1-2. Poukwa fò-nou entérésé-nou a istwa a Sanson ?

 LÈWVWÈ ou ka tann « Sanson », ka ki ka vin an lèspri a-w ? Pétèt ou ka sonjé on moun ki té ni onlo onlo fòs. É sé vré, yo té konnèt Sanson pas i té ni onlo fòs. Men ès ou sav kè i pran on mové désizyon adan vi a-y é sa fè-y soufè toubònman ? Magrésa, sa Jéova té ka gadé, sé tout sé bon biten-la Sanson fè la pou sèvi-y. É pou Jéova, Sanson sé té on moun ki té fidèl. I jous palé dè-y adan Labib pou ègzanp a-y sèvi-nou.

² Jéova sèvi èvè Sanson pou i té fè onlo biten ki té èstraòwdinè toubònman pou pèp a-y Izrayèl. Plizyè santenn lanné apré Sanson mò, Jéova voyé lèspri sen a-y anlè lapòt Pòl pou i té maké non a Sanson adan on lis a misyé é madanm ki té ni onlo fwa (Ébr. 11:32-34). Ègzanp a Sanson pé itil ban nou toubònman pas i fè Jéova konfyans, menm lèwvwè i jwenn dé sitiyasyon ki té rèd menm. An-nou vwè kijan ègzanp a-y pé ankourajé-nou é ka nou pé aprann dè sa i viv.

3. Ki misyon Jéova ba Sanson ?

³ Lèwvwè Sanson fèt, sé sé Filisten-la ki té ka menné an Izrayèl é yo té ka fè pèp-la vwè bon mizè (Jij 13:1). Sé Izraélit-la té ka soufè onlo pas sé Filisten-la té méchan toubònman. Alò Jéova chwazi Sanson pou i « sové Izrayèl anba men a sé Filisten-la » (Jij 13:5). Aaa sèlman, misyon-lasa pa té senp ! Alò fò Sanson té fè Jéova konfyans pou i té rivé an bout a misyon-lasa.

4. Lèwvwè Sanson té Léyi, kijan Jéova délivré-y anba men a sé Filisten-la ? (Jij 15:14-16).

 ⁴ Sanson té ka fè Jéova konfyans é i té ka konté asi èd a-y. An-nou vwè on ègzanp ki ka montré-nou sa. On jou, lawmé a sé Filisten-la vin adan vil a Léyi. I ka sanm sa vil-lasa té ka touvé-y an Jida. Yo té vin la pou yo té pé sa tchenbé Sanson. Sé boug-Jida la trapé pè. Pwòp konpatriyòt a Sanson désidé kè yo kay tchenbé-y é kè yo kay menné-y pou sé lènmi-la. Yo maré-y èvè dé kòd ki té tou nèf é yo menné-y ba sé Filisten-la (Jij 15:9-13). Men lèspri a Jéova ba Sanson bon fòs é i réyisi libéré-y. Aprésa, « i touvé machwa a on boukèt ki té mò pa té ni tèlman lontan » é i sèvi èvè sa pou tchouyé 1 000 Filisten ! (li Jij 15:14-16).

5. Ka ki ka montré kè Sanson té ka fè Jéova konfyans ?

⁵ Sanson sèvi èvè machwa a on boukèt pou tchouyé lènmi a-y. Poukwa sé èvè sa i sèvi ? Sèten sé pas i té sav kè a pa zàm-la i té’é sèvi èvè-y la ki té’é konté, men sé Jéova ki té’é fè-y gangné-yo. Alò, konm i té ni onlo fwa, i sèvi èvè sa ki té anba men a-y pou fè volonté a Jéova. Si i rivé tchouyé tousa Filisten sé pas i té ka fè Jéova konfyans.

6. Lèwvwè Jéova ka mandé-nou fè on biten, kijan istwa a Sanson pé ankourajé-nou ?

⁶ Nou osi, Jéova pé ban-nou fòs-la nou bizwen la pou nou fè tousa i ka mandé-nou fè, menmsi nou ni lenprésyon kè nou pé’é jen rivé fè sèwten biten. Délè, i ké fè sa on mannyè nou pa té’é jen imajiné. Ou pé sèten kè toutotan ou ké ka fè Jéova konfyans, i ké rann-vou fò é i ké édé-w fè volonté a-y kon i fè-y pou Sanson (Pwov. 16:3).

