. Lè on jenn ka pran on sèwten laj, ni dé biten adan kò a-y ki pé fè kè i anvi ni rèlasyon sèksyèl. É lanvi-lasa pé fò toubònman. Vou ki jenn, dépawfwa sèwten jenn pé mèt présyon asi-w pou fè péché sèksyèl é sé sa Satan vlé kè ou fè. Men ka ki pé édé-w pou-w pa lésé sé biten-lasa pran lanmen asi-w ? (li 1 Tésalonisyen 4:3, 4). Lè ou ka priyé Jéova, di-y tousa ou ka rèsanti é mandé-y ba-w fòs pou sé tantasyon-la pa pran lanmen asi-w. Fò pa ou jen oubliyé kè sa Jéova vlé sé édé-w (Mat. 6:13). I pé’é jen two rèd èvè-w (Sòm 103:13, 14). Pawòl a Bondyé pé édé-w osi. An-nou wouvin asi ègzanp a Melissa. Lèwvwè dé lidé ki pa pwòp té ka vin an lèspri a-y, fò i té goumé èvè sa. Mi sa i ka di : « Konm an té ka li Labib touléjou, sa édé-mwen pa lagé. Sa té ka fè-mwen sonjé kè an ba Jéova vi an mwen é kè sa an vlé sé sèvi-y tout vi an mwen » (Sòm 119:9).

¹¹ Pa éséyé rézoud pwoblèm a-w tousèl a-w. Palé dè sa èvè fanmi a-w. Pétèt kè ou pé santi-w on ti jan jenné paskè pou vou sé on biten ki pèwsonèl, men sa enpòwtan kè ou fè sa. An-nou vwè ka Melissa ka di asi sa : « An mandé Jéova ban-mwen kouraj é an ay palé ba pap’an mwen. Aprésa an santi-mwen tèlman byen. Anplisdisa, an té sav kè Jéova té fyèw dè mwen. »

12. Ka ki ké édé-w pran bon désizyon ?

¹² Fò ou lésé sé prensip-la ki an Bib-la gidé-w. Pi ou ké ka grandi, pi fanmi a-w ké lésé-w pran pwòp désizyon a-w. Men fò pa ou oubliyé kè ni onlo biten nou pa konnèt. Ka ki ké édé-w pou ou pa fè ayen ki té’é pé anpéché-w rété bon zanmi èvè Jéova ? (Pwov. 22:3). On sè non a-y sé Kari ka èspliké ka ki édé-y pran pibon désizyon ki séla i té ni labitid pran la. I rann-li kont kè lèwvwè on krétyen byen doubout adan lavérité, i pa bizwen yo di-y ka pou i fè adan chak sitiyasyon i ka jwenn. Mi sa i ka di : « Fò an té rivé konprann ka Jéova ka pansé olyé an té kontanté-mwen dè suiv on lwa pou an sav ka pou an fè. » Lèwvwè ou ka li Labib, pozé-w sé kèsyon-lasa : « Ka vèwsé-lasa ka aprann-mwen asi sa Jéova ka pansé ? Èskè ni déotwa prensip adan vèwsé-lasa ki ké édé-mwen sav kijan an pé fè Jéova plézi ? Si an ka apliké sé prensip-lasa, ki byenfé sa ké pwokiré-mwen ? » (Sòm 19:7 ; Iz. 48:17, 18). Pran tan li Labib, é pran tan réfléchi asi sé prensip-la ki adan-y la. Konsa ou ké pé pran désizyon ki ka fè Jéova plézi pi fasilman. Pi ou ké pwogrésé, pi ou ké konstaté kè ou pa bizwen on lwa pou sav ka pou-w fè adan chak sitiyasyon ou ka jwenn pas ou ka rivé konprann sa Jéova ka pansé.

13. Kijan dé bon zanmi pé édé-w ? (Pwovèb 13:20).

¹³ Chwazi dé zanmi ki enmé Jéova. Kon nou vwè-y adan paragraf 7 la, zanmi a-w pé édé-w vin on krétyen ki byen doubout adan lavérité (li Pwovèb 13:20). On sè non a-y sé Sara té ka santi kè i té ka pèd jwa a-y. Men ni on biten ki pasé é sa édé-y ni tchè kontan kon avan. Mi sa i ka rakonté : « An touvé dé bon zanmi, é sa fèt ègzaktèman a moman-la an té bizwen la. Chak simenn, an té ka préparé Tou dè Gad la èvè on jenn sè, é grasa ondòt sè, an koumansé réponn pannan sé réinyon-la. Zanmi an mwen détenn asi mwen é sa fan’an dibyen toubònman. Grasa yo, an mèt-mwen ka priyé oséryé é an mèt-mwen ka étidyé Labib tousèl an mwen byen konm i fo. An vin pibon zanmi èvè Jéova é aprézan an ni jwa an tchè an mwen kon avan. »

14. Kijan Julien rivé ni dé bon zanmi ?

 ¹⁴ Nou vwè kè ou pé ni zanmi ki ké édé-w pwogrésé. Kijan ou pé fè pou ni dé zanmi konsa ? Julien, sé on frè ki ansyen jòdijou, é mi sa i ka èspliké : « Lèwvwè an té pli jenn, an touvé dé bon zanmi pas an té ka préché èvè sé frè é sè a lasanblé-la. Yo té ka pòté bon mannèv an prédikasyon é grasa yo, an rann-mwen kont kè prédikasyon-la pé ba-w tchè-kontan. Kifè, sa ban-mwen anvi vin pyonyé pèwmanan. É an rann-mwen kont osi kè si an pa té ni onlo bon zanmi, sé pas an té ka chèché zanmi pawmi moun a laj an mwen. Kèlkètan apré, an ay travay an Bétèl-la é an touvé onlo bon zanmi. Bèl ègzanp a yo édé-mwen chwazi anmizman an mwen myé é yo édé-mwen vin pibon zanmi ankò èvè Jéova. »

