AWTIK POU ÉTIDYÉ 36
Awmagédon : sé on bon nouvèl !
« É [yo] rasanblé sé wa-la [...] on koté yo ka kriyé [...] Awmagédon » (RÉV. 16:16).
KANTIK 150 Cherche Dieu pour être délivré
ON TI LIDÉ ASI SA NOU KAY VWÈ *
1-2. a) Poukwa sa Labib ka di anrapò èvè Awmagédon sé on bon nouvèl pou limanité ? b) Ki kèsyon nou ké vwè adan awtik-lasa ?
ONLO moun ka pansé kè « Awmagédon » sé ké on lagè èvè bonb atomik oben on gwo katastwòf natirèl ki ké détwi latè. Men a pa sa Labib ka di. Li, i ka di kè sé bon biten Awmagédon ké pòté (Rév. 1:3). Lagè a Awmagédon pé’é détwi limanité men sé sové i ké sové-y ! Kijansa ?
2 Labib ka di kè lagè a Awmagédon ké sové limanité pas i ké détwi gouvènman a lézòm. Lagè-lasa ké sové limanité osi pas i ké détwi moun-méchan men an menm balan-la i ké sové moun ki jis. Anplisdisa, i ké sové limanité pas i ké pwotéjé latè pou i pa détwi (Rév. 11:18). An-nou gadé 4 kèsyon ki ké édé-nou konprann sé pwen-lasa pibyen : Awmagédon, ka sa yé ? Ka i ké pasé avan i rivé ? Ka nou pé fè pou nou sové lè Awmagédon ké rivé ? Ka nou pé fè pou kontinyé rété fidèl menmsi i toupré rivé ?
AWMAGÉDON, KA SA YÉ ?
3. a) Ka « Awmagédon » vé di ? b) Lè nou ka gadé Révélasyon 16:14, 16, poukwa nou pé di kè Awmagédon a pa on koté men sé on senbòl ?
3 (Li Révélasyon 16:14, 16.) Nou ka touvé « Awmagédon » onsèl fwa adan lézékriti é mo-lasa ka vin dè on èksprésyon ébré ki vé di « Montangn a Mégido » (Rév. 16:16 ; nòt). Mégido, sé té on vil ki té an Izrayèl an tan lontan (Joz. 17:11). Men « Awmagédon » a pa non a on koté si latè. An réyalité, yo ka sèvi èvè èsprésyon-lasa pou palé dè on sitiyasyon ki ké fè « tout wa ki asi latè » rasanblé pou goumé èvè Jéova (Rév. 16:14). Men adan awtik-lasa, nou ka itilizé lèmo « Awmagédon » osi pou palé dè lagè-la ki ké rivé jis apré rasanblèman a sé wa-lasa. Awmagédon sé on senbòl, kijan nou fè sav sa ? Prèmyèwman, pa ni pon montangn non a-y sé Mégido. Dézyèmman, Mégido pa té ké asé gran pou pran « tout wa ki asi latè », lawmé a yo é tout machin yo ni pou fè lagè. Twazyèmman, kon nou ké vwè tibwen pi ba adan awtik-lasa, lagè a Awmagédon ké koumansé lè tout « wa » ki asi latè ké ataké pèp a Bondyé ; é sèwvitè a Bondyé ka rété tibwen toupatou si latè.
4. Poukwa lè Jéova ka palé dè dènyé gran lagè-la i ké fè la, i ka palé dè « Mégido » ?
4 Poukwa lè Jéova ka palé dè dènyé gran lagè-la i ké fè la, i ka palé dè « Mégido » ? An tan a Labib, ni onlo lagè ki fèt a Mégido é adan on fon ki té toupré, a Jézréèl. Défwa, Jéova limenm édé pèp a-y gangné konba lè yo té an lagè. Pa ègzanp, Bondyé édé on jij Izraélit non a-y sé té Barak pou i té gangné lawmé a sé Kananéyen-la kè Siséra té ka dirijé. É sa fèt owa « dlo a Mégido ». Barak é Débora (on madanm ki té pwofèt a Bondyé), di Jéova mèsi pas i fè on mirak pou fè-yo gangné. Yo chanté : « Toupannan yo té an syèl-la sé zétwal-la té ka goumé [...] èvè Siséra. Rivyè a Kichòn chayé sé lènmi-la » (Jij 5:19-21).
