1. Ka Jéova ka pansé dè moun ki ni imilité ? Bay on èsplikasyon.

JÉOVA enmé moun ki ni imilité. Sé yenki moun ki vréman ni imilité ki pé vin bon zanmi èvè Jéova. Pawkont, « moun ki ni òwgèy, i ka rété lwen dè yo » (Sòm 138:6). Noutout vlé fè Jéova plézi, é noutout vlé vin bon zanmi èvè-y. Sé poukwa fò-nou chèché a ni imilité.

2. Ka nou ké vwè adan awtik-lasa ?

² Adan awtik-lasa, nou ké réponn a twa kèsyon : 1) Imilité, ka sa yé ? 2) Poukwa fò-nou chèché a ni imilité ? 3) A ki moman sa pli rèd dè aji èvè imilité ? Kon nou ké vwè, lè nou ni imilité, nou ka rann Jéova kontan, é nou ka rèsèvwa bénédisyon osi (Pwov. 27:11 ; Iz. 48:17).

3. Imilité, ka sa yé ?

³ On moun ki ni imilité pa ka santi-y pli enpòwtan ki lézòt, kivédi, i pa kon on moun latè pa’a pòté-y. Labib ka montré kè lè on moun ni imilité, i ka ba Jéova lontan plis enpòwtans ki-y é i ka ba lézòt enpòwtans a yo osi. On moun konsa ka rèkonnèt kè adan on sans, lézòt ni plis valè ki-y (Filip. 2:3, 4).

4-5. Ni dé moun ki pé ka sanmsa yo ni imilité, men an réyalité yo pa konsa ditou. Poukwa nou pé di sa ?

⁴ Ni désèwten moun ki pé ka sanmsa yo ni imilité, alòskè an réyalité yo pa ni kalité-lasa. Pétèt, kè yo timid natirèlman. Pétèt kè yo ni bèl mannyè é kè yo ka rèspèkté lézòt paskè sé sa fanmi a yo montré-yo. Men lè ou byen  gadé, yo ka santi-yo sipéryè, é on jou, ki yo vlé ki yo vlé pa, yo ké montré kimoun yo yé vréman (Lik 6:45).

⁵ Anmenmditan, ni dé moun ki sèten dè yo é ki dirèk adan pawòl a yo, men a pa pousa yo ka akwè-yo (Jan 1:46, 47). Pawkont, lè on moun sé moun a tout moun é i ni konfyans adan-y, fò i fè atansyon pou i pa konté asi pwòp kapasité a-y. Ki nou timid ki nou pa timid, fò-noutout travay rèd pou nou ni imilité an tchè an nou.

6. Dapré sa 1 Korentyen 15:10 ka di, ka ègzanp a Pòl pé aprann-nou ?

⁶ An-nou pran ègzanp a lapòt Pòl. Jéova sèvi èvè-y onlo pou mèt dé nouvo lasanblé anplas adan diféran vil, yonn apré lòt. Pawmi apòt a Jézikri, sé pétèt li ki fè plis biten adan travay a prédikasyon-la. Sèlman, Pòl pa jen santi-y pli enpòwtan ki frè é sè a-y. Èvè imilité, mi sa i jou admèt : « Pawmi sé apòt la, sé mwen ki pli piti, é an pa menm mérité kè yo kriyé-mwen apòt, paskè an pèwsékité lasanblé a Bondyé » (1 Kor. 15:9). Aprésa, Pòl di kè si i ni on bèl lanmityé èvè Jéova a pa paskè i té tèlman èspésyal konsa oben paskè i akonpli onpakèt biten. Men sé paskè Jéova ba-y on favè kè i pa té mérité (li 1 Korentyen 15:10). Sé on bèl lèson a imilité Pòl ba sé krétyen Korent la adan lèt-la i voyé ba yo la ! Siwtou lè nou ka sonjé kè ni dé frè a lasanblé-lasa ki té ka di kè i pa vo ayen (2 Kor. 10:10).

