AWTIK POU ÉTIDYÉ 37
KANTIK 118 « Ban-nou plis fwa »
On lèt ki pé édé-nou andiré é rété fidèl jous a lafen
« Konfyans-la nou té ni la odépa, nou ka kontinyé ni-y jous a lafen » (ÉBR. 3:14).
ON TI LIDÉ ASI SA NOU KAY VWÈ
Adan lèt-la Pòl maké ba sé Ébré-la nou ka touvé onlo konsèy. É sé sa nou ké ègzaminé adan awtik-lasa.
1-2. a) Lèwvwè Pòl maké lèt a-y pou sé Ébré-la, ka ki té ka pasé an Jidé ? b) Poukwa nou pé di kè lèt-la Pòl maké ba sé Ébré-la rivé o bon moman ?
AN LAN 33, apré mò a Jézi, sé krétyen-la jwenn onlo difikilté. An tan-lasa, yo té sòti fòwmé lasanblé-la é a pa ti pèwsékité yo té ka pèwsékité sé krétyen-la (Akt 8:1). Plis ki 20 lanné apré, sé krétyen-la touvé-yo ka soufè pas pa té ni manjé an péyi-la é onlo moun té maléré (Akt 11:27-30). Koté lan 61, biten-la kalmé tibwen pou sé krétyen-la. Yo té ka pèwsékité-yo tibwen mwens konnyéla, men sa pa té’é diré. Sa yo té kay viv la té’é pi rèd apré. Pannan péryòd-lasa, Jéova voyé lèspri sen a-y asi lapòt Pòl pou i maké on lèt ba sé krétyen-la é lèt-lasa té ka rivé o bon moman.
2 Poukwa nou ka di kè lèt-la Pòl maké la pou sé Ébré-la rivé o bon moman ? Nou ka di sa pas menmsi biten-la té vin tibwen pi kalm pou sé krétyen-la, sa pa té’é rété konsa lontan. Sé pousa Pòl ba-yo déotwa konsèy ki té’é édé-yo andiré tribilasyon-la yo té kay jwenn la. Jézi té anonsé kè yo té’é détwi Jérizalèm, é pa té ka rété onlo tan avan sa fèt (Lik 21:20). Sé vré, ni Pòl, ni sé krétyen-la ki té ka rété Jidé la, pa té sav kitan sa té’é fèt. Men sé krétyen-la té pé sèvi èvè tan-la ki té ka rété yo la pou yo té pé sa préparé-yo. Pousa, yo té ka konsolidé fwa a yo é yo té ka travay pou yo ni sèwten kalité kon andirans (Ébr. 10:25 ; 12:1, 2).
3. Poukwa lèt-la Pòl maké ba sé Ébré-la itil pou nou jòdijou ?
3 Talè, on gwo tribilasyon ké rivé asi nou é biten-la ké pi rèd ankò ki sa sé krétyen ébré la viv la (Mat. 24:21 ; Rév. 16:14, 16). Alò an-nou vwè déotwa konsèy Jéova té ba sé krétyen-lasa ki édé-yo onlo é ki ké édé-nou osi.
« AN-NOU FÈ ONLO ÉFÒ POU NOU VIN PLI MATI »
4. Ki difikilté sé Juif-la ki té vin krétyen la té ka jwenn ? (gadé imaj-la osi).
4 Pou on Juif té vin krétyen, fò i té fè dé gwo chanjman é sa pa té fasil ditou-ditou. Pannan on tan, sé sé Juif-la Bondyé té chwazi pou yo té vin pèp a-y. Wa-la Jéova té chwazi la pou rèprézanté-y té ka gouvèné a Jérizalèm, é sé la osi Jéova té mèt Tanp-la, kivédi koté-la ou té ka touvé vré adorasyon-la. Tout sé Juif-la ki té fidèl la, té ka suiv Lwa a Moyiz é sé biten-la sé chèf a rèlijyon la té aprann-yo la. Sèlon sa yo té ka aprann, fò-yo té siwkonsi-yo, é sa té enpòwtan pou yo. Yo pa té ni dwa manjé sèwten biten nonplis é fò yo té fè atansyon osi a jan yo té ka konpòwté-yo èvè moun ki pa té juif. Men apré mò a Jézi, Jéova pa té ka aksèpté sé sakrifis-la yo té ka fè la an Tanp-la ankò. Chanjman-lasa té difisil toubònman pou sé Juif-la ki té vin krétyen la, pas yo té ni labitid suiv Lwa a Moyiz ! (Ébr. 10:1, 4, 10). Menm dé krétyen ki té mati kon lapòt Pyè té ni dimal a fè kò èvè sèwten chanjman (Akt 10:9-14 ; Gal. 2:11-14). Anplisdisa, sé krétyen-la pa té ka kwè adan menm biten ki avan, kifè sé chèf a rèlijyon juif la mèt-yo ka pèwsékité-yo.
