1-2. a) Ka Jéova ka vwè lè milyon é milyon moun ka sanblé pou sélébré Rèpa a Ségnè-la ? (gadé prèmyé imaj a awtik-la). b) Ka nou kay ègzaminé adan awtik-lasa ?

AN-NOU réfléchi asi sa Jéova ka vwè lè milyon é milyon moun toupatou asi latè ka sanblé pou sélébré Rèpa a Ségnè-la. A pa yenki onpakèt moun i ka vwè, men i ka vwè chak sé moun-la ki la la. Pa ègzanp, i ka vwè séla ki toujou ka vin chak lanné. Adan yo, ni sa ki la magré yo ka jwenn dé gwo kalté éprèv. Ni sa ki pa ka vin adan sélézòt réinyon-la chak simenn, men yo ka vin Mémoryal, pas pou yo, sé on réinyon ki vréman enpòwtan. Jéova ka vwè osi tout sé moun-la ki ka vin Mémoryal pou prèmyé fwa a yo, pétèt pas yo anvi vwè kijan sa ka pasé.

² Sa ka fè Jéova plézi lè i ka vwè tousa moun ka vin Mémoryal (Lik 22:19). É poutan, pou Jéova, a pa kantité moun ki ka vin ki pli enpòwtan, men sé pou ki rézon yo la. Adan awtik-lasa, nou ké ègzaminé on kèsyon ki vréman enpòwtan : Poukwa non sèlman nou ka vin Mémoryal, men osi poukwa, chak simenn, nou kay adan réinyon Jéova ka prévwa pou moun ki enmé-y ?

3-4. a) Poukwa nou kay réinyon ? b) Lè nou kay réinyon, ka sa ka montré asi nou ? c) Dapré sa 1 Korentyen 11:23 a 26 ka di, poukwa fò pa nou raté Mémoryal-la ?

³ Si nou kay réinyon, sé dabò pas sé réinyon-la ka fè pati a adorasyon nou ka ba Jéova. Sé osi pas nou vlé Jéova anségné-nou. Moun ki ni òwgèy ka konprann kè yo pa bizwen ponmoun anségné-yo (3 Jan 9). Men nou, nou  anvi rèsèvwa ansègnman a Jéova é a òwganizasyon a-y (Iz. 30:20 ; Jan 6:45).

⁴ Lè nou ka vin réinyon, nou ka montré kè nou ni imilité, kè nou dakò pou yo anségné-nou. Si nou kay Mémoryal, a pa yenki pas nou sav kè sé on biten kè nou dwèt fè, men sé osi pas nou ni imilité é nou vlé suiv komandman a Jézi : « Kontinyé fè sa pou zòt sonjé-mwen » (li 1 Korentyen 11:23-26). Réinyon-lasa ka rann èspérans an nou pli solid é ka fè-nou sonjé jan Jéova enmé-nou. Men, Jéova sav kè nou bizwen ankourajman pliski onsèl fwa adan on lanné. Sé pousa, i mèt réinyon an plas chak simenn é i ka mandé kè nou la. Limilité ka pousé-nou a obéyi. Kifè, nou ka pasé on bon tibwen tan pou préparé sé réinyon-la é pou vin adan yo chak simenn.

5. Poukwa moun ki ni imilité ka réyaji lè Jéova ka envité-yo ?

⁵ Chak lanné, ni onpakèt moun ki ni asé imilité pou aksèpté envitasyon-la Jéova ka fè-yo la. Yo dakò pou Jéova anségné-yo (Iz. 50:4). Padavwa yo kontan vin Mémoryal, yo ka koumansé vin adan sélézòt réinyon-la (Zak. 8:20-23). Noutout byen kontan kè Jéova, « sila ki ka vin a sèkou an [nou] é sila ki ka libéré-[nou] la », ka enstwi-nou é ka gidé-nou (Sòm 40:17). Jéova é Gason a-y Jézi, kè i enmé toubònman, fè-nou on envitasyon pou yo anségné-nou. Franchman, si ou aksèpté on envitasyon konsa, ou ka di ni on biten ki pé rann-vou pli kontan ki sa ? Ou ka di ni on biten ki pli enpòwtan ki sa ? (Mat. 17:5 ; 18:20 ; 28:20).

6. Kijan imilité a on misyé édé-y vin Mémoryal ?

⁶ Chak lanné, nou ka fè on éfò pou on maksimòm dè moun vin Mémoryal a mò a Jézi. Lè moun ki ni imilité ka aksèpté envitasyon an nou, sa ka pwokiré-yo onlo byenfé. An-nou pran on ègzanp. Ni plizyè lanné dè sa, on frè té ba on misyé on envitasyon pou Mémoryal. Misyé-la di frè-la kè i pé’é pé vin. Men lèswa a Mémoryal-la, frè-la touvé-y étoné lè i vwè menm misyé-la vin Lasal di Wayòm ! Yo akéyi misyé-la tèlman byen, sa touché-y toubònman. Kifè, i koumansé vin réinyon chak simenn. Pou di vré, asi on lanné, i manké yenki twa réinyon. Ka ki pousé misyé-la réyaji konsa ? Sé pas i té ni bon imilité, kifè i chanjé lidé. Frè-la ki té envité-y la di : « Sé on boug ki ni onlo imilité. » Sèten sé Jéova ki fè si misyé-la aksèpté lavérité, é konnyéla, i sé frè an nou (2 Sam. 22:28 ; Jan 6:44).

