1. Dapré Ébré 12:1, ka pou on krétyen fè pou i rivé an bout a kous-la ?

 LABIB ka di kè lè on moun ka vin krétyen, sé konsi i ka koumansé kouri on kous. Tout sé krétyen-la ki ka fin kous-la ka risivwè on rékonpans : lavi étèwnèl (2 Tim. 4:7, 8). Kifè, fò-nou fè onlo éfò pou nou kontinyé kouri. É nou ka tou konprann kè a pa lèmoman pou nou moli, paskè nou toupré rivé an bout a kous-la. Lapòt Pòl gangné kous-lasa, é i di-nou ka pou nou fè pou nou fin-li osi. I di-nou « débarasé-nou dè tout chaj » é « kouri èvè andirans kous-la ki douvan nou la » (li Ébré 12:1).

2. Lapòt Pòl ka di kè fò-nou « débarasé-nou dè tout chaj ». Ka sa vlé di ?

² Pòl di-nou kè fò-nou « débarasé-nou dè tout chaj ». Ès sa vlé di kè on krétyen pa ni pon chaj a pòté ? Non ! I té vlé di kè fò-nou débarasé-nou dè tout chaj ki initil. Sé kalté chaj-lasa pé rivé a ralanti-nou é a lasi-nou. Pou nou rivé andiré, fò-nou vwè vitman lè nou ka pòté on chaj ki initil asi do an nou, é fò pa nou tadé a débarasé-nou dè-y. Men an menm balan-la, nou ka tou konprann kè nou pé’é vlé débarasé-nou dè pon chaj kè nou dwètèt pòté. Paskè si nou fè sa, nou pé’é ni dwa kouri kous-la ankò (2 Tim. 2:5). Ki chaj nou oblijé pòté ?

3. a) Dapré Galat 6:5, ka chakmoun oblijé pòté ? b) Ka nou ké vwè adan awtik-lasa é poukwa ?

³ (Li Galat 6:5.) Pòl èspliké kè ni on biten nou oblijé pòté. Mi sa i maké : « Chakmoun ké pòté pwòp chaj a-y ». Adan vèwsé-lasa, Pòl ka palé dè sèwten biten Bondyé mandé-nou fè é kè ponmoun pé pa fè anplas an nou. Adan awtik-lasa, nou  ké vwè ka pou nou konprann lè Pòl ka palé dè « pwòp chaj » an nou, é ka ki pé édé-nou pòté-y. Anplisdisa, nou ké palé dè sèwten chaj initil ki pé ka anbarasé-nou é nou ké vwè ka nou pé fè pou nou débarasé-nou dè yo. Si nou ka pòté pwòp chaj an nou é si nou ka débarasé-nou dè tout chaj initil, nou ké pé rivé an bout a kous-la nou ka kouri la.

4. Nou pwomèt Jéova kè nou ké sèvi-y pou touttan. Poukwa a pa on chaj ki two lou ban nou ? (gadé imaj-la osi).

⁴ Nou pwomèt Jéova kè nou ké sèvi-y pou touttan. Lè nou ba Jéova vi an nou, nou pwomèt-li kè nou ké adoré-y é kè nou ké fè volonté a-y. Fò-nou tchenn a mo an nou. Sé on gwo rèsponsabilité, men a pa on chaj ki two lou pou nou. Poukwa nou ka di sa ? Sé paskè Jéova kréyé-nou pou nou fè volonté a-y (Rév. 4:11). Nou anvi konnèt Jéova é nou anvi adoré-y. É sa toutafè nòwmal, piskè lè Jéova kréyé-nou, i mèt sa andidan tchè an nou. É anplisdisa, i kréyé-nou pòtré a-y. Kifè ni mwayen vin bon zanmi èvè-y é ni mwayen fè volonté a-y èvè plézi (Sòm 40:8). Anplisdisa, lè nou ka fè volonté a Bondyé é lè nou  ka suiv ègzanp a Jézi, sa ka ‘konsolé-nou’ (Mat. 11:28-30).

