1. Poukwa sé Babilonyen-la rèmawké Danyèl ?

 DANYÈL té on jenngason lèwvwè yo menné-y lwen a Jérizalèm é kè yo chayé-y pa fòs Babilòn pou i té pé sa vin prizonyé. Men menmsi Danyèl té tou jenn, sé gwo fonksyonnè-la rèmawké-y. ‘Yo vwè sa zyé a yo té ka ba-yo’ kivédi yo vwè kè Danyèl pa té ni pon défo, kè i té bèl é kè fanmi a-y té ni on gwo pozisyon (1 Sam. 16:7). Kifè, yo fòwmé-y pou i té pé sa travay pou wa-la (Dan. 1:3, 4, 6).

2. Ka Jéova té ka rèsanti pou Danyèl ? (Ézékyèl 14:14).

² Danyèl sé té on bèl gason é i té ni on gwo pozisyon men a pa sa ki fè si Jéova té enmé-y. I té désidé vin on bon moun é sé pousa Jéova té enmé-y. An réyalité, lè Jéova di Danyèl kè i té kon Noé é Jòb, pétèt Danyèl té ni 20 an apépré. Menmsi Danyèl té jenn, pou Jéova, sé té on moun ki jis menmjan ki Noé é Jòb. Sé 2 boug-lasa té fidèl é yo sèvi Jéova pannan onpakèt lanné (Jén. 5:32 ; 6:9, 10 ; Jòb 42:16, 17 ; li Ézékyèl 14:14). Danyèl viv lontan é i viv dé biten ki té èstraòwdinè é toutolon a vi a-y, Jéova kontinyé enmé-y (Dan. 10:11, 19).

3. Ka nou ké vwè adan awtik-lasa ?

³ Adan awtik-lasa, nou ké palé dè 2 kalité Danyèl té ni. Konm Danyèl té ni sé kalité-lasa, i té ni onlo valè pou Jéova. Pou koumansé, nou ké palé dè sé 2 kalité-lasa é nou ké ègzaminé osi adan ki sitiyasyon Danyèl montré kè i té ni sé kalité-lasa. Aprésa, nou ké vwè ki travay Danyèl fè pou i té kontinyé ni yo. É pou fin, nou ké vwè ka nou pé fè pou nou pé sa imité-y. Menmsi yo fè awtik-lasa pou sé jennmoun-la, ègzanp a Danyèl pé aprann-nouchak onlo biten.

4. Kijan Danyèl montré kè i té ni kouraj ? Bay on ègzanp.

⁴ On moun ki ni kouraj pé rivé a pè men i pa’a lésé sa anpéché-y fè sa ki byen. Danyèl sé té on jennboug ki té ni onlo kouraj toubònman. An-nou palé dè 2 biten ki pasé adan vi a-y ki ka montré kè i té ni kalité-lasa. Lè prèmyé biten-la fèt, sa té ka fè apépré 2 an kè sé Babilonyen-la té détwi Jérizalèm. An-nou imajiné sa : Nabikodonozò, wa a Babilòn, chouboulé toubònman. I fè on rèv é adan rèv-lasa, i vwè on gwo manman èstati. I ka mandé sé nonm-la ki saj la di-y ka i révé é èspliké-y ka rèv-lasa vé di. I ka di-yo osi kè siwvwè yo pa ka rivé fè sa, i kay tchouyé-yotout (Dan. 2:3-5). Danyèl té pawmi sé nonm-lasa, kifè, fò i té pòté mannèv pas vi a-y é vi a dòt moun té andanjé. Alò, « i ay vwè wa-la é i mandé-y ba-y tibwen tan pou i pé sa di-y ka rèv a-y vé di » (Dan. 2:16). Lè Danyèl fè sa, i montré jan i té ni kouraj é jan i té ni fwa an Jéova. Poukwa nou ka di sa ? Pas adan Labib, pa ni ayen ki ka montré kè Danyèl té ja èspliké on rèv avan sa. Men an-nou wouvin asi istwa an nou. I ka mandé zanmi a-y Chadrak, Méchak é Abèdnégo (sé konsa sé Babilonyen-la té ka kriyé-yo) « priyé Bondyé-la ki an syèl-la pou i fè-yo mizérikòd anrapò èvè sèkré-lasa » (Dan. 2:18). Jéova ka réponn a priyè a yo. Grasa-y Danyèl ka rivé èspliké Nabikodonozò ka rèv-la i té fè la té vé di. Sé konsa Danyèl é zanmi a-y pa mò.

