An fèt an 1934. Fanmi an mwen té lésé Lasuis pou vin rété Timmins, on vil ki ka touvé-y an Ontario o Kanada. Adan vil-lasa té ni onlo min. Koté 1939, manman koumansé li jounal-la Tou dè Gad la é i koumansé ay adan réinyon a Témwen a Jéova. Nou té a 7 timoun é manman té ka menné-noutout èvè-y. I pa tadé a vin Témwen a Jéova.

Lè manman vin Témwen, papa pa té kontan menm, men manman pa fè dèyè. I té byen désidé a rété fidèl a Jéova. Menm lèwvwè yo entèwdi aktivité an nou o Kanada koté 1940, manman pa lagé Jéova. Anplisdisa, i toujou té janti èvè papa é i té ka rèspèkté-y magré papa té ka vougaré-y. Grasa bèl ègzanp a-y, mwen é frè é sè an mwen nou désidé sèvi Jéova. Piti-a-piti, papa koumansé chanjé é i vin pi janti èvè nou.

An 1950, an ay adan on lasanblé yo fè a Nouyòk é onlo moun tann palé dè lasanblé-lasa. Pannan an té la, an ni lokazyon palé èvè frè é sè ki té ka sòti tibwen toupatou asi latè é an tann frè é sè ki té sòti Galaad palé dè vi a yo. Sa ban-mwen anvi travay plis pou Jéova. Sé alè an té anvi vin pyonyé pèwmanan. Alò lèwvwè an viré akaz, an mandé pou mwen té vin pyonyé pèwmanan. Men sé frè a Bétèl a Kanada la di-mwen kè fò-mwen té pran lèbatèm dabò. Alò sé sa an fè lè 1^é òktòb 1950. On mwa apré, an vin pyonyé pèwmanan. Prèmyé koté yo voyé-mwen préché sé a Kapuskasing. Vil-lasa té lwen lwen lwen a la an té ka rété la.

An 1951, Bétèl-la mandé si sé frè é sè la ki ka palé fransé té pé ay rété o Kébèk, on réjyon yo ka palé fransé. Yo mandé sa pas té ka manké pwoklamatè koté-lasa toubònman. Konm an aprann  palé fransé é anglé lèwvwè an té jenn, an désidé ay rété o Kébèk é yo voyé-mwen préché adan on vil non a-y sé Rouyn. An pa té konnèt ponmoun koté-lasa. Kon an di-y tibwen pi ho, sèl biten an té ni sé té on adrès. Men tout biten byen pasé. Marcel é mwen nou vin bon zig. An rété 4 an o Kébèk é toupannan an té ka préché koté-lasa, sé té on plézi pou mwen. An bout a sé 4 an lasa, an vin pyonyé èspésyal.

Pannan an té o Kébèk, yo voyé on envitasyon ban mwen mwen té fè lékòl a Galaad. Sé té 26^èm klas-la é lékòl-la té ka fèt South Lansing a Nouyòk. An té kontan toubònman. Yo ban-nou diplòm an nou lè 12 févriyé 1956 é yo voyé-mwen préché o Gana b. Péyi-lasa ka touvé-y an Afrik dè Lwès. Men avan an té ay la, an viré o Kanada mwen té pé sa ni papyé an té bizwen mwen té vwayajé. An té viré o Kanada pou déotwa simenn swadizan men a pa sa ki fèt.

Olyé an té rété ka atann déotwa simenn, an rété 7 mwa ka atann papyé an mwen. Pannan tout tan-lasa, an rété a Toronto aka fanmi Cripps. Yo akéyi-mwen èvè onlo jantiyès. An aprann konnèt fi a yo Sheila. Lèwgadé yonn touvé-y enmé lòt. An té kay mandé-y pou nou té mayé lèwvwè yo di-mwen kè papyé an mwen té paré. Alò nou priyé ansanm é anfinaldikont nou di-nou kè sa té’é myé si an té k’ay la yo té voyé-mwen la. Nou désidé kè yonn té’é voyé lèt ba lòt pou nou vwè si nou ka mayé é a ki moman nou té’é fè-y. Sèlman sa pa té mòl, men apré, nou rann-nou kont kè nou té pran on bon désizyon.