7. Bay on ègzanp ki ka montré kè sa enpòwtan kè nou lésé Jéova gidonné-nou ?

⁷ Onlo frè é sè ki té ka bay on pal pou konstwi batiman pou adoré Jéova montré kè yo té ka fè-y konfyans. Kijan yo montré sa ? Avan, sé sé frè é sè la ki té ka konstwi lamajorité a batiman ki fèt pou adoré Jéova. Men pi tan ka pasé é pi ni moun ki ka pran lèbatèm, alò fò lòwganizasyon té fè sèwten chanjman. Kifè sé frè-la ki an tèt a  òwganizasyon-la priyé pou Jéova té ba-yo on dirèksyon, é yo éséyé dé nouvo métòd. On métòd yo touvé sé achté batiman ki ja konstwi é ranjé-yo pou yo vin nèf. Robert, sé on frè ki travay asi plizyè pwojé a konstriksyon sé dènyé lanné-la ki pasé la é sé pwojé-lasa té diféran koté asi latè. Mi sa i ka èspliké : « Odépa, ni sèwten frè é sè ki té ni dimal a aksèpté nouvo métòd-lasa pas sa té vréman diféran dè sa nou té ni labitid fè dépi plizyè lanné. Men sé frè-la té paré a adapté-yo é yo vwè an 2 zyé a yo kè Jéova té ka béni sé chanjman-lasa. » Sa sé on ti ègzanp ki ka montré kijan Jéova ka dirijé pèp a-y pou réyalizé pwojé a-y. Sé pousa, dè tanzantan mi sa pou nou mandé-nou : « Ès an ka lésé Jéova gidonné-mwen, é lè sa nésésè, ès an paré a fè kò èvè sèwten chanjman ? »

8. On jou, Sanson té swèf bon swèf la, ka i fè ?

⁸ Pétèt ou ka sonjé dòt biten èstraòwdinè Sanson fè. Pa ègzanp, i tchouyé on liyon enki èvè 2 men a-y é aprésa, i tchouyé 30 Filisten adan vil a Askalon (Jij 14:5, 6, 19). I té ka fè dé biten ki té èstraòwdinè toubònman men i té sav kè i pa té’é jen rivé fè sa si Jéova pa té ka édé-y. Nou ka vwè sa byen adan jan-la i réyaji la apré i té tchouyé sé 1000 Filisten-la. I té swèf toubònman men olyé i té konté asi-y menm pou i té pé sa touvé dlo, i mandé Jéova sové-y (Jij 15:18).

9. Lèwvwè Sanson sipliyé Jéova, kijan i réponn a priyè a-y ? (Jij 15:19).

⁹ Sanson sipliyé Jéova é Jéova réponn-li. Pou sa, i fè on mirak. I fè on sous dlo sòti an tè-la. Apré Sanson bwè bon tibwen dlo, « sa wouba-y fòs é sa wouba-y kouraj » (li Jij 15:19). Plizyè lanné apré, lèwvwè pwofèt Samiyèl maké liv a Jij, i ka sanm sa sous dlo lasa té ka ègzisté toujou. Dlo a sous-lasa té ka fè sé Izraélit-la sonjé kè sèwvitè a Jéova pé fèfon asi-y lèwvwè yo ka pran gaz.

10. Ki biten pou nou fè si nou vé Jéova édé-nou ? (gadé imaj-la osi).

¹⁰ Nou osi, fò-nou mandé Jéova édé-nou kèlkèswa kapasité an nou oben kèlkèswa biten-la nou ja fè ba-y la. Fò-nou rèkonnèt limit an nou é fò-nou rèkonnèt kè sé enki pas nou ka fèfon asi Jéova nou ka rivé fè sa i ka mandé-nou. Sanson woupran fòs lè i bwè dlo-la Jéova ba-y la. Nou osi nou ké woupran fòs pou nou kontinyé sèvi Jéova siwvwè nou ka aksèpté sa Jéova ka fè ban-nou pou nou rété fidèl a-y (Mat. 11:28).

