Awtik-lasa montré-nou kè fè non a Jéova vin sen, sé biten-la ki pli enpòwtan la é sa ka konsèwné sé zanj-la é toutmoun asi latè. Sa ni on rapò èvè dwa-la Jéova ni la dè gouvèné é èvè fidélité a moun ki asi latè.

Poukwa alèla nou ka di kè kèsyon-la ki pi enpòwtan la ka konsèwné non a Jéova é lèfètkè fò non a-y vin sen ? An-nou vwè 3 biten ki ka fè-nou di sa.

Prèmyèwman, Satan sali non a Jéova kivédi i sali répitasyon a-y lèwvwè i té adan Jadendédèn-la. I pozé Èv on kèsyon pou fè Èv konprann kè Jéova a pa on Bondyé ki donan é kè i ka mandé sèwvitè a-y fè dé biten ki two rèd pou yo. Aprésa, i di lèkontrè a sa Jéova té di é i di kè Jéova ka manti. Lè i fè sa, i sali non a Jéova. Sé konsa i vin « Dyab-la » (Jan 8:44). Yo ka sèvi èvè mo-lasa pou palé dè on moun ki ka manti asi on moun pou fè-y ditò. Lèwvwè Satan manti ba Èv, Èv kwè-y. Kifè, i dézobéyi Bondyé é i montré kè i pa té vé Jéova gouvèné-y (Jén. 3:1-6). Dépi sa, Satan ka kontinyé manti asi non a Bondyé pou fè-y ditò. É jòdila osi, i ka kontinyé manti pou fè Jéova pasé pou on mové moun. Lè on moun ka kouté sé manti-la Satan ka bay la, i pi fasil a ba Bondyé do. Men pou sèwvitè a Jéova, tout sé manti-la Satan ka bay la pou sali non a-y ki sen, sé pli gwo enjistis ki tini. Sé akòz dè sé manti-lasa si ni tousa soufrans é tousa méchansté adan mond-la.

Dézyèmman, Jéova byen désidé a fè non a-y vin sen kivédi i byen désidé a lavé non a-y pas yo sali-y èvè tousa yo di asi-y. I ké fè sa pou fè tout kréyasyon a-y dibyen. Sé on biten ki enpòwtan ba-y toubònman. Sé pousa, mi sa i di : « Asiré pa pétèt, an ké fè tout sé nasyon-la rèkonnèt kè non an mwen sé on non ki èstraòwdinè, sé on non ki sen » (Ézék. 36:23). É Jézi montré on mannyè ki klè pou ki biten fò sèwvitè a Jéova ki fidèl priyé an prèmyé lè i di konsa : « Fò non a-w vin sen » (Mat. 6:9). Adan Labib, yo ka montré jan sa enpòwtan kè nou ba non a Jéova glwa é yo ka fè sa a plizyè rèpriz. Mi déotwa vèwsé ki ka montré sa : « Ba non a Jéova glwa-la i mérité la » (1 Kron. 16:29 ; Sòm 96:8), « Chanté pou louwé non a Jéova ki plen glwa » (Sòm 66:2) é « An vé ba non a-w glwa pou touttan » (Sòm 86:12). On jou, pannan Gason a Jéova té adan Tanp-la, a Jérizalèm, i di Jéova konsa : « Papa, ba non a-w glwa », é toupannan Jéova té an syèl-la, i réponn-li : « An ba-y glwa é an ké wouba-y glwa ankò » (Jan 12:28) a.

Twazyèmman, pwojé a Jéova ké toujou ni on rapò èvè non a-y, kivédi èvè répitasyon a-y. Pran tan réfléchi asi sa : Lèwvwè Jézi ké fin gouvèné an bout a sé 1000 an-la, ké ni on dènyé  éprèv. Ka ki ké pasé apré ? Lè tout sé zanj-la é tout sé moun-la ki asi latè la ké sonjé non a Jéova, ka yo ké rèsanti ? A moman-lasa, ponmoun asi latè pé’é bizwen montré kè yo fidèl a san pou san. Yo ké pawfè é yo ké ja montré kè yo fidèl lèwvwè yo ka jwenn éprèv. Anplisdisa, Jéova ké ja ba-yo lavi étèwnèl pou rékonpansé-yo. A moman-lasa tout moun asi latè é an syèl-la ké sav kè Jéova sé méyè dirijan ki tini. Toutmoun ké soudé, ki an syèl-la, ki asi latè é yo ké aksèpté dominasyon a Jéova. Men lèwvwè sa ké fèt, ès pou sèwvitè a Bondyé, biten-la ki ké pi enpòwtan la sé ké non a Jéova toujou ?

Non a Jéova ké vin sen a san pou san. Pé’é ni pon tras a sé manti-la Satan té simé la ankò. Men tout sèwvitè a-y, ki séla ki ké viv an syèl-la, ki séla ki ké viv asi latè ké kontinyé ba non a-y onlo enpòwtans pas yo ké vwè sé biten èstraòwdinè la kè i ké kontinyé fè la. Imajiné sa tibwen : èvè onlo imilité, Jézi ké woumèt Pap’a-y Wayòm-la é Bondyé ké « vin tout biten ba toutmoun » (1 Kor. 15:28). Aprésa, toutmoun asi latè ké ni « libèté ki plen glwa a timoun a Bondyé » (Wom. 8:21). É a moman-lasa, Jéova ké réyalizé on pwojé kè i té ni dépi lontan-lontan : sanblé tout timoun a-y ki ka viv an syèl-la é tout timoun a-y ki ka viv asi latè pou yo fòwmé onsèl fanmi (Éféz. 1:10).

Lèwvwè tousa ké fèt, ka fanmi a Jéova ki asi latè é ki an syèl-la ké rèsanti ? Sèten yotout ké anvi louwé non a Jéova toubònman. Mi sa lèspri sen a Bondyé pousé David maké adan on sòm : « Fò-yo ba Jéova Dyé louwanj, […]. Fò-yo louwé non a-y ki plen glwa pou touttan » (Sòm 72:18, 19). Wi, nou ké ba Jéova louwanj pou touttan pas toujou ké ni on biten ki ké ban-nou anvi fè sa.

Non a Bondyé an nou, « Jéova », ka rèprézanté tousa i yé é tousa i ka fè. Lè nou ka sonjé non a-y, nou ka sonjé lanmou a-y (1 Jan 4:8). Nou ké toujou sonjé kè Jéova montré-nou kè i enmé-nou lèwvwè i kréyé-nou é lèwvwè i ban-nou ranson-la. É nou pé ké jen oubliyé kè jan-la Jéova ka gouvèné la jis é plen lanmou. Men nou ké kontinyé vwè jan Jéova enmé-nou é i pé’é jen arété montré-nou sa. Alò, sa ké ban-nou anvi vin pibon zanmi èvè Pap’an nou é louwé non a-y ki plen glwa pou touttan (Sòm 73:28).