1-2. Ki évènman ki té’é fèt a épòk an nou pwofèt Ajé té anonsé ?

 « ADAN on ti moman, sé ti boutik-la é sé batiman-la enn fésé atè. » « Sé moun-la té ozabwa. Yo pa té sav kikoté pou yo mèt kò a yo [...]. Onlo moun di kè sa diré yenki 2 minit men mwen an té ni lenprésyon kè sa pa té’é jen fin. » Mi sé sa moun ki chapé kò a yo anba on tranmanndtè ki fèt o Népal an 2015 rakonté. Si on biten konsa té ka rivé-nou, nou pa té’é oubliyé sa fasilman.

² É poutan, jòdijou, a pa on vil oben on péyi tousèl Jéova ka soukwé men sé tout sé nasyon-la ki asi latè la é sa ka fè plizyè lanné sa ka diré. Pwofèt Ajé té ja anonsé sa. Mi sa i di : « Mi sa Jéova, Chèf a sé lawmé-la ka di : “Ondòt fwa ankò — adan on ti moman —, an kay soukwé syèl-la é tè-la, é lanmè-la é tè sèk la” » (Ajé 2:6).

3. Ki diférans ki ni ant on tranmanndtè é évènman-la Ajé palé la ?

³ Lè on tranmanndtè ka fèt, sé krazé i ka krazé toutbiten. Men évènman-la Ajé palé la pa ka pòté enki mové biten, i ka pòté bon biten osi. Dayè, sé sa Jéova limenm di : « An kay soukwé tout sé nasyon-la, é sé biten-la ki ni onlo valè la adan tout sé nasyon-la ké rantré adan kaz-lasa ; é an ké plen-y èvè glwa » (Ajé 2:7). An tan a Ajé, kijan pwofési-lasa réyalizé ? É Jòdijou, kijan i ka réyalizé ? Adan awtik-lasa, nou ké réponn a sé kèsyon-lasa. Jéova ka soukwé sé nasyon-la é nou ké vwè kijan nou pé bay on pal adan travay-lasa.

4. Ki travay Jéova ba Ajé fè ?

⁴ Jéova ba Ajé on travay ki té enpòwtan toubònman. An-nou vwè sa ki pasé avan sa. Yo té chayé sé Juif-la pa fòs  Babilòn é aprésa yo wouvin Jérizalèm an 537 avan épòk an nou. Pétèt kè Ajé té ka fè pawti a sé Juif-lasa. Tibwen tan apré yo viré Jérizalèm, sé Juif-lasa ki té fidèl fè fondasyon a Tanp-la (Èsdr. 3:8, 10). Men adan on ti moman, sitiyasyon-la enn chalviré. Lènmi a yo koumansé mèt baton an wou a yo, kifè, sé Juif-la touvé-yo dékourajé (Èsdr. 4:4 ; Ajé 1:1, 2). Alò, an 520 avan épòk an nou, Jéova voyé Ajé pou wouba sé Juif-la balan pou yo té pé sa fin konstwi Tanp-la b (Èsdr. 6:14, 15).

5. Poukwa sa Ajé di sé Juif-la dwèt ba-yo bon fòs ?

⁵ Sa Ajé di sé Juif-la sé té pou édé-yo ni plis konfyans adan Jéova ankò. 2 bra a yo té kasé, sé pousa mi sa i di-yo pou ba-yo kouraj : « Montré-zòt fò, zòtout, moun a péyi-la, é travay, sé sa Jéova ka di. Pas an la èvè zòt, sé sa Jéova, Chèf a sé lawmé-la, ka di » (Ajé 2:4). Lèwvwè Ajé di sé Juif-la kè ‘Jéova sé Chèf a sé lawmé-la’, sa dwèt fè-yo dibyen toubònman. Jéova ni onpakèt zanj adan lawmé a-y é sè-y ki ka dirijé-yotout. Kifè, si sé Juif-la té ka fè fon asi-y, toutbiten a yo té’é maché.

