1-2. Kijan Éklézyas 11:6 lyanné èvè travay a prédikasyon-la ?

ADAN sèwten péyi ni moun ki ka kontan toubònman lè yo ka tann bon nouvèl-la é yo vé konnèt plis biten asi mésaj-la nou ka préché la. Ou té’é di sé sa yo té ka atann ! Pawkont, adan dòt péyi, zafè a Bondyé é zafè a Labib, pa’a gè entérésé sé moun-la. Kijan sé moun-la ka réyaji la ou ka rété la ? Dè tout fason, kèlkèswa jan sé moun-la ka réyaji, Jéova vé kè nou kontinyé préché jiskatan i di travay-la fini.

² Jéova ja désidé a ki moman prédikasyon-la ké fin. É « aprésa lafen ké vin » (Mat. 24:14, 36). Men avan tousa rivé, ka nou pé fè pou montré kè nou ‘pa’a lésé men an nou pozé *’ ? (li Éklézyas 11:6).

3. Ka nou ké vwè adan awtik-lasa ?

³ Awtik a simenn pasé té ka palé dè 4 biten ki ni a fè pou kò an nou vin pibon an prédikasyon (Mat. 4:19). Adan awtik-la nou kay ègzaminé konnyéla la, nou ké palé dè 3 biten ki ké ban-nou anvi préché plis ankò, kèlkèswa éprèv nou ka jwenn. Nou ké vwè 3 biten enpòwtan : 1) poukwa fò-nou kontinyé mèt prédikasyon-la prèmyé douvan an vi an nou, 2) poukwa fò-nou pran pasyans, é 3) poukwa fò-nou fè tousa nou pé pou fwa an nou rété fò.

4. Poukwa fò-nou rété konsantré asi travay-la Jéova ban-nou fè la ?

⁴ Jézi té ja di disip a-y ka ki té’é pasé pannan dènyé jou a sistèm-lasa. I té sav kè sé biten-lasa té’é pé rivé a distrè-yo é anpéché-yo mèt prédikasyon-la prèmyé douvan an vi a yo. I di disip a-y kè ‘fò yo ké véyatif’ (Mat. 24:42). An tan a Noé, té ni onlo biten ki té’é pé anpéché sé moun-la kouté avèwtisman-la Noé té ka ba-yo la. Jòdijou, sé biten-lasa pé distrè-nou osi (Mat. 24:37-39 ; 2 Pyè 2:5). Sé pousa,  fò-nou rété konsantré asi travay-la Jéova ban-nou la.

5. Ka Akt 1:6-8 ka montré anrapò èvè travay a prédikasyon-la ?

⁵ Nou ka préché é fò-nou ba travay-lasa onlo enpòwtans. Jézi di kè disip a-y té’é kontinyé préché apré i mò é kè yo té’é préché lontan plis ki-y (Jan 14:12). Apré mò a Jézi, déotwa disip viré fè lapèch. Apré i résisité, Jézi fè on mirak : i fè déotwa disip a-y pran onpakèt pwason onsèl kou. É i pwofité pou fè disip a-y konprann kè pa ni pon travay ki pi enpòwtan ki préché é fè disip (Jan 21:15-17). On ti moman avan Jézi té monté an syèl-la, i di disip a-y kè travay a prédikasyon-la i té koumansé la pa té’é fèt enki an Izrayèl men dòt koté osi (li Akt 1:6-8). Kèlkè lanné apré, Jézi fè lapòt Jan vwè ka ki té’é fèt pannan « jou a Ségnè-la * ». Pawmi tousa Jan vwè adan vizyon-lasa, i vwè on biten ki té èstraòwdinè toubònman ; i vwè on zanj ki « té ni on bon nouvèl ki étèwnèl » é yo té’é préché-y pou « tout nasyon, tout tribi, tout lang é tout pèp » (Rév. 1:10 ; 14:6). Jòdijou, Témwen a Jéova ka préché toupatou si latè é on biten ki klè sé kè Jéova vé kè nou préché bon nouvèl a Wayòm la jistan travay-lasa fin.

