1. Poukwa ou byen enmé moun ki ni pasyans ?

 NOUTOUT ka aprésyé moun ki ni pasyans. Lèwvwè on moun ka rivé atann on biten san i fè kòlè, nou ni onlo rèspé pou-y. Lè nou fè on érè, nou ka byen kontan osi lè yo ka pran pasyans èvè nou. Pétèt kè onlo adan nou té ni dimal a konprann sèwten biten yo aprann adan Labib, oben yo té ni dimal a aksèpté ou a apliké sa yo aprann la. Men moun-la ki fè étid an nou la pran onlo pasyans èvè nou é sèten nou ni onlo rèkonésans pou sa toubònman. É pi enpòwtan la sé kè Bondyé an nou, Jéova, ka pran pasyans èvè nou é a pa ti kontan nou kontan sa ! (Wom. 2:4).

2. Adan ki sitiyasyon nou pé ni dimal a ni pasyans ?

² Sé vré nou ka touvé sa bèl lè on moun ni pasyans. Men lè sé nou ki dwètèt aji èvè pasyans, délè nou ka touvé sa on ti jan rèd. Pa ègzanp, lèwvwè nou pri adan on anboutéyaj é kè anplisdisa nou té ja anrèta, pétèt sé goumé nou ka goumé pou nou pa fè kòlè. Lè on moun ka tigonné-nou, pétèt nou ka lévé cho. Délè, nou pé ni lenprésyon kè nouvo mond-la Jéova pwomèt-nou la ka tadé, é sa ka pran tèt an nou. Ès ou té’é enmé ni plis pasyans ? Adan awtik-lasa, nou ké vwè ka lapasyans yé ojis, é poukwa kalité-lasa enpòwtan toubònman. Aprésa nou ké vwè kijan nou pé rivé a ni plis pasyans.

3. Kijan on moun ki ni pasyans ka réyaji lè yo ka tigonné-y ?

³ An-nou vwè 4 mannyè on moun pé montré i ni pasyans. Dabò pou yonn, on moun ki ni pasyans pa ka fè kòlè fasil. I ka fè tousa i pé pou i pa lévé cho é pou i pa réponn chou pou chou lè yo ka tigonné-y. Adan Labib, prèmyé fwa ou ka touvé èsprésyon-la « pa ka fè kòlè vit », sé adan Ègzòd 34:6. Yo ka sèvi èvè èsprésyon-lasa pou èspliké kijan dè moun Jéova yé. Vèwsé-lasa ka di kè i sé « on Bondyé ki ka aji èvè pityé é  ki ka pran penn a moun, ki pa ka fè kòlè vit, ki plen lanmou, on lanmou ki fidèl é ki toujou ka di lavérité ».

4. Kijan on moun ki ni pasyans ka réyaji lè i oblijé atann ?

⁴ Dézyèmman, on moun ki ni pasyans ka rivé atann on biten san i chaléré kò a-y. Si on biten pa’a fèt kon i té prévwa é kè sa ka pran plis tan, i ka fè éfò pou sa pa pran tèt a-y é pou i pa fè kòlè pou sa (Mat. 18:26, 27). Ni onlo sitiyasyon ki ka mandé kè nou rété kalm é kè nou atann. Pa ègzanp, lè on moun ka palé, fò-nou kouté-y èvè pasyans san koupé pawòl a-y (Jòb 36:2). Anplisdisa, si nou ka étidyé èvè on moun é kè i ni dimal a konprann sa Labib ka di oben kè i ni dimal a mèt sa i ka aprann an pratik, nou ké bizwen ni pasyans kon bwèt a krab.

5. Kijan on moun ki ni pasyans ka aji ankò ?

⁵ Twazyèmman, on moun ki ni pasyans pa ka enn fè on biten présé-présé san réfléchi. Sé vré, adan sèwten sitiyasyon, fò ou réyaji fap-fap. Men lè on moun ki ni pasyans ni on biten enpòwtan pou i fè, i pa’a enki rantré adan-y konsa é i pa ka baklé-y nonplis. Okontrè, i ka pran on ti tan pou vwè kijan i ké òwganizé-y. Aprésa, i ka pran tan-la i bizwen la pou fè travay a-y.