6. Ki bon biten évènman-la Ajé anonsé la pòté ba sé Juif-la ?

⁶ Jéova voyé Ajé di sé Juif-la kè i té kay soukwé sé nasyon-la. Sé Juif-la té arété konstwi Tanp-la, kifè, sa Ajé di-yo la ba-yo bon fòs. An tan-lasa, sé Lapèws ki té ka menné, men Jéova té di kè i té’é soukwé-y. Ki bon biten sa té’é pòté pou sé Juif-la ? Prèmyèwman, sé Juif-la té’é rivé fin konstwi Tanp-la. É dézyèmman, menm sé moun-la ki pa té juif la té’é adoré Jéova èvè sé Juif-la. Sèten sa Ajé di la dwèt ba pèp a Bondyé bon fòs toubònman ! (Zak. 8:9).

7. Jòdijou, ki travay nou ka édé Jéova fè ? Bay on ti èsplikasyon.

⁷ Kijan sa Ajé té anonsé ka réyalizé jòdijou ? Jòdijou osi Jéova ka soukwé tout sé nasyon-la é nou ni on wòl a jouwé adan sa. An 1914, i mèt Jézikris Chèf a wayòm a-y ki an syèl-la (Sòm 2:6). Men lèwvwè Jéova mèt wayòm-lasa anplas, a pa té on bon nouvèl pou sé moun-la ki ka menné asi latè la pas sa té vé di kè « tan-la yo ba sé nasyon-la fin ». Pannan péryòd-lasa, Jéova pa té mèt ponmoun pou dirijé asi latè (Lik 21:24). Lè sèwvitè a Bondyé konprann sa, yo koumansé anonsé kè wayòm a Bondyé sé sèl èspwa pou limanité é lèwvwè 1919 rivé, sé lè yo anonsé sa menm. Lè yo préché ‘bon nouvèl a wayòm-lasa’, sa soukwé tout sé nasyon-la (Mat. 24:14).

8. Dapré Sòm 2:1-3, kijan lamajorité a moun té’é réyaji lèwvwè nou té’é préché bon nouvèl a Wayòm-la ?

⁸ Kijan sé moun-la ka réyaji lèwvwè nou ka préché bon nouvèl a Wayòm-la ? Lamajorité a moun pa pou sa (li Sòm 2:1-3). Sé nasyon-la anrajé toubònman. Yo pa dakò èvè Chèf-la Jéova chwazi la. Pou yo, mésaj-la nou ka préché la a pa on « bon nouvèl ». Jous ni sèwten gouvènman ki ka entèwdi prédikasyon an nou ! Onlo moun ki ka menné adan mond-lasa ka di kè yo ka sèvi Bondyé men yo pa paré a lagé pouvwa-la yo ni la. Jéova chwazi Gason a-y pou on misyon èspésyal men yo vé pa-y ditou ditou ditou. Kifè, yo ka pèwsékité sèwvitè a Bondyé ki fidèl kon yo fè-y an tan a Jézi (Akt 4:25-28).

9. Ka Jéova ka di sé nasyon-la ki ka ba-y do la ?

⁹ Ka Jéova ka di sé nasyon-la ki ka ba-y do la ? Nou ka touvé répons-la an Sòm 2:10-12 : « Donk aprézan, zòt sé wa-la, fò  zò ni bon jijman. É zòt sé jij-la ki asi latè, aksèpté kè yo korijé-zòt ! Fò zò krenn Jéova lè zò ka sèvi-y, fò zò ni tchè-kontan toupannan zò ka krenn-li. Ba gason-la lonnè, pas si zò pa fè sa, Bondyé ké fè kòlè é zò ké pèd vi a zòt, pas i ka fè kòlè vit. Tchè-kontan pou tout moun ki ka vin kaché owa Bondyé ! » Jéova ka aji èvè bonté épi lènmi a-y. I ka ba-yo on chans. I sav yo pé chanjé lidé é aksèpté wayòm a-y. Men pa ka rété onlo tan ankò ! Nou ka viv « dènyé jou » a mond-lasa (2 Tim. 3:1 ; Iz. 61:2). Sé aprézan pou lézimen aprann konnèt lavérité é chwazi sèvi Jéova. Pa ni biten ki pi enpòwtan ki sa !