7. Sa nou ka aprann lè nou réinyon é sa nou ka li adan Bib-la pé édé-nou a ni imilité. Kijansa ?

⁷ Sa nou ka aprann lè nou réinyon é sa nou ka li an Bib-la pé édé-nou a ni imilité. Adan réinyon an nou, déotwa simenn avan Mémoryal-la, souvan nou ka palé dè ègzanp a Jézi é dè jan i montré imilité a-y lè i bay vi a-y konm ranson. É pannan sé jou-la ki avan Mémoryal-la, yo ka ankourajé-nou a li an Bib-la sa ki fèt avan é apré mò a-y é rézirèksyon a-y. Sa nou ka aprann lè nou réinyon é sa nou ka li an Bib-la ka fè-nou ni plis rèkonésans pou sakrifis-la Jézi fè pou nou la. Sa ka pousé-nou a ni imilité kon Jézi é a fè sa Jéova ka atann dè nou, menm lè sa difisil (Lik 22:41, 42).

8. Kijan Jézi montré kè i té ni kouraj ?

⁸ Nou ka éséyé imité kouraj a Jézi osi. Sonjé kouraj-la i montré la pannan sé dènyé jou-la avan mò a-y. I té sav  byen kè sé lènmi a-y la té kay fè-y onlo abominasyon. Yo té kay voyé mépri ba-y é yo té kay fè-y wont, yo té kay bat-li é yo té kay tchouyé-y (Mat. 20:17-19). Magrésa, i té dakò pou pran mò a-y. On ti moman avan yo tchenbé-y adan jaden a Jètsémani, i di sé apòt-la ki té fidèl la : « Doubout, an-nou ay. Mi : sila ki ka vin la pou vann-mwen la toupré rivé » (Mat. 26:36, 46). Aprésa, lè on gwoup-moun ki té ni zam vin pou arété-y, Jézi vansé owa a yo, i di-yo kimoun i té yé, é i ba-yo lòd lésé apòt a-y pati (Jan 18:3-8). Mi kouraj, mi ! Jòdila, sé krétyen wen la é séla ki ka fè pati a sélézòt mouton-la ka fè éfò pou yo suiv ègzanp a Jézi : yo ka montré kè yo ni kouraj. Kijan ?

9. a) Délè, poukwa fò-nou ni kouraj pou nou vin réinyon ? b) Kijan ègzanp an nou pé aji asi frè an nou ki lajòl padavwa yo ka sèvi Jéova ?

⁹ Lè nou ka vin réinyon chak simenn, sa ka mandé-nou kouraj, pas délè, fò-nou goumé èvè difikilté a lavi. Ni sa adan frè é sè an nou ki ka vin réinyon magré yo pèd on moun yo té enmé. Ni dòt ki la menmsi yo dékourajé, oben menmsi yo malad. Ni sa ki la magré fanmi a yo oben lalwa vlé anpéché-yo sèvi Jéova. An-nou réfléchi on ti moman asi jan ègzanp an nou pé aji asi frè an nou ki lajòl padavwa yo ka sèvi Jéova (Ébr. 13:3). Lè yo ka vin sav kè, magré nou ka sibi éprèv, nou ka kontinyé sèvi Jéova, sa ka ba-yo on bèl kouraj, sa ka rann fwa a yo pli fò, é sa ka édé-yo rété fidèl. Sé sa ki rivé lapòt Pòl lè i té lajòl a Wòm. I té ka kontan chaklè i té ka tann kè frè a-y té ka rété fidèl é kè yo té ka kontinyé sèvi Jéova (Filip. 1:3-5, 12-14). On ti moman avan i sòti lajòl oben on ti moman apré, Pòl ékri on lèt ba sé krétyen ébré-la pou ba-yo on bèl ankourajman. Fò-yo té « kontinyé montré lanmou pou frè a [yo] » é fò pa yo té jen lagé sé réinyon-la (Ébré 10:24, 25 ; 13:1).

10-11. a) Kimoun nou dwèt envité Mémoryal ? b) Dapré Éfézyen 1:7, poukwa nou ka fè sa ?

¹⁰ Fò-nou ni kouraj pou envité fanmi an nou, zanmi an nou, kolèg-travay an nou é vwazen an nou pou Mémoryal. Men poukwa nou ka fè sa ? Sé pas nou ni on gwo rèkonésans toubònman pou sa Jéova é Jézi fè ban nou. Nou vlé kè moun alantou an nou konnèt kijan, yo osi, yo pé bénéfisyé dè « favè a Bondyé, kè [yo] pa mérité » grasa ranson-la (li Éfézyen 1:7 ; Rév. 22:17).

¹¹ Lé nou ka vin réinyon, nou ka montré kè nou ni ondòt bèl kalité ankò. Ki Jéova, ki Gason a-y ka montré kalité-lasa on bèl fason toubònman.

