1. Poukwa fò-nou lésé Jéova komandé-nou ?

FÒ-NOU lésé Jéova komandé *-nou pas sé Kréyatè an nou. É sé pou rézon-lasa osi i andwa di-nou kijan pou nou aji (Rév. 4:11). Men nou dwètèt fè sa Jéova ka mandé pou ondòt rézon enpòwtan ankò. Nou ka lésé-y komandé-nou pas méyè dirijan ki tini, sé-y. Toutolon a listwa, ni onlo dirijan ki té ni on sèwten otorité asi lézòt. Men lè nou ka konparé-yo èvè Jéova, nou ka konstaté kè Jéova lontan pli saj ki yo, i ni lontan plis lanmou, lontan plis mizérikòd é lontan plis konpasyon ki yo (Ègz. 34:6 ; Wom. 16:27 ; 1 Jan 4:8).

2. Dapré Ébré 12:9-11, pou ki rézon fò-nou fè sa Jéova ka mandé ?

² Jéova vé pa nou obéyi-y yenki pas nou pè fè on biten ki pa’a fè-y plézi. Men i vlé nou obéyi-y pas nou enmé-y é pas nou ka rèkonnèt kè i sé Pap’an nou, on Papa ki enmé-nou onlo. Adan lèt-la Pòl voyé ba sé Ébré la, i ka èspliké kè nou dwètèt ‘fè sa Papa-la ka mandé volontyé’ pas i ka fòwmé-nou pou « byen an nou » (li Ébré 12:9-11).

3. a) Kijan nou ka montré kè nou ka lésé Jéova komandé-nou ? b) A ki kèsyon nou kay réponn ?

³ Nou ka lésé Jéova komandé-nou lè nou ka fè tout posib an nou pou fè sa i ka mandé-nou adan tout domenn ki tini. Nou ka fè sa osi lè nou ka fè éfò pou nou pa apiyé-nou asi pwòp entélijans an nou pou désidé kè tèl biten byen ou mal (Pwov. 3:5). Nou ka touvé sa pli fasil dè lésé Jéova komandé-nou lè nou ka vin konnèt bèl kalité a-y. Poukwa ? Paskè nou ka vwè kalité a Jéova adan tousa i fè (Sòm  145:9). Pi nou ka aprann konnèt Jéova, pi nou ka vin enmé-y. É lè nou enmé Jéova, nou pa bizwen ni on lis a règ ki ka di-nou ka pou nou fè é ka pou nou pa fè. Nou ka fè éfò pou rèfizé fè sa ki mal, é pou mété sa nou ka pansé é sa nou ka rèsanti annakò èvè volonté a Jéova (Sòm 97:10). Men délè, sa pa fasil dè fè sa Jéova ka mandé. Poukwa sa ? É ka ègzanp a Néémi, ki té gouvènè, ka aprann sé ansyen-la, sé papa-la é sé manman-la ? Ka ègzanp a Wa David é ta Mari, manman Jézi ka aprann-yo osi ? Awtik-lasa ké réponn a sé kèsyon-lasa.

4-5. Sèlon sa ki maké an Women 7:21-23, poukwa sa pé vréman rèd dè fè sa Jéova ka mandé ?

⁴ Poukwa sa pé rèd dè lésé Jéova komandé-nou ? Prèmyé rézon-la sé kè nou érité dè péché-la é nou enpawfè. Kifè, nou pa toujou anvi fè sa Jéova ka mandé. Apré Adan é Èv ba Jéova do é manjé fwi-la i té défann-yo manjé la, sé yomenm ki té ka désidé ka ki byen é ka ki mal (Jén. 3:22). Jòdijou, onlo moun ka fè kon Adan é Èv. Yo pa mélé èvè Jéova. Sé yo ki ka désidé si tèl biten byen ou mal.

⁵ A pa paskè nou enmé Jéova é nou konnèt-li kè sa toujou fasil dè fè sa i ka mandé-nou. Lapòt Pòl pé palé dè sa pas i pasé pa la (li Women 7:21-23). Kon Pòl, nou vé fè sa ki ka fè Jéova plézi. Men toutlè, fò-nou menné on konba piskè nou toujou anvi fè sa ki pa bon.

6-7. Pou ki dòt rézon ankò sa pé rèd pou nou dè lésé Jéova komandé-nou ? Bay on ègzanp.

⁶ Sa pé rèd pou nou dè fè sa Jéova ka mandé pou on dòt rézon ankò. Pétèt kè la nou lévé la, mantalité a sé moun-la é koutim a yo ka détenn asi nou. Onlo moun ka di-nou dé biten ki pa annakò èvè sa Jéova ka mandé. Pétèt fò-nou lité akontinyé pou nou pa adòpté mantalité a yo. An-nou pran on ègzanp.

