1. Ka Jézi kay fè talè ?

 ÉPÒK-la nou ka viv la enpòwtan toubònman ! Talè, Jézi ké jijé tout moun ki asi latè. Jézi ba disip a-y on « sign » ki té’é montré « kè mond-la kay bout ». Nou ka touvé pwofési-lasa adan Matyé chapit 24 é 25, adan Mawk chapit 13 é adan Lik chapit 21 (Mat. 24:3).

2. Ka nou ké ègzaminé adan awtik-lasa, é poukwa nou pé di kè sa ké sèvi-nou ?

² Jézi sèvi èvè 3 ègzanp pou i té édé-nou préparé-nou. I pran sé ègzanp-lasa pou avèti-nou. Prèmyé-la, sé ègzanp a sé mouton-la é sé kabrit-la, dézyèm-la, sé ègzanp a sé vyèwj-la ki sòt la é sè vyèwj-la ki prévwayan la, é twazyèm-la sé ègzanp a sé talan-la. Chak sé ègzanp-lasa ka édé-nou konprann kè Jézi ké tchenn kont dè konpòwtasyon a on moun pou i pé sa jijé-y. Toupannan nou ké ègzaminé sé ègzanp-lasa, nou ké vwè ki biten sa ka aprann-nou é kijan nou pé sèvi èvè sa nou aprann. Pou nou koumansé, nou ké palé dè ègzanp a sé mouton-la é sé kabrit-la.

SÉ MOUTON-LA É SÉ KABRIT-LA

3. A ki moman Jézi ké jijé sé moun-la ?

³ Adan ègzanp a sé mouton-la é sé kabrit-la, Jézi ka di kè lèwvwè i ké jijé sé moun-la, i ké gadé kijan yo réyaji lèwvwè yo préché bon nouvèl-la ba yo é i ké gadé osi ès yo soutyenn frè a-y ki wen (Mat. 25:31-46). Jézi ké jijé-yo an fen a ‘gwo tribilasyon-la’, jis avan Awmagédon rivé (Mat. 24:21). Menmjan on bèwjé ka séparé mouton é kabrit yonn dè lòt, sé konsa i ké séparé moun ki soutyenn disip a-y ki wen é moun ki pa soutyenn-yo.

4. Dapré Izayi 11:3, 4, poukwa nou pé sèten kè Jézi ké jijé lézimen èvè jistis ? (gadé imaj-la osi).

 ⁴ Sé pwofési-la ki an Bib-la ka montré kè lèwvwè Jézi, Jij-la Jéova mèt an plas la, ké jijé lézimen, i ké fè sa èvè jistis (li Izayi 11:3, 4). I ka pran tan gadé konpòwtasyon a chak moun. I ka gadé létadèspri a yo é sa yo ka di osi. Ondòt biten i ka gadé osi sé jan-la yo ka aji la èvè frè a-y ki wen (Mat. 12:36, 37 ; 25:40). Alò i ké sav si yo soutyenn frè a-y ki wen é si yo édé-yo adan misyon-la i ba-yo la a. Prèmyé biten on moun ki ka fè pawti a sé mouton-la ka fè pou soutyenn frè a Jézikris, sé préché. Lè Jézi ké jijé sé moun-la ki ka fè sa, i ké di kè yo sé dé moun ki « jis » é yo ké pé ‘viv pou touttan’ asi latè (Mat. 25:46 ; Rév. 7:16, 17). Mi on bèl rékonpans mi ! Si yo rété fidèl pannan gwo tribilasyon-la é apré gwo tribilasyon-la osi, Jéova ké maké non a yo adan « liv a lavi » (Rév. 20:15).

