1. Kijan Jézi palé dè Pap’a-y é ka sa ka montré ?

ADAN fanmi a sèwvitè a Jéova, ni Jézi ki sé « prèmyé kréyasyon a Bondyé », é i ni onlo onlo zanj (Kol. 1:15 ; Sòm 103:20). Lè Jézi té asi latè i édé sé moun-la konprann kè yo pé kriyé Jéova Papa. On jou, i té ka palé èvè disip a-y é lè i palé dè Jéova i di : « Pap’an mwen ki sé Pap’a zòt osi » (Jan 20:17). É lèwvwè nou ka ba Jéova vi an nou é nou ka pran lèbatèm, nou ka rantré adan on fanmi ki plen frè é sè adan-y é adan fanmi-lasa, yonn enmé lòt fò (Mawk 10:29, 30).

2. Ka nou ké vwè adan awtik-lasa ?

² Ni sèwten moun ki pa’a rivé vwè Jéova kon on Papa ki enmé timoun a-y. É ni dòt aprézan ki pa’a rivé montré frè é sè a yo kè yo enmé-yo. Adan awtik-lasa, nou ké vwè kijan ègzanp a Jézi ka édé-nou vwè Jéova kon on Papa ki enmé pitit a-y, é kijan nou pé vin bon bon zanmi èvè Jéova. Nou ké vwè osi kè sa enpòwtan kè nou aji èvè frè é sè an nou kon Jéova ka aji èvè yo.

3. Jéova vlé kè nou enmé-y onlo. Kijan priyè-la Jézi ban-nou la ka montré-nou sa ?

³ Jéova enmé pitit a-y é Jézi vlé kè nou vwè Pap’a-y kon li i ka vwè-y. Pou Jézi, Jéova sé on papa ki enmé pitit a-y fò é ki ka mèt-yo alèz. A pa on moun ou pé pa palé èvè-y é sèl biten i sav fè sé komandé. Sé sa nou ka vwè lèwvwè nou ka gadé jan Jézi aprann disip a-y priyé. Prèmyé biten i ka di adan priyè-lasa sé : « Pap’an nou » (Mat. 6:9). Jézi té’é pé di-nou kriyé Jéova « Toupuisan », « Kréyatè » ou « Wa étèwnèl », é i té’é ni rézon pas nou ka touvé tout sé tit-lasa adan Labib é yo k’ay byen èvè Jéova (Jén. 49:25 ; Iz. 40:28 ; 1 Tim. 1:17). Men Jézi té préféré di-nou kriyé Jéova « Papa ».

4. Kijan nou fè sav kè Jéova vlé kè nou rapwoché-nou dè-y ?

 ⁴ Ès ou ni dimal a vwè Jéova kon on Papa ki plen lanmou ? Sé pétèt konsa sèwten adan nou ka vwè sa. Si pap’an nou pa té janti èvè nou, pétèt nou pa’a vwè kijan on papa té’é pé enmé-nou. Men a pa ti byen sa ka fè-nou dibyen dè sav kè Jéova konnèt ègzaktèman sa nou ka rèsanti ! I vé nou vin bon bon zanmi èvè-y. Sé pousa, mi sa i ka ankourajé-nou fè adan Pawòl a-y : « Rapwoché-zòt dè Bondyé, é i ké rapwoché-y dè zòt » (Jak 4:8). Jéova enmé-nou é i ka pwomèt-nou kè i ké on bon Papa pou nou é kè nou pé’é touvé pibon Papa ki-y.

5. Dapré Lik 10:22, kijan Jézi ka édé-nou vin pibon zanmi èvè Jéova ?

⁵ Jézi pé édé-nou vin pibon zanmi èvè Jéova. I konnèt-li byen menm é i ka imité kalité a-y on mannyè ki pawfé. Sé pousa i di : « Sila ki vwè-mwen la vwè Papa-la osi » (Jan 14:9). Kon on gran frè ka fè èvè ti frè a-y, Jézi ka aprann-nou rèspèkté Pap’an nou é i ka aprann-nou kouté-y osi. I ka èspliké-nou ka pou nou fè pou nou pa fè Jéova lapenn é kijan nou pé fè-y plézi. Lè Jézi té asi latè, prèmyé biten i fè sé montré-nou jan Pap’a-y té janti é jan i té plen lanmou (li Lik 10:22). An-nou vwè déotwa ègzanp.

