• « Pou mwen, sé konsi mari an mwen té ni onpakèt madanm déwò. »

• « An té anvi rantré antè. Sé konsi an pa té ni pon valè é kè an pa té on bèl moun ankò. »

• « An té ka soufè é an pa té ni ponmoun pou konsolé-mwen. »

• « An té ni lenprésyon kè Jéova pa té ka sousyé-y dè mwen. »

Sé pawòl-lasa ka montré jan on madanm ka soufè lèwvwè mari a-y ka gadé biten pòwno. É siwvwè sa ja ka fè plizyè mwa oben plizyè lanné kè misyé-la ka fè sa an kachèt, madanm-la pé jous ni lenprésyon kè i pé pa fè-y konfyans ankò. Mi sa on madanm di : « An té ni lenprésyon kè an pa té konnèt mari an mwen ditou-ditou. An té ka mandé-mwen si i pa té ka fè dòt biten dèyè do an mwen. »

Yo fè awtik-lasa pou sé madanm-la mari a yo ka gadé biten pòwno a. Adan-y, nou ka touvé prensip ki ké konsolé sé madanm-la, ki ké montré-yo jan Jéova enmé-yo é jan Jéova anvi édé-yo. Sé prensip-lasa ké édé-yo osi pou yo santi-yo anpé é sa ké édé-yo rété bon bon zanmi èvè Jéova b.

Ou pé pa sav tousa mari a-w ka fè men ni sèwten biten ou pé fè pou trankilizé lèspri a-w. An-nou vwè ki biten ésa.

Pa di kè sé fòt a-w. On madanm pé rivé a mèt an tèt a-y kè si mari a-y ka gadé biten pòwno sé on tijan akòz dè-y. Alice c té ka pansé kè sé-y ki té ni on pwoblèm. I té ka mandé-y : « Men poukwa mari an mwen ka gadé dòt madanm olyé i gadé-mwen ? » Ni sèwten madanm ki ka santi-yo koupab parapòt a jan-la yo ka réyaji la é yo ka pansé osi kè sé fòt a yo si sitiyasyon-la ka vin pi mové. Mi sa Danielle ka di : « Konm an té ni rankin an tchè an mwen é kè an té kòlè, an fin pa mandé-mwen si a pa sa ki té détwi mayé an nou. »

Si sé dé biten konsa ou ka rèsanti, on biten pou ou pa jen oubliyé sé kè pou Jéova, ou pa rèsponsab a sa mari a-w ka fè. Jak 1:14 ka montré sa on mannyè ki klè. Mi sa i ka di : « Chakmoun anba  on éprèv lè i ka lésé pwòp anvi a-y menné-y é sédui-y » (Wom. 14:12 ; Filip. 2:12). Pou Jéova, a pa fòt a-w. Okontrè, konm ou fidèl a-y, i ka ba tousa ou ka fè onlo valè (2 Kron. 16:9).

Ondòt biten pou nou sav sé kè si on mari ka gadé biten pòwno, a pa paskè madanm a-y ni on pwoblèm. Sèwten èspésyalis ka èspliké kè lèwvwè on moun ka gadé biten pòwno, sa ka ba-y anvi ni rèlasyon sèksyèl é kèlkèswa madanm-la i té’é ni la, sa pé’é jen sifi-y.

Pa chaléré kò a-w. Catherine ka èspliké kè toutlè i té ka sonjé kè mari a-y ka gadé biten pòwno é sa té ka anpéché-y viv. Mi sa Frances ka di : « Lèwvwè an pa sav ola mari an mwen pasé, a pa ti angwasé an angwasé. Tout jouné-la an égri. » Ni dòt madanm ki di kè yo té ka santi-yo jenné lèwvwè yo té èvè frè é sè ki té sav kè mari a yo té ni pwoblèm-lasa. É ni dòt sè ki kidi kè yo té ka santi-yo tousèl pas pou yo, ponmoun pa té ka konprann sitiyasyon a yo.

Si ou ka rèsanti sa, sa toutafè natirèl. Men si ou ka lésé sa pran lanmen asi-w, ou ké pi enkyèt ankò. Pisimé ou éséyé konsantré-w asi lanmityé a-w èvè Jéova. Konsa, sa ké édé-w andiré (Sòm 62:2 ; Éféz. 6:10).

