1-2. Lè Jéova kréyé-nou, i fè ansòt pou nou pé sa ni tchè-kontan lè nou ka ba lézòt on biten. Poukwa i fè-nou konsa ?

 LÈWVWÈ Jéova kréyé-nou, i fè-nou on mannyè pou lèwvwè nou ka bay on biten nou ka pi kontan ki lèwvwè nou ka risivwè on biten (Akt 20:35). Ès sa vé di kè lèwvwè yo ka ban-nou on biten, sa pa’a fè-nou plézi ? Awa ! Lèwvwè on moun ka ban-nou on kado, nou ka kontan. Men nou ka pi kontan ankò lèwvwè sé nou ki ka ofè on moun on biten. An réyalité, si i fè-nou konsa sé pas i té sav kè sa té’é fè-nou dibyen. Poukwa nou ka di sa ?

² Lèfètkè Jéova kréyé-nou konsa sé konsi i mèt tout kat-la an men an nou. Sa vé di kè pi nou ka chèché a vwè kijan nou pé donan èvè lézòt é pi nou ka ni tchè-kontan. Jan-la Jéova fè-nou la èstraòwdinè menm (Sòm 139:14).

3. Poukwa Labib ka di kè Jéova sé « Dyé-la tchè a-y kontan la » ?

³ Labib ka èspliké kè lèwvwè on moun ka bay, moun-lasa ka ni tchè-kontan. Alò sa pa ka siwprann-nou siwvwè Labib ka di kè Jéova sé « Dyé-la tchè a-y kontan la » (1 Tim. 1:11). Prèmyé moun ki té donan adan linivè sé-y é pa ni moun ki pi donan ki-y. « Sé grasa li nou ni lavi, nou ka boujé é nou ka ègzisté » (Akt 17:28). Sé vré, « tout bèl don é tout kado pawfè » ka vin dè Jéova (Jak 1:17).

4. Ka ki ké édé-nou pou nou pé sa pi kontan ankò ?

⁴ Nou sòti vwè kè pi nou ka bay pi nou ni tchè-kontan, é sèten nou anvi ni tchè-kontan plis ankò. Nou ké rivé fè sa siwvwè nou ka imité Jéova ki sé on moun ki donan toubònman (Éféz. 5:1). Adan awtik-lasa, nou ké vwè kijan nou pé imité-y adan domenn-lasa é nou ké vwè osi ka nou pé fè si nou ni lenprésyon kè lézòt pa’a di-nou mèsi lèwvwè nou ka fè on biten ba yo. Konsa, nou ké kontinyé bay é nou ké ni tchè-kontan plis ankò.

 AN-NOU DONAN KON JÉOVA

5. Ki biten Jéova ka ban-nou ?

⁵ Kijan Jéova donan èvè nou ? An-nou palé dè déotwa biten i ka ban-nou. Jéova ka ban-nou sa nou bizwen pou viv. Pétèt i pa’a fè-nou viv kon pacha, men i ka ban-nou sa nou bizwen. Pa ègzanp, sé-y ki ka fè si nou ni on biten pou nou manjé, si nou ni lenj pou nou mèt asi nou, é si nou ni on koté pou nou rété (Sòm 4:8 ; Mat. 6:31-33 ; 1 Tim. 6:6-8). Men ès Jéova ka ban-nou tousa pas i ka santi kè i oblijé fè sa ? Awa. Alò poukwa i ka fè sa ?

