1. Dapré Matyé 11:28-30, ki pwomès Jézi fè ?

JÉZI fè on foulmoun ki té ka kouté-y on bèl pwomès. I di-yo : « Vin owa mwen, [...] é an ké konsolé-zòt » (li Matyé 11:28-30). A pa pawòl anlè i té ka di-yo. Pa ègzanp, sonjé sa i fè ba on madanm ki té ka soufè onlo èvè on vyé kalté maladi.

2. Ka Jézi fè pou on madanm ki té malad ?

² Madanm-lasa té bizen èd toubònman, pas i pa té ni pon èspwa ankò. Konm i té vlé géri, i té ja ay vwè enpé dòktè. Sa té ja ka fè douz lanné i té ka soufè, men ponmoun pa jen rivé édé-y. É sèlon Lwa-la Jéova té ba Moyiz la, i pa té sen (Lév. 15:25). Men on jou, i tann-di kè Jézi té pé géri moun ki ka soufè, kifè i mété-y ka chèché Jézi. Lè i touvé-y, i mannyé lenj a-y, é kon i mannyé-y, kon i géri osi ! An réyalité, a pa yenki géri Jézi géri madanm-la. I fè plis ki sa : i montré madanm-la kè Bondyé enmé-y é kè i té ni valè osi. Pa ègzanp, lè Jézi palé ba-y, i kriyé-y « Fi an mwen ». Sé té pou montré-y kè i enmé-y é kè i ni onlo rèspé ba-y. Sèten sa dwèt konsolé madanm-la é sa ba-y fòs ! (Lik 8:43-48).

3. A ki kèsyon nou kay réponn ?

³ Si ou byen gadé, sé madanm-la ki ay owa Jézi. I fè on éfò pou ay koté-y. É sa valab pou nou jòdila osi. Fò-nou fè on éfò pou nou pé sa « vin owa » Jézi. A épòk an nou, Jézi pé ké fè mirak pou géri moun malad ki ka « vin owa » a-y. Men i ka fè-nou menm envitasyon-la toujou : « Vin owa  mwen, [...] é an ké konsolé zòt ». Adan awtik-lasa, nou ké réponn a senk kèsyon : Ka fò-nou fè pou nou « vin owa » Jézi ? Ka Jézi té vlé di lè i di « rantré anba jouk » a-y ? Ka ègzanp a Jézi ka aprann-nou ? Poukwa misyon-la i ban-nou la ka konsolé-nou ? É ka nou pé fè pou kontinyé touvé rékonfò anba jouk a Jézi ?

4-5. Ankijan nou pé « vin owa » Jézi ?

⁴ On prèmyé mannyè ki pé pèwmèt on moun « vin owa » Jézi, sé lè i ka aprann lèmaksimòm asi sa i di é asi sa i fè (Lik 1:1-4). Pondòt moun pé pa fè sa ban nou. Sé noumenm ki dwètèt pran tan étidyé sa Labib ka di asi Jézi. Nou pé fè ondòt biten ankò pou nou « vin owa » Jézi. Nou pé désidé batizé é vin on disip a-y.

⁵ Ondòt mwayen ankò ki ka pèwmèt on moun dè « vin owa » Jézi, sé lè i k’ay vwè ansyen a lasanblé a-y lè i bizwen èd. Jézi ban-nou sé « nonm-lasa [...] konm kado » é i ka sèvi èvè yo pou okipé dè mouton a-y (Éféz. 4:7, 8, 11 ; Jan 21:16 ; 1 Pyè 5:1-3). Alò fò-nou fè éfò pou ay mandé-yo édé-nou. Fò pa nou konpranndèdi kè sé ansyen-la ké li an pansé an nou é kè yo ké dèviné sa nou bizwen. Mi sa on frè non a-y sé Julian ka di : « Konm an té malad, fò-mwen té kité Bétèl-la, é ni on zanmi ki ban-mwen on bon lidé. I di-mwen mandé sé ansyen-la rann-mwen vizit pou yo ankourajé-mwen. Odépa, an pa té ka pansé an té bizwen sa. Men apré, an mandé sé ansyen-la édé-mwen. É anfinaldikont, apré vizit a sé bèwjé-lasa, an rann-mwen kont kè an poto’o jen rèsèvwa on bèl kado konsa. » Menmjan Julian touvé sé 2 ansyen fidèl lasa pou édé-y, nou osi nou pé touvé ansyen ki fidèl pou édé-nou. Yo ké édé-nou konprann jan Jézi té ka pansé, mannyè i té ka aji é yo ké édé-nou imité-y (1 Kor. 2:16 ; 1 Pyè 2:21). Sé yonn adan lé pli bèl kado yo pé fè-nou !