5. A ki moman ankò fò Danyèl té montré kè i té ni kouraj ?

⁵ Kèlkè tan apré, ni ondòt biten ki pasé é fò Danyèl té ni onlo onlo kouraj. Nabikodonozò fè ondòt rèv é sé té on rèv ki té ka fè moun pè toubònman. Kou-lasa, i révé on gwo manman pyébwa. Danyèl pran kouraj a-y a 2 men é i èspliké wa-la ka rèv-lasa vé di. Pa ègzanp, i jous di-y kè i ké vin fou é kè pannan on tan i pé’é wa ankò (Dan. 4:25). Wa-la té’é pé di konsa kè Danyèl té lènmi èvè-y é i té’é pé désidé tchouyé Danyèl. Men Danyèl montré kè i té ni kouraj é i èspliké wa-la rèv-la.

6. Ka ki dwèt édé Danyèl ni kouraj ?

⁶ Danyèl montré kè i té on moun ki té ni kouraj pannan tout vi a-y. Ka ki dwèt édé-y fè sa ? Sèten kè manman-y é pap’a-y ba-y on  bèl ègzanp lèwvwè i té jenn. Konm Jéova té ka mandé sé paran izraélit la aprann timoun a yo Lwa-la, sèten fanmi a Danyèl dwèt fè sa èvè-y (Dét. 6:6-9). Non sèlman Danyèl té konnèt sé 10 komandman-la men i té konnèt onlo ti détay asi Lwa-la osi. Pa ègzanp, i té sav ki biten on Izraélit pa té ni dwa manjé b (Lév. 11:4-8 ; Dan. 1:8, 11-13). Anplisdisa, Danyèl té konnèt istwa a pèp a Bondyé é i té sav sa ki té ka rivé-yo lèwvwè yo pa té ka kouté Jéova (Dan. 9:10, 11). Akòz dè tout sé biten-la i viv la, i vin sèten kè Jéova té ka soutyenn-li é kè i té ka sèvi èvè sé zanj puisan la i ni la osi pou édé-y (Dan. 2:19-24 ; 10:12, 18, 19).

7. Ki dòt biten ki édé Danyèl ni kouraj ? (gadé imaj-la osi).

⁷ Danyèl té ka étidyé sa sé pwofèt-la maké, kifè, i étidyé sa Jérémi maké osi. Pa ègzanp, rivé onlè, sa i aprann adan étid a-y édé-y konprann kè adan on ti moman, yo té’é libéré sé Juif-la yo té chayé Babilòn pa fòs (Dan. 9:2). Sèten kè lè Danyèl vwè sé pwofési-la réyalizé, i mété-y ka fè Jéova konfyans plis ankò é nou sav kè moun ki ka fè Jéova konfyans a san pou san pé ni onlo onlo kouraj (gadé Women 8:31, 32, 37-39). Men on biten ki pi enpòwtan ankò, sé kè souvantfwa Danyèl té ka priyé Pap’a-y ki an syèl-la (Dan. 6:10). I té ka di-y sé péché-la i té fè la. I té ka di-y sa i té ka rèsanti osi é i té ka mandé-y édé-y (Dan. 9:4, 5, 19). Danyèl sé té on moun kon toutmoun. Sa vé di kè lèwvwè i fèt, i pa té ni kouraj. Men konm i té ka étidyé, i té ka priyé é i té ka fè Jéova konfyans, i vin ni onlo kouraj.