6. Ka Matyé 6:25, 26 ka aprann-nou ?

⁶ Si Jéova ka fè ansòt pou nou pé sa ni on dèkwa, sé pas i enmé-nou. Sonjé sa Jézi ni lokazyon di an Matyé 6:25, 26 (li-y). Adan sé vèwsé-lasa i ka pran ègzanp a sé zozyo-la. Mi sa i ka di : « Yo pa ka simé, yo pa ka rékòlté é yo pa ka mèt dè koté. » Aprésa, mi sa i ka di ankò : « Pap’a zòt ki an syèl-la ka ba-yo manjé. » Mi kèsyon-la i ka pozé la apré : « Zò pa’a di zò ni plis valè ki yo ? » Ka sa ka aprann-nou ? Ében pou Jéova, sèwvitè a-y ni lontan plis valè ki sé zannimo-la. Alò, si i ka pran swen a sé zannimo-la, a pa dè sèwvitè a-y i pé’é okipé. Kon on papa ki ka pran swen a pitit a-y, Jéova ka pran swen a moun ki an fanmi a-y pas i enmé-yo toubònman (Sòm 145:16 ; Mat. 6:32).

7. Jéova sé on Bondyé ki donan. Kijan nou pé imité-y ? (gadé imaj-la osi).

⁷ Kon Jéova, nou pé ba frè é sè an nou sa yo bizwen pas nou enmé-yo. Pa ègzanp, ès ou konnèt on moun an lasanblé a-w ki pa ni manjé oben ki pa ni lenj ? Jéova pé sèvi èvè-w pou fè-y dibyen. Pèp a Jéova ka pòté bon mannèv pou édé lézòt, siwtou lèwvwè ni katastwòf. Pannan pandémi a Covid-19 la, frè é sè an nou ba sèwten moun manjé, lenj, é dòt biten yo té bizwen. Onlo frè é sè fè ofrann pou soutyenn travay a prédikasyon-la ki ka fèt toupatou asi latè. Konsa, kèlkèswa koté-la yo ka rété la, frè é sè an nou rivé ni sa yo bizwen pou viv, lèwvwè katastwòf fèt la yo ka rété la. Sé frè é sè la ki donan la suiv sa ki maké an Ébré 13:16 : « Pa oubliyé fè lèbyen é pawtajé èvè lézòt, pas sé sakrifis konsa Bondyé enmé. »

8. Lè Jéova ka ban-nou fòs, ka nou ka rivé fè ? (Filipyen 2:13).

⁸ Jéova ka ban-nou fòs. Jéova ni on puisans ki pa ni pon limit é lè i ka ba sèwvitè a-y  ki fidèl tibwen adan, i ka fè sa èvè plézi (li Filipyen 2:13). Ès ou ja mandé-y fòs pou ou pa lésé on tantasyon pran lanmen asi-w, pou-w andiré on éprèv oben pétèt jis pou-w kenbé pannan jouné-la ? Lèwvwè i réponn a priyè a-w, sèten ou té dakò èvè sa lapòt Pòl di, lè i di : « An ni fòs pou tout biten, grasa sila ki ka ban-mwen puisans la » (Filip. 4:13).

9. Jéova ka sèvi èvè fòs a-y pou édé lézòt. Kijan nou pé imité-y ? (gadé imaj-la osi).

⁹ Menmsi nou enpawfè, nou pé sèvi èvè fòs an nou kon Jéova ka fè-y. Sé vré, nou pé’é ba lézòt kont a énèwji-la yo bizwen la. Men nou pé sèvi èvè fòs-la nou ni la pou édé-yo. Pa ègzanp, nou pé fè kous ba on frè oben on sè ki ja ni on bèl laj oben ki enfim. É si sitiyasyon an nou ka pèwmèt, nou pé édé lèwvwè yo bizwen nétwayé oben réparé sal di Wayòm an nou. Si nou ka sèvi èvè fòs an nou pou fè sé biten-lasa, nou ké pé fè onlo bon biten ba frè é sè an nou.