An rété 1 mwa ka vwayajé. An pran tren, an vwayajé òbò bato ki té ka chayé mawchandiz é òbò avyon. An fin pa rivé Accra, on vil ki o Gana. Lè an rivé, yo nonmé-mwen rèsponsab a distrik. An touvé-mwen ka vwayajé tibwen toupatou o Gana. An ay an Kòt Divwa osi é o Togo. An jénéral, an té ka vwayajé tousèl an mwen òbò katkat a Bétèl-la. A pa ti kontan an té kontan vwayajé pou ay vwè sé frè-la !

 Chak sanmdi é dimanch, an té k’ay adan sé lasanblé a siwkonskripsyon la. Konm nou pa té ni pon sal a lasanblé, sé frè-la té ka kouvè on koté èvè banbou é branch a palmyé pou ni lonbraj pas solèy-la té ka chofé. É konm pa té ni frijidè koté-la nou té ka manjé la, yo té ka menné sé zannimo-la touvivan é sèlon kantité moun ki té la, yo té ka tchouyé sé zannimo-la pou ba moun manjé.

Délè ni dé biten té ka rivé pannan lasanblé-la, é a pa ti ri sa té ka fè-nou ri. An ka sonjé on jou pannan frè Herb Jennings c, ondòt misyonè, té ka fè on diskou, on bèf chapé. I sòti koté-la nou té ka manjé la é i mété-y ka kouri ant la frè-la té ka fè diskou-la é la sé moun-la té sizé la pou kouté diskou-la. Lèwgadé Herb enn pé. Bèf-la pa té sav pa ki koté pou ay. É 4 frè ki té ni bon fòs kenbé bèf-la é yo menné-y la yo té ka ba moun manjé. Toutmoun aplodi.

Pannan lasimenn, an té k’ay adan sé vilaj-la ki té toupré la pou fè sé moun-la vwè fim an nou La Société du Monde Nouveau en action. Pou nou té fè-yo vwè-y, nou té ka wouvè on dra blan ant 2 poto oben ant 2 pyébwa. Sé moun-la té enmé sa ! Pou onlo adan yo, sé té prèmyé fwa yo té ka vwè on fim. Lèwvwè yo té ka vwè moun ka pran batèm adan fim-la, a pa ti aplodi yo té ka aplodi. Fim-lasa édé-yo konprann kè Témwen a Jéova adan on òwganizasyon ki soudé é ki toupatou asi latè.

An rété an Afrik 2 an apépré é aprésa, an 1958, an ay adan on lasanblé entèwnasyonal ki té ka fèt Nouyòk. An vwè Sheila. I té pyonyé èspésyal alèla. I té sòti Kébèk pou vin adan lasanblé-la. A pa ti kontan an té kontan vwè-y ! Avan sa, sé enki pa lèt nou té ka palé men alè, konm nou té ansanm, an mandé-y mayé. I aksèpté. Alò an mandé frè Knorr d si Sheila té pé fè lékòl a Galaad é si, apré lékòl-la, i té pé vin jwenn-mwen an Afrik. Frè-la aksèpté. Sheila vin jwenn-mwen o Gana é nou mayé lè 3 òktòb 1959 a Accra. Nou té sèten kè Jéova té ka béni-nou pas nou té désidé mété-y prèmyé douvan adan vi an nou.

An 1961, yo voyé-nou o Kamwoun. Yo mandé-mwen mèt on filyal anplas. Té ni bon travay dèyè do a sa. Aprésa yo nonmé-mwen sèwvitè a filyal. Sé té on rèsponsabilité é an té ni onlo biten a aprann pou mwen té fè travay-lasa byen. Aprésa  an 1965, Sheila touvé-y ansent. Nou té ni dimal a vwè-nou ka lévé on timoun. Piti-a-piti, nou aksèpté sa é nou té kontan. Nou té ja ka gadé pou vwè kijan nou té’é rantré o Kanada. Lèwgadé, on malè rivé-nou.