8. Ka pou nou fè pou nou pé sa ni plis kouraj ?

⁸ Ka pou nou fè pou nou pé sa ni plis kouraj ? Pétèt kè paran an nou sé dé moun ki ni kouraj é kè yo ka ankourajé-nou pou nou ni kalité-lasa osi. Men a pa paskè yo yo ni kouraj pou nou konpranndèdi kè nou pa bizwen fè éfò pou nou ni kouraj. Pou on moun pé sa ni plis kouraj, fò i travay sa. Sé kon lè on moun bizwen aprann jouwé pyano. I pé’é rivé fè sa onsèl kou men fò i gadé kijan pwofésè a-y ka fè é fò i fè menm biten-la. Menmjan-la, pou nou pé sa ni plis kouraj, fò-nou gadé byen kijan moun ki ni kouraj ka aji é aprésa, fò-nou suiv ègzanp a yo. Alò, lè nou ka gadé ègzanp a Danyèl, ka sa ka aprann-nou ? Kon li, fò-nou konnèt Pawòl a Bondyé byen. Fò-nou vin bon bon zanmi èvè Jéova. É pousa, fò-nou palé ba-y souvan é fò-nou wouvè tchè an nou ba-y. Anplisdisa, fò-nou fè-y konfyans é fò-nou sèten kè i ké soutyenn-nou. Alò, lèwvwè nou ké jwenn éprèv ki ké soukwé fwa an nou, nou ké aji èvè kouraj.

9. Siwvwè nou ka aji èvè kouraj, ki bon biten sa ké pòté ban nou ?

⁹ Si nou ka aji èvè kouraj, sa ké pòté onlo bon biten pou nou. An-nou palé dè Ben. I ka rété an Almagn é adan lékòl a-y, yo ka kwè adan lévolisyon. Pou toutmoun an lékòl-la, sa Labib ka di asi lakréyasyon, sa pa vré. On jou, i ni lokazyon èspliké tout klas a-y poukwa i té ka kwè kè Bondyé kréyé lavi. I té doubout douvan tout klas-la pou di toutmoun adan ki biten i té ka kwè é i fè sa èvè onlo kouraj. Kijan pwofésè a-y réyaji ? Mi sa Ben ka di : « Pwofésè an mwen pran tan kouté-mwen byen. Aprésa, i ay fè plizyè  kopi a sé dokiman-la an té itilizé la pou fè dèvwa an mwen é i ba chak zélèv an klas-la on kopi. » É kijan kanmarad-lékòl a-y réyaji aprézan ? Mi sa i ka di : « Onlo adan yo kouté-mwen é yo jous di-mwen kè yo té ni onlo rèspé pou sa an té fè la. » Ègzanp a Ben ka montré-nou kè byensouvan lèwvwè on moun ni kouraj, lézòt ka rèspèkté-y. Anplisdisa, jan-la moun-lasa ka aji pé édé moun ki ni tchè sensè vin owa Jéova. Wi, nou ni onlo biten ki ka pousé-nou aji èvè kouraj.

10. Lè Bib-la ka di kè on moun fidèl, ka sa vé di ojis ?

¹⁰ Souvantfwa, lè Labib ka di kè Jéova fidèl a zanmi a-y sa vé di kè i ni on lanmou ki fidèl pou yo. Bib-la ka palé osi dè jan sèwvitè a Bondyé fidèl yonn èvè lòt (2 Sam. 9:6, 7). Piti-a-piti, nou pé vin pi fidèl a Jéova. An-nou vwè kijan ègzanp a Danyèl ka montré-nou sa.

11. Kijan Danyèl montré kè i té fidèl a Jéova lèwvwè i té ja ni on bèl laj ? (gadé imaj-la ki anlè po a jounal-la).

¹¹ Adan vi a-y, Danyèl ni lokazyon montré Jéova a plizyè rèpriz si i té ka rété fidèl a-y oben si i té ka lagé-y. Men lèwvwè i vin ni plis ki 80 lanné, i jwenn on gwo gwo éprèv. Sé Mèd-la é sé Pèws-la té pran Babilòn é konnyéla, sé wa Dariyis ki té ka gouvèné péyi-la. Sé moun-la ki té ka travay pou wa-la pa té enmé Danyèl é yo pa té ka rèspèkté Bondyé a-y nonplis. Kifè, yo monté konplo pou yo tchouyé-y. Yo fè wa-la fè on lwa ki té’é montré si Danyèl té’é rété fidèl a Bondyé oben si i té’é rété fidèl a wa-la. Pou Danyèl té montré wa-la kè i té fidèl a-y, fò pa i té priyé Jéova pannan 30 jou. Konsa, i té’é fè kon toutmoun. Konm Danyèl rèfizé fè sa, yo jété-y adan tou a sé liyon-la. Men Jéova rékonpansé Danyèl. I sové-y pas i rété fidèl a-y (Dan. 6:12-15, 20-22). Kijan nou pé rété fidèl a Jéova menmjan ki Danyèl ?

