1-2. a) Poukwa sa pa ka étoné-nou kè Jézi di disip a-y fè dé ti biten tou senp pou konmémoré mò a-y ? b) Nou kay palé dè 3 kalité Jézi té ni. Kilès la ?

 ÈS OU ké pé èspliké kijan Mémoryal a mò a Jézikri ka déwoulé ? Sèten kè lamajorité adan nou ké sav fè sa. Poukwa ? Paskè rèpa-lasa pa konpliké ditou ! É poutan, i enpòwtan toubònman. Kifè, nou pé ka mandé-nou poukwa i senp konsa ?

² Lè Jézikri té ka préché asi latè, onlo moun té sav kè i té ka anségné dé vérité enpòwtan on mannyè ki senp, klè é fasil a konprann (Mat. 7:28, 29). Kifè, sa pa ka étoné-nou si i mandé disip a-y fè dé ti biten tou senp pou konmémoré b mò a-y. Sété dé ti biten tou senp men ki té ni on gran signifikasyon. An-nou pran on tan pou nou réfléchi asi rèpa a Mémoryal-la, asi sèwten biten Jézi di é asi sèwten biten kè i fè. Nou ké konprann pli byen ankò jan Jézi ni imilité, jan i ni kouraj é jan i plen lanmou. Nou ké vwè osi ka nou pé fè pou nou imité-y pli byen.

3. Sèlon Matyé 26:26 a 28, poukwa nou pé di kè lè Jézi fè prèmyé Mémoryal-la, rèpa-la té tou senp, é ka pen-la é diven-la té ka rèprézanté ?

³ Lè Jézi fè prèmyé Mémoryal-la, i té èvè 11 apòt a-y ki té rété fidèl. Pou rèpa-lasa, i pa fè granzafè. I sèvi èvè diven-la é pen-la ki té ka rété la apré yo té fin sélébré Lapak  (li Matyé 26:26-28). Jézi èspliké apòt a-y kè diven-la é pen-la té ka rèprézanté san a-y é kò a-y ki té pawfè, kè i pa té kay tadé a sakrifyé pou yo. Pétèt kè sa pa siwprann sé apòt-la lè yo vwè jan sérémoni-lasa té senp. Poukwa nou ka di sa ?

4. Kijan konsèy-la Jézi ba Mawt la, ka édé-nou konprann poukwa Jézi fè ansòt pou rèpa a Mémoryal-la tou senp ?

⁴ Sonjé sa ki pasé déotwa mwa avan Mémoryal-la, pannan twazyèm lanné-la apré Jézi koumansé préché. I té ay vwè Laza, Mawt é Mari akaz a yo. Té ni on bon anbyans, é Jézi koumansé anségné moun ki té la. Mawt té la, men lidé a-y pa té asi sa Jézi té ka di, pas i té okipé. I té ka préparé on gran manjé pou onoré Jézi. Lè Jézi vwè sa, i fè-y konprann, èvè onlo jantiyès, kè i pa té oblijé fè granzafè (Lik 10:40-42). Plita, déotwa zèdtan avan i mò, Jézi apliké sa limenm té di. I fè ansòt pou rèpa a Mémoryal-la tou senp. Ka sa ka aprann-nou asi Jézi ?

5. Rèpa a Mémoryal-la té tou senp. Ka sa ka aprann-nou asi Jézi é kijan sa annakò èvè sa nou ka li an Filipyen 2:5 a 8 ?

⁵ Jézi té ka aji èvè imilité kèlkèswa sa i té ka di é kèlkèswa sa i té ka fè. Kifè, sa pa ka étoné-nou si i aji èvè imilité pannan dènyé swaré-la i pasé asi latè (Mat. 11:29). I té sav kè adan istwa a limanité, pa té ké ni sakrifis pli enpòwtan ki sila i té kay ofè la. I té sav osi kè Jéova té ké résisité-y é kè i té ké mété-y wa an syèl-la. Men magrésa, i pa chèché a fè moun pòté-y anlè. Pou konmémoré mò a-y, i pa mandé disip a-y fè on gran sérémoni. Okontrè, i mandé disip a-y fè on rèpa tou senp, on fwa chak lanné, pou montré kè yo ka sonjé-y (Jan 13:15 ; 1 Kor. 11:23-25). Sé vré kè rèpa-lasa tou senp, men i an plas a-y. I ka montré kè Jézi pa té on moun ki té ka akwè-y. Imilité sé yonn dé pli bèl kalité kè Wa an nou ki an syèl-la tini. É nou kontan dè sa toubònman ! (li Filipyen 2:5-8).