Fò sé krétyen ébré la té rété byen chouké adan lavérité é fò pa yo té okipé-yo dè tout sé pawòl initil la lènmi a yo té ka rakonté la (gadé sé paragraf 4 é 5 la).
5. Poukwa fò sé krétyen-la té fè atansyon ?
5 Té ni 2 gwoupmoun ki té ka ba sé krétyen-la bon gaz. Té ni sé chèf a rèlijyon juif la ki té ka aji èvè yo konsi yo té apòsta é té ni sèwten moun adan lasanblé-la ki té ka di kè fò sé krétyen-la té kontinyé suiv sa Lwa a Moyiz té ka di. Pétèt sé moun-lasa té ka di-yo sa pou dòt moun pa té pèwsékité-yo (Gal. 6:12). Ka ki édé sé krétyen-la rété fidèl a Jéova ?
6. Ki biten Pòl ankourajé sé Ébré-la fè ? (Ébré 5:14 – 6:1).
6 Adan lèt-la i maké la ba sé Ébré-la, Pòl ankourajé-yo kontinyé ay an nannan a Pawòl a Bondyé (li Ébré 5:14 – 6:1). Pòl sèvi èvè Lézékriti ébrayik pou fè-yo rézonné. I fè-yo konprann kè jan-la sé krétyen-la té ka adoré Bondyé té lontan méyè ki jan sé Juif-la té ka fè-y a. Pòl té sav kè pi yo té’é konnèt Pawòl a Bondyé byen é kè yo té’é ka konprann-li byen é pi yo té’é rivé rèkonnèt sé fo-ansègnman-la. Konsa, yo pa té’é lésé sé biten-lasa kouyonné-yo.
7. Alèkilé, ki difikilté nou ka jwenn ?
7 Alèkilé, ni onpakèt moun ki ka fè enfòwmasyon é lidé monté é désann alòskè sé biten-lasa pa annakò èvè sa Bondyé ka di. Onlo moun ka di kè Témwen a Jéova pa bon pas nou ka suiv prensip a Jéova anrapò èvè sèks. Pi tan ka pasé é pi jan sé moun-la ka rézonné adan mond-lasa pa ni ayen a vwè èvè jan Jéova ka rézonné (Pwov. 17:15). Alò sa enpòwtan kè nou rivé rèkonnèt sé rézònman-lasa ki pa bon é kè nou ba-yo gran lè a yo. Fò pa nou lésé pon moun ki kont Bondyé dékourajé-nou é fè-nou lagé-y (Ébr. 13:9).
8. Ka pou nou fè pou nou vin pli mati ?
8 Pòl di sé krétyen ébré la kontinyé fè onlo éfò pou yo vin pli mati é nou osi, fò-nou fè menm biten-la. Sa vé di osi kè pou nou rivé fè sa, fò-nou òwganizé-nou pou étidyé Labib, pou nou konnèt Jéova byen é pou nou konnèt jan-la i ka pansé la byen osi. Fò-nou kontinyé fè sa menm apré nou ba Jéova vi an nou é kè nou pran lèbatèm. Kèlkanswa kantité tan nou adan lavérité, fò-noutout li é étidyé Pawòl a Bondyé touléjou (Sòm 1:2). Si nou ni labitid étidyé tousèl an nou, sa ké édé-nou konsolidé fwa an nou. Lè nou ka fè sa, nou ka suiv konsèy-la Pòl té ba sé krétyen ébré la (Ébr. 11:1, 6).