Pétèt sa ké édé-w siwvwè ou ka pran tan li é médité asi istwa ki adan Labib é ki ka palé dè madanm tchè a yo té an bobo. Sé madanm-lasa wouvè tchè a yo pou Jéova é i konsolé-yo toubònman. Sé vré, a pa toutlè Jéova fè pwoblèm a yo disparèt men i trankilizé-yo. Pa ègzanp, Àn té ka viv on sitiyasyon é ‘a pa ti tris i té tris’. Men i rété on bon ti moman ka priyé Jéova é lèwvwè i fè sa, sa trankilizé-y menmsi i pa té sav kijan biten-la té’é pasé apré (1 Sam. 1:10, 12, 18 ; 2 Kor. 1:3, 4).

Mandé sé ansyen-la édé-w. Yo pé vin « on abri moun k’ay kaché lè i ni van, on koté ou pé ay paré lapli lè ni mové tan » (Iz. 32:2). Pétèt yo jous ké pé di-w owa ki sè ou ké pé ay. Konsa, ou ké pé wouvè tchè a-w ba-y é i ké pé konsolé-w (Pwov. 17:17).

Si mari a-w ka gadé biten pòwno, ès ou pé édé-y lagé vyé labitid-lasa ? Pétèt. Labib ka di-nou kè siwvwè nou anvi réglé on pwoblèm oben kè nou bizwen goumé èvè on lènmi ki puisan, ‘vométan nou a dé ki tousèl’ (Ékl. 4:9-12). Ni sèwten èspésyalis ki dékouvè kè lèwvwè on mari é madanm ka travay ansanm, mari-la ka rivé lagé sé biten  pòwno la i ka gadé la pi fasilman é madanm-la pi fasil a woufè-y konfyans.

Nou ka tou konprann kè pou sa maché, fò misyé-la sensè é fò i byen désidé a mèt tout sé biten pòwno la i té ka gadé la dèyè do a-y. Ès i ja sipliyé Jéova pou i ba-y fòs-la i bizwen la é ès i ja mandé sé ansyen-la édé-y ? (2 Kor. 4:7 ; Jak 5:14, 15). Ès i mèt sèwten biten anplas pou tantasyon-la pa pran lanmen asi-y ? Pa ègzanp, ès i ja désidé konmen tan i ké pasé asi téléfòn a-y oben asi tablèt a-y é ès i ka fè ansòt pou i pa touvé-y douvan pon tantasyon ? (Pwov. 27:12). Ès i dakò pou ou édé-y é ès i pa’a kaché-w ayen ? Si sé sa, pétèt ou ké pé édé-y.

An-nou vwè ègzanp a Felicia é mari a-y, Ethan. Ethan koumansé gadé biten pòwno dépi lèwvwè i té toupiti é i ka goumé èvè sa toujou. Chakfwa i anvi gadé sa, Felicia toujou ka fè ansòt pou i santi-y alèz pou di-y sa. Mi sa Ethan ka di : « An ka palé franchman èvè madanm an mwen. Èvè onlo lanmou, i ka édé-mwen pou pon tantasyon pa pran lanmen asi mwen é souvantfwa i ka mandé-mwen kijan sa k’ay. I ka édé-mwen désidé konmen tan an ké pasé asi Entèwnèt osi. » Nou ka tou konprann kè lèwvwè Ethan anvi gadé biten pòwno, sa ka fè Felicia lapenn. Men mi sa i ka di : « A pa lèwvwè an ké fè kòlè èvè-y é lè an ké montré-y an ka soufè kè sa ké ba-y kouraj pou i kontinyé goumé èvè vyé biten-lasa. Dépi nou palé dè difikilté-la i ka jwenn la, i paré pou i édé-mwen, konsa, an ka santi-mwen myé. »

Lèwvwè on mari é madanm a-y ka fè dé ti kozé konsa, sa pé édé mari-la travay rèd pou i pa gadé biten pòwno ankò é sa pé édé madanm a-y woufè-y konfyans osi. Lèwvwè on mari ka palé èvè madanm a-y franchman dè sé lanvi-la i ni la, dè sé koté-la i k’ay la é dè sa i ka fè, sa pi fasil pou madanm a-y fè-y konfyans piskè i pa’a kaché-y ayen.