12. Danyèl pa lésé ayen anpéché-y rété fidèl a Jéova. Kijan i rivé fè sa ?

¹² Kon nou vwè-y pi ho, lè on moun enmé on moun fò, i fidèl a moun-lasa osi. Danyèl té fidèl a Jéova é ayen pa té pé fè-y lagé Jéova pas i té enmé Pap’a-y ki an syèl-la toubònman. Si i vin enmé Jéova fò konsa, sèten sé pas i té pran tan réfléchi asi kalité a Jéova  é asi jan Jéova té ka sèvi èvè sé kalité-lasa (Dan. 9:4). Anplisdisa, i té ka médité asi tout bon biten Jéova té fè pou li é pou sèwvitè a-y é i té ni onlo rèkonésans pou sa (Dan. 2:20-23; 9:15, 16).

13. a) Jòdijou, ki biten ki pé mèt fidélité a sé jenn-la a léprèv ? (gadé imaj-la osi). b) Kon vidéo-la ka montré, ka ou té’é pé réponn si yo ka mandé-w ès Témwen a Jéova ka soutyenn moun ki enmé moun ki ni menm sèks ki yo ?

¹³ Kon Danyèl, jenn an nou lantouré èvè moun ki pa ni pon rèspé pou Jéova é pou prensip a-y. Souvantfwa, sé moun-lasa pa enmé moun ki ka di kè yo enmé Bondyé. Jous ni sa adan yo ki ka tigonné jenn an nou pou fè-yo lagé Jéova. Pa ègzanp, an-nou vwè sa ki rivé on jenn non a-y sé Gabriel c. I ka viv an Òstrali é lèwvwè i té o lisé, i jwenn on sitiyasyon ki té rèd toubònman. Ni on pwofésè a-y ki mandé zélèv a klas a-y kijan yo té’é réyaji siwvwè on zanmi a yo té ka di-yo kè i enmé on moun ki ni menm sèks ki-y. Aprésa, pwofésè-la di tout sé zélèv-la ki té’é pran pou zanmi a yo ay mèt-yo on koté an sal-la é touséla ki pa dakò èvè zanmi a yo ay mèt-yo lòt koté-la. Mi sa Gabriel ka rakonté : « Tout sé zélèv-la ay mèt-yo a koté a séla ki ka pran pou moun ki ni menm sèks ki yo. Sé enki mwen é ondòt Témwen ki pa fè sa. » Sa ki fèt aprésa mèt fidélité a Gabriel a léprèv toubònman. Mi sa i ka di ankò : « Pannan tout rèstan a kouw-la, sélézòt zélèv-la té ka fè jé èvè nou é yo té ka jiré-nou. Menm pwofésè-la té adan sa. An fè tousa an té pé pou an té défann fwa an mwen, pou an té rété kalm é pou an té aji èvè bon jijman. Men yo pa té vé tann ayen. » Lèwvwè sa rivé-y, ka Gabriel rèsanti ? I ka réponn : « Sa pa fè-mwen plézi lèwvwè yo vougaré-mwen konsa, men a pa ti kontan an té kontan davwa an défann kwayans an mwen é an pa bigidi d. »

14. Ka ou pé fè pou ou toujou rété fidèl a Jéova ?

¹⁴ Menmjan ki Danyèl, pi nou ké enmé Jéova fò, pi nou ké byen désidé a rété fidèl a-y. Nou ka vin enmé Jéova fò konsa lèwvwè nou ka chèché a konnèt kalité a-y pibyen. Pou sa, nou pé pran tan étidyé sé biten-la Jéova kréyé la pa ègzanp (Wom. 1:20). Si ou vé enmé Jéova pi fò é si ou vé ni plis rèspé pou-y, ou pé gadé sé vidéo-la é sé awtik-la ki adan ribrik-la « Évolution ou conception ? » Ondòt biten ou pé fè, sé pran on ti tan pou ègzaminé sé lidé-la ou ka touvé adan sé bwochi-la La vie a-t-elle été créée ? é Cinq questions à se poser sur l’origine de la vie e. Mi sa on sè ki ka viv o Dànmawk, non a-y sé Esther, ka di : « Sé lidé-la ki adan sé bwochi-lasa entérésan toubònman. Adan sé bwochi-lasa, yo ka palé dè sèwten vérité kè moun pé pa kontrèdi, men yo pa’a di-w adan kibiten pou ou kwè. É vou aprézan, ou pé bazé-w asi sa pou ou désidé adan kibiten ou ké kwè. » Talè la nou palé dè Ben, mi sa i ka di : « Sé awtik-lasa konsolidé fwa an mwen. Yo ban-mwen plizyè prèv ki ka montré kè sé Bondyé ki kréyé lavi. » Lèwvwè ou ké étidyé-yo, sèten ou ké dakò èvè sa Révélasyon 4:11 ka di : « Jéova, Dyé an nou, ou mérité rèsèvwa glwa-la é lonnè-la é puisans-la, pas sé vou ki kréyé tout biten ».