« FÒ NOU SÉ DÉ MOUN KI NI FWA POU SOVÉ VI AN NOU »
9. Poukwa fò sé krétyen-la té ni on fwa ki solid ?
9 Fò sé krétyen ébré la té ni on fwa ki solid. Grasa fwa a yo, yo té’é rété vivan pannan tribilasyon-la ki té kay rivé Jidé la (Ébr. 10:37-39). Jézi té ja di-yo kè lèwvwè yo té’é vwè sé lawmé-la ka lantouré Jérizalèm, fò yo té’é pran pyé a kouri a yo é ay adan sé montangn-la. Sa té valab ki pou moun ki té ka rété Jérizalèm, ki pou séla ki té ka rété adan sé kanpangn-la ki té koté vil-lasa (Lik 21:20-24). An tan-lasa, lèwvwè on lawmé té ka vin ataké on nasyon, sé moun-la té k’ay kouri kaché adan sé vil-la pas sé masonn-la ki té ka lantouré vil-la té pé pwotéjé-yo. Alò pétèt kè lèwvwè sé krétyen-la tann kè sé adan sé montangn-la pou yo té ay kaché kò a yo, yo dwèt té ka mandé-yo si sé té on bon biten.
10. Lèwvwè on krétyen ni on fwa ki fò, ka sa ka pousé-y fè ? (Ébré 13:17).
10 Fò sé krétyen-la té fè sé nonm-la Jézi té chwazi la pou dirijé lasanblé-la konfyans. Sèten sé nonm-lasa di-yo a ki moman pou yo té chapé kò a yo é kijan pou yo té fè sa (li Ébré 13:17). Lapòt Pòl té mandé frè é sè a-y « obéyi » sé moun-la ki ka dirijé-yo la. I pa té vé di kè fò-yo té obéyi sé ansyen-la pas yo té oblijé men pas yo té ka fè-yo konfyans. Alò fò sé krétyen ébré la té aprann fè sé nonm-la ki té ka dirijé lasanblé-la konfyans avan tribilasyon-la té rivé. Siwvwè yo té ka obéyi é siwvwè yo té ka suiv sé enstriksyon-la yo té ba-yo la pannan té ni lapé, yo té’é obéyi pi fasilman lèwvwè tribilasyon-la té’é rivé.
11. Poukwa sa enpòwtan toubònman kè tout sé krétyen-la ki ka viv jòdijou ni on fwa ki solid ?
11 Nou osi, kon sé krétyen ébré la, fò nou ni lafwa. Adan épòk-la nou ka viv la, lamajorité a sé moun-la pa ka kwè kè mond-lasa kay bout. Yo ka jous fè jé èvè tèt an nou parapòt a sa (2 Pyè 3:3, 4). Anplisdisa, Labib ka ban-nou sèwten enfòwmasyon anrapò èvè sa ki ké pasé pannan gwo tribilasyon-la, men ni onlo biten nou pa konnèt. Jéova ja désidé kitan lafen ké rivé é i ké pran swen an nou lè moman-lasa ké rivé. Men nou aprézan, fò-nou fè on travay asi nou pou nou sèten dè sa a san pou san (Abak. 2:3).
12. Si nou vé rété vivan pannan gwo tribilasyon-la, ka pou nou fè ?
12 Fò nou fè on travay asi nou osi pou nou pé sa fè gwoup-nonm-la Jéova ka itilizé la pou gidonné-nou jòdila plis konfyans ankò. Gwoup-nonm-lasa sé « èsklav fidèl é prévwayan la » (Mat. 24:45). Lèwvwè gwo tribilasyon-la ké koumansé, yo ké ban-nou sèwten enstriksyon ki ké pé sové vi an nou. Sa ka fè-nou sonjé sé enstriksyon-la sé krétyen ébré la dwèt rèsèvwa la lèwvwè lawmé a sé Women-la vin pou lantouré Jérizalèm. Sé pou sa nou osi, dépi konnyéla, fò-nou fè ansòt pou nou fè séla ki ka dirijé-nou la konfyans plis ankò é fò-nou suiv sé enstriksyon-la yo ka ban-nou la. Siwvwè nou ja ni dimal a fè sa yo ka di-nou fè jòdila, a pa lè gwo tribilasyon-la ké rivé kè nou ké pé fè sa yo ka mandé-nou fè.
13. Poukwa konsèy-la Pòl ba sé krétyen ébré la an Ébré 13:5 té nésésè ?
13 Toupannan sé krétyen ébré la té ka atann kè yo di-yo kitan pou yo pati adan sé montangn-la, fò yo té fè atansyon pou ‘lanmou pou lajan pa té pran lanmen asi yo’ é fò yo té mèt Bondyé prèmyé douvan an vi a yo (li Ébré 13:5). Ni sa adan yo ki té sav ka sa vé di lèwvwè ou pa ni manjé é lèwvwè ou maléré (Ébr. 10:32-34). Alò pétèt kè yo té’é pé éséyé gadé kijan yo té’é fè pou ni plis lajan pou yo pa touvé-yo adan sé sitiyasyon-lasa. Men a pa lajan-la yo té’é ni la ki té’é sové vi a yo lèwvwè sé Women-la té’é détwi Jérizalèm (Jak 5:3). An réyalité, siwvwè on moun té enmé sé biten matéryèl la i té ni la, i té’é ni dimal a lésé kaz a-y é tousa i ni pou chapé kò a-y.
