1-3. a) Poukisa Jéova té enmé Salomon, é ki bénédisyon Salomon risivwè ? b) A ki kèsyon nou kay réponn adan awtik-lasa ?

SALOMON vin wa a Izrayèl alòskè i té jennboug toujou. Lè i koumansé dominé, Jéova parèt adan rèv a-y é i di-y : « Ka ou té’é enmé an ba-w ? Mandé mwen-y. » Salomon réponn : « An sé on jennboug é [...] an pa ni èkspéryans [...]. Alò souplé, ban-mwen on tchè obéyisan pou jijé pèp a-w » (1 Wa 3:5-10). I mandé « on tchè obéyisan » : Mi on dèmann plen imilité, mi ! Sa pa ka étoné-nou si Jéova té enmé Salomon ! (2 Sam. 12:24). Bondyé té tèlman kontan répons a jenn wa-la kè i ba-y « sajès é bon jijman » (1 Wa 3:12).

² Touttan Salomon rété fidèl, i risivwè onlo bénédisyon. I konstwi on tanp « pou non a Jéova, Dyé a Izrayèl ». Sété on gran lonnè pou-y toubònman (1 Wa 8:20). Anplis, onlo moun té konnèt-li pou sajès-la Bondyé té ba-y la. Bondyé enspiré Salomon pou maké dé pawòl kè nou pé touvé adan twa liv a Labib. Yonn adan sé liv-lasa sé liv a Pwovèb.

³ Lèmo tchè maké près 80 fwa adan liv-lasa. Pa ègzanp, adan Pwovèb 4:23 nou ka li : « Pwotéjé tchè a-w pliski pondòt biten. » Adan vèwsé-lasa, ki sans a lèmo « tchè » ? Adan awtik-lasa, nou ké jwenn répons-la. É nou ké vwè osi : Kijan Satan ka éséyé détouné tchè an nou oben kijan i ka éséyé kontaminé-nou ? Ka nou pé fè pou pwotéjé tchè an nou ? Pou nou rété fidèl a Bondyé, fò-nou byen konprann répons a sé kèsyon enpòwtan lasa.

4-5. a) Ankijan Sòm 51:6 ka édé-nou konprann ka lèmo « tchè » vlé di ? b) Lè nou ka pran ègzanp a santé an nou, kijan sa pé édé-nou konprann enpòwtans a pran swen a sa nou yé andidan ?

⁴ An Pwovèb 4:23, lèmo « tchè » vlé di sa nou yé andidan, « sa ki kaché andidan an [nou] » (li Sòm 51:6 èvè nòt-la). Kivédi, adan-y ni sa nou ka pansé, sa nou ka rèsanti, sa nou ni lentansyon fè é sa nou anvi. Sé sa nou yé andidan. A pa sa lézòt ka vwè lè yo ka gadé-nou.

⁵ Pou nou konprann kijan sa enpòwtan dè pran swen a sa nou yé andidan, an-nou pran ègzanp a santé an nou. Pou nou rété ansanté, fò-nou manjé byen é chak simenn fò-nou fè ispò. Menmjan, pou nou rété ansanté èspirityèlman, fò-nou toujou li Labib é sé piblikasyon-la. Ondòt biten pou nou fè, sé montré kè nou ni fwa an Jéova. Sé sa nou ka fè lè nou ka apliké sa nou ka aprann é lè nou ka palé dè fwa an nou (Wom. 10:8-10 ; Jak 2:26). Anplisdisa, siwvwè nou ka bazé-nou yenki asi sa nou ka vwè pou di kè nou ansanté, nou pé rivé a kwè kè kò an nou bon, alòskè pannansitan on maladi ja ka mi andidan an nou. Menm biten, si nou ka bazé-nou yenki asi labitid èspirityèl an nou, nou pé rivé a kwè kè fwa an nou fò, alòskè mové lanvi ja ka pran lanmen asi nou (1 Kor. 10:12 ; Jak 1:14, 15). Fò-nou sonjé kè Satan té ké enmé kontaminé lèspri an nou. Pousa, i ka éséyé fè-nou pansé menmjan ki-y. Kijan i ka fè sa ègzaktèman ? É kijan pou nou pwotéjé-nou ?

