Avan ou koumansé étidyé, ou pé mandé-w : ‘Ka sa an k’ay vwè la ké aprann-mwen ?’ Men on biten pou-w sonjé sé kè menmsi nou anvi aprann on biten, pétèt kè li Jéova, a pa sa i désidé fè-nou aprann. Alò kijan ou pé chèché a vwè ka Jéova vlé anségné-w ?

Priyé pou ni sajès. Mandé Jéova édé-w vwè ka i vlé ou aprann konnyéla (Jak 1:5). Pa enki kontanté-w dè sa ou ja konnèt (Pwov. 3:5, 6).

Lésé puisans a pawòl a Bondyé aji adan vi a-w. « Pawòl a Bondyé vivan » (Ébr. 4:12). Chakfwa ou ka li-y, i pé aprann-vou on nouvo biten é i pé édé-w diféran mannyè adan vi a-w. Men sa ké rivé enki si ou ka rèkonnèt kè ou bizwen aprann sa Bondyé ka anségné-w.

Montré rèkonésans a-w pou tousa Jéova ka ban-nou pou anségné-nou. Nouriti-la i ka ban-nou la pou nou rété bon zanmi èvè-y, sé ‘on banké ki ni bon kalité manjé adan’ (Iz. 25:6). Pa di kè ou pé’é étidyé sèwten biten pas ou pa enmé étidyé sé sijé-lasa. Okontrè étidyé-y kanmenm, konsa, non sèlman ou ké lésé Bondyé édé-w vin on méyè moun, men ou ké étidyé èvè plézi osi !