1. Lè laj-la ka monté, ki òbjèktif nou pé chèché a atenn ?

LÈ LAJ-LA ka monté, nou pé on tijan enkyèt pas nou ka di-nou kè nou pé’é rivé fè sa nou té ka fè avan pou Jéova. Sé vré, nou ni mwens fòs, men nou ni plis sajès é nou ni plis èkspéryans. Nou pé sèvi èvè sajès-lasa é èkspéryans-lasa pou édé sé pli jenn la vin pli itil an men a Jéova, konsa yo ké pé ni plis rèsponsabilité adan òwganizasyon a-y. Mi sa on frè ki ansyen dépi lontan di anrapò èvè sa : « Lèwvwè an koumansé santi kè laj-la ka bat-mwen, an té kontan sav ké té ni dé jenn frè ki té kapab kontinyé travay-la. »

2. Ka nou ké vwè adan awtik-lasa ?

² Adan awtik a simenn pasé, nou vwè kè lè frè é sè ki pli jenn ka vin zanmi èvè frè é sè ki ja ni on ti laj, sa ka pwokiré-yo onlo byenfé. Adan awtik-lasa, nou ké vwè kè si frè é sè an nou ki ja ni on ti laj ni imilité, si yo ni rèkonésans, si yo ka rèkonnèt limit a yo é si yo donan, sa ké édé-yo kolaboré èvè sé pli jenn la é sa ké fè tout lasanblé-la dibyen.

3. Dapré Filipyen 2:3, 4, ka ki limilité, é kijan sa pé édé sé krétyen-la ?

³ Si on krétyen ki ni on bèl laj vlé édé sé pli jenn la, fò i ni imilité. On moun ki ni imilité ka rèkonnèt kè lézòt ni plis valè ki-y (li Filipyen 2:3, 4). Sé krétyen-la ki ni on bèl laj-la é ki ni imilité ka rèkonnèt kè ou pé fè menm travay-la plizyè mannyè diféran dépi yo annakò èvè prensip a Labib. Kifè, yo pa ka atann kè toutmoun fè menm biten ki yo (Ékl. 7:10). Sé vré, yo ni on bèl èkspéryans toubònman é yo anvi fè sé jenn-la pwofité dè sa. Men yo sav osi kè « mond-lasa sé chanjé i ka chanjé » (1 Kor. 7:31). Sé pousa fò yo aprann fè kò èvè sé nouvo sitiyasyon-la yo ké jwenn la.

4. Menmjan ki sé Lévit-la, ki bèl létadèspri sé rèsponsab a siwkonskripsyon la ni ?

 ⁴ Lè on krétyen ni imilité, i ka rèkonnèt kè lè laj-la ka monté i pé pa fè sa i té ka fè avan ankò. Pa ègzanp, an-nou palé dè sé rèsponsab a siwkonskripsyon la. Lè yo ka vin trapé 70 an a yo, yo ka mandé-yo fè ondòt travay. Sa pé rèd pou yo toubònman. Yo enmé fè travay-lasa pas sa ka pèwmèt-yo édé frè é sè a yo é yo té’é byen enmé kontinyé fè sa. Men yo ka rèkonnèt kè konnyéla la sa té’é myé si sé pli jenn frè-la té ka kontinyé fè travay-la yo té ka fè la. Yo ni menm létadèspri ki sé Lévit-la ki té ni 50 an la. Yo té ka mandé-yo arété travay an tabèwnak-la lè yo té ni laj-lasa. Men menmsi sé Lévit-lasa té ka arété travay a yo, yo pa té ka pèd jwa a yo pas jwa a yo pa té ka dépann dè sa. Magré yo té ja an rètrèt, yo té ka fè tousa yo té pé pou édé sé pli jenn la adan travay a yo (Nonb. 8:25, 26). Jòdijou, frè an nou ki té rèsponsab a siwkonskripsyon avan pa ka vizité sé lasanblé-la ankò, men yo ka fè sé frè é sè-la ki adan lasanblé-la yo yé la dibyen toubònman.