6. Kijan nou fè sav kè Jéova té ka kouté Jézi ? Bay déotwa ègzanp.

⁶Lèwvwè pitit a-y ka palé ba-y, Jéova ka kouté-yo. Pa ègzanp, lè Jézi prèmyé Gason a-y té asi latè, i ni lokazyon priyé Pap’a-y plizyè fwa é a chakfwa Jéova té ka kouté-y (Lik 5:16). Lè i té ni on désizyon enpòwtan a pran, Jézi té ka palé ba Pap’a-y. Pa ègzanp, lèwvwè fò i té chwazi sé 12 apòt-la, i palé ba Jéova é Jéova pran tan kouté-y (Lik 6:12, 13). Lèwvwè Jézi té enkyèt osi, i té ka palé ba Jéova é Jéova té ka kouté-y. Avan Jida té trayi Jézi, Jézi priyé Pap’a-y pou palé-y dè sé difikilté-la i té kay jwenn la é Jéova pran tan kouté-y. A pa kouté Jéova kouté ti Gason a-y  sèlman men i voyé on zanj pou ba-y fòs osi (Lik 22:41-44).

7. Ka ou ka rèsanti difètkè ou sav kè Jéova ka kouté priyè a sèwvitè a-y ?

⁷ Jòdijou osi Jéova ka kouté priyè an nou. I ka atann bon moman-la pou réponn-nou é lè i ka réponn-nou, pa ni pibon répons ki sa (Sòm 116:1, 2). On sè ki ka viv an End vwè kijan Jéova réponn a priyè a-y. I té angwasé bon angwasé la é i té ka priyé Jéova onlo pou i té pé sa édé-y. Mi sa i maké : « Lèwvwè émisyon a JW Télédifizyon a mé 2019 rivé, an rann-mwen kont kè Jéova réponn a priyè an mwen. Émisyon-lasa té ka èspliké kijan on moun pé rivé about a sa ki ka enkyété-y é a sa ki ka angwasé-y. Sé ègzaktèman sa an té bizwen ! »

8. Kijan Jéova montré kè i té enmé Jézi ?

⁸ Jéova enmé-nou é i ka pran swen an nou menmjan i fè-y èvè Jézi lèwvwè i té asi latè (Jan 5:20). I édé Jézi pou fwa a-y rété fò, i ankourajé-y lè i té an difikilté é i fè ansòt pou Jézi té ni tousa i té bizwen pou viv. Jéova té ka di Gason a-y kè i enmé-y é kè i fyèw dè-y (Mat. 3:16, 17). Konm Jézi té sav kè Pap’a-y té enmé-y é kè i té pé konté asi-y toutlè, i pa jen té ka santi-y tousèl (Jan 8:16).

9. Kijan nou fè sav kè Jéova enmé-nou ?

⁹ Jéova ka montré-nou kè i enmé-nou é i ka montré-nou sa diféran mannyè menmjan i fè pou Jézi. Jéova ka pèwmèt-nou vin zanmi èvè-y é i ka ban-nou onlo frè é sè ki toujou la pou nou lè nou bizwen é ki ka mèt onlo jwa an tchè an nou (Jan 6:44). Anplisdisa, i ka ban-nou sa nou bizwen pou fwa an nou pé sa rété solid. É i ka ban-nou tousa nou bizwen pou nou pé sa viv (Mat. 6:31, 32). Pi nou ka sonjé jan Jéova enmé-nou, é pi nou enmé-y fò.

10. Lè nou ka réfléchi asi jan Jéova ka aji èvè frè é sè an nou, ka sa ka pousé-nou fè ?

¹⁰ Jéova enmé frè é sè an nou. Men pétèt kè nou pé ni dimal a enmé-yo é a montré-yo sa. Sé pé pas nou pa lévé menm koté-la oben pas nou pa lévé menmjan-la nonplis. É nouchak ka fè dé biten ki pé fè frè é sè an nou kòlè oben ki pé fè-yo lapenn osi. Men nouchak pé fè on éfò pou yonn enmé lòt pi fò. Kijan nou pé fè sa ? Sé lè nou ka imité Pap’an nou Jéova (Éféz. 5:1, 2 ; 1 Jan 4:19). An-nou vwè ka ègzanp a-y ka aprann-nou.

11. Jéova ni on konpasyon ki plen tandrès pou toutmoun. Kijan Jézi imité-y ?

¹¹Jéova ka aji èvè on « konpasyon ki plen tandrès » èvè toutmoun (Lik 1:78). On moun ki ni konpasyon ka soufè lè i ka vwè lézòt ka soufè ; i ka chèché on mwayen pou édé-yo é konsolé-yo. Jan Jézi té ka aji èvè lézòt té ka montré jan Jéova té ni on konpasyon ki plen tandrès pou yo pas sé imité Jézi té ka imité Pap’a-y (Jan 5:19). On jou, lèwvwè Jézi vwè on foulmoun « sa fè-y lapenn pou yo, pas yo té kòché é yo té adwat-agòch kon mouton ki pa ni bèwjé » (Mat 9:36). Men a pa pityé i té ni pou sé moun-la tousèl, i fè on biten pou soulajé-yo. I géri séla ki té malad la é i konsolé séla ‘ki té las la é ki té ka pòté on chaj ki lou’ (Mat 11:28-30 ; 14:14).

