Lè nou ka li Labib, nou ni plizyè zouti anba men an nou ki ka pèwmèt-nou fè rèchèch pou nou pé sa konprann sa nou ka li pibyen. Lè nou ka étidyé Labib, nou pa’a fè sa enki pou nou aprann plis biten. Men nou ka fè sa siwtou pas nou anvi enmé Jéova pi fò. Konm nou anvi konnèt ki jan dè moun Jéova yé pibyen, nou toujou ka chèché a aprann dé biten asi kalité a-y. Pou nou rivé fè sa, mi sa pou nou mandé-nou : « Ka vèwsé-lasa ka aprann-mwen asi Jéova ? »

Pa ègzanp, nou pé éséyé touvé plis biten asi jan Jéova ka montré kè i ni lanmou, kè i ni sajès, kè i ni jistis é kè i ni puisans. Men a pa enki sé 4 kalité-lasa Jéova ni. I ni onlo dòt bèl kalité. Ka ou pé fè pou ou konnèt plis biten asi sé kalité-lasa ?

Adan Index des publications des Témoins de Jéhovah, lè ou k’ay adan « Jéhovah » é kè ou k’ay adan « Qualités par nom », ou ké touvé on lis ki ni plis ki 50 kalité a Jéova adan. Gadé pou vwè ki kalité ou ka touvé adan istwa-la ou ka li la adan Bib-la. (Si adan lang a-w, sé enki Guide de recherche pour les Témoins de Jéhovah ki ni, ay asi « Jéhovah Dieu », é aprésa ay asi « Qualités de Jéhovah ».)