⁷ Adan sèwten péyi, yo ka fè présyon asi sé jenn-la pou fè-yo kouri dèyè lajan. On sè non a-y sé Mari * jwenn difikilté-lasa. Avan i té aprann konnèt Jéova, i fè étid a-y adan on gran jan dè lékòl ki ni an péyi a-y. Fanmi a Mari té vlé fòsé-y chèché on travay ki té’é fè-y gangné onpakèt lajan é ki té’é fè moun rèspèkté-y. Li osi, sé sa i té vlé. Men konm apré, i vin konnèt Jéova é i vin enmé-y, òbjèktif a-y chanjé. Magrésa, sa té rèd pou-y toujou. Mi sa i ka di : « Pawfwa, an ka santi an té’é aksèpté sèwten travay ki vréman entérésan pas yo té’é pé pèwmèt-mwen gangné onlo lajan. Men an sav kè sa ké anpéché-mwen sèvi Jéova kon an ka fè-y konnyéla la. Akòz dè jan-la an lévé la, jousalè, sa rèd pou mwen dè di non. Fò an sipliyé Jéova pou mandé-y édé-mwen rèfizé on travay ki té’é pé anpéché-mwen sèvi-y afon » (Mat. 6:24).

8. Ka nou kay vwè konnyéla ?

⁸ Kon nou sòti vwè, nou ka pwokiré-nou onlo bénédisyon lè nou ka lésé Jéova komandé-nou. Men ni ondòt rézon ankò ki fè si nou ka aji konsa. Si nou ni on sèwten otorité pas nou sé on ansyen, on manman oben on papa é nou ka suiv dirèksyon a Jéova, ou pé fè lézòt dibyen. Dayè, nou kay vwè déotwa ègzanp ki an Bib-la é ki ka montré-nou kijan pou nou sèvi èvè otorité-la Jéova ban-nou la on mannyè ki ka fè-y plézi.

9. Ki difikilté Néémi jwenn ?

⁹ Jéova ba sé ansyen-la on gwo rèsponsabilité. I di-yo pran swen a sèwvitè a-y  (1 Pyè 5:2). Si yo ka pran tan ègzaminé jan Néémi té ka aji èvè pèp a Bondyé, sé ansyen-la ké aprann onlo biten. Antankè gouvènè a Jida, Néémi té ni on gwo otorité toubònman (Néém. 1:11 ; 2:7, 8 ; 5:14). Éséyé imajiné kantité difikilté i jwenn. I aprann kè sé Juif-la té ka sèvi èvè Tanp-la pou fè biten kè Bondyé pa té enmé. Anplisdisa, yo pa té ka ba sé Lévit-la pon lajan alòskè sé sa Lwa-la té ka di-yo fè. Lwa-la té ka di sé Juif-la fò yo té fè lèsaba men yo pa té ka rèspèkté sa é ni déotwa adan yo ki mayé èvè madanm ki pa té Juif é ki pa té ka adoré Jéova. É Néémi té ni a jéré sé sitiyasyon difisil lasa (Néém. 13:4-30).

10. Néémi jwenn onlo sitiyasyon difisil. Kijan i jéré-yo ?

¹⁰ Néémi pa sèvi èvè otorité a-y pou oblijé pèp-la suiv règ kè limenm té mèt an plas. Okontrè, i priyé Jéova èvè tout tchè a-y pou mandé-y èd a-y é i anségné pèp-la Lwa a Jéova (Néém. 1:4-10 ; 13:1-3). Anplis, Néémi montré-y toupiti piskè i jou travay ansanm èvè pèp-la pou té rèkonstwi miray a Jérizalèm (Néém. 4:15).

11. Sèlon 1 Tésalonisyen 2:7, 8, kijan pou sé ansyen-la aji èvè frè é sè ki an lasanblé-la ?

¹¹ Sé ansyen-la pa oblijé ka jwenn menm pwoblèm ki Néémi, men yo pé imité-y an diféran fason. Pa ègzanp, yo ka travay rèd pou byen a frè é sè a yo. Men a pa pas yo ni on otorité, yo ka santi-yo méyè ki lézòt. Olyé dè sa, yo ka aji èvè frè é sè a lasanblé-la épi onlo tandrès (li 1 Tésalonisyen 2:7, 8). Konm yo plen lanmou é yo plen imilité, ou ka vwè sa asi jan yo ka palé. Mi sa Andrew, on ansyen ki ni onlo èkspéryans ka di : « An konstaté kè lè on ansyen janti é i sé moun a toutmoun, sa ka touché tchè a sé frè é sè la é sa ka pousé-yo kolaboré èvè sé ansyen-la ». Tony, ondòt frè ki ansyen dépi plizyè lanné ka di : « An ka fè éfò pou apliké konsèy-la ki an Filipyen 2:3 la é an toujou ka fè tousa an pé pou ba lézòt plis valè ki mwen. Sa ka édé-mwen pa aji kon diktatè ».