12. Kijan nou pé aji épi konpasyon èvè frè é sè an nou ? Bay on ègzanp.

¹² Pou nou pé sa aji èvè konpasyon èvè frè é sè an nou, fò-nou sav ki difikilté yo ka jwenn. Pétèt kè adan lasanblé an nou ni on sè ki ka goumé èvè on maladi ki grav. I pa’a jen ka plenn-li, men pétèt kè i té’é byen kontan si nou té ka fè on ti biten ba-y. Ès i ka rivé ba fanmi a-y on dèkwa ?  Ès nou té’é pé fè on ti manjé ba-y oben ès nou té’é pé fè on ti biten an kaz-la ba-y ? Pétèt osi ni on frè an lasanblé an nou ki pèd travay a-y, é i po’o touvé on nouvo travay. Ès nou té’é pé ba-y on ti monné pou dépanné-y san i sav kimoun ki fè-y ti kado-lasa ?

13-14. Kijan nou pé montré kè nou donan menmjan ki Jéova ?

¹³Jéova donan (Mat. 5:45). Fò pa nou atann kè frè é sè an nou mandé-nou édé-yo pou nou pé sa aji èvè konpasyon épi yo. Menmjan ki Jéova, an-nou pran douvan lè sé pou fè on biten pou frè é sè an nou. Chakjou Jéova ka fè solèy-la lévé pou noutout é i pa ka atann kè nou mandé-y fè sa. A pa enki moun ki ka di Bondyé mèsi ki ka pwofité dè chalè a solèy-la men sé toutmoun ki ka pwofité dè sa. Mi on bèl prèv ki ka montré kè Jéova enmé-nou mi ! I janti, i donan é i ka ban-nou tousa nou bizwen. Ès sa pa’a ba-w anvi enmé-y ?

¹⁴ Kon Pap’an nou Jéova, onlo adan frè é sè an nou donan é yo toujou paré pou édé lézòt. An-nou pran on ègzanp. An 2013, Tifon Haiyan pasé asi Léfilipin é i fè onlo déga. Onlo Témwen a Jéova pèd kaz a yo é pèd tousa yo té ni. Frè é sè a yo ki tout koté asi latè pòté mannèv pou yo pé sa édé-yo. Onlo adan yo bay on ti lajan oben yo bay on bèl pal pou réparé sé kaz-la. Kifè, an mwens ki on lanné, yo réparé oben yo rèkonstwi 750 kaz apépré ! É pa ni tèlman lontan dè sa, pannan pandémi a Covid-19 la, yonn édé lòt é yonn soutyenn lòt toupatou si latè. Lè nou ka soutyenn frè é sè an nou konsa, sa ka montré kè nou enmé-yo.

15-16. Dapré Lik 6:36, ka pou nou fè pou nou imité Pap’an nou ?

¹⁵Jéova ni onlo mizérikòd é i toujou paré pou padonné-nou (li Lik 6:36). Touléjou Pap’an nou ki an syèl-la ka aji épi mizérikòd èvè nou (Sòm 103:10-14). Jézi osi lèwvwè i té si latè aji èvè mizérikòd épi disip a-y. Konm i té sav kè yo té enpawfè, i pa té ka rété gadé sé érè-la kè yo té ka fè la. I té jou dakò pou bay vi a-y pou Bondyé té pé sa padonné péché an  nou (1 Jan 2:1, 2). Lè nou ka gadé jan Jéova é Jézi ni mizérikòd é jan yo ka padonné-nou, ès sa pa’a ban-nou anvi vin pibon zanmi èvè yo ?

¹⁶ Lè « yonn ka padonné lòt volontyé », nou ka vin enmé frè é sè an nou pi fò é yo osi ka vin enmé-nou pi fò (Éféz. 4:32). Délè, padonné sé on biten ki rèd a fè toubònman. Fò-nou fè onlo éfò pou nou rivé fè sa. On awtik a Tou dè Gad tèm a-y sé « Pardonnons-nous volontiers les uns aux autres * » édé on sè toubònman. Mi sa i maké : « Awtik-lasa édé-mwen konprann kè lè an ka padonné lézòt, sa ka fè-mwen dibyen. I té ka èspliké kè lè ou ka padonné lézòt, sa vé pa di kè ou dakò èvè sa yo fè-w la oben kè sa pa’a fè-w ayen. Okontrè, lè ou ka padonné on moun, ou pa ni-y si tchè ankò é sa ka trankilizé lèspri a-w. » Lè nou ka montré frè é sè an nou kè nou ka padonné-yo volontyé, nou ka montré-yo kè nou enmé-yo é nou ka imité Pap’an nou Jéova.