5. Ni on gran diférans ant lagè a Awmagédon é sila Barak fè la. Poukwa nou pé di sa ?
5 Barak é Débora fin chanté a yo èvè sé mo-lasa : « O Jéova, fò tout lènmi a-w disparèt. Men fò moun ki enmé-w vin kon solèy ka kléré lè i ka lévé » (Jij 5:31). Menmjan-la, pannan lagè a Awmagédon, Bondyé ké détwi lènmi a-y men i ké sové séla ki enmé-y la. Men ni on gran gran diférans ant sé dé lagè-lasa. Pannan lagè a Awmagédon, pèp a Bondyé pé ké goumé. Yo pé’é menm ni zàm. ‘Fòs a yo, sé ké dè rété kalm é dè montré yo ni konfyans’ an Jéova é an lawmé a-y ki an syèl-la (Iz. 30:15 ; Rév. 19:11-15).
6. Pannan Awmagédon, ka Bondyé pé itilizé pou fin bat èvè lènmi a-y ?
6 Ka Bondyé ké fè pou fin bat èvè lènmi a-y pannan Awmagédon ? I pé itilizé plizyè biten diféran pou fè sa. Pa ègzanp i pé sèvi èvè tranmanntè, lagrèl é èvè zéklè (Jòb 38:22, 23 ; Ézék. 38:19-22). I pé fè lènmi a-y touné yonn kont lòt osi (2 Kron. 20:17, 22, 23). Anplisdisa, i pé itilizé zanj a-y pou tchouyé sé méchan-la (Iz. 37:36). Kèlkèswa sa Bondyé ké itilizé, antoutjan i ké gangné. Tout lènmi a-y ké détwi. Men i ké sové tout sé moun-la ki jis-la (Pwov. 3:25, 26).
KA KI KÉ PASÉ AVAN AWMAGÉDON RIVÉ ?
7-8. a) Dapré sa 1 Tésalonisyen 5:1-6 ka di, sé chèf politik la ké di on biten nou pa abityé tann. Ki biten ésa ? b) Poukwa sé ké on manti, é poukwa i ké danjéré ?
7 Nou ké tann on anons anrapò èvè « Lapé é lasékirité ! » avan « jou a Jéova » rivé (li 1 Tésalonisyen 5:1-6). Adan 1 Tésalonisyen 5:2, « jou a Jéova » ka korèsponn èvè « gwo tribilasyon-la » (Rév. 7:14). Kijan nou ké sav kè tribilasyon-lasa kay koumansé ? Labib ka di-nou kè yo ké anonsé on mésaj nou pa abityé tann menm. Sé ké on sign ki ké montré kè gwo tribilasyon-la kay koumansé.
8 Yo ké fè anons-lasa : « Lapé é lasékirité ! » Poukwa sé chèf politik la ké anonsé sa ? Èskè sé chèf a sé rèlijyon-la ké adan sa osi ? Nou pa sav ègzaktèman. Men sa nou sèten, sé kè anons-lasa sé ké on manti é sé démon ki ké dèyè do a sa. Men manti-lasa ké vréman danjéré, pas i ké fè onlo moun santi-yo ansékirité alòskè pi gwo tribilasyon limanité po’o
jen vwè ké ka vin. « Yo ké détwi onsèl kou lamenmla, menmjan doulè ka vin asi on madanm ansent lè i kay akouché ». É sèwvitè fidèl a Bondyé, kijan yo ké réyaji ? Konm yo pa konnèt ègzaktèman kitan gwo tribilasyon-la ké koumansé, pétèt sa ké siwprann-yo lè sa ké fèt, men yo ké paré pou sa.9. Lè Bondyé ké détwi mond a Satan, kijan sa ké déwoulé ?