6. Lè nou adan on éprèv, ka nou pé fè pou nou ni imilité menmjan ki Jézi ?

⁶ Ka nou pé fè pou nou ni imilité menmjan ki Jézi ? On biten nou pé fè, sé fè entéré a lézòt pasé avan tan nou (Filip. 2:3, 4). An-nou viré asi dènyé swaré a Jézi asi latè. I té sav kè talè i té kay soufè bon soufè la menm ; é poutan, i té ka enkyété-y onlo pou apòt a-y pas i té sav kè lè i té’é mò, yo té’é tris toubònman. Alò, dènyé swaré a-y, i  pasé-y ka anségné-yo, ka ankourajé-yo é ka trankilizé-yo (Jan 14:25-31). Èvè onlo imilité, Jézi montré kè sa ki té ka plis entérésé-y, sété kè lézòt santi-yo byen. I té ka pasé apré. Mi on bèl ègzanp pou nou !

7. Apré i fè prèmyé Mémoryal-la, Jézi aji èvè onlo kouraj. Ka i ka montré sa ?

⁷ On ti moman apré i fè prèmyé Mémoryal-la, Jézi aji èvè onlo kouraj toubònman. Ka i fè konsa ? Jézi aksèpté dè fè volonté a Papa-y, menmsi i té sav kè akòz dè sa, yo té’é kondanné-y pou on vyé jan dè krim toubònman. Yo té ké akizé-y dè di vyé jan dè pawòl asi Bondyé (Mat. 26:65, 66 ; Lik 22:41, 42). Jézi rété obéyisan a san pou san pou i té pé sa onoré non a Papa-y é soutyenn dominasyon a-y. É i rété obéyisan osi, pou toutmoun ki rèpanti-yo pé sa viv pou touttan. An menm balan-la, Jézi préparé disip a-y pas yomenm a yo osi té kay pran bon gaz.

8. a) Ka Jézi èspliké apòt a-y ? b) Kèlkè lanné apré Jézi mò, kijan disip a-y imité kouraj-la i té ni la ?

⁸ Ondòt biten ki ka montré kè Jézi aji èvè kouraj, sé kè i pa rété la ka pran tèt a-y asi sa ki té ka trakasé lèspri a-y. Men olyé dè sa, i konsantré-y asi sa apòt a-y té bizwen. I fè Mémoryal-la apré i voyé Jida alé. Grasa ti rèpa-lasa, tout disip a Jézi ki té kay viv an syèl-la té’é sonjé byenfé kè san a-y i vèsé ka pòté. Yo té ké sonjé osi kè yo ka bénéfisyé dè nouvo alyans-la (1 Kor. 10:16, 17). Pou édé apòt a-y rété fidèl é pou yo té vin wa èvè-y an syèl-la, Jézi èspliké-yo sa li é Papa-y té vlé yo fè (Jan 15:12-15). I palé-yo osi dè sé éprèv-la yo té kay rankontré la. Aprésa, pou ankourajé-yo pran ègzanp asi-y, i  di-yo : « Pran kouraj ! » (Jan 16:1-4a, 33). Jézi té ka fè lézòt pasé avan-y é i té plen kouraj. Plizyè lanné plita, disip a-y té ka kontinyé imité-y toujou. Lè yo té ka jwenn éprèv, yonn té ka kontinyé soutyenn lòt, menmsi délè sitiyasyon-la té rèd toubònman (Ébr. 10:33, 34).