10. Dapré Ajé 2:7-9, kijan sèwten moun té’é réyaji lèwvwè Jéova té’é soukwé sé nasyon-la ?

¹⁰ Ajé té anonsé kè Jéova té’é soukwé sé nasyon-la é lèwvwè sa fèt, sa touché tchè a sèwten moun. Pwofèt-la té di kè lèwvwè Jéova té’é soukwé sé nasyon-la, « sé biten-la ki ni onlo valè la » kivédi sé moun-la ki ni on tchè ki sensè adan tout sé nasyon-la té’é rantré adan kaz a Jéova pou adoré-y c (li Ajé 2:7-9). Izayi é Miché té anonsé osi sa ki té’é pasé pannan « sé dènyé jou-la » (Iz. 2:2-4, nòt ; Mich. 4:1, 2, nòt).

11. Lèwvwè on frè tann palé dè wayòm a Bondyé, ka i fè ?

¹¹ Aprézan, an-nou palé dè jan mésaj-la ki ka soukwé sé nasyon-la aji asi on frè non a-y sé Ken. Frè-lasa ka travay adan biwo mondyal la. Ja ni plis ki 40 an i dékouvè lavérité é i ka sonjé sa toujou. Mi sa i ka di : « Prèmyé fwa an tann palé dè lavérité, an té kontan sav kè nou ka viv dènyé jou a mond méchan lasa. An byen konprann osi kè siwvwè an té vé fè Bondyé plézi é siwvwè an té vé viv pou touttan, fò an té lagé mond-lasa é fò an té montré Jéova kè sé-y an ka soutyenn, siwtou kè nou pé pa fè mond-lasa konfyans. An priyé Jéova é an désidé tousuit kè an pa té’é fè pawti a mond-lasa ankò, men kè an  té’é soutyenn wayòm a Bondyé, li ki pé pwotéjé-mwen. Anplisdisa, ayen pé’é jen pé soukwé wayòm-lasa. »

12. Kijan Jéova ka plen tanp èspirityèl a-y èvè glwa pannan sé dènyé jou-la ?

¹² On biten ki klè, sé kè Jéova béni pèp a-y. Pannan sé dènyé jou-la, kantité sèwvitè a Bondyé kontinyé ògmanté toubònman. An 1914, nou té a plis ki 5 000. Jòdila, nou a plis ki 8 milyon é ni milyon é milyon moun ki ka vin jwenn-nou chak lanné pou sélébré Mémoryal-la èvè nou. Jéova ni on tanp èspirityèl é lakou a tanp-lasa asi latè. I ka plen sé lakou-lasa èvè « sé biten-la ki ni onlo valè la adan tout sé nasyon-la ». Tanp èspirityèl lasa sé tout sé dispozisyon-la Jéova pran la pou nou pé sa adoré-y. Ondòt biten ki ka ba non a Jéova glwa, sé lèwvwè sé moun-la ka fè éfò pou chanjé vi a yo é mèt nouvo pèwsonalité-la asi yo (Éféz 4:22-24).

13. Kijan dòt pwofési té ka anonsé kè kantité moun ki té’é adoré Jéova té’é ògmanté ? (gadé imaj-la ki anlè po a jounal-la).

¹³ Adan dòt pwofési, Jéova té anonsé kè kantité moun ki té’é adoré-y té’é ògmanté. Pa ègzanp, Izayi 60:22 ka di sa. Mi sa nou ka li : « Piti-la ké vin on milyé, é sila ki toupiti menm ké vin on nasyon ki fò. Mwen Jéova, an ké fè sa pran balan lè moman-la ké rivé ». Pi nou k’ay é pi ni moun ki ka adoré Jéova. Kifè, ni on biten èstraòwdinè ki ka fèt : non sèlman sé moun-la ki ni onlo valè la ni onlo kapasité men anplisdisa, yo anvi préché bon nouvèl a Wayòm-la. Sé konsa pèp a Bondyé ka sèvi èvè lèt a sé nasyon-la, kon Izayi té anonsé (Iz. 60:5, 16). Konm sé moun-lasa ka bay on pal adan travay a prédikasyon-la, sa ka pèwmèt-nou préché adan 240 péyi é téritwa é sa ka pèwmèt-nou pwodui piblikasyon an nou an plis ki 1 000 lang.