15. Ki konsèy Pòl ba Timoté ? (2 Timoté 2:20-22).

¹⁵ Si ou ka rann-vou kont kè ou ka pasé onlo tan èvè on moun adan lasanblé-la é kè a pa on bon frékantasyon pou-w, ka pou-w fè ? Pòl té sav byen kè adan lasanblé-la, ni sèwten moun ki pa té ka pansé é ki pa té ka aji kon on krétyen dwèt fè. Sé pousa, i di Timoté rété lwen a sé moun-lasa (li 2 Timoté 2:20-22). Lanmityé an nou èvè Jéova ni onlo valè pou nou. Nou fè onlo éfò pou nou té pé sa vin zanmi èvè-y. Alò, an-nou fè tousa nou pé pou nou pa lésé ponmoun anpéché nou rété bon bon zanmi èvè-y (Sòm 26:4).

16. Ki objèktif ou dwètèt chèché a atenn ? Bay déotwa ègzanp.

¹⁶ Chwazi objèktif ki ké itil pou-w. Chwazi objèktif ki ké rann fwa a-w pi fò é ki ké édé-w vin on krétyen ki byen doubout adan lavérité (Éféz. 3:16). Pa ègzanp, ou pé òwganizé-w pou li Bib a-w é pou étidyé-y pi souvan (Sòm 1:2, 3). Ou pé fè éfò pou-w pé sa priyé Jéova pi souvan é ou pé fè éfò osi pou priyé-y èvè tout tchè a-w. Pétèt kè fò ou ké fè pi atansyon lè ou ké ka chwazi jan ou ké anmizé-w é lèwvwè ou ké ka désidé konmen tan ou ké pasé ka fè sa (Éféz. 5:15, 16). Lè Jéova ké vwè tout sé éfò-la ou ka fè la pou ou pé sa vin on krétyen ki byen doubout adan lavérité, i ké kontan toubònman.

17. Si ou édé lézòt, ki bon biten sa ké pòté ba-w ?

¹⁷ Ondòt biten ou pé fè pou pwogrésé sé édé lézòt. Mi sa Jézi di : « On moun ka pli  kontan lè i ka bay ki lè i ka rèsèvwa » (Akt 20:35). Ou ké ni tchè-kontan si ou ka fè onlo éfò é si ou ka sèvi èvè tan a-w pou fè lézòt dibyen. On objèktif ou pé chèché a atenn sé édé frè é sè a lasanblé a-w ki ja ni on bèl laj oben ki enfim. Mi sa ou pé mandé-w : « Ès yo bizwen kè on moun fè déotwa ti kous ba yo ? Oben ès yo bizwen kè on moun montré-yo kijan pou yo itilizé sé aparèy élèktronik la ? » Si ou sé on frè, ou pé éséyé vwè ka pou-w fè pou pwogrésé pou vin asistan, konsa ou ké pé édé sé frè é sè la plis ankò (Filip. 2:4). Anplisdisa, ou ka montré jan ou enmé sé moun-la ki an téritwa-la lèwvwè ou ka palé dè bon nouvèl a Wayòm-la èvè yo (Mat. 9:36, 37). É si sa posib, éséyé vwè kijan ou pé sèvi Jéova aplentan.

18. Lè ou ka sèvi Jéova aplentan, kijan sa pé édé-w pwogrésé ?

¹⁸ Lè ou ka sèvi Jéova aplentan, sa pé wouvè onlo pòt ba-w pou ou pé sa pwogrésé. Pa ègzanp, lèwvwè ou pyonyé pèwmanan, sa pé pèwmèt-vou fè Lékòl pou évanjélizatè a Wayòm-la, travay adan on Bétèl oben pawtisipé adan pwojé pou konstwi sal di Wayòm oben dòt batiman. Kaitlyn sé on jenn sè ki ni 21 an é ki pyonyé é mi sa i ka rakonté : « An té ka pasé onlo tan ka préché èvè frè é sè ki byen doubout adan lavérité, kifè sa édé-mwen vin pibon zanmi èvè Jéova ankò apré batèm an mwen. Lè an té ka gadé jan yo té ka fè, sa té ka ban-mwen anvi étidyé Labib plis ankò é sa té ka ban-mwen anvi anségné pibyen osi. »

19. Si ou kontinyé fè pwogré pou vin on krétyen ki byen doubout adan lavérité, ki byenfé sa ké pwokiré-w ?

¹⁹ Si ou ka kontinyé fè pwogré pou vin on krétyen ki byen doubout adan lavérité, ou ké jwenn onlo bénédisyon. A moman-lasa, ou pé’é sèvi èvè fòs a-w pou fè dé biten ki initil (1 Jan 2:17). Anplisdisa, ou pé’é tris kon sé moun-la ki ka pòté chaj a sé mové désizyon-la yo ka pran la. Okontrè, ou ké réyisi vi a-w é ou ké ni tchè-kontan (Pwov. 16:3). Anplisdisa bèl ègzanp a-w ké ankourajé tout sé frè é sè a lasanblé-la (1 Tim. 4:12). É on biten ki pli enpòwtan ankò, sé kè lèspri a-w ké trankil é tchè a-w ké kontan pas ou sav ou ka fè Jéova plézi é pas ou sé zanmi a-y (Pwov. 23:15, 16).