5. Ka ègzanp a Dan é Katie ka aprann-nou ?

⁵ An-nou pran ègzanp a Dan. I rété rèsponsab a siwkonskripsyon pannan 23 an é lè i vin trapé 70 an a-y, li é madanm a-y Katie vin pyonyé èspésyal. Men ka yo ka fè pou yo pé sa ni tchè-kontan adan nouvo travay-la yo ka fè la ? Dan ka di kè sé  prèmyé fwa i ni tousa biten a fè. I ni onlo rèsponsabilité adan lasanblé-la, i ka édé sé frè-la pwogrésé pou yo pé sa vin asistan é i ka édé sé pwoklamatè-la pou yo pé sa préché plibyen adan sé vil-la é adan sé lajòl-la. Frè é sè an nou ki ja ni on bèl laj, ki zò ka sèvi Jéova aplentan, ki zò pa’a sèvi-y aplentan, zò pé fè onlo biten pou lasanblé-la. Ka zò pé fè ? Pran tan aprésyé nouvo travay-la zò ka fè la, chwazi ki òbjèktif zò ké ni é rété konsantré asi sa zò pé fè konnyéla la olyé zò sonjé sa zò pé pa fè ankò.

6. Poukwa sa enpòwtan kè nou rèkonnèt limit an nou ? Bay on ègzanp.

⁶ On moun ki ka rèkonnèt limit a-y sav sa i pé fè é sa i pé pa fè (Pwov. 11:2). Pli laj-la ka monté, é pli i ka rann-li kont kè ni sèwten biten kè i té ka fè avan kè i pé pa fè ankò é i ka aksèpté sa. Kifè, i ka kontinyé ni tchè-kontan é i ka kontinyé travay rèd pou Jéova. Nou pé konparé on moun ki ka rèkonnèt limit a-y èvè on moun ki ka kondui on vwati adan on mòn. Pou vwati-la pé sa kontinyé monté mòn-la, fò moun-la chanjé vitès-la. Sé vré, pétèt kè vwati-la pé’é woulé vit ankò men i ké kontinyé vansé. Menmjan-la, on moun ki ka rèkonnèt limit a-y sav a ki moman pou i moli é a ki moman pou i fè chanjman an vi a-y pou i pé sa kontinyé sèvi Jéova é kontinyé édé lézòt (Filip. 4:5).

7. Ka ki ka montré nou kè Bawzilay té ka rèkonnèt limit a-y ?

⁷ Aprézan, an-nou pran ègzanp a Bawzilay. Wa David pwopozé-y vin travay adan wayòm a-y. Konm i té ja ni 80 an é kè i té ka rèkonnèt limit a-y, i di wa-la kè i pé’é pé. I té ja sav kè i pa té’é pé fè travay-la byen konm i fo pas i té ja ni on ti laj, alò, i té préféré di wa-la pran Kimam an plas a-y (2 Sam. 19:35-37). Kon Bawzilay, sé frè-la ki ja ni on bèl laj-la kontan lésé sé frè-la ki pli jenn la travay adan lasanblé-la.

8. Adan ki sitiyasyon David montré kè i té ka rèkonnèt limit a-y ?

⁸ David té ka rèkonnèt limit a-y é i ban-nou on bèl ègzanp. A pa ti anvi i té anvi konstwi on kaz pou Jéova, Bondyé a-y. Men lèwvwè Bondyé di-y kè sé Salomon ki ké fè travay-lasa, i aksèpté désizyon-lasa é i soutyenn pwojé-la dè-tou-kè (1 Kron. 17:4 ; 22:5). I pa di an tchè a-y kè Salomon ‘jenn é kè i pa ni èkspéryans’ é kè li i té’é fè sa lontan plibyen ki-y (1 Kron. 29:1). I té sav kè pou on pwojé réyisi, a pa laj-la sé moun-la ki an tèt a pwojé-la ni la ki ka konté ni èkspéryans a yo, men sé bénédisyon a Jéova. Menmjan ki David, frè é sè an nou ki ja ni on bèl laj ka kontinyé pòté bon mannèv menm lè yo chanjé aktivité. Yo sav osi kè Jéova ké béni sé frè é sè-la ki pli jenn la ki ka fè travay-la yo té ka fè la avan.

9. Kijan on frè ki té ka travay adan on komité a filyal montré kè i té ka rèkonnèt limit a-y ?

⁹ Jòdijou osi, nou ni onlo frè é sè ki ka rèkonnèt limit a yo é yo sé dé bèl ègzanp pou nou. An-nou palé dè Shigeo. An 1976 i té ni 30 an é yo nonmé-y adan on komité a filyal. An 2004, i vin koòwdinatè a komité-lasa. Men kèlkè lanné apré, i rann-li kont kè i pa té ka rivé fè travay-la kon i té ka fè-y avan. I té ka pran plis tan pou i té pé sa fè-y é i pa té ni fòs kon avan. I priyé Jéova, i di-y sa i té ni an fon a tchè a-y é i chèché a vwè pou ki rézon sa té’é myé si sé té on frè pli jenn ki té ka fè  travay-la an plas a-y. Jòdijou, a pa Shigeo ki koòwdinatè a komité-la ankò men i ka kontinyé pòté bon mannèv èvè sélézòt frè-la ki adan komité-la. Ègzanp a Bawzilay, ta wa David, é ta Shigeo, montré-nou kè lèwvwè on moun ni imilité é kè i ka rèkonnèt limit a-y, i pa’a rété gadé kè sé jenn-la pa ni onlo èkspéryans men i ka vwè sa yo kapab fè. I pé ké anripaj èvè yo nonplis men i ké dakò pou travay èvè yo (Pwov. 20:29).