5. Ka ègzanp a sé mouton-la é sé kabrit-la ka aprann-nou é ba kimoun ègzanp-lasa itil ?

⁵ Montré-w fidèl. Lèwvwè Jézi pran ègzanp a sé mouton-la é sé kabrit-la, i pran ègzanp-lasa dabò pou moun ki kay viv asi latè. Yo ka montré kè yo ni fwa adan Jézi non sèlman lèwvwè yo ka soutyenn frè a-y adan travay a prédikasyon-la, men osi lèwvwè yo ka suiv dirèksyon-la èsklav fidèl é prévwayan la ka ba-yo la (Mat. 24:45). Men ègzanp-lasa itil osi pou moun ki k’ay viv an syèl-la. Poukwa nou ka di sa ? Paskè Jézi ka gadé byen kijan yo ka aji, i ka gadé mantalité a yo é i ka gadé ka yo ka di osi. Alò sé pousa fò yo montré-yo fidèl. Dayè pou yonn, Jézi pran dézòt ègzanp, é adan sé ègzanp-lasa nou ka touvé dé konsèy ki itil èspésyalman pou sé wen-la. Sé ègzanp-lasa, nou ka touvé-yo osi an Matyé chapit 25. Pou koumansé, nou ké palé dè ègzanp a sè vyèwj-la ki té prévwayan la é dè sé vyèwj-la ki té sòt la.

SÉ VYÈWJ-LA KI TÉ PRÉVWAYAN LA É SÉ VYÈWJ-LA KI TÉ SÒT LA

6. Pawmi sé 10 vyèwj-la, kijan 5 adan yo montré kè yo té prévwayan ? (Matyé 25:6-10).

⁶ Adan ègzanp a sé vyèwj-la Jézi pran la, i palé dè 10 vyèwj ki sòti pou ay jwenn on misyé ki té kay mayé (Mat. 25:1-4). Yotout té ka èspéré kè yo té ay adan fèt a mayé la èvè-y. Lè Jézi palé dè sé vyèwj-lasa, i di kè 5 adan yo té « prévwayan » é kè 5 adan yo té « sòt ». Sé vyèwj-la ki té prévwayan la té véyatif. Menmsi misyé-la té ka rivé ta lannuit, yo té préparé-yo pou atann tout tan-lasa. Pousa, yo té pran lanp a luil a yo èvè yo pou yo té pé sa ni limyè siwvwè té ka fè nwè. Yo té jous pran luil anplis siwvwè misyé-la ki té ka mayé la té ka rivé pli ta ki sa yo té ka pansé. Alò yo té paré : yo té fè sa ki fo pou lanp a yo pa té étenn (li Matyé 25:6-10). Lèwvwè misyé-la rivé, yo rantré adan fèt a mayé la èvè-y. Menmjan-la, sé krétyen wen la ki fidèl é ki véyatif ka montré kè yo paré pou ay jwenn Jézi adan wayòm a-y an syèl-la b. É Jézi ké di kè yo mérité ay an syèl-la èvè-y (Rév. 7:1-3). Men ka ki ké rivé sé vyèwj-la ki sòt la ?

7. Ka ki rivé sé vyèwj-la ki sòt la é poukwa sa rivé-yo ?

 ⁷ Pawkont, sé vyèwj-la ki té sòt la pa té paré. Lèwvwè yo aprann kè misyé-la ki té ka mayé la té toupré vin, yo pa té ni luil adan lanp a yo ankò. É konm yo pa té pran dòt luil pou sianka, yo té oblijé ay achté. Lèwvwè misyé-la ki té ka mayé la rivé, yo poto’o viré. Ka ki pasé apré ? Ében « sé vyèj-la ki té ja paré la rantré èvè-y adan fèt a mayé la. Aprésa yo fèmé pòt-la » (Mat. 25:10). Tibwen plita, lèwvwè sé vyèwj-la ki sòt la vin pou yo rantré, mi sa misyé-la réponn-yo : « An pa konnèt zòt » (Mat. 25:11, 12). Sé vyèwj-lasa pa té préparé-yo pou sianka misyé mayé la té ka rivé plita ki sa yo té prévwa. Ka sa ka aprann sé krétyen wen la ?

