1. Lè nou ka étidyé sé pwofési-la, fò-nou enmé sa. Ka ki pé édé-nou ?

 MI SA on jenn frè non a-y sé Ben ka di : « An enmé étidyé sé pwofési-la. » Ès vou osi ou enmé fè sa ? Oben ès ou ka pansé kè yo two difisil a konprann ? Pétèt ou ka touvé kè sa pa tèlman entérésan. Men lè ou ké konprann pibyen poukwa Jéova fè-yo maké sé pwofési-la adan Pawòl a-y, pétèt ou ké chanjé lidé.

2. Ka nou ké vwè adan awtik-lasa ?

² Adan awtik-lasa nou ké vwè poukwa fò-nou aprann plis biten asi sé pwofési-la ki an Bib-la men nou ké vwè osi kijan pou nou étidyé-yo. Aprésa, nou ké ègzaminé 2 pwofési nou ka touvé adan liv a Danyèl é nou ké vwè kijan sa pé édé-nou lèwvwè nou ka konprann sé pwofési-lasa.

3. Ka pou nou fè pou nou rivé konprann sé pwofési-la ki an Bib-la ?

³ Nou bizwen on moun édé-nou pou nou rivé konprann sé pwofési-la ki adan Bib-la. An-nou pran on ègzanp. Imajiné kè ou k’ay fè on vwayaj èvè déotwa zanmi. Ou vlé vizité on koté kè ou pa konnèt, men yonn adan sé zanmi a-w la konnèt koté-lasa byen. I sav ègzaktèman ola zò yé é kikoté tout ti wout ka menné. Sèten ou ké byen kontan kè i vin èvè zòt. Ében Jéova kon zanmi-lasa. I sav ègzaktèman ka ki ké fèt dèmen. Alò pou nou konprann sé pwofési-la ki an Bib-la, fò-nou ni imilité é fò-nou mandé-y édé-nou (Dan. 2:28 ; 2 Pyè 1:19, 20).

4. Jéova fè-yo maké plizyè pwofési adan Pawòl a-y. Poukwa i fè sa ? (Jérémi 29:11 ; gadé imaj-lasa osi).

 ⁴ Tout papa é tout manman ki ka okipé-yo dè timoun a yo byen konm i fo vé kè timoun a yo ni on bèl landèmen. Sé sa Jéova vé osi pou nou (li Jérémi 29:11). Men ni on biten Jéova konnèt é kè pon paran pa konnèt. I kapab di sa ki ké fèt dèmen é i pa jen ka tronpé-y. I fè-yo maké plizyè pwofési adan Pawòl a-y pou nou sav ki évènman enpòwtan ki kay fèt talè (Iz. 46:10). Sé pwofési-la ki an Bib-la sé on bèl kado Pap’an nou ki an syèl-la fè-nou. Men kijan ou pé sèten kè sa Labib anonsé ké fèt poudèbon ?

5. Ka ègzanp a Max pé aprann on jenn ?

⁵ Souvantfwa, sé jenn-la ki lékòl la lantouré èvè moun ki pa gè ni rèspé pou Labib é délè sé moun-lasa pa ni pon rèspé pou-y menm. Sa yo ka di é jan-la yo ka aji la pé mèt dout an tèt a jenn an nou. Mi sa on frè non a-y sé Max ka rakonté : « Lèwvwè an té lékòl, dout koumansé rantré an tèt an mwen. An té ka mandé-mwen si rèlijyon a fanmi an mwen é sa yo té ka anségné-mwen sé té lavérité é si sa Labib té ka di té ka vin dè Bondyé. » Ka fanmi a-y fè ? Mi sa i ka di : « Yo rété kalm menmsi sa té ka enkyété-yo. » Fanmi a Max sèvi èvè Labib pou réponn a kèsyon a-y. É Max, ka i fè ? Mi sa i ka èspliké : « An té ka étidyé sé pwofési-la ki an Bib-la mwenmenm an mwen é an té ka palé dè sa èvè dòt jenn ki té an lasanblé an mwen osi. » Ka sa pòté dè bon ba-y ? Mi sa i ka di : « Apré an fè tousa, an té sèten kè Labib sé Pawòl a Bondyé ! »

