1. Lè Pyè vwè mirak-la Jézi fè la, ka i rèsanti ?

 PYÈ rété ka péché pwason tout lannuit-la men i pa trapé ayen. Lèwgadé Jézi ka mandé-y on biten ki ka siwprann-li. Mi sa i ka di-y : « Ay la dlo-la fon la, é lagé filèt a zòt pou péché » (Lik 5:4). Pyè pa sèten kè i ké trapé pwason men i ka fè sa Jézi mandé-y kanmenm. É ka ki fèt ? Li é sé boug-la ki té èvè-y la trapé tèlman pwason kè sé filèt-la koumansé chiré. Mésyé ! Lè yo vwè sa, yo pran pè. Yo rann-yo kont kè Jézi té sòti fè on mirak. Alò mi sa Pyè di-y : « Ségnè, sòti owa mwen, pas an sé on moun ki ka fè onlo péché » (Lik 5:6-9). I ka sanm sa Pyè té ni lenprésyon kè on moun kon-y pa té mérité rété owa Jézi.

2. Ka ègzanp a Pyè ka aprann-nou ?

² Pyè té ni rézon. I té ‘on nonm ki ka fè péché’. Labib ka montré kè délè i di oben i fè dé biten é aprésa i règrété sé biten-lasa. É vou, ès sa ja rivé-w ? Ès ou ka goumé èvè on défo oben èvè on vyé manni ? Si sé ka a-w, ègzanp a Pyè pé ankourajé-w. Réfléchi asi sa : Yo pa té oblijé palé dè sé défo-la Pyè té ni la adan Labib, men si yo ka palé dè sa sé pas sa pé itil pou nou (2 Tim. 3:16, 17). Lè nou ka vwè èvè kibiten Pyè té ka goumé, sa ka montré-nou kè Jéova pa ka mandé-nou vin dé moun ki pawfè. I vé kè nou kontinyé tchenbé é kè nou kontinyé goumé èvè défo an nou.

3. Poukwa fò pa nou lagé ?

³ Poukwa sa enpòwtan kè nou pa lagé ? Pas byensouvan, pi nou ka kontinyé fè on biten, pi nou ka pwogrésé. An-nou vwè on ègzanp. Lè on moun bizwen aprann jouwé piyano, sa pé pran-y plizyè lanné. Pannan péryòd-lasa, pétèt lèwvwvè i ké ka jouwé, son-la pé’é tèlman bèl. Men si i ka kontinyé jouwé  kanmenm, i ké pwogrésé. É menm lè kò a-y ké bon adan sa, sa pé rivé kè i fè on érè. Lèwvwè sa ké rivé, i pé’é lagé. I ké chèché a vwè ka i pé fè pou i vin pibon adan domenn-lasa. Menmjan-la, pétèt nou arété fè on mové biten é pou nou pwoblèm-lasa té ja réglé é lèwgadé nou ka viré fè menm biten-la. Ès nou ké lagé ? Awa ! Délè, noutout nou ka di oben nou ka fè dé biten é aprésa nou ka règrété sa. Men si nou ka kontinyé fè éfò, Jéova ké édé-nou pou nou kontinyé pwogrésé (1 Pyè 5:10). Adan awtik-lasa, nou ké vwè kijan lapòt Pyè pa lagé. Lèwvwè nou ké vwè jan Jézi aji èvè konpasyon épi-y menmsi i té ni défo, sa ké ban-nou anvi kontinyé sèvi Jéova.

4. Dapré Lik 5:5-10, lè Pyè palé dè limenm, ka i di é kijan Jézi rasiré-y ?

⁴ Labib pa ka di poukwa Pyè di kè i « sé on moun ki ka fè onlo péché » é i pa ka di nonplis dè ki péché i té ka palé (li Lik 5:5-10). Pétèt i té ja fè dé biten ki té grav. Jézi té sav kè Pyè té pè pas pétèt an tchè a-y Pyè té ka di : « An pa on bon moun ». Men Jézi té sav osi kè i té pé rété fidèl a-y. Alò sé pousa i di-y èvè onlo jantiyès : « ou pa bizwen pè ankò. » Jézi fè Pyè konfyans é sa chanjé vi a-y. Pyè é André té maren-péchè men aprésa yo lagé travay-la yo té ka fè la pou suiv Mési-la é yo pa jen arété suiv-li. É konm sé sa yo désidé fè, Bondyé vidé onpakèt bénédisyon asi yo (Mawk 1:16-18).