6. Lè on moun ni pasyans, kijan i ka réyaji lèwvwè i ka jwenn éprèv ?

⁶ Katriyèmman, on moun ki ni pasyans ka fasadé èvè sé éprèv-la i ka jwenn la san plenn-li. Si ou byen gadé, pasyans lyanné èvè andirans. Sa pa vlé di kè on moun pé pa palé ba on bon zanmi a-y pou di-y sa i ka rèsanti anrapò èvè on éprèv i ka jwenn. Men on moun ki ni pasyans ké fè onlo éfò pou tchenn tchè, é pou rété pozitif (Kol. 1:11). Antankè krétyen, fò-nou aji èvè pasyans adan sé 4 domenn-lasa. Poukisa ? An-nou vwè déotwa rézon.

7. Dapré sa nou ka li an Jak 5:7, 8, poukwa sa enpòwtan kè nou ni pasyans ? (gadé imaj-la osi).

⁷ Nou bizwen ni pasyans pou nou pé sa ni lavi pou touttan. Menmjan ki sèwvitè fidèl a Bondyé an tan lontan, fò-nou atann èvè pasyans kè Jéova réyalizé pwomès a-y (Ébr. 6:11, 12). Bib-la ka di kè nou adan menm sitiyasyon ki on kiltivatè (li Jak 5:7, 8). On kiltivatè ka travay rèd. I ka planté, i ka wouzé, men i pa sav ègzaktèman kitan sé plant-la ké pousé. Alò i ka pran pasyans, i ka atann, men i sèten on jou i ké rékòlté. Menmjan-la, nou ka pòté bon mannèv pou nou suiv Lèkris, menmsi nou ‘pa sav ki jou Ségnè an nou ka vin’ (Mat. 24:42). Nou ka atann èvè pasyans pas nou sèten kè lè lè-la ké rivé, Jéova ké fè tout pwomès a-y réyalizé. Si nou ka koumansé di kè ja ni two lontan nou ka atann, sa pé rivé a lasi-nou é nou pé jous kité Jéova piti-a-piti. Pétèt nou anvi tchè an nou kontan alèla, alò nou ka kouri dèyè tout biten ki pé fè-nou santi-nou konsa. Men si nou ni pasyans, nou ké andiré jiskatan lafen rivé, é nou ké sové (Mich. 7:7 ; Mat. 24:13).

8. Kijan lapasyans ka édé-nou antann-nou pibyen èvè lézòt ? (Kolosyen 3:12, 13).

⁸ Lapasyans ka édé-nou antann-nou byen èvè moun ki ka lantouré-nou. Si nou ni pasyans, nou ké pran tan kouté-yo byen (Jak 1:19). Lè nou ni pasyans, nou ka fè ansòt pou nou anpé èvè lézòt. Siwvwè nou istrésé osi, nou pé ké réyaji two vit, é nou pé’é di pon biten ki ké fè lézòt lapenn. É si nou ni pasyans, menmsi on moun di-nou on biten ki fè-nou mal, nou pé ké enki lévé cho é monté an koko. Olyé nou réponn chou pou chou, ‘yonn ké kontinyé sipòté lòt é yonn ké kontinyé padonné lòt volontyé’ (li Kolosyen 3:12, 13).

9. Kijan lapasyans ka édé-nou lè nou ni désizyon a pran ? (Pwovèb 21:5).

⁹ Grasa lapasyans, nou ka pran pibon désizyon osi. Lèwvwè nou ni on désizyon a pran, olyé nou aji san réfléchi, oben olyé nou lésé sa nou ka rèsanti pran lanmen asi nou, nou ké pran tan fè rèchèch. Konsa, nou ké vwè sé diféran chwa-la nou ni la é nou ké vwè kilès ki pibon (li Pwovèb 21:5). Pa ègzanp, imajiné kè nou ka chèché on travay. Pétèt tala nou ka touvé la ké pran tout tan an nou, kifè nou pé’é pé adoré Jéova kon nou dwètèt. Men konm sé prèmyé-la nou ka touvé la é kè nou pa ni asé pasyans, nou anvi pran-y. Pawkont si nou ni pasyans, nou ké gadé pou vwè konmen kilomèt nou ké ni a fè pou ay an travay-lasa, a ki lè nou ké pran é a ki lè nou ké lagé. Nou ké gadé osi kijan travay-lasa ké aji asi fanmi an nou é asi lanmityé an nou èvè Jéova. Sa ka montré kè lè nou ka aji èvè pasyans, sa pé anpéché-nou pran on mové désizyon.