8-9. Ka ègzanp a sé vyèwj-la ka aprann sé krétyen wen la ? (gadé imaj-la osi).

⁸ Fò ou paré é fò ou véyatif. Lè Jézi pran ègzanp-lasa, a pa té pou di kè té’é ni 2 gwoup a krétyen wen, kivédi on gwoup ki té’é paré a atann-li jistan fen a mond-lasa rivé é on dézyèm gwoup ki pa té’é paré. Men an réyalité i té vé èspliké ka ki té’é rivé sé krétyen wen la siwvwè yo pa té ka préparé-yo pou yo té pé sa andiré joustan lafen rivé. Siwvwè yo pa té paré, yo té’é pèd rékonpans a yo (Jan 14:3, 4). Ègzanp-lasa ka aprann-noutout on biten ki enpòwtan toubònman. Ki nou ni lèspwa dè viv an syèl-la oben asi latè, noutout, nou dwètèt pran sa ègzanp-lasa ka aprann-nou oséryé. Fò-nouchak kontinyé véyé é fò-nou paré, paré pou andiré jous a lafen (Mat. 24:13).

⁹ Jézi pran ègzanp a sé vyèwj-la pou montré jan sa enpòwtan kè nou paré é kè nou véyatif. Aprésa i pran ègzanp a sé talan-la. Ègzanp-lasa ka montré kijan sa enpòwtan kè nou travay rèd.

SÉ TALAN-LA

10. Ka 2 èsklav fè ki montré kè yo té fidèl a mèt a yo ? (Matyé 25:19-23).

¹⁰ Adan ègzanp a sé talan-la, Jézi palé dè  2 èsklav ki té fidèl èvè mèt a yo é dè on twazyèm ki pa té fidèl (Mat. 25:14-18). Sé 2 prèmyé èsklav-la montré kè yo té fidèl davwa yo travay rèd pou fè mèt a yo gangné plis lajan. Avan i té pati adan on péyi étranjé, i té ba-yo déotwa talan ; sa té ka fè onlo lajan toubònman. Sé 2 èsklav-la byen sèvi èvè lajan-la mèt a yo té ba-yo la é yo aji èvè bon jijman. Ki rézilta sa bay ? Lèwvwè mèt-la rantré adan péyi a-y, yo toulédé té fè mèt a yo gangné 2 fwa plis lajan ki sa i té ba-yochak odépa. Mèt-la félisité-yo é i di-yochak : « Vin bwè dlo a [zòt] èvè mèt a [zòt] » (li Matyé 25:19-23). Men, é twazyèm èsklav-la ? Ka i fè èvè lajan-la mèt a-y té ba-y la ?

11. Ka ki rivé sèwvitè-la ki té fengnan la é poukwa sa rivé-y ?

¹¹ Yo ba twazyèm sèwvitè-la aprézan, on talan. Pou mèt-la, sèwvitè-lasa té ké aji èvè sajès. Men konm sèwvitè-lasa té fengnan, i ay téré talan-la yo té ba-y la. Lèwvwè mèt-la viré, sèl biten i té pé ba mèt a-y sé talan-la mèt a-y té ba-y la. Sèwvitè-lasa pa té ka aji byen menm. I pa fè ayen pou mèt a-y té pé sa gangné plis lajan. Olyé i té èskizé-y, i jou di mèt a-y kè i sé « on nonm ki toujou ka mandé onlo ». Alò mèt-la pa pran sa menm. Non sèlman i woté talan-lasa an men a-y men i ba-y biyé palapenn a-y (Mat. 25:24, 26-30).

12. Kimoun sé 2 èsklav-la ki fidèl la ka rèprézanté ?

¹² Sé 2 èsklav-la ki fidèl la ka rèprézanté sé krétyen wen la ki fidèl la. Jézi, mèt a yo, ka envité-yo a ‘vin bwè dlo a yo èvè-y’ é i ka ba-yo rékonpans a yo an syèl-la, kivédi prèmyé rézirèksyon-la (Mat. 25:21, 23 ; Rév. 20:5b). Pawkont, ègzanp a èsklav-la ki fengnan la sé on avèwtisman pou sé wen-la. Kijansa ?