17. Sèlon Matyé 5:16, kijan nou pé ba Pap’an nou Jéova lonnè ?

¹⁷ A pa ti kontan nou kontan davwa nou adan on fanmi a frè é sè ki ka rété toupatou asi latè é ki ni lanmou yonn pou lòt ! Nou anvi kè on maksimòm dè moun vin jwenn-nou pou nou adoré Jéova ansanm-ansanm. Sé pousa, fò nou fè atansyon pou nou pa sali répitasyon a Jéova oben ta pèp a-y. Alò, an-nou fè tousa nou pé pou nou ni on bon konduit. Konsa, nou ké ba onlo moun anvi kouté bon nouvèl a Wayòm-la (li Matyé 5:16).

18. Ka ki pé ban-nou kouraj pou nou pé sa préché ?

¹⁸ Dépawfwa, ni sèwten moun ki pé ka kritiké-nou oben ki ka pèwsékité-nou pas nou ka fè sa Pap’an nou ki an syèl-la ka mandé-nou fè. Men imajiné nou anvi palé dè sa Pawòl a Bondyé ka di é kè nou on ti jan pè. Ka pou nou fè ? Nou pé sèten kè Jéova é Jézi ké édé-nou. Jézi té di disip  a-y kè yo pa bizwen pran tèt a yo pou sav sa yo ké di é jan yo ké di-y. Poukwa ? Pas mi sa i di-yo : « Zò ké sav ka pou zò di lè lè-la ké rivé. Pas a pa zòt tousèl ki ka palé, men sé lèspri a Pap’a zòt ki ka sèvi èvè zòt pou i palé » (Mat. 10:19, 20).

19. Ka ki édé Robert préché èvè kouraj ?

¹⁹ An-nou palé tibwen dè Robert. Ni déotwa lanné dè sa, alòskè i té sòti koumansé étidyé é kè i pa té konnèt granzafè asi Labib, fò i té pasé douvan tribinal an Afrik di Sid. I pran kouraj a-y a 2 men é i èspliké-yo kè i pa té vé mélanjé-y adan zafè a politik pas i té enmé frè é sè a-y. I di-yo kè i té kontan pas i ni enpé frè é sè toupatou asi latè. Men yonn adan sé jij-la mandé-y : « Kimoun ki sé frè é sè a-w ? » Robert pa té ka atann-li a kèsyon-lasa. Men onfwamenm Jéova fè-y sonjé tèks-di-jou-la i té fè la. Sé té Matyé 12:50 ki ka di : « Pas kèlkèswa moun la ki ka fè volonté a Pap’an mwen ki an syèl-la, sé moun-lasa ki frè an mwen, ki sè an mwen oben ki manman-mwen. » Menmsi sa pa té ka fè lontan kè Robert té ka étidyé Labib, lèspri sen a Jéova édé-y réponn a kèsyon-lasa é a onlo dòt kèsyon i pa té sav kè yo té’é pozé-y. A pa ti kontan Jéova dwèt té kontan Robert ! Nou osi, nou pé touvé-nou adan on sitiyasyon difisil men lè nou ka apiyé-nou asi Jéova pou préché èvè kouraj, i fyèw dè nou.

20. Ka pou nou byen désidé a fè ? (Jan 17:11, 15).

²⁰ Nou adan on fanmi ki plen frè é sè toupatou si latè é yonn enmé lòt fò toubònman. Fò-nou toujou ni onlo rèkonésans pousa. Nou ni méyè Papa ki tini é nou ni onlo frè é sè ki enmé-nou. Fò-nou toujou ba sa onlo valè pas Satan é bannélo a-y hay-nou ; yo ké éséyé mèt dout an tèt an nou pou fè-nou kwè kè Pap’an nou ki an syèl-la pa enmé-nou. Yo ké éséyé osi mèt zizanni adan pèp a Jéova. Men érèzman Jézi priyé ban nou é i mandé Pap’a-y jété on zyé asi nou pou nou pé sa rété soudé (li Jan 17:11, 15). É Jéova réponn a priyè a-y. Alò menmjan ki Jézi, fò-nou sèten kè Pap’an nou ki an syèl-la enmé-nou é kè i ké toujou la pou soutyenn-nou. É fò-nou byen désidé a vin pibon zanmi ankò èvè frè é sè an nou ki adan fanmi a Jéova !