7. Kijan on frè kè onlo moun konnèt montré kè i ni imilité ?

⁷ Onlo sèwvitè a Jéova touvé on bèl ankourajman adan istwa a vi a frè Karl Klein ki té ka fè pawti a Komité Santral la. Èvè onlo imilité é onlo franchiz, frè Klein ka palé dè féblès a-y, é dè difikilté i jwenn adan vi a-y. Pa ègzanp, prèmyé  fwa i éséyé préché dè kaz an kaz sé té an 1922. I touvé prédikasyon-la tèlman rèd, kè aprésa, i rété apépré 2 lanné san préché. Plita, pannan i té ka sèvi adan Bétèl-la, on frè ba-y on konsèy é i touvé-y ni frè-lasa si tchè. Anplisdisa, i fè on déprésyon men érèzman i géri apré. É magrésa, frè Klein ni lokazyon fè onlo biten entérésan é enpòwtan toubònman adan òwganizasyon a Jéova. Onlo moun té konnèt frè Klein. Alò nou ka tou konprann kè fò i té ni onlo onlo imilité pou i té palé dè féblès a-y fasilman konsa ! Ni onlo frè é sè, lè yo ka sonjé frè Klein é jan i palé franchman dè sa i fè, jousalè sa ka touché-yo *.

8. Kijan 1 Pyè 5:6 ka édé-w vwè kè lè nou ni imilité sa ka fè Jéova plézi ?

⁸ Pli gran rézon ki fè nou ka chèché a ni imilité, sé kè sa ka fè Jéova plézi. Lapòt Pyè èspliké sa byen toubònman (li 1 Pyè 5:6). Ni on liv non a-y sé « Viens, suis-moi » ki ka palé dè sa Pyè di. Mi sa i ka di : « Òwgèy, sé on pwazon. I pé fè onlo déga toubònman. On moun pé ni tout kapasité kè i vlé, men si i ni òwgèy, Jéova pé’é pé sèvi èvè-y. Pawkont, menmsi on moun pa ni onlo kapasité, dépi i ni imilité Jéova ké pé sèvi èvè-y. [...] A pa ti kontan [Jéova] ké [...] kontan rékonpansé-w si ou ni imilité *. » Ou pa’a di sé méyè biten nou pé fè pou mèt jwa adan tchè a Jéova ? (Pwov. 23:15).

9. Poukwa imilité ka ba lézòt anvi rapwoché-yo dè nou ?

⁹ Anplis dè fè Jéova plézi, lè nou ni imilité, nou ka rèsèvwa onlo bénédisyon. Lè nou ni imilité sa ka ba lézòt anvi rapwoché-yo dè nou. Pou-w konprann sa plibyen, enki mété-w an plas a yo (Mat. 7:12). An jénéral, nou pa’a gè anvi touvé-nou èvè moun ki toujou bizwen kè lézòt fè sa yo vlé jan yo vlé, é ki pa’a vlé kouté pon konsèy. Pawkont, sé on plézi lè nou ka touvé-nou èvè frè é sè an nou pas lè on moun ka soufè sa ka touché-yo. Anplisdisa, yo ni lanmou pou frè é sè a yo, yo ni on konpasyon ki plen tandrès é yo ni imilité osi (1 Pyè 3:8). Si nou enmé pasé tan èvè dé moun ki konsa, nou ka tou konprann kè yo osi, yo ké santi-yo byen èvè nou si nou ni imilité.

10. Poukwa on moun ki ni imilité ka sipòté difikilté a lavi pli fasilman ?

¹⁰ Imilité ka rann vi an nou pi fasil osi.  Nou oblijé admèt kè délè, nou ké vwè oben nou ké viv sitiyasyon nou ké touvé enjis. Salomon ki té on Wa saj di : « An vwè sèwvitè achouval, alòskè té ni prens ki té ka maché apyé kon sèwvitè » (Ékl. 10:7). Ni moun ki plen kapasité, men moun pa’a rèkonnèt valè a yo. É délè, sé on moun ki pa konnèt fè granzafè yo ka pòté anlè. Men Salomon konstaté kè sa pi saj dè aksèpté lavi kon i yé olyé nou fè kòlè pas tout biten pa’a pasé kon nou té’é vlé (Ékl. 6:9). Si nou ni imilité, sa ké pi fasil ban nou dè pran lavi jan i yé é nou pé’é rété gadé sa ki pa’a fè-nou plézi.

