Sé vré kè lèwvwè Jézi mèt Rèpa a Ségnè la anplas, sé 70 disip-la pa té la. Men fò pa nou pansé kè sa té vé di kè Jézi pa té dakò èvè yo ankò oben kè yotout té lagé-y. Anfèt, Jézi té vé pasé ti moman-lasa èvè apòt a-y.

Ki sé 12 la ki sé 70 la, yotout té disip a Jézi. Dabò, pawmi tout sé pakèt disip-la i té ni la, i chwazi 12 nonm pou yo vin apòt a-y (Lik 6:12-16). Lèwvwè i té an Galilé, i sanblé sé 12 la, « i voyé-yo préché wayòm a Bondyé é i voyé-yo géri moun-malad » (Lik 9:1-6). Aprésa, lèwvwè i té an Jidé, i chwazi 70 disip ankò é i voyé-yo préché 2 pa 2 (Lik 9:51 ; 10:1). Kifè, Jézi té ni disip ki té ka préché mésaj a-y adan plizyè réjyon diféran.

Sé Juif-la ki té vin disip a Jézi, kontinyé sélébré Pak-la chak lanné. I ka sanm sa yo té ka sélébré fèt-lasa èvè fanmi a yo (Ègz. 12:6-11, 17-20). Kèlkètan avan i mò, Jézi ay Jérizalèm èvè apòt a-y. Men i pa sanblé tout disip a-y ki té an Jidé, an Galilé oben an Péré pou yo té sélébré Pak-la èvè-y. Okontrè, i ka sanm sa i té vé rété èvè apòt a-y tousèl. Dayè, mi sa limenm a-y di : « A pa ti anvi an té anvi manjé rèpa a Pak-lasa èvè zòt avan an soufè ! » (Lik 22:15).

Jézi té ni on bon rézon pou aji konsa. Li, « Timouton a Bondyé ki ka woté péché a mond-la », té kay mò talè (Jan 1:29). É fò sa té fèt Jérizalèm, pas sé adan vil-lasa yo té ka fè sakrifis pou Bondyé dépi lontan. Jou a Lapak, sé Juif-la té ka manjé on timouton é sa té ka fè-yo sonjé kè Jéova té libéré-yo é kè i té fè-yo sòti an Éjipt. Men lè Jézi té’é sakrifyé vi a-y, i té’é fè lontan plis ki sa. I té’é libéré toutmoun asi latè anba jouk a péché-la é anba jouk a lanmò (1 Kor. 5:7, 8). Grasa sakrifis a Jézi, sé 12 apòt-la, sé té’é prèmyé moun ki ka fè pawti a lasanblé a sé krétyen-la (Éféz. 2:20-22). Liv a Larévélasyon ka di kè vil-la ki sen la, Nouvo Jérizalèm-la, ‘ni 12 wòch ki ka sèvi-y fondasyon, é asi yo ni 12 non, non a sé 12 apòt a Timouton-la’ (Rév. 21:10-14). Sa ka montré kè sé apòt-la ki té fidèl la té ni on wòl enpòwtan adan pwojé a Bondyé. Alò nou ka konprann poukwa Jézi té vé yo rété èvè-y pou dènyé Pak-la i té kay fè la asi latè é pou sa fè yo té kay apré : Rèpa a Ségnè la.

Alò sé vré kè sé 70 disip-la é sélézòt disip-la pa té èvè Jézi jou a Rèpa a Ségnè la. Men yotout té’é bénéfisyé dè sé byenfé-la Rèpa a Ségnè la té’é pòté la si yo té ka rété fidèl. Tout sé disip-la ki té’é vin wen apré, té’é fè pawti a alyans-la Jézi té palé la èvè apòt a-y pannan Rèpa a Ségnè la, kivédi alyans-la pou on wayòm (Lik 22:29, 30).