14. Si nou sèten fen a mond-lasa toupré rivé, ki désizyon nou ké pran ?
14 Si nou sèten kè fen a mond-lasa toupré rivé, nou pé’é mèt an tèt an nou kè sa nou ni é lajan nou ni sé sa ki pi enpòwtan. Labib ka di kè « yo ké jété lajan a yo an lari-la é lò-la yo ni la ké ba-yo malotchè ». Yo ké fè sa pas yo ké rann-yo kont kè « ni lajan a yo ni lò a yo pé’é pé sové-yo lè jou a kòlè a Jéova ké rivé » (Ézék. 7:19). Alò olyé nou chèché a ni onlo lajan, an-nou pran désizyon ki ké édé-nou pran swen an nou é pran swen a fanmi an nou é ki ké édé-nou mèt Jéova prèmyé douvan adan vi an nou. An-nou fè atansyon pou nou pa dépansé plis lajan ki sa nou ni, sa pa té’é bon pou nou. An-nou fè atansyon osi pou nou pa pasé tout tan an nou ka okipé dè tousa nou ni la. É menm èvè sé biten-la nou ja ni la, an-nou fè atansyon pou nou pa lésé sé biten-lasa vin sa ki pli enpòwtan adan vi an nou (Mat. 6:19, 24). Pannan nou ka atann fen a mond-lasa rivé, nou pé touvé-nou douvan sèwten sitiyasyon ki ké mèt fwa an nou a léprèv. Ès nou ké chwazi fè Jéova konfyans oben ès nou ké kouri dèyè biten matéryèl é chèché a pran pyé an nou adan mond-lasa ?
« NOU BIZWEN NI ANDIRANS »
15. Poukwa sé krétyen-la té bizwen andirans toubònman ?
15 Sé krétyen Jidé la té bizwen andirans pou kontinyé sèvi Jéova pas yo té kay jwenn bon difikilté talè (Ébr. 10:36). Pawmi sé krétyen-lasa, ni sèwten adan yo yo té ja pèwsékité onlo, men ni onlo dòt ki poto’o viv sa vréman pas lè yo té vin krétyen, biten-la té on ti jan pi kalm. Sé pousa lapòt Pòl fè-yo sonjé kè fò-yo té préparé-yo pou lè biten-la té’é vin pi rèd. É i di-yo osi kè fò-yo té paré a rété fidèl a Jéova menm douvan lanmò, kon Jézi fè-y (Ébr. 12:4). Lèwvwè sé Juif-la té ka vwè tousa moun ki té ka vin krétyen, yo té égri toubònman é sa té ka menné onlo vyolans menm. Kèlkè lanné avan lapòt Pòl maké lèt a-y pou sé Ébré-la, on foulmoun ataké-y alòskè i té ka préché a Jérizalèm. Plis ki 40 Juif « pwomèt kè yo pa té’é ni manjé ni bwè toutotan yo pa té’é tchouyé Pòl » (Akt 22:22 ; 23:12-14). Alò menmsi sé moun-la té hay sé krétyen-la é kè yo té ka pèwsékité-yo, fò sé krétyen-la té kontinyé ay an réinyon, préché bon nouvèl-la é fè ansòt pou konsolidé fwa a yo.
16. Kijan lèt-la Pòl maké ba sé Ébré-la édé-yo vwè ki bon biten andirans a yo té ka menné ba yo ? (Ébré 12:7).
16 Ka ki té’é édé sé krétyen ébré la andiré sé pèwsékisyon-la yo té ka jwenn la ? Pòl té vé édé sé krétyen-la vwè ki bon biten andirans a yo té ka menné ba yo. I èspliké-yo kè lèwvwè yo ka jwenn éprèv, Bondyé ka sèvi èvè sa pou fòwmé-yo (li Ébré 12:7). Grasa fòwmasyon-lasa, yo té’é pé ni onlo bèl kalité ki ka fè Jéova plézi. Si yo té ka konsantré-yo asi tout sé bon biten-la yo té’é ni la an bout a éprèv a yo, yo té’é rivé andiré pli fasilman (Ébr. 12:11).