10. Kijan nou pé ba lézòt fòs adan sa nou ka di ?

¹⁰ Fò pa nou oubliyé osi kè èvè sa nou ka di, nou pé ba moun fòs. Ès ou konnèt on moun ki bizwen yo félisité-y oben ki bizwen yo konsolé-y ? Si sé sa, pétèt kè ou té’é pé di-y jan i ni valè pou-w. Ka ou di ? Pétèt ou pé ay vwè-y akaz a-y, ou pé kriyé-y oben ou pé maké dé ti mo asi on kat ba-y. Sé pé osi on mésaj oben on mèl kè ou ka voyé ba-y. Pa pran tèt a-w pou sav ka ou ké ni a di, ou pa bizwen di granzafè. Dé ti mo tousenp ki sòti an fon a tchè a-w, sé pé ègzaktèman sa frè a-w oben sè a-w bizwen pou ba-y fòs (Pwov. 12:25 ; Éféz. 4:29).

11. Ka Jéova ka fè èvè sajès a-y ?

¹¹ Jéova ka ban-nou sajès. Mi sa disip Jak ni lokazyon maké : « Si yonn adan zòt ka manké sajès, fò i kontinyé mandé Bondyé li, é Bondyé ké ba-y li, pas i donan èvè toutmoun é i pa ka babyé » (Jak 1:5). Kon nou ka vwè-y adan vèwsé-lasa, Jéova pa ka gadé sajès a-y pou-y tousèl. I donan é i ka pawtajé-y èvè dòt moun. Jak ka di osi kè lè Jéova ka ba moun sajès, « i pa ka babyé ». I vé pa nou santi-nou jenné lèwvwè nou bizwen mandé-y dirèksyon a-y. Okontrè i ka ankourajé-nou mandé-y sajès (Pwov. 2:1-6).

12. A ki moman nou pé aprann lézòt fè dé biten kè nou konnèt ?

¹² É nou, ès nou pé imité Jéova ki ka pawtajé tibwen adan sajès a-y èvè lézòt ? (Sòm 32:8). Sèwvitè a Jéova ni onpakèt lokazyon pou yo pawtajé sa yo ka aprann èvè lézòt. Pa ègzanp, souvantfwa yo ka fòwmé moun ki toufré adan lavérité. Lè sé ansyen-la ka ba sé  asistan-la é dòt frè ankò fè on travay adan lasanblé-la, yo ka montré-yo kijan pou yo fè travay-lasa byen. Yo ka aji èvè onlo pasyans èvè sé frè-la lèwvwè yo ka montré-yo fè sa. É sé frè é sè la ki ni èkspéryans adan lakonstriksyon oben ki abityé pran swen a batiman nou ka adoré Jéova adan pé montré dòt moun ki pa ni èkspéryans kijan pou yo fè travay-lasa.

13. Jéova ka ban-nou adan sajès a-y. Kijan nou pé imité-y ?

¹³ Lè nou ka aprann on moun fè on biten, an-nou éséyé imité Jéova. Sonjé jan i donan lè i ka ban-nou adan sajès a-y. Alò, nou osi an-nou pawtajé sa nou konnèt é èkspéryans an nou èvè moun-la nou ka fòwmé la. Fò pa nou pè di moun-la sa nou konnèt, pou moun-la pa pran plas an nou. É an-nou pa jen di-nou : « Ponmoun pa fòwmé-mwen ! Alò, débouyé-y ! » Pon sèwvitè a Jéova pa dwètèt rézonné konsa. Okontrè, nou vé fè-y konnèt tousa nou sav èvè plézi, é nou vé fè tousa nou pé pou nou fòwmé lézòt (1 Tés. 2:8). Nou ka èspéré kè ‘li a tou a-y, i ké kapab anségné lézòt’ (2 Tim. 2:1, 2). Konsa, si noutout pawtajé sa nou konnèt, ki nou ki lézòt ké ni plis sajès é nou ké pi kontan.

