1. Dépawfwa, a ki moman sa pi rèd pou nou sèvi Jéova ?

SÈLON vou, a ki moman sa pi rèd pou adoré Jéova ? Lèwvwè ou ka pran bon gaz oben lèwvwè tout biten trankil ? Lèwvwè zafè mélé, prèmyé biten nou ka fè sé kriyé Jéova. Men, é lè tout biten k’ay byen aprézan ? Ès délè nou ka oubliyé kè sa ki pi enpòwtan adan lavi, sé fè volonté a Bondyé. Jistèman, sé akòz dè sa Jéova avèti sé Izraélit-la (Dét. 6:10-12).

2. Ki bèl ègzanp wa Aza lésé ban-nou ?

² Aza sé té on wa a Jida é sé on bèl ègzanp pou nou. I aji èvè sajès pas i konté asi Jéova. I sèvi Jéova lè biten-la té rèd, men, i sèvi-y osi lè tout biten té k’ay byen. Pannan tout vi a-y, i sèvi Jéova èvè tout tchè a-y (1 Wa 15:14, nòt). Adan wayòm a Jida, yo té ka adoré enpé fo dyé, men konm Aza té enmé Jéova fò toubònman, i mété on milyé adan sa. Mi sa Bib-la ka di : « I woté tout lotèl yo té fè pou adoré fo dyé. I woté tout koté ki té anhotè é ki té fèt pou adoré fo dyé. I fwayé sé kolòn sakré la é i koupé sé poto sakré la » (2 Kron. 14:3, 5). I jous woté granmèw a-y adan grad-la i té ni la. Poukwa sa ? Pas ni on idòl, madanm-la té ka ankourajé pèp-la adoré (1 Wa 15:11-13).

3. Ka nou ké vwè adan awtik-lasa ?

 ³ A pa yenki sé fo dyé la, Aza fè vòlkannizé. Men anplisdisa, i édé pèp-la woukoumansé adoré Jéova. Jéova béni Aza é pèp-la. I fè ansòt pou ponmoun pa chèché-yo tren. Lè Aza té ka gouvèné, « péyi-la viv trankil pannan 10 an » (2 Kron. 14:1, 4, 6). Adan awtik-lasa, nou ké vwè ka wa-lasa fè pannan péryòd-lasa. Aprésa, nou ké palé dè sé prèmyé krétyen-la, pas yo fè kon Aza. Yo pwofité pannan biten-la té bon. É pou fin, nou ké réponn a kèsyon-lasa : Si adan péyi-la ou ka viv la ou pé sèvi Jéova alèz a-w, kijan ou pé aji èvè sajès, pannan biten-la bon ?

4. Sèlon sa ki maké an 2 Kronik 14:2, 6, 7, ka Aza fè pannan biten-la té bon ?

⁴ (Li 2 Kronik 14:2, 6, 7.) Aza di pèp-la kè sé Jéova ki fè ansòt ‘pou ponmoun pa chèché-yo tren’. Men, i pa mèt an tèt a-y kè sé té lè moman pou i té blèz kò a-y. Okontrè, i mété-y ka konstwi vil, miray, tou é i mèt pòt an rantran a sé vil-la. I èspliké pèp a Jida, kè ‘péyi-la sé ta yo toujou’. Ka i té vé di pa la ? I té vé fè-yo konprann kè yo té pé déplasé an péyi-la Bondyé té ba-yo la alèz a yo é kè yo té pé konstwi sa yo té vé san ponmoun vin anbété-yo. An réyalité, i té ka ankourajé pèp-la aji èvè sajès pannan biten-la té bon.

5. Poukwa Aza fè ansòt pou lawmé a-y vin pi fò ?

⁵ Aza pwofité dè péryòd-lasa pou i té fè lawmé a-y vin pi fò (2 Kron. 14:8). Ès sa vé di kè i pa té ni konfyans an Jéova ankò ? Awa ! Okontrè ! Men, Aza aji konsa pas i té sav kè on bon wa ka préparé pèp a-y pou difikilté i pé rivé a jwenn plita. É i té ja sav byen kè biten-la pa té’é rété konsa toultan é i té ni rézon.