Sheila pèd timoun-la. Dòktè-la di-nou kè timoun-la sé té on tigason. Sa an ka rakonté-zòt la, sé biten ki fèt ja ni 50 an dè sa, men nou pa jen oubliyé sa. Menmsi tchè an nou té an bobo, nou rété la yo té voyé-nou la pas nou té enmé la nou té yé la toubònman.

O Kamwoun, yo té ka pèwsékité frè é sè an nou pas yo pa té ka mélanjé-yo adan zafè a politik. Biten-la té rèd menm lèwvwè sété péryòd a élèksyon pou sé moun-la té chwazi on prézidan. Aprésa, sa nou té pi pè la sé sa ki rivé. Lè 13 mé 1970, yo entèwdi aktivité an nou adan péyi-la. Lèwgadé gouvènman-la pran ti Bétèl an nou ki té tounèf. Sa té ka fè enki 5 mwa nou té adan. Yo pa pran on simenn pou voyé tout sé misyonè-la alé é mwen é Sheila nou té adan. Noutout té oblijé kité péyi-la. Aaa, an pa’a di-zòt jan sa fè-nou lapenn lèwvwè fò-nou té lésé frè é sè an nou. Nou té enmé-yo onlo é nou té enkyèt pou yo.

Aprésa, nou rété 6 mwa adan Bétèl a Lafrans. Toupannan an té la, an té ka fè tousa an pé pou édé frè é sè an nou ki ka rété o Kamwoun. Menm lanné-la, yo voyé-nou adan Bétèl a Nijérya. Sé té an désanm. Bétèl-lasa koumansé okipé dè travay a prédikasyon-la ki té ka fèt o Kamwoun. Frè é sè ki té ka rété Nijérya akéyi-nou bra gran wouvè é nou té kontan travay pou Jéova adan Bétèl-lasa. Nou rété la pannan plizyè lanné.

An 1973, nou té ni on désizyon enpòwtan a pran é sa té rèd menm. Sheila touvé-y malad bon malad la. Pannan nou té Nouyòk pou on lasanblé, i enn mété-y ka pléré é i di-mwen : « An pé’é pé kontinyé konsa ! Souvantfwa an las é an malad. » Sa té ja ka fè plis ki 14 an i té adan sèwvis-la èvè mwen an Afrik dè Lwès. A pa ti fyèw an té fyèw dè-y ! Men fò-nou té fè déotwa chanjman. Nou fè on bèl ti kozé asi sa ansanm é nou priyé Jéova onlo. Aprésa, nou désidé kè nou té’é viré o Kanada. Konsa, yo té’é pé swangné Sheila pibyen. Mésyé, lèwvwè nou lésé sèwvis aplentan la é la yo té voyé-nou préché la, i pa té mòl menm. Adan tout désizyon nou ja pran, sé prèmyé fwa nou pran on désizyon ki fè-nou soufè konsa.

Lè nou viré o Kanada, an touvé on travay adan on vil ki té o nò a Toronto. Sé té adan on garaj ki ka vann vwati é garaj-lasa sé té ta on bon zanmi an mwen. Aprésa Sheila é mwen nou louwé on kaz é nou achté sa nou té bizwen pou mèt an kaz-la, men a pa té dé biten ki té nèf. Kifè nou pa mèt pon dèt asi do an nou. Nou té vé kontinyé ni on vi ki senp pou sianka nou té ka touvé on lokazyon pou nou sèvi Jéova aplentan. É sa nou té anvi la rivé pi vit ki sa nou té ka pansé !

An koumansé travay antankè volontè adan chantyé a konstriksyon a sal a lasanblé a Norval. Sé on vil ki ka touvé-y an Ontario. An té òwganizé-mwen mwen té vin tou lésanmdi asi chantyé-la. Tibwen tan pasé, é lèwgadé yo mandé-mwen si an té pé vin rèsponsab a sal a  lasanblé-lasa. Konm sa té k’ay tibwen myé pou santé a Sheila, nou di-nou kè sé on biten kè nou té’é pé fè. Alò an jen 1974, nou ay rété adan on kaz ki té adan sal a lasanblé-lasa. Nou té pé woupran sèwvis aplentan la. Nou té kontan menm !