5. Nou pwomèt Jéova kè nou ké sèvi-y pou touttan. Ka ki pé édé-nou tchenn a mo an nou ? (1 Jan 5:3).

⁵ Ka ki pé édé-w pòté chaj-lasa ? Ni 2 biten ki pé édé-w. Adan on prèmyé tan, kontinyé fè sa ki fo pou ou enmé Jéova pi fò. Ou ké enmé Jéova pi fò si ou ka pran tan réfléchi asi sa Jéova ja fè ba-w, asi sa i ka fè ba-w é asi sa i ké fè ba-w. Pi ou ké enmé Jéova, é pi ou ké touvé kè komandman a-y pa fòsan (li 1 Jan 5:3). On dézyèm biten ou pé fè, sé imité Jézi. Jézi toujou té ka mandé Pap’a-y édé-y é i toujou té ka sonjé rékonpans-la i té’é risivwè la. É sé pousa i rivé fè volonté a Jéova (Ébr. 5:7 ; 12:2). Menmjan ki Jézi, priyé Jéova pou i ba-w fòs é toujou sonjé kè si ou rété fidèl a-y, ou ké ni lavi étèwnèl. Si ou kontinyé fè sa ki fo pou ou enmé Jéova pi fò é pou imité Gason a-y, ou ké rivé tchenn pwomès-la ou fè-y la avan ou té pran lèbatèm.

6. Poukwa fò chakmoun jouwé wòl a-y adan fanmi a-y ? (gadé imaj-la osi).

⁶ Sé rèsponsabilité-la nou ni la adan fanmi an nou. Adan kous-la nou ka kouri la, fò-nou enmé Jéova é Jézi plis ki fanmi an nou (Mat. 10:37). Men sa pa vlé di kè nou pé fè konsi nou pa ni fanmi, konsidiré okipé dè fanmi an nou ka anpéché-nou fè Jéova é Jézi plézi. Okontrè, pou nou fè Jéova é Jézi plézi, fò-nouchak jouwé wòl an nou adan fanmi an nou (1 Tim. 5:4, 8). Si nou ka fè sa, tchè an nou ké pli kontan ankò. É sa toutafè nòwmal piskè Jéova sav kè pou ni lajwa adan on fanmi, fò misyé-la é madanm-la enmé-yo é fò yonn rèspèkté lòt. Jéova sav osi kè pou on fanmi ni tchè-kontan, fò papa-la é manman-la enmé timoun a yo, é fò-yo lévé-yo byen. Anplisdisa, fò sé timoun-la kouté fanmi a yo (Éféz. 5:33 ; 6:1, 4).

7. Ki ou sé on moun-mayé, on papa, on manman oben on timoun, ka ou pé fè pou jouwé wòl a-w adan fanmi a-w byen konm i fo ?

⁷ Ka ki pé édé-w pòté chaj-lasa ? Ki ou sé on moun-mayé, ki ou ni timoun oben ki ou sé on timoun, fè sé konsèy-la ki an Bib-la konfyans pas yo plen sajès. Pa enki mété-w ka fè sa lidé a-w ka di-w fè oben sa ou ka vwè moun alantou a-w ka fè é pa fè sé èspésyalis-la konfyans zyé-fèmé (Pwov. 24:3, 4). Pa ézité sèvi èvè piblikasyon an nou pas yo bazé asi Labib. Adan sé piblikasyon-lasa, nou ka touvé onlo konsèy ki itil é yo ka èspliké-nou kijan pou nou mèt sé prensip-la ki an Bib-la an pratik. Pa ègzanp, adan on ribrik non a-y sé « De l’aide pour les familles b », ou ké touvé dé bèl ti lidé ki pé édé sé moun-mayé-la réglé pwoblèm yo ka jwenn. Anplisdisa, ni dé bon ti konsèy pou sé paran-la é pou sé jennmoun-la. Fò ou byen désidé a suiv sé prensip-la ki an Bib-la, menmsi ni sèwten moun an fanmi a-w ki pa ka mèt-yo an pratik. Fanmi a-w ké bénéfisyé dè sé éfò-la ou ka fè la é Jéova ké béni-w (1 Pyè 3:1, 2).