6. Lè Jézi di : « Rantré anba jouk an mwen », ka sa té vlé di ?

⁶ Lè Jézi di : « Rantré anba jouk an mwen », pétèt i té vlé di « aksèpté otorité an mwen ». Pétèt osi i té vlé di « rantré anba menm jouk ki mwen é nou ké travay pou Jéova ansanm ». Kèlkanswa, lè yo ka palé dè « jouk », sé pou montré-nou kè nou ni on travay a fè.

7. Dapré Matyé 28:18-20, ki misyon nou ni, é dè ki biten nou pé sèten ?

⁷ Nou ka aksèpté envitasyon a Jézi lè nou ka ba Jéova vi an nou é lè nou ka pran lèbatèm. Jézi envité toutmoun a vin owa a-y, é si on moun vlé vréman sèvi Jéova, Jézi pé’é jen voyé-y ponmlé (Jan 6:37, 38). Tout disip a Jézi té ni lokazyon pawtisipé adan misyon-la Jéova ba-y la. On biten nou pé sèten, sé kè Jézi ké toujou la pou édé-nou fè travay-lasa (li Matyé 28:18-20).

8-9. Poukwa sé moun ki té ni imilité ki té vlé vin owa Jézi, é ki kèsyon fò-nou pozé-nou ?

⁸ Moun ki ni imilité té anvi vin owa Jézi (Mat. 19:13, 14 ; Lik 7:37, 38). Poukwa ? Sonjé ki diférans ki té ni ant Jézi é sé farizyen-la. Sé farizyen-la pa té ni pon lanmou é yo té plen òwgèy (Mat. 12:9-14). Pawkont li Jézi té ni onlo lanmou é i té ni imilité. Sé farizyen-la té enmé lè moun té ka pòté-yo anlè, é lè toutmoun té ka palé dè yo. Men Jézi èspliké disip a-y kè sa pa té byen dè aji konsa é i montré-yo kè fò-yo ni imilité é kè fò-yo sèvi lézòt (Mat. 23:2, 6-11). Pou yo té menné moun alabagèt, sé farizyen-la té  ka fè-yo pè é yo té ka mennasé-yo (Jan 9:13, 22). Li Jézi, pou i té konsolé moun, i té ka palé jantiman é i té ka aji èvè lanmou.

⁹ Ès ou ka apliké sa Jézi anségné ? Ou pé pozé-w sé kèsyon-lasa : « Lè lézòt ka gadé-mwen, ès yo ka vwè on moun ki dous é ki ni imilité ? Ès an dakò pou fè sèwten travay moun pa’a gè vlé fè pou sèvi lézòt ? Ès an janti èvè lézòt ? »

12-14. Poukwa misyon-la Jézi ban-nou la ka konsolé-nou ?

¹² Poukwa lè nou ka akonpli misyon-la Jézi ban-nou la, sa ka konsolé-nou ? Ni onlo rézon. An-nou pran tan gadé déotwa.

¹³ Nou ni sé méyè rèsponsab-la. Jéova sé pli gran Rèsponsab ki ni. A pa on mèt engra é i pa rèd nonplis. I ka aprésyé travay-la nou ka fè ba-y la (Ébr. 6:10). É i ka ban-nou fòs-la nou bizwen la pou nou pé fè travay-la i ban-nou fè la (2 Kor. 4:7 ; Gal. 6:5, nòt). Jézi, Wa an nou, ban-nou on ègzanp pawfè pou nou sav kijan pou nou aji èvè lézòt (Jan 13:15). É sé ansyen-la ki ka pran swen an nou la ka fè éfò pou imité ègzanp a Jézi ki sé « gran bèwjé-la » (Ébr. 13:20 ; 1 Pyè 5:2). Yo ka anségné-nou é yo ka pwotéjé-nou. Men pannan yo ka fè sa, yo ka fè lèmaksimòm osi pou yo janti èvè nou, pou yo ban-nou kouraj é pou yo aji èvè kouraj.