5. Lèwvwè Pyè rivé about a sa ki té ka fè-y pè é kè i aksèpté envitasyon a Jézi, ki bénédisyon i risivwè ?

⁵ Konm i té ka maché èvè Jézi, Pyè viv dé biten ki té èstraòwdinè toubònman. I vwè Jézi géri moun ki té malad, i vwè-y woté démon asi moun é i jous vwè-y résisité moun ki té mò b (Mat. 8:14-17 ; Mawk 5:37, 41, 42). Anplisdisa, adan on vizyon, i vwè glwa-la Jézi té’é ni la adan Wayòm-la é sa touché-y onlo (Mawk 9:1-8 ; 2 Pyè 1:16-18). Si i pa té vin disip a Jézi, i pa té’é jen vwè sé biten-lasa. A pa ti kontan i dwèt té kontan davwa i pa lagé menmsi i té ka pansé kè i pa té on bon moun ! Grasa sa, i risivwè onpakèt bénédisyon.

6. Ès sé an détwa jou Pyè rivé about a sé défo-la i té ni la ? Bay on ti èsplikasyon.

⁶ Magré tousa i vwè é tousa i tann, fò Pyè té kontinyé goumé èvè défo a-y. An-nou vwè déotwa ègzanp. Lèwvwè Jézi di kè i té kay soufè é kè i té kay mò kon sé pwofési-la té ka di, Pyè woupran-y (Mawk 8:31-33). A plizyè  rèpriz, li é sélézòt apòt-la fè kòlè pas yo té vé sav kilès adan yo ki té pi gran (Mawk 9:33, 34). Dènyé lannuit a Jézi asi latè, Pyè aji san réfléchi é i koupé zorèy a on boug (Jan 18:10). Menm jou-la, i lésé lapè pran lanmen asi-y é i rènyé Jézi, zanmi a-y, a 3 rèpriz (Mawk 14:66-72). Kifè, aprésa i pléré gwodlo (Mat. 26:75).

7. Apré Jéova résisité Jézi, ki posibilité Jézi ba Pyè ?

⁷ Lapòt Pyè té dékourajé men Jézi pa lagé-y. Apré Bondyé résisité Jézi, Jézi mandé-y pran swen a ti mouton a-y èvè onlo imilité. Lèwvwè Jézi fè sa, i ba lapòt Pyè lokazyon montré-y kè i té enmé-y (Jan 21:15-17). Ès Pyè aksèpté misyon-lasa ? Asiré pa pétèt ! Dayè jou a Lapannkòt, i té a Jérizalèm é lèwvwè Jéova voyé lèspri sen a-y asi sèwten moun pou yo vin wen, i té pawmi sé prèmyé moun-la.

8. Pyè fè on gwo érè lè i té Antyòch. Ki érè ésa ?

⁸ Menm lèwvwè Jéova voyé lèspri sen a-y asi Pyè pou i vin wen, i kontinyé goumé èvè défo a-y. An 36 a épòk an nou, Jéova voyé lèspri sen a-y asi Kòwnèy. Sé té on boug ki pa té juif é ki pa té siwkonsi. Lèfètkè Jéova voyé lèspri sen a-y asi boug-lasa, sa té ka montré kè « Bondyé pa ka fè préférans » é kè moun ki pa té juif té pé fè pawti a lasanblé krétyèn la (Akt 10:34, 44, 45). Pyè té la lèwvwè sa fèt. Dayè, aprésa i santi-y alèz pou i té pé sa manjé èvè dé moun ki pa té juif alòskè avan sa sé on biten i pa té’é jen fè (Gal. 2:12). Men pou sèwten krétyen ki té juif, fò pa on Juif té manjé èvè moun ki pa juif. Lèwvwè sèwten frè ki té juif vin a Antyòch, lapòt Pyè arété manjé èvè sé frè-la ki pa té juif la pas i té pè kè sé frè-la ki té juif la té mal pran sa. Lapòt Pòl vwè jan i té ka aji é i touvé sa ipokrit. Alò i di-y sa douvan toutmoun (Gal. 2:13, 14). Men magré Pyè fè éré-lasa, i kontinyé fè douvan. Ka ki édé-y ?

9. Jan 6:68, 69 ka montré kè Pyè sé té on moun ki té fidèl. Kijansa ?

⁹ Pyè sé té on moun ki té fidèl. I pa lésé ayen anpéché-y suiv Jézi. Pa ègzanp, on jou i montré kè i té fidèl lèwvwè Jézi di on biten kè disip a-y pa konprann (li Jan 6:68, 69). Lèwvwè sa fèt, ni onlo moun ki arété suiv Jézi. Yo pa menm chèché a sav ka i té vé di pa la oben yo pa menm atann kè Jézi èspliké-yo sa nonplis. Men Pyè pa fè sa. I rèkonnèt kè sé Jézi tousèl ki té « ni pawòl ki ka bay lavi étèwnèl ».