8. Lè nou ka pran on désizyon, ki rèsponsabilité nou ni ?

⁸ Lè nou ka pran on désizyon, fò-nou asimé. Jéova ban-nou laposibilité dè pran pwòp désizyon an nou. É sa i té’é swété sé kè sé désizyon-la nou ka pran la pwokiré-nou yenki bon biten. Men si nou ka pran mové désizyon, Jéova pé ké anpéché-nou rékòlté sa nou simé (Gal. 6:7, 8). Kifè, si nou jwenn pwoblèm davwa nou fè on mové chwa, nou palé san réfléchi oben nou fè on biten ki pa bon, fò-nou asimé. Byensouvan, apré nou fè  on biten ki pa bon, konsyans an nou ka bat-nou. Alò, si nou byen konprann kè fò nou asimé lè nou pran on désizyon, sa ké pousé-nou a di sa nou fè ki pa bon, a réparé tout déga nou fè é a fè éfò pou nou pa woukoumansé. Si sé konsa nou ka aji, nou ké pé kontinyé kouri kous-la nou ka kouri la pou nou pé sa ni lavi étèwnèl.

9. Ka pou-w fè si ou pran on mové désizyon ? (gadé imaj-la osi).

⁹ Ka ki pé édé-w pòté chaj-lasa ? Si ou té pran on mové désizyon é kè pa ni mwayen ou wouvin asi-y, fò ou aksèpté sitiyasyon a-w kon i yé. Fò ou admèt kè ou pé’é pé fè ayen pou chanjé sa ki ja fèt. Alò pa pèd tan a-w ka chèché èskiz é pa pran tèt a-w parapòt a sa ki pasé. Pa chèché a montré kè sé dòt moun ki fè si sa rivé-w, pas si ou fè sa sé tan a-w ou ké pèd é ou ké fatigé-w initilman. Okontrè, admèt kè ou fè érè, aksèpté sitiyasyon-la ou adan-y la é éséyé gadé ki bon biten ou pé fè konnyéla la. Si konsyans a-w ka bat-vou parapòt a on érè ou fè, priyé Jéova èvè onlo imilité pou di-y ka ou fè é mandé-y padon (Sòm 25:11 ; 51:3, 4). Si akòz dè érè-la ou fè la ou fè moun ditò, mandé-yo padon é si sa nésésè, mandé sé ansyen-la édé-w (Jak 5:14, 15). Éséyé vwè ka érè-la ou fè la ka aprann-vou é fè éfò pou-w pa viré fè menm fòt-la. Si ou suiv sé konsèy-lasa, ou pé sèten kè Jéova ké padonné-w é kè i ké soutyenn-vou (Sòm 103:8-13).

10. Lè nou bizwen fè plis ki sa nou kapab fè, sé on chaj ki lou toubònman. Poukwa nou ka di sa ? (Galat 6:4).

¹⁰ Lè nou toujou bizwen fè plis ki sa nou kapab fè. Si nou ka konparé-nou èvè lézòt, nou pé rivé a mèt an tèt an nou kè fò-nou fè plis ki sa nou kapab fè, é a moman-lasa nou ka mèt on chaj ki two lou pou nou asi do an nou (li Galat 6:4). Si nou toujou ka konparé-nou èvè lézòt, nou pé rivé a jalou-yo é pétèt kè nou ké anripaj èvè yo (Gal. 5:26). Si nou bizwen fè menm biten ki lézòt alòskè nou pa annéta fè kon yo, nou ké fè noumenm an nou ditò. Labib ka di kè « lè on moun ka atann on biten é kè biten-lasa ka pran tan pou rivé, sa ka fè-y pèd èspwa » (Pwov. 13:12). Alò imajiné adan ki léta nou ké yé si nou ka atann on biten kè nou pé’é jen ni ! Sa pé rivé a kasé 2 bra an nou é a frenné balan an nou adan kous-la nou ka kouri la (Pwov. 24:10).

