AWTIK POU ÉTIDYÉ 36
KANTIK 89 Kouté, obéyi, é ou ké béni
« Vin dé moun ki ka mèt pawòl-la an pratik »
« Fò pa zò vin dé moun ki ka tann sèlman, [...] men fò zò vin dé moun ki ka mèt pawòl-la an pratik » (JAK 1:22).
ON TI LIDÉ ASI SA NOU KAY VWÈ
Awtik-lasa ké ban-nou plis balan ankò pou nou anvi li Pawòl a Bondyé plis ankò, pou nou réfléchi asi sa nou ka li é pou nou mèt sa nou aprann an pratik.
1-2. Poukwa pèp a Bondyé ni tchè-kontan ? (Jak 1:22-25).
JÉOVA é Jézi vé nou ni lakontantman. Mi sa moun-la ki maké Sòm 119:2 ni lokazyon di : « Tchè-kontan pou séla ki ka kouté sa Jéova ka fè-yo sonjé la, ki ka chèché-y èvè tout tchè a yo. » É mi sa Jézi ni lokazyon di osi : « Tchè-kontan […] pou séla ki ka tann pawòl a Bondyé é ki ka mété-y an pratik ! » (Lik 11:28).
2 Nou ka adoré Jéova é nou ni tchè-kontan. Poukwa nou ka di sa ? Pou plizyè rézon. Prèmyé-la, sé pas nou ka li Pawòl a Bondyé touléjou é pas nou ka mèt sa nou ka aprann adan-y an pratik (li Jak 1:22-25).
3. Lèwvwè nou ka mèt sa nou ka li an Bib-la an pratik, ki byenfé sa ka pwokiré-nou ?
3 Lèwvwè nou ka « vin dé moun ki ka mèt pawòl-la an pratik », sa ka pwokiré-nou onlo byenfé. Pa ègzanp, lèwvwè nou ka suiv konsèy ki adan Pawòl a Bondyé, nou ka fè Jéova plézi é sa ka ban-nou tchè-kontan toubònman (Ékl. 12:13). Anplisdisa, nou ka antann-nou pibyen èvè moun an fanmi an nou é nou ka vin pi bon zanmi èvè frè é sè a lasanblé-la. Souvantfwa osi, sa ka pwotéjé-nou pou nou pa jwenn sé difikilté-la kè moun ki pa’a suiv komandman a Jéova ka jwenn. Wa David ni lokazyon palé dè Lwa a Bondyé, dè sé lòd-la i ka bay la é dè jijman a-y adan dé ti chanté. Mi sa i di anrapò èvè sa : « Moun ki ka rèspèkté-yo ka jwenn on gwo rékonpans » (Sòm 19:7-11).
4. Poukwa délè nou pé ni dimal a mèt Pawòl a Bondyé an pratik ?
4 Pou nou vin dé moun ki ka mèt Pawòl a Bondyé an pratik, fò-nou li Labib é fò-nou étidyé-y pou konprann sa Jéova vé nou fè. Men sa pa toujou fasil pas noutout ni onlo biten a fè. Alò fò-nou pran on tan pou nou fè sa.
PRAN ON MOMAN TAN POU LI PAWÒL A BONDYÉ
5. Ni onlo biten ki ka pran adan tan an nou. Bay déotwa adan yo.
5 Pou lamajorité adan nou, sé kouri nou ka kouri adan jouné-la. Nou ni onlo biten a fè ki enpòwtan toubònman é pou nou fè-yo sa ka mandé onlo tan. Pa ègzanp, ni sa ki kay travay pou gangné sou a pen a yo é pou ba fanmi a yo on dèkwa (1 Tim. 5:8). Ni sa osi ki ka okipé-yo dè fanmi a yo ki ja ni on bèl laj oben ki malad. Fò-nou pran swen a santé an nou osi é pou nou fè sa, sa ka mandé tan. Anplisdisa, nou ni onlo biten a fè adan lasanblé-la. Prèmyé biten nou ni a fè ki enpòwtan toubònman sé préché bon nouvèl a Wayòm-la. Lèwvwè nou ni tousa biten a fè, ola nou pé touvé tan pou nou pé sa li Labib touléjou, pou nou pé sa réfléchi asi-y é pou nou pé sa mèt sa nou aprann an pratik ?