11. Kijan nou pé montré kè nou ka fèfon asi Jéova pou édé-nou, é ka on frè é madanm a-y ka fè ?

¹¹ An-nou palé dè Aleksey, on frè ki ka rété an Risi. Yo ka pèwsékité-y rèd menm. Ka ki ka édé-y andiré sé pèwsékisyon-lasa ? Li é madanm a-y pran labitid étidyé é fè étid familyal a yo. Mi sa i ka di : « An toujou ka étidyé tousèl an mwen é an toujou ka li Bib an mwen touléjou. An ka éséyé pa pèd sé labitid-lasa. Toulématen, an ka fè tèks-di-jou-la èvè madanm an mwen é nou ka priyé Jéova ansanm. » Ka ègzanp a Aleksey ka aprann-nou ? Olyé nou konté asi noumenm, simétan nou konté asi Jéova. Fò-nou kontinyé fè dé biten ki ké konsolidé fwa an nou. Pa ègzanp, nou pé étidyé Bib an nou, priyé, vin an réinyon é préché chak simenn. Lè Jéova ké vwè éfò an nou, i ké vidé onpakèt bénédisyon asi nou. Menmjan i ba Sanson fòs, sé konsa i pé ban-nou fòs osi.

12. a) Ki mové désizyon Sanson pran ? b) An ki sans sa ki té ka pasé ant Sanson é Dalila té diféran dè sa ki pasé èvè Filistin-la é èvè pwòstitiyé-la ?

¹² Sanson té enpawfè kon nou, kifè, délè i pran mové désizyon é ni on désizyon i pran ki fè-y soufè toubònman. Alòskè pannan on tan, i travay antankè jij, i vin touvé-y enmé on madanm ki té ka viv adan ravin a Sorèk. Non a madanm-lasa sé té Dalila (Jij 16:4). Tibwen tan avan, i té fiyansé èvè on madanm filistin men sé ‘Jéova ki té dèyè do a sa’. An réyalité, ‘Jéova té ka chèché on mwayen pou okipé-y dè ka a sé Filisten-la’. Aprésa, i rété déotwa zèdtan koté on pwòstitiyé ki té ka rété Gaza, on vil a Lafilisti. Sé jou-lasa Jéova ba Sanson fòs pou i raché pòt a vil-lasa é pou i menné sé pòt-la lwen lwen lwen. Kifè sé moun-la ki té ka rété adan vil-lasa pa té pé pwotéjé-yo kon avan ankò (Jij 14:1-4 ; 16:1-3). Pawkont, lè Sanson vin enmé Dalila, a pa té menm biten-la pas pétèt madanm-lasa té izraélit.

13. Davwa Sanson fè Dalila konfyans, adan ki mové sitiyasyon i mèt kò a-y ?

¹³ Sé Filisten-la pwopozé Dalila ba-y on koko lajan siwvwè i té ka trayi Sanson. Dalila aksèpté. Poukwa Sanson pa pran prékosyon a-y èvè-y ? Pétèt tèlman i té enmé Dalila, i pa té ka rivé vwè sa i té ni lentansyon fè. Antouka, Dalila té ka mèt présyon asi Sanson toutlè pou i té di-y ola i té ka pran fòs-lasa é Sanson fin pa di-y toutbiten-la. Malérèzman, Sanson mèt kò a-y adan on mové sitiyasyon. Kifè, pannan on moman, i pèd fòs-la i té ni la é i pèd favè a Jéova (Jij 16:16-20).

14. Ka ki rivé Sanson davwa i fè Dalila konfyans ?

 ¹⁴ Konm Sanson fè Dalila konfyans olyé i té fè Jéova konfyans, i soufè onlo menm. Sé Filisten-la kenbé-y, yo pati èvè-y é yo krévé 2 zyé a-y. Yo mété-y lajòl a Gaza dirèktèman la Sanson té woté sé pòt a vil-la é i té ka sèvi-yo èsklav pou krazé grenn a séréal. Aprésa, yo fè on fèt pou dyé a yo Dagon. Konm pou yo, sé grasa Dagon si yo té rivé kenbé Sanson, yo fè on gran sakrifis pou dyé-lasa. Alò, yo fè Sanson sòti lajòl pou yo fè jé èvè tèt a-y é pou i anmizé-yo (Jij 16:21-25).

15. Ka ki ka montré kè Sanson woukoumansé fè Jéova konfyans ? (Jij 16:28-30 ; gadé imaj-la ki anlè po a jounal-la).

¹⁵ Sanson fè on fòt grav men i woupran doubout a-y é i kontinyé sèvi Jéova. I gadé pou vwè kijan i té’é pé goumé èvè sé Filisten-la pas sé travay-lasa Jéova té ba-y fè (li Jij 16:28-30). Sé pousa Sanson sipliyé Jéova. Mi sa i di-y : « Lésé-mwen vanjé-mwen asi sé Filisten-la. » Vré Dyé-la réponn a priyè a-y é i wouba-y fòs-la i té ni la avan. Jou-lasa, Sanson tchouyé onlo Filisten é sé prèmyé fwa i té ka tchouyé tousa Filisten.