6. Siwvwè sèwten dout ja rantré an tèt a-w, ka ou pé fè é poukwa fò ou fè sa ?

⁶ Si kon Max, sèwten dout rantré an tèt a-w é kè ou ka mandé-w si adan Labib ou ka touvé lavérité, ou pa oblijé wont ! Pawkont, fò pa ou rété la lébwa kwazé pas sé dout-la kon wouy-la. Siwvwè ou ni on biten ki ni onlo valè, kè wouy ka pran asi-y é kè ou pa’a fè ayen, ou pé rivé a pèd biten a-w. Menmjan-la, si sèwten dout koumansé fébli fwa a-w, fò ou pòté mannèv. Mi sa pou-w mandé-w : « Lè Labib ka di dé biten anrapò èvè sa ki ké fèt dèmen, ès an ka kwè sa ? » Si ou ni sèwten dout, étidyé pwofési ki an Bib-la ki ja réyalizé. An-nou vwè kijan ou pé fè sa.

7. Ki bèl ègzanp Danyèl ka ban-nou ? (Danyèl 12:10 ; gadé imaj-la osi).

⁷ Pou sav kijan pou nou étidyé sé pwofési-la ki an Bib-la, an-nou vwè ègzanp a Danyèl. Sé dé bon biten ki té ka pousé Danyèl étidyé sé pwofési-la ; i té anvi konnèt lavérité. Anplisdisa, i té ni imilité. I té sav kè Jéova té’é pèwmèt-li konprann sé pwofési-la siwvwè i té bon bon zanmi èvè Jéova é siwvwè i té ka kouté-y (Dan. 2:27, 28 ; li Danyèl 12:10). I montré kè i té ni imilité lèwvwè i té ka fèfon asi Jéova (Dan. 2:18). Ondòt biten i té ka fè, sé kè i té ka pran tan a-y pou étidyé byen konm i fo. I té ka chèché tout répons i té bizwen adan sé pawti a Bib-la ki té ja disponib an tan a-y la (Jér. 25:11, 12 ; Dan. 9:2). Kijan ou pé imité-y ?

8. Poukwa sèwten moun ka étidyé sé pwofési-la ki an Bib-la, men é nou ka pou nou fè ?

 ⁸ Pou ki rézon ou ka ègzaminé sé pwofési-la ? Ès ou ka étidyé sé pwofési-la ki an Bib-la pas ou anvi konnèt lavérité vréman ? Si sé sa, Jéova ké béni éfò a-w (Jan 4:23, 24 ; 14:16, 17). Pou ki dòt rézon on moun té’é pé étidyé sé pwofési-la ? Ni sèwten moun ki ka fè sa pas yo bizwen touvé dé biten ki ka montré kè Labib pa ka vin dè Bondyé. Konm yo pa ka kwè kè Labib ka vin dè Bondyé, pou yo, yo ni dwa désidé ka ki bon é ka ki mové. Men nou, sé dé bon biten ki ka pousé-nou étidyé sé pwofési-la. Anplisdisa, ni on kalité nou oblijé ni pou nou konprann sé pwofési-la. Ki kalité ésa ?

9. Pou konprann sé pwofési-la ki an Bib-la, ki kalité pou nou ni ? Bay on ti èsplikasyon.

⁹ Fò ou ni imilité. Jéova ka pwomèt kè i ké édé moun ki ni imilité (Jak 4:6). Si nou anvi konprann sé pwofési-la ki an Bib-la, fò-nou mandé-y édé-nou. Fò-nou rèkonnèt osi kè nou bizwen kè èsklav fidèl é prévwayan la édé-nou. Sé-y Jéova ka itilizé pou ban-nou nouriti-la a bon moman-la (Lik 12:42). Jéova a pa on Bondyé a dézòd. Kifè, sa toutafè lojik kè i sèvi enki èvè èsklav-lasa pou pèwmèt-nou konprann sé vérité-la ki adan Pawòl a-y (1 Kor. 14:33 ; Éféz. 4:4-6).