15. Ki dòt biten ou pé fè pou ou pé sa vin pi bon zanmi èvè Jéova ?

¹⁵ Ondòt biten nou pé fè pou enmé Jéova pi fò, sé pran on ti tan pou étidyé vi a Gason a-y Jézi. Sé sa Samira, on jenn sè ki ka rété  an Almagn fè. Mi sa i ka èspliké : « Grasa Jézi, an vin konnèt Jéova pibyen. » Lèwvwè i té piti, Samira pa té ka vwè kijan Jéova té’é pé rèsanti dé biten men i té ka rivé konprann sa Jézi té ka rèsanti. Mi sa i ka di ankò : « Konm Jézi té janti é kè i té enmé timoun, an té enmé-y osi. » Pi i té ka aprann dé biten asi Jézi, pi i té ka vin zanmi èvè Jéova. Poukwa ? Mi sa limenm a-y ka di : « Piti-a-piti, an rann-mwen kont kè Jézi ka imité Pap’a-y on mannyè ki pawfè. A pa ti sanm yo ka sanm ! A moman-lasa, an rivé konprann kè sé pousa osi Jéova voyé-y asi latè. I té vé kè lézimen aprann konnèt-li pibyen grasa Gason a-y » (Jan 14:9). Si ou anvi vin pi bon zanmi èvè Jéova, pétèt ou té’é pé éséyé aprann tousa ou pé asi Jézi. Si sé sa ou ja ka fè, ou ké vin enmé Jéova pi fò é ou ké rété fidèl a-y.

16. Lè nou fidèl a Jéova, ki bon biten sa ka menné ? (Sòm 18:25 ; Miché 6:8).

¹⁶ Lèwvwè nou ka montré kè nou sé on zanmi fidèl pou lézòt, souvantfwa, yo ka vin bon zanmi èvè nou é yo osi, yo ka montré kè yo sé dé zanmi fidèl pou nou (Rit 1:14-17). Anplisdisa, pli souvan ki rarman moun ki fidèl a Jéova ka santi-yo anpé é yo kontan. Poukwa ? Pas Jéova ka pwomèt kè i ké fidèl èvè moun ki fidèl a-y (li Sòm 18:25 ; Miché 6:8). Réfléchi asi sa : Kréyatè an nou ki toupuisan vé vin bon bon zanmi èvè nou é pa ni pon éprèv, pon lènmi, pa menm lanmò ki pé détwi lanmityé-lasa (Dan. 12:13 ; Lik 20:37, 38 ; Wom. 8:38, 39). Alò sa enpòwtan toubònman kè nou imité Danyèl é kè nou rété fidèl a Jéova !

17-18. Ki dòt biten Danyèl pé aprann-nou ?

¹⁷ Adan awtik-lasa, nou palé enki dè 2 kalité Danyèl té ni. Men i pé aprann-nou onlo dòt biten. Pa ègzanp, Jéova fè Danyèl vwè dé biten adan rèv é adan vizyon é Jéova pèwmèt-li èspliké sèwten pwofési osi. Onlo adan sé pwofési-lasa ja réyalizé é sélézòt pwofési-la ka ban-nou déotwa détay asi sa ki ké fèt talè. Lèwvwè sé biten-lasa ké fèt, sa ké aji asi vi a toutmoun asi latè.

¹⁸ Adan awtik-la ki ka vin la, nou ké ègzaminé 2 pwofési Danyèl maké. Ki nou jenn, ki nou ja ni on ti laj, sé pwofési-lasa ké édé-noutout pran bon désizyon dépi jòdila. Yo ké ban-nou plis kouraj é plis fòs pou nou rété fidèl a Jéova. Konsa, nou ké paré pou éprèv nou ké jwenn talè.