9. Ka nou pé fè pou imité kouraj a Jézi ?

⁹ Jòdijou osi, nou ka imité kouraj-la Jézi té ni la. Pa ègzanp, délè, yo ka pèwsékité frè é sè an nou pas yo Témwen a Jéova. Lè sa ka rivé, fò-nou ni kouraj pou soutyenn-yo. Défwa, yo ka mété déotwa adan nou lajòl alòskè yo inosan. An ka-lasa, fò-nou fè tousa nou pé pou édé-yo. É délè, sa ka mandé kè nou défann-yo (Filip. 1:14 ; Ébr. 13:19). Fò-w ni kouraj osi pou-w kontinyé préché (Akt 14:3). Menmjan ki Jézi, nou byen désidé a kontinyé préché mésaj a Wayòm-la, menmsi yo vlé anpéché-nou sèvi Jéova oben yo ka pèwsékité-nou. Men défwa, pétèt nou ka touvé kè nou pa ni asé kouraj. Ka nou pé fè an ka-lasa ?

10. Pannan péryòd a Mémoryal-la, ka nou dwètèt fè, é poukwa ?

¹⁰ Ranson-la Jézi péyé la ka pwokiré-nou on èspérans. Lè nou ka réfléchi asi-y, nou pé ni plis kouraj ankò (Jan 3:16 ; Éféz. 1:7). Pannan déotwa simenn avan Mémoryal-la, nou ni on lokazyon èspésyal dè rann rèkonésans an nou pou laranson pli fò. Pannan péryòd-lasa, suiv pwogram a lèkti a Labib ki fèt pou Mémoryal é pran on tan pou rantré an nannan a sa ki pasé avan é apré mò a Jézi. Konsa, lèswa a Mémoryal-la, ou ké konprann pli byen ankò signifikasyon a sé senbòl-la é a sakrifis èstraòwdinè la yo ka rèprézanté la. Si nou ka konprann vréman ka  Jézi é Jéova fè ban nou é ki bon biten sa ka pwokiré, ki nou, ki moun kè nou enmé, èspérans an nou ké vin pli fò. Nou ké byen désidé a tchenbé rèd èvè kouraj jistan sistèm-la bout (Ébr. 12:3).

11-12. Ka nou ja aprann jousalè ?

¹¹ Kon nou ni lokazyon vwè, rèpa a ségnè-la ka pèwmèt-nou réfléchi si valè a ranson-la, men osi si imilité é kouraj a Jézikri. É nou pé pa pi kontan ki sa padavwa i toujou ni sé menm kalité-lasa an syèl-la, antankè Gran Prèt ki ka plédé an favè an nou (Ébr. 7:24, 25). Nou ka montré rèkonésans an nou lè nou ka konmémoré mò a-y chak lanné, kon i mandé-nou (Lik 22:19, 20). Nou ka fè sa, jou-la ki ka korèsponn èvè lè 14 nizan, ki sé dat pli enpòwtan la an lanné-la.

¹² Men difètkè Rèpa a Ségnè-la té tou senp sa ka montré-nou kè Jézi té ni ondòt kalité ankò. Sé kalité-lasa ki pousé-y a bay vi a-y pou nou. Lè i té asi latè, moun té ka rèkonnèt kè i té ni kalité-lasa. Ki kalité ésa ?

13. Ki détay Jan 15:9 é 1 Jan 4:8 a 10 ka bay asi jan Jéova é Jézi montré lanmou a yo, é kimoun ki ka bénéfisyé dè lanmou-lasa ?

¹³ Jéova enmé-nou fò menm, é Jézi té ni menm lanmou-lasa adan tousa i té ka fè (li Jan 15:9 ; 1 Jan 4:8-10). Tèlman Jézi té enmé-nou fò, i bay vi a-y pou nou. Sakrifis-lasa ka montré-nou kè Jéova é Jézi enmé-nou. É lanmou-lasa, noutout ka bénéfisyé dè-y, ki sé o syèl oben asi latè nou kay viv (Jan 10:16 ; 1 Jan 2:2). Réfléchi osi si sé senbòl-la nou ka itilizé la pannan Mémoryal-la. Yo ka montré kè Jézi enmé disip a-y é kè i té ni konsidérasyon pou yo. Kijansa ?