10. Ka ègzanp a Esther ka aprann-vou ?

¹⁰ Pran tan a-w pou fè rèchèch. Koumansé èvè on pwofési kè ou byen enmé é fè rèchèch asi-y. An-nou palé dè on sè non a-y sè Esther. I té bizwen aprann plis biten asi sèwten pwofési ki té ka di kè Mèsi-la té’é vin. Mi sa i ka èspliké : « Lèwvwè an té ni 15 an, an koumansé chèché dé biten ki té ka bay laprèv kè yo té maké sé pwofési-lasa avan épòk a Jézi. » I li sèwten biten yo maké anrapò èvè sé woulo a lanmè Mò la é sa i li la fè-y sèten dè sa. Mi sa i ka di : « Ni sèwten adan sé woulo-lasa yo té maké avan épòk a Jézi. Alò, sé pwofési-la ki adan yo la ka vin dè Bondyé. » Mi sa i ka di ankò : « An li sé enfòwmasyon-lasa é an wouli-yo plizyè fwa pou an byen konprann-yo. » Men i kontan i fè tout sé éfò-lasa pas apré i pran tan a-y pou étidyé plizyè pwofési ki adan Labib, mi sa i ka di : « An rann-mwen kont mwenmenm an mwen kè sa Labib ka di sé lavérité. »

11. Lè nou sèten kè Labib ka di lavérité, poukwa sé on bon biten ?

¹¹ Lèwvwè nou ka konprann kijan sèwten pwofési ki an Bib-la réyalizé, sa ka édé-nou fè Jéova konfyans a san pou san é kèlkèswa dirèksyon-la Jéova ka ban-nou la, nou ka fè-y konfyans osi. Anplisdisa, grasa sé pwofési-la ki an Bib-la, nou ni on bèl èspwa pou dèmen. Alò, lèwvwè nou ka étidyé sé pwofési-lasa, sa ka édé-nou rété pozitif menmsi nou ka jwenn difikilté. An-nou ègzaminé 2 pwofési Danyèl maké é ki ka réyalizé anba zyé an nou jòdijou. Si nou ka rivé konprann-yo, sa ké édé-nou pran dé désizyon ki ké plen sajès.

12. Ka sé pyé-la ki fèt èvè ‘fè mélanjé èvè awjil’ ka rèprézanté ? (Danyèl 2:41-43).

¹² (Li Danyèl 2:41-43.) Nabikodonozò fè on rèv é Danyèl èspliké-y rèv-la. Adan rèv-lasa,  i vwè on èstati é pyé a èstati-lasa té fèt èvè ‘fè mélanjé èvè awjil’. Lèwvwè nou ka konparé pwofési-lasa èvè dòt pwofési ki adan liv a Danyèl é adan liv a Révélasyon, nou ka rivé konprann kè pyé a èstati-lasa ka rèprézanté alyans-la Langlètè é Lamérik ka fòwmé la. Sé-y ki sé pi gran puisans mondyal ki ka gouvèné a épòk an nou. Danyèl anonsé kè ‘on pawti a wayòm-lasa té’é fò é kè lòt pawti-la té’é fèb’. Poukwa on pawti a-y té’é fèb ? Pas popilasyon-la, kivédi awjil-la, ka anpéché-y aji èvè menm fòs ki on mòso fè ki byen rèd b.