LÈ NOU NI LENPRÉSYON KÈ LÉZÒT PA NI RÈKONÉSANS POU SA NOU FÈ BA YO

14. Lèwvwè nou donan èvè lézòt, kijan lamajorité adan yo ka réyaji ?

¹⁴ Souvantfwa, lèwvwè nou ka fè on biten pou on moun, siwtou si sé on frè oben on sè, i ka di-nou mèsi. Délè i pé maké dé ti mo asi on kat ban nou pou di-nou mèsi oben i pé fè ondòt biten ankò (Kol. 3:15). Lè yo ka aji konsa èvè nou, nou ka kontan toubònman.

15. Ka pou nou sonjé siwvwè on moun pa ka montré pon rèkonésans pou sa nou fè ba-y ?

¹⁵ Men on biten pou nou sonjé, sé kè a pa toutmoun ki ké di-nou mèsi pou sa nou fè ba yo. Sa pé rivé kè nou sèvi èvè tan an nou, èvè énèwji an nou é èvè sa nou ni pou édé on moun, é lèwgadé moun-lasa pa menm ka lévé-nou di gad. Siwvwè sa rivé, ka nou pé fè pou sa pa désèvwa-nou é pou sa pa fè-nou pèd jwa an nou ? An-nou sonjé sa Akt 20:35, vèwsé-la ki antèt a awtik-la ka di. Nou ni tchè-kontan davwa nou ka bay. Nou pa ni tchè-kontan pas moun-la nou bay la kontan sa nou fè. Alò sé on chwa nou ka fè : nou pé bay èvè onlo jwa menmsi nou ni lenprésyon kè moun-la pa ni rèkonésans pou sa nou fè ba-y. Ka ki pé édé-nou fè sa ? An-nou vwè déotwa biten.

16. Ka ki pé édé-nou pou nou kontinyé bay èvè jwa ?

¹⁶ Fè éfò pou imité Jéova. Jéova ka ban-noutout onlo bon biten, ki nou ka di-y mèsi ki nou pa’a di-y mèsi (Mat. 5:43-48). I ka pwomèt-nou kè si nou ka aji menmjan ki-y « san atann ayen anrètou », ‘nou ké ni on gwo rékonpans’ (Lik 6:35). Lè nou pa atann « ayen » anrètou, nou pa ka atann yo di-nou mèsi nonplis. Alò ki yo di-nou mèsi pou sa nou fè ki yo pa di-nou ayen, fò pa nou jen oubliyé kè Jéova ké toujou béni-nou pou tout sé bon biten-la nou ka fè la pou lézòt, siwtou kè nou ka ‘fè sa dètoukè’ (Pwov. 19:17 ; 2 Kor. 9:7).

17. Kijan nou pé imité Jéova lè nou ka bay ? (Lik 14:12-14).

¹⁷ Ondòt biten nou pé fè pou nou imité Jéova lè nou ka bay, sé suiv sa Jézi di an Lik 14:12-14 (li-y). Nou pé donan èvè on moun oben nou pé rèsèvwa on moun akaz an nou ki pé donan èvè nou é ki pé rèsèvwa-nou osi.  Pa ni pon pwoblèm adan sa. Men, nou pé rann-nou kont kè, délè, nou pé donan èvè on moun èvè lidé kè moun-lasa ké ban-nou on biten anrètou. Ka pou nou fè, si nou adan ka-lasa ? Nou pé suiv sa Jézi di-nou : nou pé òwganizé-nou pou nou rèsèvwa on moun akaz an nou ki pé’é pé ban-nou ayen anrètou. Konsa, nou ké ni tchè-kontan davwa nou ka imité Jéova. Siwvwè nou ka fè sa, sa ké édé-nou ni tchè-kontan menmsi yo pa’a di-nou mèsi pou sa nou fè.