Ès ou ka pansé kè ou ké pé édé mari a-w konsa ? Si sé sa, pétèt kè zò té’é pé li awtik-lasa ansanm é kè zò té’é pé fè on ti kozé asi-y. Òbjèktif a mari a-w sé ké arété gadé dé biten ki pòwno é fè dé biten pou ou pé sa woufè-y konfyans. A moman-lasa, olyé i fè kòlè lèwvwè ou ka palé-y dè pwoblèm-lasa, i ké chèché a konprann sa ou ka rèsanti. É vou aprézan, fò ou ké ankourajé-y adan sé éfò-la i ka fè la é montré-y kè ou anvi woufè-y konfyans. Fò zò toulédé ké konprann poukwa on moun ka mété-y ka gadé biten pòwno é ka moun-lasa pé fè pou woté kò a-y adan vyé biten-lasa d.

Si ou pè kè vou é mari a-w lévé cho lèwvwè zò ka palé, pétèt zò pé chwazi on ansyen zò toulédé alèz èvè-y é zò pé mandé-y si pannan kèlkè  tan i pé vin èvè zòt lè zò ka palé dè pwoblèm-lasa. Fò ou sav kè délè menm lèwvwè mari a-w ké lagé mové labitid-lasa, sa pé pran tan pou-w pé sa woufè-y konfyans. Men pa lagé. Chèché a vwè tout ti biten ki ka montré kè sa koumansé alé adan mayé a zòt. Toujou mèt an tèt a-w kè siwvwè zò ni pasyans, mayé a zòt ké solid kon avan (Ékl. 7:8 ; 1 Kor. 13:4).

Siwvwè mari a-w ka viré gadé biten pòwno, ès sa vé di kè i pa ka rèpanti-y oben kè pa ni pon èspwa pou-y ankò ? Pa oblijé. Si mari a-w woutonbé adan biten pòwno é kè i pé pa rété san gadé sa, pétèt kè fò i ké goumé tout vi a-y pou i sòti adan sa. Menmsi i rété plizyè lanné san gadé biten pòwno, sa pé rivé kè i woutonbé adan sa. Pou sa pa rivé, lèwvwè i ka sèvi èvè téléfòn a-y oben tablèt a-y, fò i ké pi karé é fò i ké fè plis atansyon ankò a tan-la i ka pasé asi sé zouti-lasa. Fò i ké fè atansyon osi pou i pa touvé-y adan pon sitiyasyon ki té’é pé fè-y bigidi. É fò i ké kontinyé fè sa menmsi i ni lenprésyon kè i ja mèt pwoblèm-lasa dèyè do a-y (Pwov. 28:14 ; Mat. 5:29 ; 1 Kor. 10:12). On biten pou i fè osi, sé fè éfò pou i ni on nouvo mantalité é fè ansòt pou i toujou lésé ‘mantalité-lasa dirijé-y’. Anplisdisa, fò i aprann « hay sa ki mal » kivédi biten ki pòwno men osi tout biten on moun pé fè ki pa pwòp kon lèwvwè i ka batdous (Éféz. 4:23 ; Sòm 97:10 ; Wom. 12:9). Ès i paré a fè tout sé éfò-lasa ? Si sé sa, tout krab-la pa mò an bari-la e.

Men vinvwè mari a-w pa anvi réglé pwoblèm-lasa, ka ou pé fè ? Pétèt sa ké désèvwa-w, pétèt ou ké kòlè oben ou ké ni lenprésyon kè sé trayi i ka trayi-w é sa ké toutafè nòwmal. Lagé tousa ki ka trakasé-w an men a Jéova (1 Pyè 5:7). Kontinyé étidyé, priyé é médité pou-w pé sa vin pibon zanmi èvè Jéova. Ou pé sèten kè Jéova osi ké vin pi pré a-w. Kon Izayi 57:15 ka di i ka rété èvè « moun ki ni imilité, moun ki tris » é i ‘ka fè moun ki ni imilité woupran doubout a yo’. Fè tousa ou pé pou-w kontinyé sèvi Jéova é pou-w rété fidèl a-y. Mandé sé ansyen-la édé-w. É pa jen pèd èspwa : pétèt kè talè mari a-w ké chanjé mantalité a-y (Wom. 2:4 ; 2 Pyè 3:9).