10. Kijan Jézi montré Pyè kè i té ka fè-y konfyans ? (gadé imaj-la osi).

¹⁰ Jézi pa lagé Pyè. Dènyé lannuit-la Jézi pasé asi latè la, Jézi té sav kè Pyè é sélézòt apòt-la té’é lagé-y. Men magrésa, i montré Pyè kè i té ka fè-y konfyans, i di-y kè i té sèten kè i té’é woupran doubout a-y é kè i té’é rété fidèl a-y (Lik 22:31, 32). Jézi té sav byen kè « lèspri-la cho-cho men chè-la fèb » (Mawk 14:38). Sé pousa, menm apré Pyè té di moun kè i pa konnèt Jézi ni an blan ni an nwè, Jézi pa lagé-y. Apré Jéova té résisité Jézi, Jézi parèt douvan Pyè é i ka sanm sa a moman-lasa, Pyè té tousèl (Mawk 16:7 ; Lik 24:34 ; 1 Kor. 15:5). Pyè té tris akòz dè sa i té fè. Alò nou ka tou konprann kijan sa dwèt ankourajé-y !

11. Jézi ba Pyè lagaranti kè Jéova té’é soutyenn-li. Kijan i fè sa ?

¹¹ Jézi ba Pyè lagaranti kè Jéova té’é soutyenn-li. Apré Jéova té résisité Jézi, Jézi woufè on mirak pou i té pèwmèt lapòt Pyè é dòt apòt ankò péché onlo onlo pwason  (Jan 21:4-6). Sèten mirak-lasa rasiré Pyè é sa montré-y kè Jéova té’é pé pran swen a-y san pon pwoblèm. É pétèt sa fè-y sonjé sa Jézi té di asi Jéova lèwvwè i té di-y kè Jéova té’é ba moun ki ka ‘chèché wayòm a Bondyé an prèmyé’ tousa yo té’é bizwen (Mat. 6:33). Sa ba Pyè balan pou i té mèt prédikasyon-la prèmyé douvan an vi a-y olyé i té mèt antrèpriz a pèch a-y prèmyé douvan. Lèwvwè jou a Lapannkòt 33 rivé, i préché èvè onlo kouraj é grasa sa, milyé é milyé moun aksèpté bon nouvèl-la (Akt 2:14, 37-41). Aprésa, i édé sé Samariten-la é sé moun-la ki pa té juif la aprann konnèt Jézi é suiv-li osi (Akt 8:14-17 ; 10:44-48). On biten ki sèten, Jéova sèvi èvè Pyè pou édé tout kalté moun vin adan lasanblé-la.

12. Ègzanp a Lapòt Pyè pé édé-nou si nou ka goumé èvè menm tandans-la dépi bon tibwen tan. Kijansa ?

¹² Jéova pé édé-nou pou nou pa lagé. Men sa pa toujou fasil siwtou lèwvwè sa ka fè bon tibwen tan kè nou ka goumé èvè menm tandans-la. Pyè goumé èvè sé tandans-la i té ni la, men délè nou pé ni lenprésyon kè fò-nou goumé èvè dé biten ki pi rèd ki sa. Adan on ka konsa, Jéova pé ban-nou fòs-la nou bizwen la pou nou fè douvan (Sòm 94:17-19). An-nou pran on ègzanp. Avan i té vin konnèt lavérité, on frè té enmé misyé é i té ni mové tandans-lasa dépi bon enpé lanné. Grasa lavérité, i arété fè péché sèksyèl. Vi a-y chanjé bout-pou-bout. Pannan on tan, fò i té kontinyé goumé èvè sé mové lanvi-la i té ni la men i pa lagé. Ka ki édé-y fè sa ? Mi sa i ka èspliké : « Jéova ka ban-nou fòs. » É mi sa i ka di ankò : « Grasa lèspri sen a Jéova, an rivé konprann kè on moun pé kontinyé viv kon Jéova ka mandé […] Jéova itilizé-mwen é […] menmsi an enpawfè, i ka kontinyé ban-mwen bon fòs. »

13. Kijan nou pé imité Pyè ? (Akt 4:13, 29, 31 ; gadé imaj-la osi).

¹³ Kon nou vwè-y, Pyè mal aji a plizyè rèpriz pas i té pè moun. Men lèwvwè i fèfon asi Jéova é asi fòs-la Jéova ka bay la, i mété-y ka aji èvè onlo kouraj (li Akt 4:13, 29, 31). Nou osi, nou pé rivé about a sa ki ka fè-nou pè. Sé sa on frè non a-y sé Horst konstaté. I té ka viv an Almagn pannan 2^èm Gè mondyal la. An tan-lasa, fò sé moun-la té sèvi èvè on  èksprésyon ki té vé di « Hitler ka sové-nou. » Magré Horst té sav kè sa yo té ka di la pa té bon, souvantfwa i té ka fè kon yo pas i té pè sé pwofésè a-y la é sé kanmarad-lékòl a-y la. Men olyé fanmi a-y tonbé an zo a-y, yo mèt-yo ka priyé èvè-y. Yo té ka mandé Jéova ba-y kouraj. Grasa èd-la fanmi a-y ba-y la é konm limenm té ka konté asi Jéova, Horst rivé touvé fòs pou i pa té lésé présyon-la yo té ka mèt asi-y la pran lanmen asi-y. Kèlkè tan apré, mi sa i di : « Jéova pa jen lagé-mwen c. »