18. Ka pou nou pa fè é poukwa fò pa nou fè sa ?

¹⁸ Pa jijé lézòt two vit (1 Kor. 13:7). Si on moun pa di-w mèsi pou sa ou fè ba-y, mi sa pou mandé-w : « Ès sé engra moun-lasa engra oben ès i oubliyé di-mwen mèsi ? » Pétèt osi moun-la pa di-nou mèsi pou dòt rézon ankò. Délè ni dé moun ki ni onlo rèkonésans pou lézòt men yo ni dimal a montré sa. Ni dòt moun aprézan ki toujou té abityé édé lézòt avan, kifè lèwvwè sé yo yo ka édé, sa ka jenné-yo. Antouka, si nou enmé frè an nou oben sè an nou vréman, nou pé’é mèt an tèt an nou kè i fè sa pa èspré, nou ké kontinyé montré-nou donan èvè-y é nou ké fè sa èvè jwa (Éféz. 4:2).

19-20. Poukwa fò-nou ni pasyans lèwvwè nou donan èvè lézòt ? (gadé imaj-la osi).

¹⁹ Fò-w ni pasyans. Mi sa wa Salomon ki té plen sajès maké : « Lagé pen a-w an dlo-la, pas onpakèt jou apré ou ké viré touvé-y » (Ékl. 11:1). Kon vèwsé-lasa ka montré, ni sèwten moun, sé « onpakèt jou apré », kivédi lontan apré kè on moun fè on biten ba yo kè yo ka montré moun-lasa rèkonésans a yo. An-nou vwè on ègzanp ki ka montré sa.

²⁰ Ni kèlkè lanné dè sa, madanm a on rèsponsab a siwkonskripsyon voyé on ti kat ba on sè ki té sòti pran batèm. I té maké dé ti mo janti asi kat-la ba sè-la pou ankourajé-y a rété fidèl. Lèwgadé sé apépré 8 an apré kè sè-la réponn. Mi sa i maké : « Sè an mwen, ou pé pa sav kijan ou édé-mwen sé dènyé lanné-la ki pasé la. An pa té pé pa di-w sa. » I palé-y dè  diféran difikilté i jwenn é aprésa mi sa i di madanm a rèsponsab-la : « Délè an té anvi lagé tout biten é an té anvi lagé Jéova osi. Men a moman-lasa vèwsé-la a ou té maké ban mwen la té ka wouvin an lèspri an mwen é sa té ka ban-mwen fòs mwen pa té lagé. » Mi sa i di sè-la ankò : « Lè an ka gadé, pannan sé 8 lanné-la ki pasé la, pa ni ayen ki ban-mwen fòs kon ti kat a-w la é ti vèwsé-la ou pawtajé èvè mwen la. » Ou ka imajiné jan madanm a rèsponsab a siwkonskripsyon-la dwèt té kontan lèwvwè sè-la voyé ti lèt-lasa ba-y « onpakèt jou apré ». Pétèt kè nou osi, on moun ké vin di-nou mèsi oben i ké montré-nou jan i ni rèkonésans pou sa nou fè ba-y alòskè sa ja ka fè onpakèt tan nou fè sa.

21. Poukwa ou byen désidé a kontinyé imité Pap’an nou ki an syèl-la é ki donan ?

²¹ Kon nou vwè adan awtik-lasa, Jéova fè-nou on mannyè ki ka fè kè nou kontan lèwvwè nou ka rèsèvwa, men nou pi kontan ankò lè nou ka bay. Lèwvwè nou ka édé frè é sè an nou, sa ka ban-nou tchè-kontan. É nou kontan lè yo ka montré kè yo ni rèkonésans pou sa nou fè ba yo. Men, ki yo montré rèkonésans a yo ki yo pa fè-y, nou pé ni tchè-kontan davwa nou aji byen konm i fo. An-nou pa jen oubliyé kè ‘Jéova pé ban-nou lontan plis ki sa’ (2 Kron. 25:9). Nou pé’é jen pé bay plis ki sa Jéova ka ban-nou ! É lè sé Jéova ki ka rékonpansé-nou, pa ni pi bèl biten ki sa. Alò fò nou byen désidé a kontinyé imité Pap’an nou ki an syèl-la é ki i donan.