12. a) Kijan réinyon an nou ka konsolidé lanmou nou ni pou Jéova é pou Jézi ? b) Dapré 2 Korentyen 5:14 é 15, kijan nou pé imité Jézi ?

¹² Lanmou nou ni pou Jéova é pou Jézi ka pousé-nou a vin réinyon. É sa nou  ka aprann lè nou réinyon ka konsolidé lanmou nou ni pou yo, pas nou ka tann palé dè sa yo fè pou nou (Wom. 5:8). Mémoryal-la ka fè-nou sonjé jan Jéova é Jézi enmé-nou fò toubònman. Menm séla ki po’o konprann ki valè a ranson-la, Jéova é Jézi enmé-yo osi. Tèlman nou ni rèkonésans an tchè an nou, nou ka fè tousa nou pé pou nou imité Jézi adan vi an nou touléjou (li 2 Korentyen 5:14, 15). Anplisdisa, sa ka ban-nou anvi louwé Jéova pou ranson-la i ban-nou la. Pou nou fè sa, nou pé bay komantè ki ka sòti an fon a tchè an nou, lè nou réinyon.

13. Kijan nou pé montré kè nou ni on gran lanmou toubònman pou Jéova é Jézi ? Bay on ti èsplikasyon.

¹³ Nou pé montré kè andidan an nou ni on gran lanmou toubònman pou Jéova é Jézi, lè nou paré a fè sakrifis pou yo. Byensouvan, sé dé sakrifis konsa nou ka fè lè nou ka vin réinyon. An simenn-la, onlo lasanblé lokal ka ni réinyon a yo an fen a jouné la, é pétèt sé moman nou ka pi las pas nou sòti lagé travay. É lòt réinyon-la ka fèt lèwikenn, alòskè onlo moun ka pwofité pou pozé kò a yo. Ou ka di Jéova ka vwè lè nou ka fè éfò pou nou vin réinyon, alòskè nou tou las ? Asiré pa pétèt ! An réyalité, pli nou ka fè éfò é pli Jéova ka vwè valè a sa nou ka fè pou nou montré-y kè nou enmé-y (Mawk 12:41-44).

14. Jézi montré on lanmou ki pa ka atann ayen an rètou. Ki ègzanp i lésé ban nou ?

¹⁴ Jézi ban-nou lègzanp : i montré on lanmou ki pa ka atann ayen an rètou, on lanmou ki fò toubònman, ki ka pousé a fè sakrifis ba lézòt. Non sèlman, i té paré a mò pou disip a-y, men osi, touléjou, i té ka fè entéré a yo pasé avan ta-y. Pa ègzanp, menm lè i té ka santi kò a-y oben moral a-y krazé, i toujou té ka pasé on moman èvè disip a-y (Lik 22:39-46). Prèmyé biten ki té an lidé a-y, a pa té sa moun té pé bay, men sété sa i té pé ba moun (Mat. 20:28). Si lanmou an nou pou Jéova é pou frè an nou fò kon ta Jézi, nou ké fè lèmaksimòm pou nou vin Mémoryal é pou nou vin adan tout sélézòt réinyon-la.

15. Kimoun èspésyalman nou vlé édé ?

 ¹⁵ Nou ka fè pati a sèl fanmi a vré krétyen ki ni asi latè, é nou ka kontan lè nou ka pasé on maksimòm dè tan ka envité dòt moun vin jwenn-nou. Kanmenmsa, ni dé moun nou vlé édé èspésyalman. Sé « séla ki [sé] frè é sè an nou adan lafwa », men ki arété préché é ki pa ka vin réinyon ankò (Gal. 6:10). Nou ka montré kè nou enmé-yo lè nou ka ankourajé-yo a vin réinyon é a vin Mémoryal. Kon Jéova é Jézi, a pa ti kontan nou kontan lè on frè ou on sè ki té arété préché ka wouvin owa Jéova, ki sé Pap’an nou é Bèwjé an nou ki plen lanmou (Mat. 18:14).

16. a) Kijan yonn pé ankourajé lòt, é ka sé réinyon-la ka pòté ban nou ? b) Poukwa sé bon moman a lanné-la pou nou sonjé pawòl a Jézi nou ka touvé adan Jan 3:16 ?

¹⁶ Adan lé simenn ki ka vin, an-nou envité on maksimòm dè moun vin Mémoryal, ki ké fèt lè vandrèdi 19 avril 2019 (gadé karé-la «  Ès ou ké envité-yo ? »). É pannan lanné-la, an-nou fè tousa nou pé pou vin chak simenn adan tout réinyon Jéova prévwa ban nou, pou yonn ankourajé lòt. Padavwa lafen ka vin vit, nou bizwen réinyon an nou pou nou pa pèd imilité an nou, kouraj an nou é lanmou an nou (1 Tés. 5:8-11). Jéova é Jézi enmé-nou fò toubònman, alò an-nou montré-yo tousa nou ka rèsanti pou yo an fon a tchè an nou ! (li Jan 3:16).