Dézan apré, konm Sheila té ja woupran tibwen fòs, lèwvwè yo mandé-mwen si an té pé travay adan siwkonskripsyon-la èvè madanm an mwen, nou aksèpté. Alò, yo voyé-nou Manitoba, on réjyon ki ka touvé-y o Kanada. Mésyé, lè sé livè koté-lasa, fwadi an zo a-w ! Men érèzman sé frè é sè-la ni bon chalè, kifè ou adoumanman èvè yo. Sa nou aprann sé kè sa ki pi enpòwtan, a pa koté-la nou ka sèvi Jéova la, men sé kè nou kontinyé sèvi-y kèlkèswa koté-la nou yé la.

Apré kè an rété plizyè lanné rèsponsab a siwkonskripsyon, an 1978, yo mandé-nou si nou té pé ay travay an Bétèl-la. Kèlkètan apré, an touvé-mwen adan on sitiyasyon difisil é sa sèvi-mwen lèson. Yo mandé-mwen si an té pé fè on diskou pou on réinyon èspésyal a Montréal. An té’é fè diskou-la an fransé é i té’é diré inè é dèmi. Men malérèzman, sé frè é sè la té ni dimal a suiv diskou-la parapòt a mannyè-la an fè-y la. Kifè, on frè a biwo-la ki ka jéré prédikasyon-la vin vwè-mwen pou ban-mwen dé ti konsèy. Pou mwen, lè an té ka fè on diskou, kò an mwen té bon. Men alè, an ka rann-mwen kont kè a pa té sa ditou-ditou. Lè frè-la vin owa an mwen pou ban-mwen on konsèy, sa malpasé-mwen. Pannan ti kozé-la nou fè la, an té kòlè pas pou mwen, olyé frè-la té di-mwen ka ki té bon adan diskou an mwen, sé enki kritiké i té ka kritiké-mwen. Alò an pa tchenn kont dè konsèy a-y, pas sa an gadé sé jan-la i ban-mwen konsèy-la é an té ka di an tchè an mwen kimoun frè-lasa yé pou ban-mwen on konsèy. Men jan-la an té ka rézonné la pa té bon.

Kèlkèjou apré, on frè ki ka fè pawti a komité a filyal la vin palé-mwen dè sa. Mwenmenm di-y franchman kè an pa té aksèpté konsèy-la é kè an té ka règrété sa. An ay vwè frè-la ki té ban-mwen konsèy-la pou mandé-y padon é èvè onlo jantiyès i di-mwen pa ni pon pwoblèm. Sa ki rivé montré-mwen jan sa enpòwtan kè nou ni imilité é an pé’é jen oubliyé sa (Pwov. 16:18). An palé Jéova dè sa onlo fwa menm é an byen désidé a pa jen lésé sa rivé-mwen ankò lèwvwè yo ké ban-mwen on konsèy.

Aprézan, sa ja ka fè 40 an kè an adan Bétèl a Lèkanada. Dépi 1985, an ka fè pawti a komité a filyal la. An févriyé 2021, lanmò chayé Sheila, ti doudou an mwen. Mésyé, a pa ti manké i ka manké-mwen ! Anplisdisa, kò-la pa two flanbo, kifè an pé pa fè granzafè ankò. Men èvè tousa an ni a fè pou Jéova, tan-la ka pasé asi mwen é an pa menm ka vwè sa (Ékl. 5:20). Sé vré kè an ja pasé onlo penn é péripési adan vi an mwen men bénédisyon Jéova vidé asi mwen, sa pa ni non. Pannan 70 an, an sèvi Jéova aplentan. An toujou mété-y prèmyé douvan adan vi an mwen é an pé di kè sa menné onlo bon biten pou mwen. An ka priyé Jéova pou sé jenn-la, pou yo kontinyé mété-y prèmyé douvan adan vi a yo. An sèten kè si yo fè sa, yo ké adoumanman ka travay pou Jéova é yo ké fè onlo bèl biten adan vi a yo. Sé sèlman lè ou adan òwganizasyon a Jéova kè ou pé viv dé biten konsa.