6. Ki òbjèktif a Satan é kijan i ka éséyé atenn-li ?

⁶ Satan vlé kè nou vin kon-y, on rèbèl ki pa ka tchenn kont dè lwa a Jéova é ki égoyis adan tousa i ka fè. Konm i pé pa fòsé-nou rézonné kon-y é i pé pa fòsé-nou fè kon-y, i ka chèché dòt jan pou atenn òbjèktif a-y. Pa ègzanp, i ka mèt alantou an nou moun kè i ja kontaminé (1 Jan 5:19). Sa i ka èspéré sé kè nou  chwazi frékanté-yo, menmsi nou sav kè mové frékantasyon ka gaté mannyè nou ka pansé é mannyè nou ka aji (1 Kor. 15:33, nòt). Métòd-lasa maché byen èvè wa Salomon. I mayé èvè plizyè madanm ki té ka sèvi onlo fo-dyé. É piti-a-piti, sé madanm-lasa « aji asi tchè a-y », kifè i viré Jéova do (1 Wa 11:3).

7. Ki dòt mwayen Satan ka itilizé pou simé lidé a-y, é poukwa fò-nou fè atansyon ?

⁷ Satan ka itilizé fim é émisyon yo ka bay an télé-la pou simé lidé a-y. Ki sé biten ki fèt, ki sé biten yo envanté, i sav kè sé istwa-lasa pa ka yenki anmizé-nou ; yo ka anségné-nou mannyè pou nou pansé é mannyè pou nou aji. Jézi limenm sèvi onlo èvè métòd-lasa pou anségné-nou. Pa ègzanp, nou pé palé dè istwa a bon Samariten-la é dè istwa a tigason-la ki ka lésé kaz a papa-y é ki ka gaspiyé éritaj a-y (Mat. 13:34 ; Lik 10:29-37 ; 15:11-32). Moun Satan ja kontaminé pé itilizé métòd-lasa pou détouné-nou osi. Men fò pa nou two radikal. Nou pé anmizé-nou oben aprann dé biten adan fim oben émisyon ki ka pasé an télé-la san yo aji asi lèspri an nou. Men fò-nou fè atansyon. Lè nou ka chwazi èvè ki biten nou ké anmizé-nou, fò-nou mandé-nou : « Ès lè an ka gadé fim-lasa oben émisyon-lasa, i ka aprann-mwen kè pa ni ayen dè mal a kouté kò an mwen lè an ni on lanvi ki mové ? » (Gal. 5:19-21 ; Éféz. 2:1-3). Ka ou pé fè si ou ka rann-vou kont kè on anmizman ka simé lidé a Satan ? Pran pyé a kouri a-w, menmjan ou té’é fè pou-w pa trapé on maladi ki ka kouri.

8. Kijan léparan pé édé timoun a yo a pwotéjé tchè a yo ?

⁸ Léparan, sé zòt ki rèsponsab dè pwotéjé timoun a zòt kont tousa Satan pé fè  pou kontaminé tchè a yo. Nou pa’a douté kè zò ka fè tousa zò pé pou anpéché-yo tonbé malad. Kaz a zòt toujou pwòp é zò ka jété tousa ki té’é pé rann-yo malad. Menmjan-la, fò-zòt pwotéjé timoun a zòt kont fim, émisyon télé, jé vidéo é sit Entèwnèt ki pé fè lidé a Satan rantré an tèt a yo. Jéova ba-zòt on rèsponsabilité. Fò-zòt édé timoun a zòt vin zanmi a-y (Pwov. 1:8 ; Éféz. 6:1, 4). Alò, pa pè mèt an plas règ ki bazé asi prensip a Labib. Di timoun a zòt sa yo pé gadé é sa yo pé pa gadé. Édé-yo konprann osi pou ki biten zò fè sé chwa-lasa (Mat. 5:37). Toupannan yo ka grandi, aprann-yo ni bon jijman pou yo rivé konprann yomenm ka Jéova enmé é ka i pa enmé (Ébr. 5:14). Pa oubliyé : yo ké aprann onlo dè sa zò ka di, men plis ankò dè sa zò ka fè ! (Dét. 6:6, 7 ; Wom. 2:21).