10. Ka on krétyen pé fè pou i ni pasyans é pou i kontinyé ni kalité-lasa ?

¹⁰ Priyé pou ou pé sa ni plis pasyans. Lapasyans sé on kalité ki ka fè pawti a fwi a lèspri sen a Bondyé (Gal. 5:22, 23). Alò, fò-nou mandé Bondyé ban-nou lèspri sen a-y é édé-nou fè éfò pou nou pé sa ni fwi a lèspri sen a-y. Si nou ka jwenn on sitiyasyon ki ka mèt pasyans an nou a léprèv, fò-nou « kontinyé mandé » Jéova lèspri sen a-y pou nou pé sa ni kalité-lasa (Lik 11:9, 13). Anplisdisa, nou pé mandé Jéova édé-nou vwè sitiyasyon-la kon li i ka vwè-y. É apré nou priyé Jéova, nou ké fè tousa nou pé pou nou ni pasyans touléjou Bondyé fè jou. Si nou ka kontinyé  priyé pou nou ni pasyans é si nou ka fè éfò pou aji èvè pasyans, Jéova ké édé-nou ni plis pasyans é i ké fè sa menmsi avan, nou pa té ni kalité-lasa.

11-12. Poukwa nou pé di kè Jéova ni pasyans ?

¹¹ Médité asi ègzanp a moun ki adan Labib é ki té ni pasyans. Adan Labib, nou ka touvé onlo ègzanp a moun ki té ni pasyans. Si nou ka pran on ti tan pou médité asi sé ègzanp-lasa, nou pé aprann kijan pou nou aji èvè pasyans. Men pou nou koumansé, an-nou vwè pi bèl ègzanp a pasyans nou pé ni, ta Jéova.

¹² Adan Jadendédèn-la, Satan sali non a Jéova. Pou sa, i fè Èv konprann kè Jéova pa ka dirijé on mannyè ki jis é kè i pa ka fè sa èvè lanmou nonplis. Men olyé Jéova té détwi Satan onfwamenm, i pran pasyans é i aji èvè métriz. I té sav kè pou montré toutmoun kè pa ni pibon dirijan ki-y, sa té’é pran tan. Annatandan, a pa ti biten yo ka di asi do a-y, é li i ka sipòté tousa. Anplisdisa, i ka aji èvè pasyans pou on maksimòm dè moun ni laposibilité dè viv pou touttan (2 Pyè 3:9, 15). Grasa sa, ni milyon é milyon moun ki rivé aprann konnèt-li. Si nou ka konsantré-nou asi sé bon biten-la nou ni la grasa pasyans a Jéova, sèten sa ké pi fasil pou nou atann jou-la i prévwa la pou fin bat èvè sé méchan-la.

13. Lèwvwè Jézi té asi latè, i imité pasyans a Pap’a-y on mannyè ki pawfè. Ka ki ka montré-nou sa ? (gadé imaj-la osi).

¹³ Jézi imité pasyans a Pap’a-y on mannyè ki pawfè é i fè sa lèwvwè i té asi latè. Men sa pa té fasil pou-y siwtou lè i té ka vwè jan sé iskrib-la é sé farizyen-la té ipokrit (Jan 8:25-27). I té kon Pap’a-y. I pa té ka fè kòlè fasil. Lèwvwè yo té ka jiré-y oben lè yo té ka tigonné-y, i pa té ka viré fè sé moun-la menm  biten-la (1 Pyè 2:23). Lèwvwè i té ka andiré, i pa té ka plenn-li nonplis. Sé pousa, sa pa ka étoné-nou si Bib-la ka di-nou kè fò-nou « pran tan réfléchi asi sila ki andiré tousa mové pawòl péchè voyé ba-y » (Ébr. 12:2, 3). Grasa èd a Jéova, nou osi, nou ké pé andiré nenpòt ki éprèv nou pé rivé a jwenn.