9 Jéova pé’é détwi tout mond a Satan onsèl kou kon an tan a Noé. Adan on prèmyé tan, i ké détwi on pawti a mond a Satan é apré i ké détwi lòt pawti-la. I ké koumansé pa détwi Gran-Babilòn-la ki ka rèprézanté tout sé fo rèlijyon-la. É apré, i ké détwi rèstan a mond a Satan : sistèm politik la, sé lawmé-la é sistèm a lajan la. An-nou vwè plis détay asi sé 2 évènman enpòwtan lasa.
10. Dapré sa ki maké adan Révélasyon 17:1, 6, é 18:24, poukwa Bondyé ké détwi Gran-Babilòn-la ?
10 « Jijman a gran pwòstitiyé-la » (li Révélasyon 17:1, 6 ; 18:24). A pa ti sali Gran-Babilòn-la ja sali répitasyon a Bondyé ! I ja manti tèlman si Bondyé ! Lè i alyansé-y èvè sé dirijan politik la sé konsi i vann kò a-y ba yo. I fè moun ki ka soutyenn-li vwè mizè é i pran lajan a yo. I ja tchouyé tèlman moun ! Jou sèwvitè a Bondyé pasé adan sa (Rév. 19:2). Kijan Jéova ké détwi Gran-Babilòn-la ?
11. Ka « bèt sovaj ki wouj » la ka rèprézanté é kijan Bondyé ké sèvi èvè-y pou détwi Gran-Babilòn-la ?
11 Jéova ké sèvi èvè « dis kòn » a « on bèt sovaj ki wouj » pou détwi « gran pwòstitiyé-la ». Bèt sovaj lasa ka rèprézanté Òwganizasyon a Lénasyonzini. Dis kòn-la ka rèprézanté sé gouvènman-la ki ka soutyenn òwganizasyon-lasa. Lè moman-la Bondyé chwazi la ké rivé, sé gouvènman-lasa é Lénasyonzini ké ataké Babilòn. « Yo ké mété-y anchèpi é yo ké lésé-y toutouni », yo ké pran tout richès a-y é yo ké fè toutmoun vwè méchansté Rév. 17:3, 16). Tèlman Babilòn ké détwi vit, sé ké konsi sa fèt adan « onsèl jouné ». Men touséla ki té ka soutyenn-li la ké rété èstèbèkwè, siwtou kè ni lontan i ka akwè-y é kè i ka di : « An ka menné antankè rèn, an pa vèv, é an pé’é jen andèy » (Rév. 18:7, 8).
i ni an kò a-y (12. Ka Jéova pé ké lésé sé nasyon-la fè, é poukwa ?
12 Bondyé pé’é pèwmèt sé nasyon-la détwi pèp a-y. Yo fyèw dè pòté non a-y é lè Bondyé ka ba-yo lòd dè sòti dè Gran-Babilòn-la yo ka obéyi (Akt 15:16, 17 ; Rév. 18:4). Anplisdisa, yo ka travay rèd pou édé dòt moun sòti adan-y osi. Donk sèwvitè a Jéova pé ké « sibi pinisyon a-y èvè-y ». Men fò fwa a yo rété fò pou andiré sa ki ka vin dèyè.
Kèlkèswa la yo yé asi latè, sèwvitè a Bondyé ké ni konfyans adan-y lè Gòg ké ataké-yo * (gadé paragraf 13 la).
13. a) Ka ki Gòg ? b) Dapré sa ki maké adan Ézékyèl 38:2, 8 é 9, a ki moman sé nasyon-la ké rivé on koté senbolik non a-y sé « Awmagédon » ?