9. Ka Satan ka chèché fè-nou kwè é poukwa mantalité-lasa danjéré ?

⁹ Pou détouné tchè an nou, Satan ka fè dòt biten ankò. I ka éséyé kontaminé tchè an nou. É pousa, i vlé nou fè sajès a lézòm konfyans olyé nou fè Jéova konfyans (Kol. 2:8). Pa ègzanp, i ka éséyé fè-nou kwè kè sa ki pli enpòwtan adan lavi sé gangné lajan. Pawmi moun ki ka pansé konsa, ni sa ki ké vin rich é ni sa ki pa oblijé vin rich. Men on biten ki sèten, sé kè yo an danjé. Poukisa ? Paskè tèlman yo dèyè do a lajan, yo ké sakrifyé santé a yo, fanmi a yo é menm lanmityé a yo èvè Bondyé pou atenn objèktif-lasa (1 Tim. 6:10). Pap’an nou ki an syèl-la é ki saj ka édé-nou vwè lajan on mannyè ki rézonab. Nou kontan dè sa toubònman ! (Ékl. 7:12 ; Lik 12:15).

10-11. a) Ka fò-nou fè pou nou pwotéjé-nou ? b) An tan lontan, ka sé gad-la té ka fè é kijan konsyans an nou pé sèvi-nou gad ?

¹⁰ Pou réyisi pwotéjé tchè an nou fò-nou vwè sé danjé-la é aji san tadé. An tan a Salomon té ni dé nonm ki té ka véyé an ho a miray a vil-la é ki té ka hélé lè té ni on danjé. Éséyé imajiné sa. Sa ké édé-w konprann sa ou pé fè pou pa lésé Satan kontaminé mantalité an nou.

¹¹ Sé nonm-la ki té ka véyé an ho a miray-la té ka kolaboré men-dan-lamen èvè sé nonm-la ki té ka véyé pòt-la (2 Sam. 18:24-26). Yo té ka pwotéjé vil-la ansanm. Yo té ka pran prékosyon pou fèmé sé pòt-la chakfwa on lènmi té ka vin (Néém. 7:1-3). Lè nou ka édiké konsyans * an nou èvè Labib, i pé sèvi-nou gad é avèti-nou lè Satan ka éséyé rantré an tchè an nou oben aji asi lidé an nou, santiman an nou, lentansyon an nou é lanvi an nou. Chakfwa konsyans an nou ka ban-nou on son, fò-nou kouté-y é fò-nou fè tousa nou pé pou pwotéjé tchè an nou.

12-13. Ka nou pé anvi fè, men kijan pou nou réyaji ?

¹² An-nou pran on ègzanp. Jéova ka aprann-nou kè « péché sèksyèl, tout kalté malpwòpté oben lè ou pa jen ni asé, sé dé biten [nou] pa menm [dwèt] palé dè yo pawmi [nou] » (Éféz. 5:3). Men ka nou ké fè si kanmarad-lékòl an  nou oben kolèg-travay an nou ka mèt-yo ka palé dè biten sèksyèl ki pa pwòp ? Nou sav kè nou dwèt « rèfizé suiv atitid ki ka dérèspèkté Bondyé èvè sa mond-lasa anvi » (Tit 2:12). Pétèt gad-la, konsyans an nou, ké avèti-nou kè ni on danjé (Wom. 2:15). Men, ès nou ké tchenn kont dè-y ? Nou pé anvi kouté kanmarad-lékòl an nou oben kolèg-travay an nou, oben nou pé anvi gadé imaj kè yo ka montré-nou. Men a moman-lasa, pisimé nou pran ondòt konvèwsasyon oben nou pati, pou nou fèmé pòt a tchè an nou.

¹³ Lè nou anba présyon a lézòt, sa pé fè-nou ni dé mové lidé oben sa pé fè-nou fè sa ki mal. Pou tchenbé anba présyon-lasa, fò-nou ni kouraj. Nou pé sèten kè Jéova ka vwè éfò nou ka fè. I ké ban-nou fòs-la é sajès-la nou bizwen la pou nou pa mèt-nou ka pansé kon Satan (2 Kron. 16:9 ; Iz. 40:29 ; Jak. 1:5). Men, ki dòt biten nou pé fè pou pwotéjé tchè an nou ?

14-15. a) Ka pou nou lésé rantré andidan tchè an nou é kijan nou ké rivé fè sa ? b) Kijan Pwovèb 4:20 a 22 ka édé-nou bénéfisyé anplen dè sa nou ka li an Bib-la ? (gadé karé-la «  “Pran tan réfléchi asi sa Labib ka di.” Kijan ? »).