13. Ki biten enpòwtan pwofési-la nou ka vwè la ka aprann-nou ?

¹³ Lèwvwè nou ka ègzaminé sa Danyèl di asi èstati-la, é siwtou sa i di anrapò èvè pyé a èstati-la, nou ka aprann onlo biten enpòwtan. Puisans mondyal la Langlètè é Lamérik ka fòwmé la ni lokazyon montré a plizyè rèpriz kè i fò toubònman. Pa ègzanp, puisans-lasa té pawmi sé nasyon-la ki gangné sé 2 gè mondyal la, é i jouwé on wòl enpòwtan adan sa. Men i pèd fòs é i ké kontinyé pèd fòs pas ki an Anglètè, ki an Amérik, sé moun-la ka goumé yonn èvè lòt é yo ka lévé kont gouvènman-la. Dézyèmman, puisans-la Langlètè é Lamérik ka fòwmé la ké dènyé puisans mondyal ki ké ka gouvèné lèwvwè wayòm a Bondyé ké vin. A moman-lasa, Wayòm-la ké détwi tout sé gouvènman-la ki asi latè la. Menmsi dépawfwa sé nasyon-la kont puisans-lasa, yo pé’é pé pran plas a-y. Nou sav sa pas ‘wòch-la’ ki ka rèprézanté wayòm a Bondyé ké fè pyé a èstati-la fè pach, kivédi i ké fè alyans-la Langlètè é Lamérik ka fòwmé la fè pach (Dan. 2:34, 35, 44, 45).

14. Lèwvwè nou ka konprann pwofési-la anrapò èvè èstati-la ki ni pyé a-y an fè é an awjil, sa ka pèwmèt-nou pran dé désizyon ki saj. Poukwa nou ka di sa ?

¹⁴ Nou palé dè pwofési a èstati-la pyé a-y an fè é an awjil la. Men ès ou sèten a san pou san kè sa yo ka di adan pwofési-lasa vré ? Si sé sa, sa ké aji asi sé désizyon-la ou ké pran la adan vi a-w. Ou pé’é mèt-vou ka kouri dèyè lajan oben dèyè biten matéryèl pas ou sav kè talè, Bondyé ké détwi mond méchan lasa (Lik 12:16-21 ; 1 Jan 2:15-17). Lèwvwè ou ké konprann pwofési-lasa osi, sa ké édé-w vwè jan sa enpòwtan kè ou préché é kè ou anségné sé moun-la (Mat. 6:33 ; 28:18-20). Lè ou ké fin étidyé pwofési-lasa, mi sa pou-w mandé-w : « Èskè sé chwa-la an ka fè la ka montré kè an sèten kè Bondyé ké détwi sé gouvènman-la talè ? »

15. Kimoun « wa di Nò la » é « wa di Sid la » ka rèprézanté jòdijou ? (Danyèl 11:40).

¹⁵ (Li Danyèl 11:40.) Adan Danyèl chapit 11, yo ka palé dè 2 wa. Sé 2 wa-lasa sé 2 gouvènman ki ka goumé pou dirijé tout sé nasyon-la ki an mond-la. Lèwvwè nou ka konparé pwofési-lasa èvè dòt pwofési, nou ka rann-nou kont kè « wa di Nò la » sé Larisi é sé péyi-la ki alyansé èvè-y la, é « wa di Sid la » sé puisans-la Langlètè é Lamérik ka fòwmé la c.

16. Ki difikilté sèwvitè a Jéova ki ka viv anba dominasyon a « wa di Nò la » ka jwenn ?

¹⁶ « Wa di Nò la » ka pèwsékité sèwvitè a Jéova ki ka viv anba dominasyon a-y. Yo ka ba sèwten adan yo bon kou é yo ka mèt-yo lajòl pas yo ni fwa adan Jéova. Men ès sa ka fè-yo pè ? Awa ! Okontrè, lèwvwè « wa di Nò la » ka aji konsa, sa ka konsolidé fwa a yo. Poukwa nou ka di sa ? Pas yo sav kè lèwvwè yo ka pèwsékité pèp a Bondyé, sé réyalizé sa ka réyalizé pwofési nou ka touvé adan liv a Danyèl d  (Dan. 11:41). Noumenm osi, lèfètkè nou sav sa, sa ka édé-nou mèt èspérans an nou byen fon an tèt an nou é sa ka édé-nou rété fidèl a Jéova.