6. Dépi biten-la té bon, ka sé prèmyé krétyen-la té ka fè ?

⁶ Byensouvan, yo té ka pèwsékité sé prèmyé krétyen-la rèd menm. Men ni délè, yo té ka trankil osi. Lèwvwè yo té ka pran on ti souf konsa, ka yo té ka pwofité pou yo té fè ? Yo préché bon nouvèl-la rèd menm. Adan liv a Akt, yo ka di-nou kè yo ‘té ni on gwo rèspé pou Jéova’ é konm yo pa té ka arété préché, kantité-la yo té yé la kontinyé ògmanté. Sa té klè ; konm yo té ka pòté bon mannèv pannan biten-la té bon, Jéova té ka béni éfò a yo (Akt 9:26-31).

7-8. Ka Pòl é dòt krétyen fè pannan biten-la té bon ?

⁷ Dépi sé prèmyé krétyen-la té ni on lokazyon, yo té ka pwofité pou préché bon nouvèl-la. Pa ègzanp, lè Pòl réyalizé kè i té’é pé préché pou plis moun a Éfèz, i rété préché an vil-lasa (1 Kor. 16:8, 9).

⁸ An 49 a épòk an nou, lèwvwè yo réglé pwoblèm a siwkonsizyon-la, Pòl é dòt krétyen ankò pwofité pou yo té pé sa préché plis (Akt 15:23-29). Dépi ou vwè yo té anonsé sé lasanblé-la désizyon-la Komité santral la té pran la, sé disip-la fè bon éfò pou anonsé bon nouvèl-la ki an Pawòl a Jéova (Akt 15:30-35). Ka sa bay ? Mi sa Labib ka di : « Sé lasanblé-la té ka kontinyé vin pli solid adan lafwa é jou apré jou, yo té ka kontinyé gwosi » (Akt 16:4, 5).

9. Alèkilé, kijan biten-la yé adan onlo péyi é ki kèsyon nou té’é pé pozé-nou ?

⁹ Konnyéla la, adan onlo péyi nou pé préché alèz an nou. Ès ou ka viv adan on péyi konsa ? Si sé sa, pozé-w kèsyon-lasa : « Ka an ka fè pannan biten-la bon ? » Toujou sonjé kè nou ka viv dènyé jou a sistèm-lasa. É dépi nou rantré an péryòd-lasa, sé prèmyé fwa pèp a Bondyé ka préché é ka anségné konsa. Nou po’o té jen vwè sa menm ! (Mawk 13:10). Ni onlo biten sèwvitè a Bondyé pé fè adan travay-lasa.

10. Dapré 2 Timoté 4:2, ka Pòl ka ankourajé-nou fè ?

¹⁰ Lèwvwè biten-la bon, ka ou pé fè ? (li 2 Timoté 4:2). Pétèt kè ou pé gadé si vou oben on moun an fanmi a-w pé fè sèwten chanjman pou i préché plis oben pou i vin pyonyé. A pa lè moman pou ranmasé lajan oben byen matéryèl. Sé biten-lasa pé’é ni pon valè lèwvwè gwo tribilasyon-la ké koumansé (Pwov. 11:4 ; Mat. 6:31-33 ; 1 Jan 2:15-17).

11. Ka onlo pwoklamatè ka fè pou yo préché ba on maksimòm dè moun ?

¹¹ Ni onlo pwoklamatè ki ka aprann on nouvo lang pou yo pé sa édé lézòt aprann konnèt Jéova. Òwganizasyon a Jéova ka ba-yo on bèl pal an domenn-lasa pas i ka pwodui piblikasyon adan onpakèt lang menm é kantité lang-lasa pa’a jen fin ògmanté. Gadé ! An 2010, nou té ni piblikasyon an 500 lang apépré. Men jòdijou, nou ni yo anplis ki 1000 lang !