14. Abraam té ni pasyans, sé on bèl ègzanp pou nou. Kijansa ? (Ébré 6:15 ; gadé imaj-la osi).

¹⁴ Ès sa ja ka fè lanné é lanné kè ou ka atann jou a Jéova ? Si sé ka a-w, pétèt ou ka di-w kè ou ké ja ni tan mò avan jou-lasa rivé é sa ka fè-w on ti jan pè. Ka ki pé édé-w kontinyé atann èvè pasyans ? An-nou vwè ègzanp a Abraam. Alòskè Abraam té ja ni 75 an é kè i pa té ni timoun, Jéova fè-y on pwomès. Mi sa i di-y : « An ké fè-w vin on gran nasyon » (Jén. 12:1-4). Ès Abraam vwè pwomès-lasa réyalizé ? I ni tan vwè on pawti a pwomès-lasa. Sé 25 an apré i travèsé on flèv yo ka kriyé Léfrat kè Jéova fè on mirak, é kè i vin ni on gason non a-y sé Izaak. É 60 an apré, Izaak fè 2 ti gason, Ézayi é Jakòb (li Ébré 6:15). Men Abraam pa jen vwè pitit a pitit a-y vin on gran nasyon é i pa jen vwè-yo érité dè tè-la Jéova té pwomèt-li la nonplis. Men sa pa anpéché-y rété fidèl a Jéova é sèvi-y tout vi a-y (Jak 2:23). Ou ka imajiné jan i ké ni tchè-kontan lèwvwè Jéova ké résisité-y é kè i ké vin sav kè grasa fwa a-y é grasa pasyans a-y, Jéova béni tout sé nasyon-la ! (Jén. 22:18). Ka sa ka aprann-nou ? Pétèt kè nou pé’é vwè tout sé pwomès-la Jéova fè-nou la réyalizé men nou pé sèten kè si nou ni pasyans kon Abraam, Jéova ké rékonpansé-nou dépi konnyéla é i ké fè sa plis ankò adan nouvo mond-la (Mawk 10:29, 30).

15. Lè ou ka étidyé tousèl a-w, ka ou pé ègzaminé ?

 ¹⁵ Adan Bib-la, nou ka touvé onlo ègzanp a moun ki té ni pasyans b (Jak 5:10). Pétèt kè ou té’é pé kabéché asi sé ègzanp-lasa toupannan ou ka étidyé tousèl a-w ? Pa ègzanp, ou té’é pé étidyé ègzanp a David. Dépi lèwvwè i té tou jenn, Jéova chwazi-y pou i vin wa men sé lanné é lanné apré kè i monté asi twòn-la. Pétèt kè ou té’é pé étidyé ègzanp a Siméon é ègzanp a Àn ki rété fidèl a Jéova toupannan yo té ka atann Mési-la (Lik 2:25, 36-38). Pannan ou ké ka ègzaminé sé ègzanp-lasa, éséyé réponn a sé kèsyon-lasa : « Ka ki dwèt édé sé moun-lasa aji èvè pasyans ? Ki bon biten sa menné ba yo ? Kijan an pé imité-yo ? » Adan Bib-la, nou ka touvé osi ègzanp a moun ki pa aji èvè pasyans é sé ègzanp-lasa pé aprann-vou onlo biten (1 Sam. 13:8-14). Mi sa pou ou mandé-w lè ou ka étidyé-yo : « Poukwa sé moun-lasa pa aji èvè pasyans é ki dézagréman sa pwokiré-yo ? »

16. Siwvwè nou ni pasyans, ki byenfé sa ké pwokiré-nou ?

¹⁶ Toujou sonjé byenfé kè lapasyans ka pwokiré-w. Lè nou ni pasyans, lèspri an nou pi trankil é nou pi kalm. Sa pé édé-nou santi-nou byen an tèt an nou é sa pé édé-nou ni on pibon santé osi. Nou ka antann-nou pibyen èvè lézòt é nou ka travay pou lasanblé an nou rété anpé. Pa ègzanp, si on moun ka chèché-nou tren é kè nou pa’a fè kòlè fasilman, sitiyasyon-la pé ké vin pi mové (Sòm 37:8, gadé nòt-la an fransé ; Pwov. 14:29). Men sa ki pi enpòwtan, sé kè lèwvwè nou ni pasyans, nou ka imité Pap’an nou ki an syèl-la é nou ka vin pibon zanmi èvè-y.

17. Ki biten pou nou byen désidé a fè ?

¹⁷ Lapasyans sé on bèl kalité toubònman é i ka fè-noutout dibyen ! Pou nou aji èvè pasyans, a pa toutlè sa fasil. Men Jéova pé édé-nou pou nou kontinyé ni kalité-lasa. É toupannan nou ka atann nouvo mond-la, nou pé sèten kè « Jéova ka voyé zyé asi moun ki ka krenn-li, asi moun ki ka konté asi lanmou fidèl la i ni la » (Sòm 33:18). Alò, fò-nou byen désidé a kontinyé ni pasyans.