13-14. Ka ègzanp a sé talan-la pé aprann sé krétyen wen la ? (gadé imaj-la osi).

¹³ Travay èvè onlo balan. Siwvwè Jézi pran ègzanp a sé talan-la é ègzanp a sé vyèwj-la  ba disip a-y, a pa té pou di kè sé krétyen wen la té’é vin fengnan. Okontrè, i té vé èspliké ka ki té’é pasé si janmen yo té ka pèd balan a yo. Menmsi yo té ‘kriyé-yo é kè yo té chwazi-yo’ pou ay an syèl-la, yo té’é pèd bèl privilèj-lasa é yo pa té’é lésé-yo rantré adan wayòm-la ki an syèl-la (2 Pyè 1:10).

¹⁴ Sé ègzanp-la Jézi pran la anrapò èvè sé vyèwj-la é sé talan-la ka montré kè fò tout sé krétyen wen la paré, fò yo véyatif, é fò yo travay èvè onlo balan osi. Men, ès Jézi pran ondòt ègzanp pou avèti-yo ankò ? Wi ! Nou ka touvé ègzanp-lasa an Matyé 24:40, 41, é i ka palé dè jan-la Jézi ké jijé-yo la.

KIMOUN YO KÉ « CHWAZI » ?

15-16. Fò sé krétyen wen la véyatif é sa enpòwtan toubònman. Kijan Matyé 24:40, 41 ka montré sa ?

¹⁵ Avan Jézi té bay sé 3 ègzanp-la nou sòti ègzaminé la, i té palé dè jijman a sé krétyen wen la. Sé pannan jijman-lasa Jézi ké di kimoun ki ké ay an syèl-la. Pou yo té konprann sa byen, i pran ègzanp a 2 nonm ki té ka travay rèd adan on jaden é ègzanp a 2 madanm ki té ka pòté bon mannèv pou pilé grenn a séréal. Ou té’é di kè sé 2 misyé-la té ka fè menm travay-la é sé 2 madanm-la osi. Men poutan Jézi di kè « yo ké chwazi yonn é yo ké lésé lòt-la » (li Matyé 24:40, 41). Aprésa, i avèti sé disip-la. Mi sa i di-yo : « Donk, fò-zò véyatif, pas zò pa sav ki jou Ségnè a zòt ka vin » (Mat. 24:42). Sé konsa Jézi avèti disip a-y osi apré i ba-yo ègzanp a sé vyèwj-la (Mat. 25:13). Èskè sa vé di kè sé 2 biten-lasa lyanné ? I ka sanmsa sé sa menm. Pawmi tout sé krétyen wen la, sé enki séla ki vréman wen la é ki rété fidèl la kè Jézi ké « chwazi ». Sa vé di kè i ké akéyi-yo adan wayòm-la ki an syèl-la (Jan 14:3).

¹⁶ Fò ou véyatif. Siwvwè on krétyen wen pa fè atansyon pou ayen pa jouwé adan lanmityé a-y èvè Jéova, i pé’é fè pawti a séla yo ké « chwazi » la pou yo sanblé an syèl-la (Mat. 24:31). Anfinaldikont, tout sèwvitè a Bondyé, kèlkanswa èspérans a yo, dwètèt pran sé pawòl-la Jézi di la oséryé, é yo dwètèt montré-yo véyatif é rété fidèl.