6. Ka pou nou fè pou nou kontinyé mèt prédikasyon-la prèmyé douvan an vi an nou ?

⁶ Nou ké mété travay a prédikasyon-la prèmyé douvan an vi an nou si nou ka pran tan réfléchi asi tousa Jéova ka fè pou édé-nou. I ka ban-nou nouriti èspirityèl a débòdé. Pa ègzanp, nou ni onpakèt piblikasyon swa asi papyé, swa asi òwdinatè oben swa asi tablèt. Nou pé kouté onpakèt anrèjistrèman é gadé onpakèt vidéo, san palé dè émisyon a JW Télédifizyon ki ka parèt chak mwa. Anplisdisa, anlè sit an nou, nou ka touvé  onlo enfòwmasyon an plis ki 1 000 lang. O ou ja vwè sa ! (Mat. 24:45-47). Adan mond-lasa, ni onlo moun ki pa’a antann-yo byen pas yo pa adan menm rèlijyon-la, yo pa’a soutyenn menm pawti politik la oben pas ni sa ki rich é ni sa ki maléré. Men magrésa, ni plis ki 8 milyon moun ki ka sèvi Bondyé toupatou si latè é yo vréman soudé. Yotout frè é sè. Pa ègzanp, lè vandrèdi 19 avril 2019, toupatou si latè, Témwen a Jéova té pé gadé on vidéo ki té ka palé dè tèks di jou la. Jouswa-lasa, té ni 20 919 041 moun ki réini-yo pou yo té pé konmémoré mò a Jézi. Tout sé bèl biten-lasa ka fèt an 2 zyé an-nou. Sé vréman on gwo mirak Jéova ka fè a épòk an nou. É lè nou ka pran tan réfléchi asi sa, sa ka ban-nou anvi mèt travay a prédikasyon-la prèmyé douvan an vi an nou !

7. Kijan ègzanp a Jézi pé édé-nou mété prédikasyon-la prèmyé douvan an vi an nou ?

⁷ Ondòt biten nou pé fè pou mèt prédikasyon-la prèmyé douvan an vi an nou sé suiv ègzanp a Jézi. I pa lésé ayen distrè-y é anpéché-y préché lavérité (Jan 18:37). Lè Satan di-y kè i ka ba-y « tout wayòm a mond-la èvè glwa a yo », tchè a-y pa soté é lè yo té bizwen mété-y wa, sa pa té ka entérésé-y nonplis (Mat. 4:8, 9 ; Jan 6:15). I pa lésé ayen ba-y anvi vin rich é menm lè yo té ka pèwsékité-y rèd menm, i pa lésé sa anpéché-y fè travay-la i té vin fè la (Lik 9:58 ; Jan 8:59). Lè nou ka jwenn éprèv ki pé soukwé fwa an nou, nou ké kontinyé mèt prédikasyon-la prèmyé douvan si nou ka suiv on konsèy lapòt Pòl ban nou. I ankourajé sé krétyen-la a suiv ègzanp a Jézi, konsa yo ‘pa té’é vin las é yo pa té’é dékourajé !’ (Ébr. 12:3).

8. Lè nou ni pasyans, kijan nou ka aji é poukwa nou bizwen kalité-lasa plis ki avan ?

⁸ On moun ki ni pasyans ka rivé atann kalmèman jiskatan on sitiyasyon chanjé. Lèwvwè nou adan on sitiyasyon ki rèd a sipòté é kè nou ja anvi sa fin, fò nou pran pasyans. Nou bizwen pasyans osi lèwvwè sa ka fè lontan nou ka atann on biten. An tan a pwofèt Abakik té ni onlo vyolans é i té vé kè Jéova fè sa arété (Abak. 1:2). Disip a Jézi té ka èspéré kè Wayòm-la té’é ‘parèt tousuit’ é té’é woté-yo anba jouk a sé women-la (Lik 19:11). Nou ja anvi wayòm a Bondyé woté laméchansté asi latè. É nou ja anvi kè i mèt mond nouvo la anplas, pas a moman-lasa sé yenki moun ki ka kouté Bondyé ki ké asi latè (2 Pyè 3:13). Men annatandan, fò-nou pran pasyans é fò-nou atann pas sé Jéova ki konnèt a ki moman i ké aji. Konnyéla, an-nou vwè kijan Jéova ka aprann-nou aji èvè pasyans.