¹⁴ Nou ni méyè zanmi ki ni. Pondòt moun pa ni zanmi ki ni lanmou kon séla nou ni la, é pondòt moun pa ni on travay enpòwtan kon tala nou ka fè la. Ou ka rann-vou kont ! Nou ka travay èvè frè é sè ki ni méyè konpòwtasyon ki ni, men yo pa’a santi-yo méyè ki lézòt. Yo ni onlo kapasité, men yo pa blagè, é yo ka ba lézòt plis valè ki yo. Pou yo, a pa yenki kolaboré nou ka kolaboré, men nou zanmi. É tèlman yo enmé-nou, yo parèt a mò ban nou.

15. Lè nou ka fè travay-la Jéova ban nou fè la, ka nou ka rèsanti ?

¹⁵ Nou ni méyè travay ki ni. Nou ka anségné moun lavérité asi Jéova, é nou ka dévwalé mansonj a Satan (Jan 8:44). Satan ka plen tèt a sé moun-la èvè mansonj, kifè, yo pa ni pon èspwa. Pa ègzanp, i vlé fè-nou kwè kè Jéova pa’a padonné péché an nou é kè nou pa mérité ponmoun enmé-nou. Dé mansonj konsa oblijé dékourajé sé moun-la ! Lè nou ka « vin owa » Jézi, Jéova ka padonné péché  an nou. É lavérité, sé kè Jéova enmé nouchak onlo menm (Wom. 8:32, 38, 39). Lè ou ka montré moun kijan pou yo konté asi Jéova, é ou ka vwè jan yo ka chanjé, pa ni pli bèl rékonpans ki sa !

16. Chaj-la Jézi ban-nou pòté la pa ni ayen a vwè èvè tout sélézòt chaj-la nou ni a pòté la. Poukwa nou ka di sa ?

¹⁶ Chaj-la Jézi mandé-nou pòté la pa ni ayen a vwè èvè sélézòt chaj-la nou ni a pòté la. Pa ègzanp, apré yo fè on jouné travay, onlo moun ka las, men anplis yo pa’a ni pon satisfaksyon pou sa yo fè la. Pawkont, lè nou sòti travay pou Jéova é pou Jézikri, nou ka ni tchè-kontan toubònman. Pétèt kè apré on jouné travay nou ka santi-nou tèlman las kè nou oblijé fè on éfò pou ay réinyon jou-lasa. Men byensouvan, lè nou rètouné akaz an nou, nou ka santi nou plen fòs, é plen kouraj. Sé menm biten ki ka fèt lè nou ka fè on éfò pou ay préché é pou étidyé Labib tousèl an nou. Aprésa, nou ka santi nou ni plis fòs.

17. Poukwa fò-nou sizé pou analizé sitiyasyon an nou é poukwa fò-nou fè atansyon ?

¹⁷ Fò-nou konprann kè noutout pa ni menm fòs-la. Kifè, fò-nou fè atansyon a jan nou ka itilizé-y. Pa ègzanp, nou pé ka krazé kò an nou pou kouri dèyè byen matéryèl. Men gadé ka Jézi di on jenn nonm rich ki té mandé-y : « Ka an dwèt fè pou an pé sa ni lavi étèwnèl ? » Jenn nonm-la té ja ka suiv Lalwa. É i ka sanm sa sé té on bon boug piskè lè Mawk ka palé dè-y, i ka di kè Jézi ‘touvé-y byen enmé-y’. Alò Jézi fè nonm-la on envitasyon. I di-y konsa : « Alé, vann tousa ou ni [...]. É aprésa, vin, suiv-mwen. » Misyé-la té byen vlé suiv Jézi, men sa fann tchè a-y pas i pa té pou lagé tout « pakèt byen » la i té ni la (Mawk 10:17-22). Kifè, i rèfizé rantré anba jouk-la Jézi pwopozé-y la é i té préféré rété èsklav a lajan (Mat. 6:24). Ka ou té’é chwazi si sé té-w ?