13 Atak a Gòg (li Ézékyèl 38:2, 8, 9). Lè Bondyé ké détwi tout sé fo rèlijyon-la, onsèl rèlijyon ké rété asi latè. Sé konsi pèp a Bondyé sé ké sèl pyébwa ki rété doubout apré on gwo siklòn pasé. Nou ka tou konprann jan Satan ké anrajé. Pou i pasé raj a-y, i ké sèvi èvè sé démon-la pou simé « dé pawòl enspiré ki pa pwòp ». É sé pawòl-lasa ké pousé enpé nasyon alyansé-yo pou ataké sèwvitè a Bondyé (Rév. 16:13, 14). Yo ka kriyé gwoup nasyon-lasa « Gòg ki sòti an péyi a Magòg ». Lè sé nasyon-lasa ké ataké pèp a Bondyé, yo ké rivé on koté senbolik yo ka kriyé « Awmagédon » (Rév. 16:16).
14. Dè ki biten Gòg ké rann-li kont ?
14 Gòg ké konté si « on bra ki an chè » kivédi asi moun ki an lawmé a-y (2 Kron. 32:8). Nou, nou ké konté si Jéova, Bondyé an nou. Kifè, sé nasyon-la ké pran-nou pou dé moun ki fou. Poukwa ? Pas Gran-Babilòn-la té fò, men pon dyé a-y pa anpéché « bèt sovaj la » é sé « dis kòn-la » détwi-y (Rév. 17:16). Donk pou Gòg, i ké pé détwi-nou fasilman. « Kon niyaj ki ka kouvè péyi-la », i ké vin pou ataké pèp a Jéova (Ézék. 38:16). Men apré, i ké rann-li kont kè i pé’é pé chapé. Menmjan ki Faraon lè i té adan lanmè wouj la, Gòg ké rann-li kont kè sé èvè Jéova i ka goumé (Ègz. 14:1-4 ; Ézék. 38:3, 4, 18, 21-23).
15. Ka Jézi ké fè pannan lagè a Awmagédon ?
15 Jézikri é tout lawmé a-y ki an syèl-la ké défann pèp a Bondyé é yo ké détwi sé nasyon-la é lawmé a yo (Rév. 19:11, 14, 15). Men ka ki ké rivé pi gran lènmi a Bondyé, Satan, li ki manti ba sé nasyon-la é ki pousé-yo ataké pèp a Bondyé pannan Awmagédon ? Jézi ké jété ki li ki démon a-y adan on tou san fon, é yo ké rété fèmé la pannan 1 000 an (Rév. 20:1-3).
KA OU PÉ FÈ POU-W PÉ SA SOVÉ PANNAN AWMAGÉDON ?
16. a) Kijan nou pé montré kè nou « konnèt Bondyé » ? b) Ka ki ké rivé moun ki konnèt Bondyé pannan lagè a Awmagédon ?
16 Ki ou toufré adan lavérité ki ou la dépi lontan, fò ou montré kè ou « konnèt Bondyé » pou-w pé sa sové lè Awmagédon ké rivé. Fò ou montré osi kè ou ka « kouté bon nouvèl-la ki anrapò èvè Sényè an nou Jézi » (2 Tés. 1:7-9). Nou « konnèt Bondyé » lè nou konnèt sa i enmé, sa i pa enmé é lè nou konnèt komandman a-y. Nou ka montré osi kè nou konnèt-li lè nou enmé-y, lè nou ka kouté-y é lè sé yenki li nou ka adoré (1 Jan 2:3-5 ; 5:3). Lè nou ka montré kè nou konnèt Bondyé, nou ni on gran privilèj pas li osi i « konnèt-nou », é sé sa ki ké pèwmèt-nou sové lè Awmagédon ké rivé ! (1 Kor. 8:3). Kijansa ? Pas lè « Bondyé konnèt-nou » sa vé di kè nou ka fè-y plézi.