6. Ka ou pé fè pou ou sèten ou ké li bib a-w ?
6 On krétyen ni onlo biten enpòwtan a fè, é pawmi sé biten-lasa li Labib sé ‘biten-la ki pi enpòwtan la’ (Filip. 1:10). Sé sa nou dwèt mèt an prèmyé adan vi an nou. Sòm 1 la ka palé dè moun-la ki ni tchè-kontan la. Mi sa i ka di : « Plézi a-y sé adan lwa a Jéova i yé, é i ka li lwa-lasa touba lajouné kon lannuit » (Sòm 1:1, 2). Sa ka montré byen kè nou bizwen pran on tan pou li Labib. A ki moman pou nou fè sa ? Répons-la pa oblijé menm biten-la pou nouchak. Men sa ki enpòwtan sé kè lè nou ka chwazi on moman an jouné-la pou nou li Labib, nou ka òwganizé-nou pou nou fè-y chakjou. Mi sa on frè non a-y sé Victor ka èspliké : « An enmé li Labib lèmaten. Menmsi an pa enmé lévé granbonnè, a moman-lasa an ka rivé konsantré-mwen pli fasilman é an ka konprann sa an ka li pibyen. » Ès sé menm biten-la pou-w osi ? Mi sa pou-w mandé-w : « A ki moman an jouné-la an ké rivé li bib an mwen pi fasilman ? »
A ki moman an jouné-la ou ké rivé li Bib a-w touléjou ? (gadé paragraf 6 la).
PRAN ON TAN POU RÉFLÉCHI ASI SA OU KA LI
7-8. Ki biten ki té’é pé anpéché-nou pwofité dè sa nou ka li ?
7 Nou pé li onpakèt biten chakjou men sa pa oblijé sèvi-nou. Dépawfwa, ou sòti li on biten é ou pa’a menm ka sonjé-y. Ès sa ja rivé-w ? Sèten sa ja rivé-w é sé on biten ki ka rivé-noutout. É malérèzman sé on biten ki pé jous rivé-nou lè nou ka li bib an nou. Pétèt nou désidé kè òbjèktif an nou sé li plizyè chapit a Labib chakjou, é sé on bon biten. Lè nou ka chwazi on òbjèktif, fò-nou fè éfò pou nou atenn-li (1 Kor. 9:26). Men a pa li Labib pou nou li Labib tousèl. Sa nou vé sé kè sa menné on biten dè bon ban nou.
8 An-nou pran on ègzanp : Sé plant-la bizwen dlo pou yo viv. Men siwvwè onlo lapli ka tonbé é kè sa ka fèt adan on ti moman, tè-la pé’é pé bwè tout dlo-la ki tonbé la. É siwvwè lapli-la kontinyé tonbé, sé plant-la pé’é pé pwofité dè tout dlo-lasa. Tè-la bizwen tan pou i pé sa bwè tout dlo a lapli-la ki tonbé la é pou sa édé sé plant-la pousé. Menmjan-la fò-nou fè atansyon pou nou pa li Labib two vit. Sa ké anpéché-nou pwofité dè sa nou ka li, pas nou pé’é pé sonjé sa nou li é nou pé’é pé mété-y an pratik adan vi an nou (Jak 1:24).
Menmjan tè-la bizwen tan pou i pé sa bwè tout dlo a lapli-la ki tonbé la é pou sa édé sé plant-la pousé, sé konsa osi nou bizwen tan pou médité asi sa nou ka li adan Pawòl a Bondyé é pou mété-y an pratik (gadé paragraf 8 la).
9. Siwvwè nou ja ni labitid li Labib ogalo, ka pou nou fè ?
9 Délè, ès sa ja rivé-w dè li Bib a-w ogalo ? Si sé sa, ka ou pé fè ? Ében ralanti tibwen. Pran tan a-w pou-w réfléchi asi sa ou ka li oben asi sa ou sòti li adan Pawòl a Bondyé. Pétèt kè ou ké òwganizé-w pou-w ni plis tan lèwvwè ou ka li bib a-w, konsa ou ké ni tan pou-w réfléchi asi sa ou ka li osi. Oben pétèt osi, ou pé li mwens vèwsé pou ou pé sa ni tan pou-w réfléchi asi sa ou li. Talè-la nou palé dè Victor, é mi sa i ka di ankò : « An désidé kè lè an ka li Bib an mwen, an pa’a li twòp biten. Pétèt an pé li on chapit. É konm an ka lévé bonnè mwen pé sa li Bib an mwen, an pé réfléchi asi sa an li toutolon a jouné-la. » Kèlkèswa kantité vèwsé ou désidé li adan Bib-la, sa ki pi enpòwtan sé kè pannan ou ka li, ou ni tan réfléchi asi sa ou ka li la (Sòm 119:97 ; gadé ti karé-la « Déotwa kèsyon pou-w pozé-w »).