9. Ki ègzanp ki ka montré kè Jéova ni pasyans ?

⁹ An zafè a pasyans, Jéova sé on ègzanp ki pawfè. I ba Noé tout tan-la i té fo la pou i té konstwi lawch-la é pou i té ‘palé moun dè sa ki jis’ (2 Pyè 2:5 ; 1 Pyè 3:20). Lè Jéova té k’ay détwi sé moun méchan la ki té ka viv a Sodòm é Gomò, Abraam pozé-y enpé kèsyon asi sa é i fè sa a plizyè rèpriz. Men a chakfwa, Jéova pran tan kouté-y èvè onlo pasyans (Jén. 18:20-33). Pannan plizyè syèk, Jéova pran pasyans kon pasyans fèt èvè nasyon a Izrayèl (Néém. 9:30, 31). Jòdijou osi, nou ka vwè kè Jéova ni onlo pasyans toubònman pas i ka ba toutmoun ki vé vin zanmi èvè-y asé tan pou yo ‘rivé rèpanti-yo’ (2 Pyè 3:9 ; Jan 6:44 ; 1 Tim. 2:3, 4). Ègzanp-la Jéova ka ban-nou la ka ban-nou anvi pran pasyans  èvè sé moun-la lè nou ka préché é lè nou ka anségné. Men Jéova ka aprann-nou aji èvè pasyans ondòt jan ankò : i ka sèvi èvè on ègzanp nou ka touvé adan Pawòl a-y.

10. Dapré sa ki maké an Jak 5:7, 8, ka ègzanp a agrikiltè-la ka fè-nou sonjé ?

¹⁰ (Li Jak 5:7, 8.) Si nou pran tan ègzaminé ègzanp a on agrikiltè ki ka fè plant pousé, sa ké édé-nou pran pasyans. Ni sèwten plant ki ka pousé vit. Men lamajorité ka pran onlo tan, siwtou si sé plant ki ka bay fwi. An Izrayèl, pou on plant té pòté, fò ou té konté 6 mwa apépré. Agrikiltè-la té ka simé sé grenn-la lè sézon a lapli té ka koumansé, kivédi koté lè 15 òktòb é i té ka rékòlté koté lè 15 avril lè sézon a lapli-la té ka fin (Mawk 4:28). Si nou ka imité pasyans a agrikiltè-la, nou ké aji èvè sajès. Men sa pa toujou fasil.

11. Poukwa fò-nou pran pasyans lè nou ka préché ?

¹¹ Byensouvan, konm nou enpawfè, nou anvi vwè rézilta a sa nou ka fè tousuit. Men si nou vé rékòlté on biten adan ti jaden-la ki dèyè kaz-la, fò-nou ka okipé dè-y toutlè : fò-nou chalviré tè-la, fò-nou planté, fò-nou raché vyé zèb é fò-nou wouzé. Menmjan-la, fò-nou fè bon tibwen éfò pou nou fè disip. Fò-nou raché vyé zèb ki an tchè a étidyan an nou kivédi fò-nou aprann-yo pa fè préférans, é fò-nou aprann-yo enmé lézòt. Men sa, sa pa’a fèt an 2 jou. Si nou ni pasyans, menmsi sé moun-la pa’a kouté-nou, sa pé’é dékourajé-nou. É lè lavérité ka entérésé on moun, fò-nou pran pasyans èvè-y. Nou pé pa oblijé on moun ki ka étidyé Labib konsolidé fwa a-y. Délè, lè Jézi té ka anségné disip a-y, yo té ka pran tan pou konprann sa i té ka di. É poutan sé té disip a-y ! (Jan 14:9). Ni on biten pou nou pa jen oubliyé : sé nou ki ka simé grenn-la, sé nou ki ka wouzé-y, men sé Bondyé ki ka fè-y pousé (1 Kor. 3:6).