10. Kijan frè é sè an nou ki ja ni on bèl laj ka vwè sé frè é sè-la ki pli jenn la ?

¹⁰ Pou frè é sè an nou ki ni on bèl laj, sé frè é sè-la ki pli jenn la sé on bèl kado ki ka vin dè Jéova. Menmsi yo pé pa fè sa yo té ka fè avan, yo kontan vwè kè sé jenn-la la pou kontinyé fè travay-la adan lasanblé-la.

11. Frè é sè an nou ki ja ni on bèl laj ka jwenn onlo bénédisyon lè yo ka lésé sé pli jenn la édé-yo. Kijan Rit 4:13-16 ka montré sa ?

¹¹ Labib ka palé osi dè bèl ègzanp-la Noémi ka ban-nou la. I té ja ni on ti laj lèwvwè i aksèpté kè on madanm ki pli jenn ki-y édé-y. Lè gason a-y mò, Noémi di bèlfi a-y Rit, viré aka fanmi a-y. Men Rit pa té vlé lagé bèlmè a-y anponjan. Alò i viré Bétléèm èvè-y é anfinaldikont, Noémi té byen kontan Rit vin èvè-y é i aksèpté kè Rit édé-y (Rit 1:7, 8, 18). Sa pwokiré-yo toulédé onlo jwa ! (li Rit 4:13-16). Si frè é sè an nou ki ni on bèl laj ni imilité, yo ké imité bèl ègzanp a Noémi.

12. Ka ki ka montré kè Pòl té ni onlo rèkonésans ?

¹² Sé frè é sè-la té ka soutyenn lapòt Pòl é i montré kè i té ni onlo rèkonésans pou sa. Pa ègzanp, i di sé krétyen Filip la mèsi pas yo édé-y ni on dèkwa pou i té pé sa viv (Filip. 4:16). I di osi kijan i té ka  aprésyé sa Timoté té fè ba-y la (Filip. 2:19-22). É lè yo té ka menné-y a Wòm pou yo té fèmé-y adan on kaz, i di Bondyé mèsi davwa i voyé déotwa frè pou yo té pé sa ankourajé-y (Akt 28:15). Pòl a pa té on boug ki té ka dòmi. Dayè, i fè plizyè miliyé kilomèt pou i té pé sa préché é pou i té pé sa ba sé lasanblé-la fòs. Men Pòl té ni imilité, kifè, i aksèpté kè sé frè é sè-la édé-y.

13. Kijan moun ki ni on bèl laj pé montré kè yo ni rèkonésans ?

¹³ Frè é sè an nou ki ni on bèl laj, zò pé montré sé pli jenn la kè zò kontan ni yo adan lasanblé-la é zò pé fè sa plizyè fason diféran. Pa ègzanp, lèwvwè yo ka pwopozé-zòt menné-zòt on koté oben fè kous ba zòt oben lè yo ka pwopozé-zòt fè ondòt biten ba zòt ankò, aksèpté é montré kè zò kontan sa yo ka fè ba zòt. Sonjé kè Jéova ka itilizé-yo pou montré-zòt kè i enmé-zòt. Pétèt kè zò ké vin bon zanmi èvè yo. Toujou chèché a édé-yo pwogrésé pou yo pé sa vin pibon zanmi èvè Jéova é zòt pé di-yo kè zò kontan davwa yo ka chèché a fè plis adan lasanblé-la. Pasé tibwen tan èvè yo é rakonté-yo sa zò viv adan vi a zòt. Lè zò ka fè sa, zò ka montré kè zò kontan kè Jéova voyé jenn ki ka pòté bon mannèv adan lasanblé-la (Kol. 3:15 ; Jan 6:44 ; 1 Tés. 5:18).