10. Kijan ou pé mèt sa ou ka aprann an pratik ? Bay on ègzanp (1 Tésalonisyen 5:17, 18).
10 Kèlkèswa moman-la an jouné-la ou chwazi la pou li bib a-w, é kèlkèswa kantité tan ou ka pasé ka li-y, chakfwa ou ka fè sa, mandé-w kijan pou-w apliké sa ou ka aprann. Chakfwa ou fin fè lèkti a-w, pozé-w kèsyon-lasa : « Kijan an ké pé sèvi èvè sa an aprann jòdijou, é kijan an ké pé sèvi èvè-y apré ? » An-nou pran on ègzanp. Imajiné kè ou li 1 Tésalonisyen 5:17, 18 (li-y). Lè ou li sé 2 vèwsé-lasa, ou té’é pé mandé-w ès ou ka priyé souvan é ès ou ka fè sa èvè tout tchè a-w ? Ou té’é pé éséyé sonjé osi déotwa biten ki ka ba-w anvi di Jéova mèsi. É pétèt ou ké désidé di-y mèsi pou 3 biten an pawtikilyé. Lè ou ka pran déotwa minit tousèl pou réfléchi konsa, piti-a-piti, ou ka vin on moun ki ka tann Pawòl a Bondyé é ki ka mété-y an pratik. É sonjé tousa bon biten sa ké menné ba-w si ou ka fè sa chakjou. Non sèlman ou ké vin on moun ki ka mèt Pawòl a Bondyé an pratik, men ou ké vin filé toubònman adan domenn-lasa. Men vinvwè aprézan ou ni lenprésyon kè ou ni twòp biten a chanjé pou-w rivé fè sa, ka pou-w fè ?
LÈ OU KA CHWAZI ON ÒBJÈKTIF, PA PANN CHAPO A-W TWO HO
11. Poukwa nou pé ni lenprésyon kè nou ni tèlman biten a chanjé kè nou pé’é jen rivé about ?
11 Lè ou ka li Labib é kè ou anvi mèt sa ou aprann an pratik, délè ou pé ni lenprésyon kè ou ni twòp biten a chanjé é kè ou pé’é jen rivé. An-nou pran on ègzanp pou nou konprann sa. Imajiné kè jòdla ou ka li Bib a-w é sa ou li la ka montré-w kè sa enpòwtan kè ou pa fè préférans pou ponmoun (Jak 2:1-8). Lèwgadé ou ka réfléchi é ou ka rann-vou kont kè fò ou fè dé ti chanjman adan jan ou ka aji èvè lézòt é ou ka désidé fè sé chanjman-lasa. Sé on bon biten. Lèlandèmen aprézan, adan lèkti a-w, ou ka vwè kè sa enpòwtan kè ou tchenn lang a-w (Jak 3:1-12). Alò ou ka pran on tan pou réfléchi é ou ka rann-vou kont kè délè, ou ka di dé biten ki pa tèlman pozitif. Alò ou ka désidé kè alèla ou ké ankourajé lézòt plis lè ou ké palé. Lèlandèmen, adan sa ou li la, yo ka èspliké-w jan sa danjéré lè ou zanmi èvè mond-la (Jak 4:4-12). Lèwgadé sa ka tonbé an jaden a-w é ou ka rann-vou kont kè fò ou fè atansyon a jan ou ka anmizé-w. Lèlandèmen ankò, lè ou ka gadé tout sé chanjman-la ou ni a fè la, ou pé santi kè tèt a-w ka pété.
12. Si lè ou ka li Labib ou ka rann-vou kont kè fò ou chanjé détwa biten, poukwa fò pa ou lésé sa dékourajé-w ? (gadé nòt-la osi).
12 Si fò ou pwogrésé adan plizyè domenn, pa lésé sa kasé 2 bra a-w. Lèfètkè ou ka rann-vou kont kè fò ou pwogrésé, sa ka montré kè ou ni bon lentansyon. On moun ki ni imilité é ki sensè ka li Labib pou i pé sa vwè adan ki domenn pou i chanjé sèwten biten a. Sonjé osi kè pou mèt « nouvo pèwsonalité-la » anlè-w, sa ka mandé éfò akontinyé (Kol. 3:10). Alò, ka ki ké édé-w pou-w kontinyé vin on moun ki ka mèt Pawòl a Bondyé an pratik ?