17. Ka sa vé di ‘kouté bon nouvèl-la ki anrapò èvè Ségnè an nou Jézi’ ?
17 Adan « bon nouvèl-la ki anrapò èvè Jézi », nou ka touvé sé vérité-la Jézi té ka anségné la é ki adan Pawòl a Bondyé. Nou ka kouté bon nouvèl-lasa lè nou ka mété-y an pratik adan vi an nou. Kivédi, Mat. 6:33 ; 24:14). Anplisdisa, fò-nou soutyenn frè a Kris ki wen é ki ni onlo rèsponsabilité (Mat. 25:31-40).
nou ka mèt entéré a Wayòm-la an prèmyé adan vi an nou, nou ka tchenn kont dè lwa a Jéova adan tousa nou ka fè, é nou ka fè moun konnèt wayòm a Bondyé (18. Talè, sé wen-la ké ni lokazyon rékonpansé ‘sélézòt mouton-la’ pou bonté a yo. Kijan ?
18 Talè, sèwvitè a Bondyé ki wen ké rékonpansé ‘sélézòt mouton-la’ pas yo édé-yo onlo (Jan 10:16). Poukwa nou ka di sa ? Avan lagè a Awmagédon koumansé, tout sé 144 000 la ké an syèl-la é sé ké dé kréyati èspirityèl ki pé pa mò ankò. Aprésa, yo ké an syèl-la adan lawmé a Bondyé é yo ké détwi Gòg. É yo ké pwotéjé « gran-foulmoun-la » ki sé pèp a Bondyé (Rév. 2:26, 27 ; 7:9, 10). A pa ti kontan gran-foulmoun-la ké kontan yo soutyenn sé wen-la pannan yo té si latè !
KA NOU PÉ FÈ POU NOU KONTINYÉ RÉTÉ FIDÈL MENMSI AWMAGÉDON TOUPRÉ RIVÉ ?
19-20. Magré éprèv nou ka jwenn, ka nou pé fè pou nou kontinyé rété fidèl menmsi Awmagédon toupré rivé ?
19 Pannan dènyé jou a sistèm-lasa, onlo sèwvitè a Jéova ka jwenn bon éprèv. Men magrésa, ni mwayen nou sipòté èvè tchè-kontan (Jak 1:2-4). Pou rivé fè sa, fò-nou kontinyé priyé èvè tout tchè an nou (Lik 21:36). Anplis, fò-nou étidyé pawòl a Bondyé chak jou é médité anlè-y. Fò-nou médité osi asi sé bèl pwofési-la ki ka palé dè biten ki ké fèt talè (Sòm 77:12). Si nou ka fè sé biten-lasa é si nou ka fè tousa nou pé an prédikasyon, fwa an nou é èspérans an nou ké rété fò.
20 Sèten ou ké kontan lè Gran-Babilòn-la ké détwi é lè Awmagédon ké fin ! É ou ké pi kontan ankò lè toutmoun ké rèspèkté non a Bondyé é lè yo ké rèkonnèt kè sé li ki andwa gouvèné (Ézék. 38:23). Wi, Awmagédon sé on bon nouvèl pou moun ki konnèt Bondyé, ki ka kouté Gason a-y é ki byen désidé a andiré jistan lafen rivé ! (Mat. 24:13).
KANTIK 143 Continuons de veiller, de servir et d’attendre
^ par. 5 Lontan pèp a Jéova ka atann Awmagédon. Adan awtik-lasa, nou ké vwè ka ki Awmagédon, ka ki ké pasé jis avan Awmagédon rivé é ka nou pé fè pou nou rété fidèl menmsi lafen ka vin.
^ par. 71 SA NOU KA VWÈ ASI SÉ IMAJ-LA : Ni dé biten nou po’o jen vwè ki ké fèt talè, men 1) nou ké préché toutotan nou ké pé, 2) nou ké kontinyé ni on pwogram pou étidyé, é 3) nou ké kontinyé ni konfyans adan pwotèksyon a Bondyé.
^ par. 85 SA NOU KA VWÈ ASI SÉ IMAJ-LA : Lapolis paré a pété pòt pou rantré aka on fanmi ki krétyen. Men fanmi-la sèten kè Jézi é zanj a-y ka vwè sa ki ka pasé.