17. Si a épòk-la nou ka viv la, Jéova ka chwazi sèwten krétyen pou yo vin wen, poukwa sa pa dwètèt enkyété-nou ?

¹⁷ Nou konnèt Jéova byen é nou sav kè i toujou ka aji èvè jistis. Siwvwè a épòk-la nou ka viv la i ka chwazi dé krétyen ki fidèl pou yo vin wen, sa pa ka enkyété-nou c. Nou ka sonjé sa Jézi di adan ègzanp a pyé-rézen-la lèwvwè i té ka palé dè sé travayè-la ki koumansé travay lontan apré sé prèmyé-la (Mat. 20:1-16). Sé travayè-la yo chwazi la pou vin travay adan chan-rézen-la an fen a jouné-la trapé menm kantité lajan ki séla ki koumansé travay pi bonnè la. Menmjan-la, kèlkèswa moman-la on krétyen ka vin wen la, i ké ni rékonpans a-y an syèl-la siwvwè i ka kontinyé rété fidèl.

TCHENN KONT DÈ KONSÈY A JÉZI

18-19. Ka sé ègzanp-la nou ègzaminé la ka aprann-nou ?

¹⁸ Ka nou aprann ? Ègzanp a sé mouton-la é sé kabrit-la montré jan sa enpòwtan kè séla ki ni lèspwa dè viv pou touttan asi latè rété fidèl a Jéova, ki sé konnyéla, ki sé pannan gwo tribilasyon-la ki ka vin la. Lèwvwè Jézi ké jijé lézimen an bout a gwo tribilasyon-la, i ké di kè séla ki rété fidèl  la mérité « rèsèvwa lavi pou touttan » (Mat. 25:46).

¹⁹ Nou vwè 2 ègzanp osi, é sé ègzanp-lasa sé té pou avèti sé krétyen wen la. Adan ègzanp a sé vyèwj-la, ni senk adan yo ki té prévwayan. Yo té paré é yo té véyatif : kèlkèswa kantité tan fò yo té atann misyé-la ki té kay mayé la, yo té paré pou atann-li. Sé vyèwj-la ki té sòt la aprézan, pa té paré. Sé pousa misyé-la ki té ka mayé la pa lésé-yo rantré adan fèt a mayé la. Talè, Jézi kay fin bat èvè mond-lasa, é fò-nou préparé-nou pou nou atann menmsi nou pa sav a ki moman sa ké rivé ègzaktèman. Adan ègzanp a sé talan-la, ni 2 sèwvitè ki pòté bon mannèv. Yo travay rèd pou yo té fè mèt-la gangné lajan é grasa sa, mèt-la té kontan yo. Èsklav-la ki fengnan la aprézan, yo ba-y biyé palapenn a-y. Ka sa ka aprann-nou ? Fò nou pòté bon mannèv adan travay-la nou ka fè la pou Jéova joustan lafen rivé. Ondòt biten nou vwè osi, sé kè fò sé krétyen wen la rété véyatif si yo vé Jézi « chwazi »-yo é ba-yo rékonpans a yo an syèl-la. A pa ti présé yo présé pou vwè jou-la yo ké « sanblé koté » Jézi an syèl-la ! Apré lagè a Awmagédon, ké ni mayé a timouton-la, é a moman-lasa, yo ké ni on bèl lonnè toubònman pas yo ké vin madanm a-y (2 Tés. 2:1 ; Rév. 19:9).

20. Ka Jéova ké fè pou moun ki ka tchenn kont dè konsèy a Jézi ?

²⁰ Menmsi lè-la pou Jézi jijé lézimen ka vin vit, nou pa bizwen pè. Siwvwè nou ka rété fidèl a Pap’an nou ki an syèl-la é ki plen lanmou, i ké ban-nou « puisans-la ki ka dépasé sa ki nòwmal » pou nou « rivé rété doubout douvan Gason a lòm » (2 Kor. 4:7 ; Lik 21:36). Ki nou ni lèspwa dè viv an syèl-la oben asi latè, si nou ka tchenn kont dè konsèy a Jézi, nou ké fè Jéova plézi. É grasa favè-la nou pa mérité la i ka ban-nou la, i ké maké non an nou « adan liv a lavi » (Dan. 12:1 ; Rév. 3:5).