11. Kijan pou nou réyaji lè on moun ka ban-nou on konsèy ?

¹¹ Chak jou ka ban-nou lokazyon dè montré imilité an nou. An-nou pran déotwa ègzanp. Lè yo ka ba-w on konsèy. Sa té ké byen kè nou sonjé kè si on moun ka fè éfò pou ban-nou on konsèy, sé pétèt paskè sa nou fè la pli grav ki sa nou té ka konprann. Pétèt kè lè on moun ka ban-nou on konsèy, prèmyé biten nou ké vlé fè, sé voyé moun-la ponmlé èvè konsèy a-y. Pétèt nou ké malpalé moun-la ki ban-nou konsèy-lasa oben nou ké touvé kè i mal di-nou sa. Men si nou ni imilité, nou ké fè éfò pou nou vwè sa on mannyè ki pozitif.

12. Dapré sa Pwovèb 27:5, 6 ka di, poukwa fò-nou ni rèkonésans ba on moun ki ban-nou on konsèy ? Bay on ègzanp.

¹² On moun ki ni imilité ka aprésyé lè yo ka ba-y on konsèy. An-nou pran on ègzanp : Imajiné kè ou adan on réinyon krétyèn. Apré ou ja palé èvè plizyè frè é sè, yonn adan yo ka pran-w apa, é i ka di-w kè ni on mòso manjé ki rété pri an dan a-w. Sèten ou ké wont ! Men ès ou pa byen kontan i di-w sa kanmenm ? An réyalité, pétèt kè ou té’é préféré ondòt moun di-w sa pli bonnè ! Alò lè on frè oben on sè ka pran kouraj a-y a dé men pou ban-nou on konsèy, fò-nou ni imilité é montré rèkonésans an nou pou konsèy-lasa. Olyé nou pran moun-lasa pou on lènmi, sa té’é byen kè nou vwè-y kon zanmi an nou (Li Pwovèb 27:5, 6 ; Gal. 4:16).

13. Lè lézòt ka rèsèvwa rèsponsabilité adan lasanblé-la, kijan nou pé montré kè nou ni imilité ?

¹³ Lè yo ka ba lézòt rèsponsabilité. Mi sa on ansyen non a-y sé Jason ka di : « Lè an ka vwè rèsponsabilité lézòt ka rèsèvwa,  délè, an ka mandé-mwen poukwa a pa mwen yo chwazi. » Ès sa ka rivé-w dè rèsanti sa osi ? Sé on bèl biten lè on moun vlé fè plis pou Jéova (1 Tim. 3:1). Men fò-nou fè atansyon a sa ki ka pasé andidan tchè an nou. Si nou pa véyé-nou, nou ka riské dè lésé òwgèy pran rasin an tchè an nou é grandi. Pa ègzanp, on frè té’é pé koumansé pansé kè sé li ki pli kapab pou asimé on sèwten rèsponsabilité adan lasanblé-la. Oben on sè pé ka pansé konsa : « Si sété mari an mwen, i té’é fè sa lontan plibyen ki frè entèl ou ! » Men si vréman nou ni imilité adan nou, nou pé ké pansé konsa.