17. Lèfètkè Pòl sibi bon pèwsékisyon, ka sa aprann-li ?
17 Pòl ankourajé sé krétyen-la pou yo pa té lagé lè yo té’é anba éprèv. I té byen plasé pou ba-yo konsèy adan domenn-lasa. Avan i té vin krétyen, i té ka pèwsékité sé krétyen-la é i ni lokazyon vwè jan yo té ka fè-yo bon abominasyon. Anplisdisa limenm osi té sav ka sa vé di andiré pèwsékisyon davwa yo té pèwsékité-y an tout sans apré i té vin krétyen (2 Kor. 11:23-25). Alò Pòl té byen plasé pou palé dè sa, pas i té sav byen ka sa yé lèwvwè on moun anba pèwsékisyon é kè i ka andiré. I fè sé krétyen ébré la sonjé kè lèwvwè yo té ka andiré éprèv, fò pa yo té fèfon asi yomenm men sé asi Jéova pou yo té fèfon. Sé sa ki ba Pòl kouraj, kifè i té pé di : « Jéova sé sèkou an mwen, an pé ké pè » (Ébr. 13:6).
18. Ka nou pé fè pou préparé-nou pou sé pèwsékisyon-la nou kay jwenn la ?
18 Sèwten adan frè é sè an nou ka jwenn pèwsékisyon touléjou. Nou pé soutyenn-yo grasa priyè an nou. Dépawfwa osi, nou pé fè ansòt pou yo ni sa yo bizwen (Ébr. 10:33). Labib ka di kè « tout moun ki vlé montré an vi a yo kè yo enmé Bondyé é kè yo vlé vin disip a Jézi ké jwenn pèwsékisyon osi » (2 Tim. 3:12). Sé pousa, fò-noutout préparé-nou pou sé moman difisil la nou ké jwenn la. Kijan nou pé fè sa ? Fò-nou kontinyé fè Jéova konfyans a san pou san é fò-nou sèten kè i ké édé-nou andiré nenpòt ki éprèv nou té’é pé jwenn. Lè moman-la ké rivé, i ké sové tout sèwvitè a-y ki fidèl (2 Tés. 1:7, 8).
19. Kijan nou pé préparé-nou pou gwo tribilasyon-la ? (gadé imaj-la osi).
19 On biten ki sèten, sé kè sé konsèy-la Pòl ba sé Ébré-la adan lèt a-y édé-yo préparé-yo pou sé gwo éprèv-la yo té kay jwenn la. Dabò pou yonn, lapòt Pòl di-yo kè fò-yo té fè ansòt pou yo té ni plis konésans é fò-yo té fè ansòt pou yo konprann Lézékriti pibyen osi. Konsa, lè yo té’é touvé-yo douvan dé lidé ki té’é pé fébli fwa a yo, yo té’é rèkonnèt sé lidé-lasa é yo té’é mèt sé lidé-lasa akoté. Anplisdisa, lapòt Pòl ankourajé-yo a konsolidé fwa a yo. Konsa, dépi Jézi é sé moun-la ki té ka dirijé lasanblé-la té’é mandé-yo fè on biten, yo té’é fè-y onfwa-onfwa. Ondòt biten i di-yo osi sé kè sa enpòwtan kè yo ni andirans. Pousa fò yo té vwè pi lwen ki sé éprèv-la, kivédi fò yo té vwè kijan Pap’a-yo Jéova ki enmé-yo té ka fòwmé-yo. Nou osi nou pé apliké sé bèl konsèy-lasa kè nou ka touvé an Bib-la. Si nou ka fè sa, nou ké pé andiré é nou ké pé rété fidèl jistan lafen rivé (Ébr. 3:14).
Jéova béni sé krétyen-la ki té fidèl la. Apré yo sòti an Jidé pou chapé kò a yo, yo kontinyé réini-yo. Ka sa ka aprann-nou ? (gadé paragraf 19 la).
Kantik 126 Rété véyatif, rété solid, vin fò
a Lè nou ka gadé enki prèmyé chapit-la Pòl maké la, Pòl ka répété omwen 7 pasaj a Lézékriti ébrayik pou montré kè jan-la sé krétyen-la té ka adoré Bondyé té méyè ki jan-la sé Juif-la té ka adoré Bondyé (Ébr. 1:5-13).