12. Fò sé ansyen la ni imilité. Poukwa sa enpòwtan ?

 ¹² Fò sé ansyen-la ni imilité, menmjan Jéova ni imilité. Magré Jéova sé Pli gran Dirijan ki ni adan linivè, « i ka bésé-y » pou woté « toupiti-la an pousyè-la » (Sòm 18:35 ; 113:6, 7). An réyalité, Jéova hay moun latè pa’a pòté-yo é moun ki ni òwgèy (Pwov. 16:5).

13. Poukwa fò on ansyen fè atansyon a jan i ka palé é a sa i ka di » ?

¹³ On ansyen ki ka lésé Jéova komandé-y ka fè atansyon a jan i ka palé é a sa i ka di. Si i pa’a fè sa, lè jou on moun ké dérèspèkté-y i pé rivé a palé rèd ba-y (Jak 1:26 ; Gal. 5:14, 15). Nou palé dè Andrew talè-la. Mi sa i ka di : « Délè, lè an té ni lenprésyon kè on frè oben on sè pa’a rèspèkté-mwen, an té ka santi an té’é tonbé an zo a-y. Men an pran tan réfléchi asi ègzanp a sèwten moun fidèl ki an Bib-la, é sa édé-mwen konprann kè fò an aji èvè imilité é èvè dousè. An konprann kè sé on biten ki enpòwtan toubònman ». On ansyen ka montré i ka lésé Jéova komandé-y lè i ka palé ba frè é sè a-y é ba sélézòt ansyen-la ki an lasanblé-la jantiman é èvè lanmou (Kol. 4:6).

14. Ki wòl Jéova ba sé papa-la, é ka i ka atann dè yo ?

¹⁴ Adan on fanmi, sé papa-la ki chèf. Sé Jéova ki ba-y rèsponsabilité-lasa. É i vlé kè papa-la fòwmé sé timoun-la, kè i anségné-yo, kè i gidé-yo é kè i korijé-yo (1 Kor. 11:3 ; Éféz. 6:4). Men sa pa vlé di kè on papa ni dwa sèvi èvè otorité a-y nenpòt ki jan. Sé grasa Jéova si ni fanmi asi latè, donk sé papa-la ni kont a rann-li (Éféz. 3:14, 15). Sé papa-la ka montré kè yo ka lésé Jéova komandé-yo lè yo ka sèvi èvè otorité a yo on mannyè ki ka fè-y plézi. É si yo ka pran tan étidyé vi a Wa David, sa ké itil pou yo toubònman.

15. Poukwa Wa David sé on bèl ègzanp pou sé papa-la ?

¹⁵ Jéova pa ba David rèsponsabilité a fanmi a-y tousèl, men i té mété-y chèf a tout nasyon a Izrayèl osi. Antankè Wa, David té ni onlo pouvwa. Malérèzman sa rivé-y dè mal sèvi èvè otorité-lasa é i fè gwo érè (2 Sam. 11:14, 15). Men i montré osi kè i té ka lésé Jéova komandé-y paskè i aksèpté disiplin-la Jéova ba-y la. I wouvè tchè a-y ba Jéova. É i fè tousa i té pé pou suiv sé konsèy-la Jéova ba-y la (Sòm 51:1-4). Anplisdisa, sé on boug ki té ni onlo imilité piskè a pa yenki konsèy a nonm i té ka suiv men i té ka kouté ta madanm osi (1 Sam. 19:11, 12 ; 25:32, 33).  Sé érè-la David fè la aprann-li onlo biten é sa ki té pi enpòwtan adan vi a-y sé té sèvi Jéova.

16. Ka ègzanp a David pé aprann sé papa-la ?

¹⁶ Ka ègzanp a Wa David pé aprann sé papa-la ? I ka aprann-yo kè fo pa yo fè nenpòt ki biten èvè otorité-la Jéova ba-yo la. Sé papa-la, lè zò fè on érè, admèt-sa, é aksèpté sé konsèy biblik la yo ka ba-zòt la. Si zò ka fè sa, fanmi a zòt ké konstaté kè zò ni imilité é sa ké fè-yo rèspèkté-zòt plis ankò. Lè zò ka priyé èvè fanmi a zòt, di Jéova sa ki ni an fon a tchè a zòt, konsa fanmi a zòt ké pé tann kè zò vréman vlé bénéfisyé dè èd a Jéova é dè dirèksyon a-y. É sa pou zò mèt prèmyé douvan adan vi a zòt, sé Jéova é tousa zò ka fè pou-y (Dét. 6:6-9). Si zò ka ba fanmi a zòt on bèl ègzanp, sé yonn dé pli bèl kado zò pé fè-yo.