14. Jòdijou limanité oblijé fè on chwa. Ki chwa ésa ?

¹⁴ Pannan dènyé jou a mond-lasa, Jéova ka soukwé sé nasyon-la. Kifè, limanité oblijé fè on chwa : sé swa yo ka soutyenn wayòm a Bondyé oben sé swa yo ka soutyenn sé gouvènman-la. Men ka yo ké  chwazi ? Sé on chwa ki enpòwtan é sa ka konsèwné-noutout. Sèwvitè a Jéova ka suiv lwa a péyi-la yo ka viv adan-y la men yo pa’a pran pawti adan zafè a politik (Wom. 13:1-7). Yo sav kè sé wayòm a Bondyé ki ké réglé tout pwoblèm limanité ka jwenn é wayòm-lasa pa’a fè pawti a mond-lasa (Jan 18:36, 37).

15. Dapré liv a Larévélasyon, sèwvitè a Bondyé ké sibi dé biten ki rèd é sa pé’é fasil pou yo dè rété fidèl. Ki biten ésa ?

¹⁵ Liv a Larévélasyon ka di kè pannan sé dènyé jou-la, sèwvitè a Bondyé ké sibi bon éprèv é sa pé ké fasil pou yo rété fidèl. Pi sa ké ay é pi nou ké jwenn pèwsékisyon. Sé gouvènman-la ki asi latè-la ké mandé toutmoun soutyenn-yo a san pou san é yo ké pèwsékité touséla ki ka rèfizé fè sa (Rév. 13:12, 15). Yo ké « fòsé toutmoun — piti kon gran, rich kon maléré, ki moun lib, ki èsklav — rèsèvwa on mak asi men dwat a yo oben asi fon a yo » (Rév. 13:16). An tan lontan, lèwvwè yo té vé maké on èsklav pou montré kimoun ki mèt a-y, yo té ka mèt on mòso fè an difé é lèwvwè fè-la té ka vin byen wouj yo té ka mété-y anlè èsklav-la pou maké po a-y. Menmjan-la, a épòk an nou, yo ké oblijé toutmoun montré ba kimoun yo yé. Yo ké vé toutmoun montré kè yo pou gouvènman a péyi a yo é kè yo montré sa adan sa yo ka di é adan sa yo ka fè.

16. Poukwa sé aprézan pou nou travay pou nou rété fidèl a Jéova ?

¹⁶ Ès nou ké aksèpté mak a sé gouvènman-la é ès nou ké soutyenn-yo ? Touséla ki ké rèfizé mak-lasa ké jwenn difikilté é yo ké andanjé. Mi sa Révélasyon ka èspliké : ‘Ponmoun pé’é pé ni achté ni vann si i pa ni mak-la’ (Rév. 13:17). Men nou sav ka Jéova ké fè sé moun-la ki ni mak-lasa (Rév. 14:9, 10). Alò olyé nou ni mak-lasa asi nou, mi sa ki ké maké asi men an nou : ‘Nou, nou sé ta Jéova’ (Iz. 44:5). Sé pousa, dépi aprézan, fò-nou gadé pou vwè si nou fidèl a Jéova a san pou san. Si nou fidèl a Jéova, i ké kontan di kè nou sé ta-y !