14. Kijan sé bèwjé-la ki ka pran swen a lasanblé-la pé rasiré séla ki dékourajé la ?

¹⁴ Jéova é Jézi pé’é lagé-nou. Apré Pyè té rènyé Jézi, fò i té pran on désizyon enpòwtan. Ès i té’é arété suiv Jézi oben ès i té’é kontinyé fè éfò pou suiv-li ? Jézi té sipliyé Jéova pou fwa a Pyè pa té fébli. Anplisdisa, Jézi té di Pyè kè i té priyé ba-y é i té di-y osi jan i té sèten kè apré tousa ki té’é pasé, i té’é ni fòs pou ankourajé sélézòt-la (Lik 22:31, 32). Sèten lè Pyè té ka sonjé sé pawòl-lasa, sa té ka rasiré-y ! Lèwvwè nou ni on désizyon enpòwtan a pran, Jéova pé sèvi èvè bèwjé a lasanblé-la ki plen lanmou pou rasiré-nou é pou édé-nou rété fidèl a-y (Éféz. 4:8, 11). An-nou palé dè on frè non a-y sé Paul. Sa ka fè onpakèt lanné kè i ansyen é i ka éséyé rékonfòwté frè é sè a-y kon Jézi fè èvè Pyè. Lèwvwè i ka jwenn frè é sè ki dékourajé, i ka ankourajé-yo fè on ti réfléchi pou yo pé sa sonjé jan Jéova fè-yo vin a lavérité. Aprésa, i ka èspliké-yo kè konm Jéova sé on Bondyé ki ni on lanmou ki fidèl, i pé’é jen lagé-yo. Mi sa i ka di : « An ni lokazyon vwè onlo frè é sè ki té dékourajé kontinyé fè douvan pas Jéova ka soutyenn-yo. »

15. Kijan ègzanp a Pyè é ègzanp a Horst ka montré-nou kè sa Matyé 6:33 ka di sé lavérité ?

 ¹⁵ Jéova pran swen a Pyè é a sélézòt apòt-la é i ké fè menm biten pou nou osi siwvwè nou ka mèt prédikasyon-la prèmyé douvan an vi an nou (Mat. 6:33). Talè la, nou palé dè Horst. Apré 2^èm Gè mondyal la, i té anvi vin pyonyé. Men pwoblèm-la sé kè i té maléré. Kifè, i té ka pansé kè i pa té’é rivé ni sa i bizwen pou viv toupannan i té ka sèvi Jéova aplentan. Alò, ki désizyon i té kay pran ? I désidé mèt Jéova a léprèv pou vwè si i té’é pran swen a-y. Lèwvwè rèsponsab a siwkonskripsyon la vin vizité lasanblé a-y, i pasé tout simenn-la ka préché. Lè simenn èspésyal la fin, rèsponsab a siwkonskripsyon la ba-y on anvlòp ki té ni lajan adan men i pa di-y kimoun ki fè-y kado-lasa. Mésyé, Horst rété èstèbèkwè ! Grasa lajan-lasa, i té pé rété pyonyé pannan plizyè mwa. Pou-y, Jéova té ka ba-y on répons ki klè : grasa kado-lasa, Jéova té ka rasiré-y é té ka ba-y lagaranti kè i té’é soutyenn-li. I kontinyé mèt Wayòm-la prèmyé douvan an vi a-y é i kontinyé fè sa tout rèstan a vi a-y (Mal. 3:10).

16. Poukwa fò-nou entérésé-nou a ègzanp-la Pyè lésé ban-nou la é a sé lèt-la i maké la ?

¹⁶ An koumansman a awtik-la, nou vwè kè Pyè té di Jézi : « Ségnè, sòti owa mwen ». Men a pa ti kontan i dwèt té kontan kè Jézi pa té kouté-y. Jézi fòwmé-y, i vin on apòt ki fidèl é i vin on bèl ègzanp pou sé krétyen-la toubònman. Jan-la Jézi fòwmé-y la ka aprann-nou onlo biten osi. Pyè pawtajé sèwten biten Jézi aprann-li é dòt biten ankò adan 2 lèt kè i maké ba sé lasanblé-la o 1^é syèk é jòdijou sé 2 lèt-lasa ka fè pawti a Bib-la. Adan awtik-la ki ka vin la, nou ké vwè déotwa lidé nou ka touvé adan sé lèt-lasa é nou ké vwè kijan nou pé mèt-yo an pratik jòdijou.