16. Ka fòt-la Sanson fè la pé aprann-nou ?

¹⁶ Menmsi Sanson soufè onlo akòz dè fòt-la i fè la, i pa jen arété fè volonté a Jéova. Menmjan-la, si nou ka fè on fòt é kè yo ka korijé-nou oben kè akòz dè sa, nou ka pèd on rèsponsabilité, fò-nou kontinyé fè volonté a Jéova. Fò pa nou jen oubliyé kè Jéova ka padonné volontyé (Sòm 103:8-10). Menmsi nou ja fè sèwten érè, fò-nou sèten kè Jéova pé sèvi èvè nou toujou kon i fè-y èvè Sanson.

17-18. Poukwa ègzanp a Michael ka ankourajé-w ? (gadé imaj-la osi).

¹⁷ An-nou palé dè on jennfrè non a-y sé Michael. I té byen okipé ka sèvi Jéova ; i té asistan adan lasanblé a-y é i té pyonyé. Men malérèzman, i fè on érè kifè i pèd sé rèsponsabilité-la i té ni la adan lasanblé-la é i pa té pyonyé ankò. Mi sa i ka di : « An té ka pòté bon mannèv adan lasanblé-la é lèwgadé tout biten enn arété. Men an pa jen mèt an tèt an mwen kè Jéova té’é lagé-mwen. Pawkont an té ka mandé-mwen si on jou an té’é wouvin bon zanmi èvè-y kon avan oben si an té’é pé fè tousa an té ka fè ba-y adan lasanblé-la kon avan. »

 ¹⁸ Michael byen réyaji, i pa lagé. Mi sa i ka di ankò : « An fè tousa an té pé pou an vin pibon zanmi èvè Jéova. An toujou té ka wouvè tchè an mwen ba-y lèwvwè an té ka priyé-y. An té ka étidyé é an té ka pran tan réfléchi asi sa an té ka étidyé. » Piti-a-piti, Michael vin ni on bon répitasyon kon avan adan lasanblé-la. Jòdijou, i ansyen é i pyonyé pèwmanan. Mi sa i ka di : « Sé frè é sè la é sé ansyen-la an pawtikilyé ankourajé-mwen é yo soutyenn-mwen. Sa édé-mwen konprann kè Jéova enmé-mwen toujou. Konnyéla, an pé sèvi Jéova adan lasanblé an mwen èvè on konsyans ki nèt. Sa an viv la montré-mwen kè Jéova ka padonné tout moun ki ka rèpanti-yo èvè tout tchè a yo. » Si nou fè on érè men kè nou ka fè tousa nou pé pou nou chanjé mové konpòwtasyon an nou, é kè nou ka kontinyé fèfon asi Jéova, nou pé sèten kè i ké kontinyé sèvi èvè nou é kè i ké kontinyé béni-nou (Sòm 86:5 ; Pwov. 28:13).

19. Kijan ègzanp a Sanson ba-w fòs ?

¹⁹ Adan awtik-lasa, nou ègzaminé déotwa ti mòso a vi a Sanson ki vréman entérésan. Sé vré, Sanson pa té pawfè men i pa jen arété fè éfò pou sèvi Jéova. I kontinyé fè sa menm apré fòt-la i fè la akòz dè Dalila. Apré évènman-lasa, Jéova kontinyé sèvi èvè-y. I sèvi èvè-y pou fè on biten ki té èstraòwdinè. Pou Jéova ayen pa té chanjé, Sanson sé té on boug ki té ni onlo onlo fwa. É dayè, plita, i fè-yo maké non a-y adan on lis ki ni yenki sèwvitè ki fidèl adan. Nou ka touvé lis-lasa an Ébré chapit 11. Bondyé-la nou ka sèvi la sé on Papa ki plen lanmou é ki vlé ban-nou fòs siwtou lè nou ka jwenn difikilté é kè nou bizwen i édé-nou. Lè nou sav sa, a pa ti kouraj sa ka ban-nou ! Alò, kon Sanson, an-nou sipliyé Jéova é an-nou mandé-y : « Tanprisouplé, sonjé-mwen é ban-mwen fòs » (Jij 16:28).