14. Lè nou ka gadé jan Moyiz réyaji lè dòt moun rèsèvwa rèsponsabilité, ka sa ka aprann-nou ?

¹⁴ Lè nou ka vwè jan Moyiz réyaji lè dòt moun rèsèvwa rèsponsabilité, sa pé aprann-nou onlo biten. Sé vré kè Moyiz aprésyé onlo lè Jéova ba-y dirijé nasyon a Izrayèl. Men onlè, Jéova chwazi dòt moun pou té fè sèwten biten anplas a-y. Kijan Moyiz réyaji ? I pa touvé-y jalou (Nonb 11:24-29). Olyé dè sa, i aji èvè imilité é i lésé lézòt édé-y jijé pèp-la (Ègz. 18:13-24). Kifè, sé Izraélit-la pa té bizwen atann onpakèt tan ankò pou yo jijé on afè, piskè té ni plis moun pou jijé-yo. Sa ka montré-nou kè pou Moyiz, entéré a lézòt té pli enpòwtan ki sé rèsponsabilité-la i té ni la. Mi on bèl ègzanp ban nou mi ! Fò-nou sonjé kè si nou vlé Jéova sèvi èvè nou, fò-nou ni plis imilité ki kapasité. Menmsi « Jéova ka rété anho an syèl-la, i ka pran tan gadé moun ki ni imilité » (Sòm 138:6).

15. Kijan sitiyasyon a onlo frè é sè vin chanjé ?

¹⁵ Lè sitiyasyon an nou ka chanjé. Sa pa’a fè lontan, yo voyé onlo frè é sè ki té ja ka sèvi Jéova dépi onpakèt lanné sèvi  ondòt koté. Pa ègzanp, an 2014, sé siwvéyan a distrik la touvé-yo douvan on chanjman. Lòwganizasyon di kè pé ké ni siwvéyan a distrik ankò, é i mandé sé frè-la èvè madanm a yo dè fè ondòt jan dè sèwvis aplentan. Menm lanné-la, lòwganizasyon di osi kè lè on frè rivé a 70 an, i pé’é pé rété rèsponsab a siwkonskripsyon ankò. É on frè ki ni 80 an ou plis pé’é pé sèvi antankè koòwdinatè a kolèj a sé ansyen-la. Anplisdisa, dépi déotwa lanné, yo ka voyé onlo bétélit sèvi antankè pyonyé pèwmanan. É dòt sèwvitè aplentan té oblijé arété sèwvis a yo, swa pou okipé dè santé a yo, swa pou okipé dè fanmi a yo, oben pou dòt rézon ankò.

16. Ni dé frè é sè ki aji èvè imilité, é yo fè kò èvè on nouvo sitiyasyon. Kijan yo fè ?

¹⁶ Sa té rèd toubònman pou on bon enpé frè é sè dè abityé-yo èvè sé chanjman-lasa. On biten ki klè, sé kè yo té enmé sa yo té ka fè la toubònman, piskè onlo adan yo té ja ka fè sa dépi onpakèt lanné. Kifè, toupannan yo té ka fè kò èvè nouvo sitiyasyon a yo, sé konsi yo té andèy padavwa yo té enmé sa yo té ka fè la. Men piti-a-piti yo réyisi adapté-yo. Poukwa yo rivé fè sa ? Pli gran rézon-la, sé pas yo enmé Jéova. Anplis, yo pa ba Jéova vi a yo ni pou on travay, ni pou on tit, ni pou on sèwvis (Kol. 3:23). Yo kontan dè kontinyé sèvi Jéova èvè imilité kèlkanswa sa yo mandé-yo fè. Yo ‘ka lagé tousa ki ka trakasé-yo asi-y’, paskè yo sav i ka sousyé-y dè yo (1 Pyè 5:6, 7).

17. Poukisa nou kontan kè Pawòl a Jéova ka ankourajé-nou a ni imilité ?

¹⁷ A pa ti kontan nou kontan kè Labib ka ankourajé-nou a ni imilité ! Lè nou ni bèl kalité-lasa, sa ka fè-nou di byen é sa ka fè lézòt di byen osi. Sa ka pli fasil pou nou dè andiré pwoblèm nou pé jwenn adan lavi. É siwtou, nou ka vin pli pré Jéova, Pap’an nou ki an syèl-la. Nou tèlman kontan dè sav kè menmsi sé-y ki ‘pli ho é ki pli gran’, Jéova ka ba sèwvitè a-y ki ni imilité onlo valè é i enmé-yo toubònman ! (Iz. 57:15).