18. Ka nou dwèt fè dètanzantan, é poukwa ?

¹⁸ Dètanzantan, fò-nou ègzaminé-nou pou vwè ka nou ka mèt prèmyé douvan an vi an nou. Poukwa ? Sé pou nou vwè si nou ka sèvi èvè fòs an nou èvè sajès. Gadé ka on jenn frè non a-y sé Mark ka di : « Pannan enpé lanné, an té ka konprann vi an mwen té senp. An té pyonyé, men toutlè, sèl biten an té ka sonjé sé lajan é kijan an té’é pé viv pibyen ankò. An té ka mandé poukwa vi an mwen vin rèd konsa. Men on jou, an rann-mwen kont kè tousa an té ka fè sé té pou fè-mwen plézi, é kè sé yenki rèstan an té ka ba Jéova. Sé rèstan a tan an mwen é a fòs an mwen an té ka ba-y. » Mark chanjé jan i té ka pansé é jan i té ka viv, pou ni plis tan pou sèvi Jéova. I ka di : « Délè, an ka pè pou lajan-la pa two kout. Men grasa èd a Jéova é grasa soutyen a Jézi, an ka rivé goumé kont sé difikilté-lasa. »

19. Poukwa fò-nou vwè travay-la Jéova ban-nou fè la konm i fo ?

¹⁹ Nou ké kontinyé touvé konsolasyon anba jouk a Jézi si nou fè twa biten. Déja, fò-nou vwè travay-la Jéova ban-nou fè la konm i fo. Sé travayè-la sé nou, é Mèt-la sé Jéova (Lik 17:10). Sé pou Jéova nou ka travay, donk fò-nou fè sa i mandé jan i vlé-nou fè-y. Si nou ka éséyé fè volonté a Jéova jan nou vlé, nou ké touvé-nou ka goumé èvè jouk-la. Menmsi on toro ni onpakèt fòs, si i ka lité èvè jouk-la mèt a-y ka dirijé la é i ka halé charèt-la la i vlé, i ka riské dè blésé-y oben dè lasi kò a-y. Pawkont,  si nou lésé Jéova gidé-nou, nou ké pé fè dé biten nou pa jen pansé nou té’é pé fè é nou ké rivé about a difikilté nou ka jwenn. Pa oubliyé, ponmoun pé pa anpéché volonté a Jéova fèt ! (Wom. 8:31 ; 1 Jan 4:4).

20. Èvè ki motivasyon pou nou rantré anba jouk a Jézi ?

²⁰ Dézyèm biten, fò-nou travay èvè bon motivasyon-la. Òbjèktif an nou sé dè ba Jéova glwa, li ki sé on Papa ki plen lanmou. An tan a Jézi, ni moun ki té ni tchè-soté, oben ki té égoyis. Kifè, adan on batzyé yo pèd jwa a yo, é yo sòti anba jouk a Jézi (Jan 6:25-27, 51, 60, 66 ; Filip. 3:18, 19). Pawkont, séla ki té ni on lanmou sensè pou Bondyé é pou pwochen a yo rété anba jouk-lasa pannan tout vi a yo asi latè. Yo fè sa èvè tchè-kontan magré yo té ni lèspwa dè travay èvè Jézi an syèl-la. Kon yo, si nou ka travay èvè bon motivasyon-la, nou ké pòté jouk a Jézi èvè tchè-kontan touttan.

21. Dapré Matyé 6:31-33, ka nou sèten Jéova ké fè ?

²¹ Twazyèm biten, fò-nou rézonab. Nou chwazi dè fè onlo sakrifis an vi an nou, é dè travay rèd pou Jéova. Jézi té ja di-nou kè yo ké pèwsékité-nou. Men nou pé sèten kè Jéova ké ban-nou fòs pou andiré nenpòt ki difikilté. Pi nou ké andiré, é pi nou ké vin fò (Jak 1:2-4). Ondòt biten nou pé sèten, sé kè Jéova ké ban-nou sa nou bizwen é kè Jézi ké pran swen an nou. Frè é sè an nou osi ké ankourajé-nou (li Matyé 6:31-33 ; Jan 10:14 ; 1 Tés. 5:11). Alò ka nou bizwen ankò pou andiré ? Pen é poul ?

22. Pou ki rézon nou pé ni tchè-kontan ?

²² Madanm-la Jézi géri la touvé-y konsolé onfwamenm, menm jou-la. Men pou i té kontinyé bénéfisyé dè konsolasyon-lasa tout vi a-y, fò i té vin on disip a Jézi. Ka ou ka di i fè ? Ou ka di i rantré anba jouk a Jézi ? Si sé sa i fè, imajiné ki rékonpans i ké rèsèvwa : i ké travay èvè Jézi an syèl-la ! Kèlkanswa sakrifis i té’é fè pou suiv Jézi, sa té’é vo lapenn toubònman ! Ki sé an syèl-la nou ka èspéré viv, ki sé asi latè, nou pé ni tchè-kontan davwa nou aksèpté envitasyon a Jézi, lè i di-nou : « Vin owa mwen » !