17. Ki wòl Jéova ba sé manman-la ?

¹⁷ Jéova ba chak manman on bèl wòl a jouwé an fanmi-la é i ba-yo on sèwten otorité asi sé timoun-la (Pwov. 6:20). An réyalité, sa on manman ka di é sa i ka fè pé aji si timoun a-y pannan tout rèstan a vi a-y (Pwov. 22:6). An-nou vwè ka ègzanp a Mari, manman Jézi, pé aprann sé manman-la.

18-19. Ka ègzanp a Mari ka montré sé manman-la ?

¹⁸ Mari té konnèt Lézékriti byen menm. I té ka rèspèkté Jéova onlo é yo té bon zanmi toubònman. I té paré a fè tousa Jéova té ka mandé-y, menmsi pou sa fò i té chanjé vi a-y bout pou bout (Lik 1:35-38, 46-55).

¹⁹ Sé manman-la, zò pé imité Mari plizyè fason diféran. Kijan ? Prèmyèwman, fò-zòt fè sa ki fo pou rété bon zanmi èvè Jéova kivédi fò-zòt étidyé Labib é fò-zòt priyé Jéova souvan. Dézyèmman, fò-zòt paré a fè chanjman an vi a zòt pou fè Jéova plézi. Pa ègzanp, pétèt zò grandi èvè on papa é on manman ki té ka fè kòlè pou mwenn tibiten é ki té ka palé rèd pou timoun a yo. Kifè, pou zòt, sa toutafè nòwmal dè lévé on timoun konsa. É menmsi konnyéla zò konnèt kijan Jéova vlé-zòt aji èvè sé timoun-la, pétèt kè magrésa zò ni dimal a aji kalmèman é a pran pasyans èvè yo, siwtou lè yo pa ka obéyi é kè zò ja byen las ! (Éféz. 4:31). Adan dé moman konsa, sa vréman enpòwtan kè zòt priyé Jéova pou mandé-y édé-zòt. Mi sa on manman non a-y sé Lydia ka di : « Défwa, an té oblijé priyé Jéova fò menm pou an pa té hélé anlè tigason an mwen lè i pa té ka kouté-mwen. Délè, an té ka arété palé anmitan on fraz é an té ka priyé Jéova  an silans pou mandé-y èd a-y. Lapriyè ka édé-mwen rété kalm » (Sòm 37:5).

20. Ki difikilté sèwten manman ka rankontré, é ka yo pé fè pou rivé about a-y ?

²⁰ Ni dé manman ki ka rankontré ondòt jan dè pwoblèm : yo ni dimal a montré timoun a yo kè yo enmé-yo (Tit 2:3, 4). Ni dé madanm ki grandi adan on fanmi ki pa té ni granzafè a lanmou. Papa-la é manman-la pa té ni pon tandrès pou sé timoun-la. Si sé konsa ou lévé, pa konpranndèdi kè ou kondanné a fè menm érè ki fanmi a-w. Alò pétèt kè on manman ki vlé lésé Jéova komandé-y ké oblijé aprann kijan pou i montré tout timoun a-y kè i enmé-yo. Pétèt kè sa ké rèd pou-y dè chanjé jan i ka pansé, sa i ka rèsanti é fason i ka aji. Men sé dé biten ki posib ! É sé chanjman-lasa ké mété plis jwa an tchè a-y é an tchè a fanmi a-y.

21-22. Sèlon sa ki maké an Izayi 65:13, 14, ki byenfé sa ka pwokiré-w lè ou ka lésé Jéova komandé-w ?

²¹ Wa David té sav ki bénédisyon sa ka pwokiré-w lè ou ka lésé Jéova komandé-w. Mi sa i maké : « Lòd a Jéova jis é yo ka mété onlo jwa an tchè-a moun ; komandman a Jéova bon é yo ka fè zyé a moun kléré. Yo avèti sèwvitè a-w. Moun ki ka rèspèkté-yo ka jwenn on gwo rékonpans » (Sòm 19:8, 11). Jòdijou, nou pé vwè on mannyè ki klè, ki diférans ki ni ant on moun ki ka lésé Jéova komandé-y é on moun ki pa’a tchenn kont dè konsèy a-y ki plen lanmou. Moun ki ka lésé Jéova komandé-yo ka ‘soté anlè tèlman tchè a yo kontan’ (li Izayi 65:13, 14).

²² Lè sé ansyen-la, sé papa-la é sé manman-la ka lésé Jéova komandé-yo, vi a yo é ta fanmi a yo ka vin pi bèl é tout lasanblé lokal la ka vin pli soudé. Men plis ankò, sa ka mèt onlo jwa an tchè a Jéova (Pwov. 27:11). Pa ni pli bèl biten ki sa !