12. Ka sé moun-la ka rèsanti lè nou ka palé-yo dè Jéova an lang a yo ? Bay on ègzanp.

¹² Ka sé moun-la ka rèsanti lèwvwè nou ka palé-yo dè Jéova an lang a yo ? An-nou pran ègzanp a on sè ki ay adan on lasanblé réjyonal o Zétazini. Yo fè sé diskou-la an kinyawanda, on lang yo ka palé siwtou o Wanda, o Kongo (Kinchasa), é an Ouganda. Sè-la ka palé  lang-lasa dépi toupiti é apré lasanblé-la, mi sa i di : « Sa ka fè 17 an an ka viv o Zétazini é sé prèmyé fwa an ka konprann tousa yo di adan on lasanblé. » A pa ti kontan, sè-la té kontan tann sé diskou-la an lang a-y ! Sa touché tchè a-y ! É vou ? Si sitiyasyon a-w ka pèwmèt, ès ni mwayen ou aprann on nouvo lang ? Ou pa’a di kè sèwten moun ki an téritwa a-w té’é kouté-w pi fasilman si ou té ka diskité èvè yo an lang a yo ? Alò ka i ka frenné-w ? Siwvwè ou fè éfò-lasa, Jéova ké vidé onpakèt bénédisyon asi-w.

13. Pannan on tan, tout biten té k’ay byen an Risi. Kijan frè é sè an nou pwofité dè péryòd-lasa ?

¹³ A pa tout frè é sè an nou ki pé préché alèz a yo. Konnyéla la, sèwten gouvènman ka séré jwen a yo pou anpéché-yo préché. Pa ègzanp, an-nou palé dè frè é sè an nou ki an Risi. Yo pèwsékité-yo pannan plizyè lanné é an maws 1991, gouvènman-la ba-yo dwa adoré Bondyé kon yo vlé. A épòk-lasa, té ni apépré 16 000 pwoklamatè an Risi. Men 20 an apré, yo té a plis ki 160 000 ! Lè frè é sè an nou té alèz a yo pou préché, yo aji èvè sajès. On ti tan apré, biten-la vin rèd. Men yo kontinyé pòté bon mannèv an prédikasyon. Yo ka kontinyé fè tousa yo pé pou yo sèvi Jéova.

14-15. Kijan Jéova sèvi èvè puisans a-y pou i édé Aza ?

¹⁴ An tan a Aza, yo té trankil trankil a yo, lèwgadé, biten-la enn chalviré ; lawmé a sé étyopyen-la ki té ni plis ki on milyon sòlda adan-y vin ataké-yo. Zéra, komandan a lawmé-lasa té ja ka vwè-y ka ba lawmé a Jida on bèl plich ! Men pou  Aza, a pa kantité sòlda-la ki té ka konté. Sé asi Jéova, Bondyé a-y, i té ka fè fon. Mi sa i mandé-y adan on priyè : « Vin a sèkou an nou, o Jéova Bondyé an nou, pas nou ka fè-w konfyans é sé an non a-w nou vin goumé èvè gran foulmoun-lasa » (2 Kron. 14:11).

¹⁵ Adan lawmé a sé étyopyen-la, té ni 2 fwa plis sòlda ki adan ta Aza. Men Aza té sav kè Jéova sé on Bondyé ki puisan é kè i té’é pé édé pèp a-y. É Jéova pa désèvwa-y, sé étyopyen-la pran on plich ! A pa ti wont yo té wont ! (2 Kron. 14:8-13).