17. Ka fò pa nou oubliyé anrapò èvè pasyans a Jéova ?

¹⁷ Pannan sé dènyé jou-la, Jéova ka aji èvè pasyans toubònman pas i vé pa menm onsèl moun détwi (2 Pyè 3:9). Sé pousa, i ka ba toutmoun tan pou yo pé rèpanti-yo é pou yo pé sèvi-y. Men biten-la pé’é rété konsa toutlè. Touséla ki pa dakò pou soutyenn wayòm a Bondyé ké touvé-yo adan menm sitiyasyon ki Faraon an tan a Moyiz. Mi sa Jéova té di-y : « An té’é pé ja lonji men an mwen pou pini-w, ki vou, ki pèp a-w, èvè on gwo maladi, é ou té’é ja disparèt si latè. Men si an lésé-w viv, sé pou montré-w puisans an mwen é pou yo anonsé non an mwen si tout latè » (Ègz. 9:15, 16). Anfinaldikont, toutmoun ké sav kè sèl vré Bondyé-la sé Jéova (Ézék. 38:23). Men kijan sa ké fèt ?

18. a) Ajé 2:6, 20-22 té di kè Jéova té’é soukwé ondòt biten. Ki biten ésa ? b) Poukwa nou pé di kè sé pawòl-lasa ké réyalizé plita ?

¹⁸ Plizyè syèk apré Ajé mò, grasa lèspri sen a Bondyé, Pòl èspliké kè sé pawòl-la nou ka touvé an Ajé 2:6, 20-22 té ké réyalizé plita (li-y). Mi sa Pòl ékri : « Aprézan mi sa i pwomèt : “Ondòt fwa ankò, non sèlman an ké soukwé tè-la, men an ké soukwé syèl-la osi.” Lè yo ka di “ondòt fwa ankò” sa vé di kè sé biten-la yo ké soukwé la kay disparèt, kivédi sé biten-la kè li i pa té fè la, pou sé biten-la i pa soukwé la  rété » (Ébr. 12:26, 27). Lè Jéova di kè i ké soukwé tè-la é syèl-la, sa pa ni ayen a vwè èvè lè Jéova té di kè i té’é soukwé tout sé nasyon-la an Ajé 2:7 pas kou-lasa, Jéova ké détwi pou touttan tout sé moun-la ki kon Faraon pa ka rèkonnèt kè i andwa gouvèné.

19. Ki biten Jéova pé’é soukwé é kijan nou fè sav sa ?

¹⁹ Ki biten Jéova pé’é soukwé, kivédi ki biten i pé’é détwi ? Mi sa Pòl ka di : « Piskè fò-nou risivwè on wayòm ponmoun pé’é pé soukwé, an-nou kontinyé pwofité dè favè-la nou pa mérité la, on favè ki ka pèwmèt-nou ba Bondyé on sèwvis sakré ki ka fè-y plézi, toupannan nou ka krenn-li é kè nou ka rèspèkté-y » (Ébr. 12:28). Wi, lèwvwè Jéova ké soukwé tout sé biten-la on dènyé fwa, sé yenki wayòm a-y ki ké ègzisté. Wi, wayòm-lasa ké rété byen doubout ! (Sòm 110:5, 6 ; Dan. 2:44).

20. Ki chwa fò lézimen fè é ka nou pé fè pou édé-yo fè chwa-lasa ?

²⁰ Alèla, pa ka rété onlo tan ! Sé moun-la ni on chwa a fè : si yo ka désidé soutyenn mond-lasa, Jéova ké détwi-yo, men si yo ka désidé sèvi Jéova é kè yo ka fè chanjman an vi a yo pou fè sa i ka mandé, yo ké pé viv si latè pou touttan (Ébr. 12:25). Sé on désizyon ki enpòwtan toubònman é lèwvwè nou ka préché, nou ka édé sé moun-la pran bon désizyon-la. Sé pousa, an-nou préché ba on maksimòm dè moun pou yo pé sa soutyenn wayòm a Bondyé é fò pa nou jen oubliyé sa Jézi, Ségnè an nou di : « Bon nouvèl a Wayòm-la, yo ké préché-y toupatou asi latè, pou i sèvi témwagnaj ba tout sé nasyon-la, é aprésa lafen ké vin » (Mat. 24:14).