12. Fò-nou pran pasyans èvè fanmi an nou ki pa Témwen. Kijan pou nou fè sa ?

 ¹² Défwa, nou anvi palé dè lavérité èvè fanmi an nou, men pou pran pasyans èvè yo sé on bab. Si sa ka rivé-nou, prensip-la nou ka touvé an Éklézyas 3:7 pé édé-nou. Mi sa i ka di : « ni on moman pou pé é on moman pou palé ». Si nou ni on bon konduit, nou pé ba fanmi an nou anvi kouté mésaj-la. É a moman-lasa, nou ké pi alèz pou palé-yo dè Jéova (1 Pyè 3:1, 2). Nou ka pòté bon mannèv an prédikasyon é nou ka fè tousa nou pé pou anségné moun, men fò-nou toujou pran pasyans èvè toutmoun, menmsi sé fanmi an nou.

13-14. An tan lontan é a épòk an nou, ni onlo sèwvitè a Bondyé ki aji èvè pasyans. Bay déotwa ègzanp.

¹³ An tan lontan é a épòk an nou, ni onlo sèwvitè a Jéova ki aji èvè onlo pasyans. Si nou pran tan ègzaminé ègzanp a yo, nou ké pwogrésé an domenn-lasa. Abakik té ja anvi vwè laméchansté disparèt, é mi sa i di èvè onlo konfyans : « An ké rété an plas an mwen pou mwen véyé » (Abak. 2:1). Lapòt Pòl di kè i té présé ‘fin ministè a-y’. Men magrésa, i kontinyé ‘préché bon nouvèl-la afon’ èvè onlo pasyans (Akt 20:24).

¹⁴ Aprézan, an-nou palé dè on frè é madanm a-y ki fè lékòl a Galaad. Yo voyé-yo on koté pa gè té ni Témwen a Jéova é pa gè té ni krétyen. Pa gè ni moun ki té anvi étidyé Labib. Pawkont, yo voyé dòt zélèv ki fè Galaad èvè yo adan dòt péyi, é yo, yo té ka ni bon rézilta an prédikasyon. Souvantfwa, yo té ka rakonté-yo kè yo té plen étid é kè ni onlo étidyan ki té ka pran lèbatèm. Men frè-la é madanm a-y pran pasyans, é yo kontinyé préché menmsi moun a téritwa-la pa té ka kouté-yo. Yo rété ka préché pannan 8 an adan téritwa-lasa é ou té’é di pon grenn pa té ka pousé pas a pa granzafè a moun ki té ka kouté. Men anfinaldikont, apré 8 an-lasa, ni on étidyan a yo ki pran lèbatèm. A pa ti kontan yo té kontan ! Nou sòti palé dè sèwten sèwvitè a Bondyé ki viv an tan lontan é dè déotwa ki viv a épòk an nou. Ka ègzanp a yo ka aprann-nou ? Nou ka rann-nou kont kè sé sèwvitè fidèl lasa toujou kontinyé pòté bon mannèv an prédikasyon. Yo pa lésé men a yo pozé é Jéova béni-yo pas yo aji èvè onlo pasyans. Alò, an-nou « imité séla ki ka érité dè sé pwomès-la grasa lafwa é grasa lapasyans » (Ébr. 6:10-12).

15. Pi ou ké ni fwa é pi ou ké anvi ay préché. Poukwa nou ka di sa ?

¹⁵ Nou ni fwa adan mésaj-la nou ka préché la, kifè, sa ka ban-nou anvi palé dè mésaj-lasa èvè on maksimòm dè moun. Anplisdisa, nou ni konfyans adan tout pwomès kè nou ka touvé an pawòl a Bondyé (Sòm 119:42 ; Iz. 40:8). Nou ka vwè onpakèt pwofési ka réyalizé an 2 zyé an nou, é nou ka konstaté kè sé moun-la ka viv pibyen lèwvwè yo ka mèt sé konsèy-la ki an Bib-la an pratik. Tout sé biten-lasa ka montré kè toutmoun bizwen tann bon nouvèl a Wayòm-la.