13. Ki bon métòd ou té’é pé itilizé pou mèt sa ou ka aprann an pratik ? (gadé imaj-la osi).
13 Olyé ou chèché a fè tout sé chanjman-la ou ni a fè la onsèl kou, vométan ou montré-w rézonab lè ou ka chwazi òbjèktif a-w (Pwov. 11:2). Mi on biten ou pé éséyé fè : maké tout sé chanjman-la pou ou fè la on koté. Aprésa chwazi yonn dé adan yo kè fò ou fè onfwa-onfwa é lésé sélézòt-la pou apré. Men pwoblèm-la aprézan, sé pa ki biten pou-w koumansé ?
Olyé ou éséyé chanjé tousa ou ni a chanjé onsèl kou, chwazi on òbjèktif ki rézonab. Pou koumansé, pétèt ou pé éséyé pwogrésé enki adan yonn oben dé domenn (gadé sé paragraf 13 é 14 la).
14. Ki prèmyé biten ou té’é pé éséyé chanjé ?
14 Pawmi tout sé biten-la ou ni a chanjé la, pétèt ou ké chwazi on biten ki fasil ba-w pou koumansé, oben pétèt on biten ki vréman enpòwtan. Lèwvwè ou ké chwazi pa ki biten ou ka koumansé, fè rèchèch adan piblikasyon an nou. Pa ègzanp, sèvi èvè Index des publications des Témoins de Jéhovah oben èvè Zouti pou fè rèchèch la. Palé Jéova osi dè òbjèktif-la ou chwazi la é mandé-y ba-w ‘anvi-la é fòs-la anmenmtan pou ou pé sa aji’ (Filip. 2:13). Aprésa, mèt sa ou aprann an pratik. Lèwvwè ou ké pwogrésé adan on 1é domenn, sèten sa ké ba-w plis balan pou chèché a pwogrésé adan on 2èm domenn. É sé vré, pi ou ké vwè kè ou ka rivé travay sèwten kalité, pi sa ké ba-w gou pou fè dòt chanjman. A moman-lasa, ou ké rivé fè sé chanjman-lasa pi fasilman.
LÉSÉ PAWÒL A BONDYÉ « AJI ANLÈ-W »
15. Ki diférans ki ni ant sèwvitè a Jéova é onlo moun ki ka li Bib-la ? (1 Tésalonisyen 2:13).
15 Ni sèwten moun ki ka bat lèstonmak a yo é yo ka di kè yo ja li Labib konmen fwa. Men ès yo ka kwè adan sa Labib ka anségné vréman ? É ès yo ka mèt sa yo aprann an pratik adan vi a yo ? Malérèzman, byensouvan a pa sa ki ka rivé. Men a pa konsa sèwvitè a Jéova ka aji. Pou nou, Bib-la sé ‘pawòl a Bondyé’, é sé konsa sé prèmyé krétyen-la té ka vwè Bib-la osi. Anplisdisa nou ka fè tousa nou pé pou apliké sé konsèy-la ki an Bib-la adan vi an nou (li 1 Tésalonisyen 2:13).
16. Ka fò-nou byen désidé a fè ?
16 Sa pa toujou fasil dè li Labib é dè mèt sa i ka di an pratik. Pétèt nou ni dimal a touvé tan pou nou pé sa li-y. Pétèt osi nou pran labitid li-y two vit é akòz dè sa nou pé pa vréman pwofité dè sa nou ka li. Oben pétèt lèwvwè nou ka vwè tousa biten pou nou chanjé, sa ka kasé 2 bra an nou. Kèlkanswa difikilté-la nou ka jwenn la, nou pé rivé about a-y. É nou ké rivé fè sa pas Jéova ka édé-nou. Men pousa, fò nou byen désidé a lésé-y édé-nou. Fò nou byen désidé a vin dé moun ki pa ka kontanté-yo dè tann Pawòl a Bondyé sèlman men dé moun ki ka mété-y an pratik osi. Asirésèten, pli nou ké li Labib é kè nou ké mété-y an pratik adan vi an nou, pli nou ké ni tchè-kontan (Jak 1:25).
KANTIK 94 Rèkonésans pou Pawòl a Bondyé
a Ay asi jw.org é gadé vidéo-la Sa yo ka di dè sa : Li Labib.