14. A ki moman David montré kè i té donan ?

¹⁴ Ègzanp a David ka montré-nou kè sa enpòwtan kè frè é sè an nou ki ni on bèl laj montré-yo donan. David bay onpakèt lajan é onpakèt biten pou i té soutyenn konstriksyon a Tanp-la (1 Kron. 22:11-16 ; 29:3, 4). Poutan, i té sav byen kè lè yo té’é konstwi Tanp-la sé dè Salomon yo té’é tann palé, yo pa té’é tann palé dè-y. Si nou pé pa ay adan sé chantyé a konstriksyon la kon avan, pétèt kè nou pé bay on ti lajan pou nou pé sa soutyenn sé pwojé-lasa. Pétèt osi nou pé ankourajé sé jenn-la lè nou ka palé-yo dè tousa nou té ka fè lè nou té asi sé chantyé-la.

15. Ki bèl kado Pòl fè Timoté ?

¹⁵ Pòl té donan osi é i ka ban-nou on bèl ègzanp adan domenn-lasa. Timoté té jenngason toujou lèwvwè lapòt Pòl menné-y adan sé vwayaj-la i té ka fè la. Pòl montré kè i té donan pas i montré Timoté kijan pou i té préché é kijan pou i té anségné (Akt 16:1-3). Sa Pòl aprann-li la édé-y préché é anségné byen menm (1 Kor. 4:17). Timoté sèvi èvè sa Pòl té aprann-li la pou i té pé sa édé dòt moun préché é anségné bon nouvèl-la.

16. Poukwa Shigeo fòwmé dòt frè ?

¹⁶ Frè an nou ki ja ni on bèl laj pa’a mèt an tèt a yo kè Jéova pé’é sèvi èvè yo ankò siwvwè yo ka aprann sé jenn frè-la fè sa yo té ni labitid fè. Pa ègzanp, talè la nou palé dè Shigeo. Lanné apré lanné, i fòwmé sèwten frè ki té pli jenn ki-y pou yo té pé sa fè pawti a Komité a filyal-la èvè-y. I fè sa pou prédikasyon-la té pé sa kontinyé fè douvan adan péyi a-y. Lèwvwè i pa té pé rété koòwdinatè ankò, yo té pé mèt on frè ki té byen fòwmé an plas a-y. Sa ja ka fè plis ki 45 an kè Shigeo adan on komité a filyal, kifè i ni onlo èkspéryans. Grasa èkspéryans-lasa, i ka kontinyé fòwmé onlo jenn. Lé ou ni dé frè kon Shigeo, sa ka édé sé lasanblé-la toubònman !

17. Kijan frè é sè an nou ki ja ni on bèl laj pé fè sa ki maké an Lik 6:38 ?

¹⁷ Frè é sè an nou ki ni on bèl laj, ègzanp a zòt ka montré kè lè on moun ni fwa an Jéova é kè i fidèl a san pou san, sé pli bèl  biten i pé fè an vi a-y. Ègzanp a zòt ka montré osi kè sa vo lapenn kè ou aprann konnèt sé prensip-la ki an Bib-la é kè ou mèt-yo an pratik adan vi a-w. Zò ni onlo èkspéryans men zò sav osi kè sitiyasyon-la ka chanjé tèlman vit, kifè, sa enpòwtan kè zòt adapté-zòt. Frè é sè an nou ki ja ni on bèl laj é ki toufré pran lèbatèm, zòt osi zò pé aprann lézòt onlo biten. Zò pé di sé pli jenn la jan zò ni tchè-kontan dépi zò aprann konnèt Jéova. Yo ké kontan tann-zòt rakonté-yo sa zò ja viv an vi a zòt é sa sa aprann-zòt. Èkspéryans-la zò ni la ni onlo valè. Si zò ni labitid fè lézòt pwofité dè èkspéryans a zòt, Jéova ké béni-zòt toubònman (li Lik 6:38).

18. Lè frè é sè an nou ki ni on bèl laj é frè é sè an nou ki pli jenn ka kolaboré ansanm, ki byenfé yonn ka pòté ba lòt ?

¹⁸ Frè é sè an nou ki ni on bèl laj, pran tan vin zanmi èvè sé frè é sè-la ki pli jenn la pas sa ké pòté byenfé pou zòt men sa ké pòté byenfé pou yo osi (Wom. 1:12). Chakmoun-la ni on biten ki ni onlo valè : èvè tousa frè é sè an nou ki ni on bèl laj ja viv, yo ni onlo sajès é yo ni onlo èkspéryans é sé jenn-la yo, yo ni onlo fòs toubònman. Kifè, yonn pé pòté onlo biten ba lòt. Lè yonn ka kolaboré èvè lòt é yonn ka vin zanmi èvè lòt, sa ka ba Jéova glwa é sa ka fè tout lasanblé-la dibyen.