16. Si nou ni fwa an Jéova é an Jézi, nou ké pi anvi préché. Kijan Sòm 46:1-3 ka montré-nou sa ?

¹⁶ Nou ni fwa an Jéova é nou ni fwa an Jézi osi. Sé Jéova ki ban-nou mésaj-la nou ka préché la, é sé Jézi i mété Wa a wayòm a-y (Jan 14:1). Kèlkèswa difikilté nou ka jwenn, Jéova ké toujou rété abri an nou é fòs an nou (li Sòm 46:1-3). Anplis, nou sèten kè Jézi ka dirijé aktivité a prédikasyon-la menmsi i an syèl-la. É nou sèten osi kè pou i fè sa, i ka sèvi èvè  puisans-la é otorité-la Jéova ba-y la (Mat. 28:18-20).

17. Ès ou pé palé dè on ègzanp ki ka montré kè fò-nou kontinyé préché ?

¹⁷ Pi on moun ni fwa é pi i sèten kè Jéova ké béni tout éfò i ka fè. É défwa, lè i ka béni-nou, nou pa jen konpranndèdi sé konsa i té’é fè sa ! (Ékl. 11:6). Pa ègzanp, chakjou, ni plizyè mil moun ka pasé douvan tab a piblikasyon an nou é douvan prézantwa an nou. Èskè sé on métòd ki ka maché ? Ou pé di-y ! Adan Ministère du Royaume a novanm 2014, yo ka rakonté-nou sa ki rivé on jenn tifi ki té ka fè étid adan on linivèwsité. Yo ba-y on dèvwa a fè é i désidé palé dè Témwen a Jéova adan dèvwa-lasa. I pa rivé touvé pon Sal di Wayòm, men i tonbé anlè on tab a piblikasyon an nou. Konsa, i touvé tousa i té bizwen pou pé sa fè dèvwa a-y. Jòdijou, sé on sè é i pyonyé pèwmanan. Ègzanp-lasa é dòt ankò ka ban-nou anvi kontinyé préché, pas i ka montré kè ni dòt moun ankò ki bizwen tann mésaj a Wayòm la.

18. Lè nou ké arété préché, poukwa nou ké pé di kè travay-lasa fèt kon Jéova té vlé i fèt ?

¹⁸ On biten nou pé sèten sé kè travay a prédikasyon-la ké fin lè pou i fin. An-nou arété-nou asi sa ki pasé an tan a Noé. Jéova montré kè i pé fè biten a-y tonbé tèk kon i té prévwa. Apépré 120 an alavans, i té ja désidé kitan délij-la té’é koumansé (Jén. 6:3). Plizyè lanné apré, i di Noé konstwi on lawch. Kifè, Noé rété 40 ou 50 lanné ka travay rèd avan délij-la té fèt. Sé moun-la pa té ka kouté-y, men magrésa i kontinyé avèti-yo jiskatan Jéova di-y kè moman-la rivé pou i pé sa fè sé bèt-la rantré an lawch-la. É lè lè-la rivé, « Jéova fèmé pòt-la » (Jén. 6:3 ; 7:1, 2, 16).

19. Ki bénédisyon nou ké ni si nou pa’a lésé men an nou pozé ?

¹⁹ Talè, Jéova ké di-nou kè fò-nou arété préché bon nouvèl a Wayòm-la. É aprésa, i ké fèmé pòt-la : i ké détwi mond a Satan é i ké kréyé on nouvo mond. Adan mond-lasa, sé yenki moun ki ka fè sa i ka mandé ou ké touvé. Men annatandan, an-nou kontinyé imité Noé, an-nou kontinyé imité Abakik é an-nou kontinyé imité tout rèstan sèwvitè a Bondyé ki pa jen lésé men a yo pozé. An-nou mèt prédikasyon-la prèmyé douvan an vi an nou, an-nou pran pasyans èvè sé moun-la é an-nou fè tousa nou pé pou nou ni plis konfyans an Jéova é pou nou ni konfyans adan sé pwomès-la i fè-nou la.