16. Pou lenstan biten-la bon, men i pé’é diré. Kijan nou fè sav sa ?

¹⁶ Nou ponyonn pé pa di ègzaktèman an ki sitiyasyon nou ké yé dèmen. Men sa nou sav, sé kè biten-la pé’é rété bon toultan. Sonjé ! Jézi té di kè pannan dènyé jou a sistèm-lasa, ‘tout sé nasyon-la té’é hay disip a-y’ (Mat. 24:9). Li Pòl, mi sa i di : « Toutmoun ki vlé montré an vi a yo kè yo enmé Bondyé é kè yo vlé vin disip a Jézi ké jwenn pèwsékisyon osi » (2 Tim. 3:12). É a pa ti anrajé Satan « anrajé » ! (Rév. 12:12). Alò, fò pa nou ni pon lèspwa a malpapay pas noutout ké pasé anba men a-y.

17. Nou pé rivé a jwenn éprèv ki ké montré ka nou vo. Poukwa nou ka di sa ?

¹⁷ Talè, nou ké viv sèwten sitiyasyon ki ké montré ka nou vo vréman. Talè, ké ni on « gwo tribilasyon ki poko jen fèt dépi lèmond ka ègzisté é ki pé’é jen fèt ankò » (Mat. 24:21). Pannan péryòd-lasa, fò pa nou touvé sa fò si sèwten moun an fanmi an nou bizwen anpéché-nou sèvi Jéova, oben si sé gouvènman-la ka entèwdi aktivité an nou (Mat. 10:35, 36). Men ès ou ké fè Jéova konfyans kon Aza ? Ès ou sèten i ké édé-w é kè i ké pwotéjé-w ?

18. Sèlon Ébré 10:38, 39, ka pou nou fè dépi aprézan pou nou paré lèwvwè biten-la ké chalviré ?

¹⁸ Jéova ka préparé-nou pou sa ki ké fèt plita. I ka gidé « èsklav fidèl é prévwayan la » pou i ban-nou nouriti-la nou bizwen la a moman-la ki fo la. Konsa, nou ni tousa nou bizwen pou nou rété fò  (Mat. 24:45). Men noutout ni on wòl a jouwé. Fò-nou konsolidé fwa an nou (li Ébré 10:38, 39).

19-20. Ki kèsyon 1 Kronik 28:9 dwètèt pousé-nou a pozé-nou é poukwa ?

¹⁹ Fò-nou imité Aza ; fò-nou ‘chèché Jéova’ (2 Kron. 14:4 ; 15:1, 2). Pou sa, fò-nou koumansé pa aprann konnèt-li é fò-nou pran lèbatèm. Aprésa, nou ké fè tousa nou pé pou nou enmé Jéova plis. Alò, nou pé pozé-nou kèsyon-lasa : « Ès an ni labitid ay réinyon ? » Pas pa oubliyé kè pannan sé réinyon-lasa, Jéova ka ban-nou fòs-la nou bizwen la pou nou kontinyé sèvi-y é frè é sè an nou ka ankourajé-nou osi (Mat. 11:28). Mi on séri kèsyon nou pé pozé-nou osi : « Ès an ka pran tan étidyé Labib tousèl an mwen ? » Si ou ka viv èvè fanmi a-w, ès zò ka fè étid familyal la chak simenn ? Oben, si ou tousèl a-w, ès ou ka pran tan étidyé kon on fanmi ka fè ? É ondòt kèsyon ou pé pozé-w sé : Ès ou ka fè tousa ou pé pou préché é pou fè disip ?

²⁰ Poukwa fò-nou pozé-nou sé kèsyon-lasa ? Labib ka di kè Jéova ka pran tan gadé sa ki ka pasé an lèspri an nou é an tchè an nou. Kifè, nou osi, fò-nou pran tan gadé sa ki an lèspri an nou é an tchè an nou (li 1 Kronik 28:9). Si nou ka rann-nou kont kè ni on biten a chanjé adan mantalité an nou oben adan òbjèktif an nou, fò-nou mandé Jéova édé-nou. Sé dépi konnyéla pou nou préparé-nou pou sé éprèv-la ki ka vin la. Alò pwofité pannan biten-la bon pou aji èvè sajès.