11. Lè ou ka santi kè ou anvi fè plis ki sa ou kapab fè, ka ki pé édé-w goumé èvè lanvi-lasa ?

¹¹ Ka ou pé fè pou débarasé-w dè chaj-lasa ? Pa mèt an tèt a-w kè ou oblijé ba Jéova plis ki sa i ka mandé-w. I pé’é jen mandé-w ba-y sa ou pa ni (2 Kor. 8:12). Ou pé sèten a san pou san kè i pa’a konparé sa ou ka fè ba-y èvè sa lézòt ka fè (Mat. 25:20-23). Lè i ka gadé jan ou ka pòté mannèv ba-y, jan ou fidèl é jan ou ka andiré, sa ni onlo valè ba-y toubònman. Fò ou ni imilité é fò ou mèt an tèt a-w kè konnyéla la pétèt ou pé’é pé fè tousa ou anvi fè, swa paskè laj-la ka monté, swa paskè kò-la pa two flanbo, oswa paskè sitiyasyon a-w pa ka pèwmèt. Si yo ka ba-w on rèsponsabilité adan òwganizasyon a Jéova é kè kò-la é laj-la pa’a pèwmèt-vou fè sa, ou pé fè kon Barzilay, rèfizé rèsponsabilité-lasa (2 Sam. 19:35, 36). Kon Moyiz, aksèpté kè lézòt édé-w é lè sa posib ba dòt moun fè sèwten biten anplas a-w (Ègz. 18:21, 22). Si nou ni imilité nou pé’é chèché a fè dé biten nou pa kapab fè, paskè sa té’é pé fè-nou pèd fòs-la nou bizwen la pou kontinyé kous-la nou ka kouri la.

12. Lè lézòt ka pran mové désizyon, ès nou dwèt pòté chaj-la anplas a yo ?

¹² Lè lézòt ka pran mové désizyon é kè nou  bizwen ranmasé chaj-la. Nou pé pa pran pon désizyon anplas a ponmoun, é a pa toutlè nou ké pé anpéché lézòt rékòlté sa yo simé davwa yo pran on mové désizyon. Pa ègzanp, lè on timoun ka désidé arété sèvi Jéova, sa pé fann tchè a fanmi a-y. Men lè sé paran-la ka di kè sé fòt a yo si timoun a yo lagé Jéova, sé on chaj yo ka mèt asi do a yo. Jéova vé pa kè yo pòté chaj-lasa (Wom. 14:12).

13. Ka sé paran-la pé fè lè timoun a yo ka pran on mové désizyon ?

¹³ Ka ou pé fè pou débarasé-w dè chaj-lasa ? Sonjé kè noutout lib dè fè pwòp chwa an nou paskè sé konsa Jéova kréyé-nou. Kifè, nouchak pé désidé si nou ké sèvi Jéova oben si nou pé’é sèvi-y. Jéova sav kè ou pa pawfè ; sa i vlé sé kè ou fè tousa ki fo pou lévé timoun a-w byen. Donk lèwvwè timoun a-w ka pran pwòp désizyon a-y, a pa vou pou pòté chaj a-y anplas a-y (Pwov. 20:11). Men pétèt kè ou fè sèwten érè lè ou té ka lévé timoun a-w é kè ou pa ka arété sonjé sa. Si sé ka a-w, pa ézité di Jéova sa ou ka rèsanti é mandé-y padonné-w. Jéova sav kè ou pé pa chanjé sa ki ja fèt. Men anmenmditan, i pa’a mandé-w pwotéjé timoun a-w pou i pa rékòlté sa limenm a-y simé. Pa jen oubliyé kè si timoun a-w fè tousa ki fo pou wouvin owa Jéova, Jéova ké akéyi-y bra gran wouvè (Lik 15:18-20).