17. Toutolon a listwa, ki difikilté sèwvitè a Jéova ki ka viv anba dominasyon a « wa di Sid la » jwenn ?

¹⁷ An tan lontan, « wa di Sid la » pèwsékité sèwvitè a Bondyé. Pa ègzanp, pannan sé 2 gè mondyal la, yo mèt onlo frè é sè lajòl pas yo té ka rèfizé fè lagè. Yo mèt sèwten timoun a Témwen a Jéova déwò an lékòl a yo osi pas yo té ka rèfizé ba drapo a péyi-la lonnè. Men dépi kèlkè lanné, ni dòt biten ki pé mèt fidélité a sèwvitè a Jéova ki ka viv anba dominasyon a wa-lasa aléprèv. Pa ègzanp on krétyen pé anvi soutyenn on pawti politik oben on moun ki bizwen yo voté ba-y. Pétèt i pé’é ay voté pou on moun, men an tchè a-y, i pé di kè i té’é byen anvi kè tèl moun gangné sé élèksyon-la. Sa vréman enpòwtan kè nou pa pran pawti adan zafè a politik. É pou nou pa pran pawti adan sa anponjan, fò-nou fè atansyon a sa nou ka fè, a sa nou ka pansé é a sa ki an tchè an nou (Jan 15:18, 19; 18:36).

18. Lè nou ka vwè kè « wa di Nò la » ka tigonné « wa di Sid la », kijan nou ka réyaji ? (gadé imaj-la osi).

 ¹⁸ Lè moun ki pa ni fwa adan sé pwofési-la ki an Bib-la ka vwè « wa di Sid la » ka ba « wa di Nò la » « on pousad pou goumé èvè-y », sa ka fè sé moun-la pèd lakat (Dan. 11:40). Chak sé 2 wa-lasa ni bonb atomik ki pé détwi tousa ki asi latè. Men nou nou sav kè Jéova pé ké pèwmèt kè dé biten konsa rivé (Iz. 45:18). Lè nou ka vwè jan « wa di Nò la » ka tigonné « wa di Sid la », sa pa ka enkyété-nou. Okontrè, sa ka konsolidé fwa an nou. Sa ka montré kè adan on ti moman mond-lasa ké disparèt.

19. Lèwvwè nou pa sav kijan on pwofési ké réyalizé, ka pou nou sonjé ?

¹⁹ Nou pa sav kijan sèwten pwofési ki an Bib-la ké réyalizé. Sé té menm biten pou pwofèt Danyèl pas a pa toutlè i té sav ka sa i té ka maké la té vé di (Dan. 12:8, 9). Men menmsi nou pa sav ègzaktèman kijan on pwofési ké réyalizé, apapousa i pé ké réyalizé ! Nou pé sèten kè Jéova ké édé-nou konprann sa nou bizwen konnèt a bon moman-la menmjan i fè-y an tan lontan (Amòs 3:7).

20. Ni plizyè pwofési ki entérésan toubònman ki ké réyalizé talè. Ki pwofési ésa é ka pou nou kontinyé fè ?

²⁰ Apré sé nasyon-la ké anonsé kè ni « lapé é lasékirité », sé puisans politik la ki adan mond-lasa ké ataké fo-rèlijyon-la é yo ké fè-y fè pach (1 Tés. 5:3 ; Rév. 17:16, 17). Aprésa yo ké ataké sèwvitè a Jéova (Ézék. 38:18, 19). É pou fin, dènyé lagè-la yo ka kriyé Awmagédon ké koumansé (Rév. 16:14, 16). Nou pé sèten kè tout sé biten-lasa ké fèt talè. Men pannan nou ka atann tousa, an-nou kontinyé montré Pap’an nou ki an syèl-la é ki enmé-nou kè nou ni rèkonésans pou-y. Pou sa, nou ké montré-nou véyatif parapòt a sa sé pwofési-la ka di é nou ké ankourajé lézòt fè menm biten.