¹⁴ Pou pwotéjé-nou, apatoudi fèmé pòt a tchè an nou pou pa lésé mové biten rantré adan-y. Men fò-nou fè bon biten rantré an tchè an nou osi. Sonjé ègzanp a vil-la ki ni gran miray-la. Défwa, gad a pòt a vil-la té ka fèmé sé pòt-la pou anpéché sé lènmi-la rantré é dòt lè, i té ka wouvè-yo pou fè nouriti é dòt matéryèl rantré. Si yo pa té ka jen wouvè pòt a vil-la, moun ki té andidan a-y té pé mò-fen. Menmjan la, fò-nou toujou wouvè tchè an nou pou pansé a Bondyé aji asi-y.

¹⁵ Adan Labib, nou ka touvé pansé a Jéova. Donk, chakfwa nou ka li-y, nou ka lésé pansé a Jéova gidonné mannyè nou ka pansé é fason nou ka aji. Kijan nou pé bénéfisyé anplen dè sa nou ka li adan Labib ? Fò-nou priyé. Sa nésésè toubònman. On sè ka di : « Avan an li Labib, an ka priyé Jéova pou mandé-y édé-mwen “vwè byen biten èstraòwdinè” ki an Pawòl a-y » (Sòm 119:18). Fò-nou pran tan réfléchi asi sa nou ka li. Lè nou ka priyé, lè nou ka li é lè nou ka pran tan réfléchi, Pawòl a Bondyé kay « anfon a tchè a[n nou] » é sa ka fè-nou enmé mannyè Jéova ka pansé (li Pwovèb 4:20-22 ; Sòm 119:97).

16. Ki bon biten onlo moun ka jwenn grasa pwogram a JW Télédifizyon ?

¹⁶ Ondòt jan ankò nou pé lésé pansé a Bondyé aji anlè nou, sé lè nou ka gadé sé pwogram a JW Télédifizyon^® la. Dé moun-mayé ka di : « Émisyon a chak mwa, sé vréman répons a priyè an nou ! Yo ka ban-nou fòs é kouraj lè nou ni lapenn oben lè nou ka santi-nou tousèl. É nou toujou ka kouté sé mizik-la akaz : lè nou ka fè manjé, lè nou ka nétwayé oben lè nou ka pran on ti té. » Sé pwogram-lasa ka édé-nou pwotéjé tchè an nou. Yo ka aprann-nou pansé kon Jéova é rèfizé pansé kon Satan.

17-18. a) Dapré sa nou ka li an 1 Wa 8:61, ka ki ka fèt lè nou ka apliké sa Jéova ka aprann-nou ? b) Ka ègzanp a wa Ézékyas ka aprann-nou ? c) Annakò èvè priyè a David nou ka touvé an Sòm 139:23, 24, pou ki biten nou pé priyé ?

¹⁷ Chakfwa nou ka vwè bon biten sa ka pòté lè nou ka fè sa Jéova ka aprann-nou,  fwa an nou ka vin pli fò (Jak 1:2, 3). Anplis, nou kontan paskè Jéova fyèw kè nou sé timoun a-y, kifè nou ka vlé fè-y plézi plis ankò (Pwov. 27:11). Chakfwa nou ka jwenn on éprèv, sa ka ban-nou lokazyon montré kè nou pa ka sèvi-y an dé tchè (Sòm 119:113 ; nòt). Okontrè, nou enmé Jéova èvè tout tchè an nou ; kivédi, nou vréman désidé a obéyi lwa a-y é fè volonté a-y (li 1 Wa 8:61).

¹⁸ Ès nou ké fè érè ? Wi, pas nou enpawfè. Lè sa ka rivé, an-nou sonjé ègzanp a wa Ézékyas. I fè érè, men i rèpanti-y é i kontinyé sèvi Jéova « èvè tout tchè a-y » (Iz. 38:3-6 ; 2 Kron. 29:1, 2 ; 32:25, 26). Tousa Satan ka éséyé fè pou nou pansé menmjan ki-y, fò-nou voyé sa alé. An-nou priyé pou nou ni « on tchè ki ka obéyi » (1 Wa 3:9 ; li Sòm 139:23, 24). Nou pé rété fidèl a Jéova si nou ka pwotéjé tchè an nou pliski pondòt biten.