14. Si nou ka santi-nou koupab alòskè Jéova ja padonné-nou, sé on chaj nou ka pòté. Poukwa fò-nou lagé chaj-lasa ?

¹⁴ Lè nou ka kontinyé santi-nou koupab alòskè Jéova ja padonné-nou. Si nou ka santi-nou koupab apré nou fè on péché, sa toutafè nòwmal. Men lè nou ka kontinyé santi-nou koupab alòskè Jéova ja padonné-nou, nou ka touvé-nou ka pòté on chaj kè nou pa dwètèt pòté. Kifè, fò-nou lagé chaj-lasa. Si nou di ki péché nou fè, kè nou rèpanti-nou é kè nou ka fè tousa nou pé pou nou pa woutonbé adan menm péché-la, nou pé sèten kè Jéova ja padonné-nou (Akt 3:19). Jéova vé pa nou santi-nou koupab akontinyé pas i sav kè sa pé  fè-nou soufè onlo toubònman (Sòm 31:10). Siwvwè nou two tris é nou pa’a rivé woupran doubout an nou, nou pé rivé a lagé kous-la nou ka kouri la (2 Kor. 2:7).

15. Si ou ka kontinyé santi-w koupab alòskè Jéova ja padonné-w, kijan ou pé lité kont sa ? (1 Jan 3:19, 20 ; gadé imaj-la osi).

¹⁵ Ka ou pé fè pou débarasé-w dè chaj-lasa ? Si ou ka kontinyé santi-w koupab, sonjé kè Jéova ka padonné-nou poudèbon (Sòm 130:4). Lèwvwè Jéova ka padonné séla ki rèpanti-yo poudèbon, i pa ka sonjé péché a yo ankò (Jér. 31:34). Sa vlé di kè i pa’a tchenn kont dè sé péché-la ou fè la avan. Si ou ka jwenn difikilté akòz dè péché-la ou fè la, sa pa vé di kè Jéova pa padonné-w. Alò, pa mèt lidé-lasa an tèt a-w. É pa tèwbolizé lèspri a-w si érè ou fè avan ka anpéché-w fè sèwten biten adan òwganizasyon a Jéova jòdila. Pa rété ka sonjé sé péché-la ou fè la toutlè, paskè li Jéova, i pa’a sonjé-yo ankò (li 1 Jan 3:19, 20).

16. Konm nou adan on kous, ki biten pou nou byen konprann ?

¹⁶ Fò-nou kouri kous-la nou ka kouri la ‘on jan pou nou pé sa gangné-y’ (1 Kor. 9:24). Pou sa, fò-nou konprann kè nou ni sèwten biten a chayé é kè fò-nou lagé sèwten biten ki two lou ban nou. Adan awtik-lasa, nou palé dè déotwa adan yo men ni dòt ki ka ègzisté ankò. Jézi di kè ‘tchè an nou té’é pé vin lou afòs nou manjé twòp, afòs nou bwè twòp é akòz dè penn é traka a lavi’ (Lik 21:34). É adan Labib, ou pé touvé dòt vèwsé kon sila ki pé édé-w vwè ki chanjman ou dwèt fè pou ou kontinyé kouri kous-la ou ka kouri la.

17. Poukwa nou pé sèten kè ni mwayen nou gangné kous-la ki ké pèwmèt-nou ni lavi étèwnèl ?

¹⁷ Nou pé sèten kè ni mwayen nou gangné kous-la pou nou ni lavi étèwnèl pas Jéova ké ban-nou fòs-la nou bizwen la (Iz. 40:29-31). Alò, pa frenné balan a-w ! Fè kon lapòt Pòl ; i fè tousa i té pé pou i té pé sa gangné rékonpans-la (Filip. 3:13, 14). Ponmoun pé pa kouri kous-lasa an plas a-w men èvè èd a Jéova, ou pé rivé an bout a-y. I pé édé-w pòté sa ou dwètèt chayé é i pé édé-w lagé tout chaj initil (Sòm 68:19). Grasa Jéova, ou ké pé kouri kous-la ou adan-y la san janmé arété-w é ou ké gangné kous-lasa !