14. Kijan Jézi montré kè i té enmé disip a-y ?

¹⁴ Jézi montré kè i té enmé disip a-y ki wen, pas pou sélébré Rèpa a Ségnè-la i pa mandé-yo fè granzafè, men i di-yo fè on ti rèpa tou senp. Fò sé disip-lasa té sélébré Mémoryal-la chak lanné. É fò yo té fè-y adan diféran sitiyasyon, menmsi yo té lajòl (Rév. 2:10). Èskè yo rivé fè sa Jézi mandé-yo ? Ou pé di-y !

15-16. Kijan sèwten adan nou rivé sélébré Rèpa a Ségnè-la magré sitiyasyon-la té rèd ?

¹⁵ Dépi o prèmyé syèk jous alajouné jòdi, sé vré krétyen-la toujou pòté bon mannèv pou konmémoré mò a Jézikri. Pou sélébré Rèpa a Ségnè-la, yo fè tousa yo té pé pou suiv modèl-la Jézi lésé la, menm lè sitiyasyon a yo té rèd menm. An-nou pran ègzanp a déotwa moun ki viv a épòk an nou. Lèwvwè frè Harold King touvé-y tousèl adan on prizon an Chin, fò i té touvé on jan pou i té konmémoré mò a Jézi. San pon moun vwè, i préparé sé anblèm-la èvè sa i té ni anba men a-y. I fè tousa i té pé pou kalkilé ki dat Mémoryal-la té ka tonbé. Lè lè a Mémoryal-la rivé, i té tousèl adan on pyès, men i chanté, i priyé, é i fè on diskou biblik.

¹⁶ Mi on dòt ègzanp. Pannan dézyèm gè mondyal la, dé sè ki té fèmé on koté yo té ka fè moun bon atrosité riské vi a yo pou yo té pé sa konmémoré Rèpa a Ségnè-la. Men konm sé on rèpa tou senp, yo rivé fè sa andous san pon moun vwè-yo. Mi sa yo di : « Nou té an won, yonn té kolé si lòt, é anmitan an nou té ni on tabouré èvè on ti nap blan é sé anblèm-la té anlè-y. Sé on bouji ki té ka kléré pyès-la, pas limyè élèktrik la  té’é pé rivé a trayi-nou. [...] Nou priyé Pap’an nou fò pou nou woudi-y kè nou vlé sèvi èvè tout fòs an nou pou nou défann non a-y ki sen ». Mi on fwa solid mi ! É mi lanmou a Jézikri osi, piskè grasa-y nou pé sélébré Mémoryal-la menm lè sitiyasyon-la difisil !

17. Ki kèsyon nou pé pozé-nou ?

¹⁷ Toupannan Mémoryal-la ka apwoché, an-nou mandé-nou : « Ka an pé fè pou enmé menmjan ki Jézi ? Ès an ka pran swen a frè é sè an mwen plis ki mwen menm ? Ès an ka atann kè frè é sè an mwen bay pliski sa yo pé bay, oben ès an ka tchenn kont dè limit a yo ? » An-nou fè kon Jézi é pousa, « lè [nou] ka vwè moun ka soufè, fò sa fè-[nou] on biten » (1 Pyè 3:8).

18-19. a) Dè ki biten nou pé sèten ? b) Ka ou byen désidé a fè ?

¹⁸ Konnyéla nou ka sélébré Mémoryal a mò a Jézi, men talè, nou pé’é ka fè sa ankò. Lè Jézi « [ké] vin » pannan gwo-tribilasyon-la, i ké sanblé an syèl-la rèstan a « séla i chwazi la », é nou ké arété sélébré Mémoryal-la (1 Kor. 11:26 ; Mat. 24:31).

¹⁹ Men menm aprésa, nou pé sèten kè sèwvitè a Jéova ké kontinyé sonjé èvè on tchè plen rèkonésans tout sé bèl lèson-la ti rèpa tou senp lasa ka aprann-yo. Rèpa-lasa ké fè-yo sonjé pli gran imilité, pli gran kouraj é pli gran lanmou kè on nonm ja tini asi latè. A moman-lasa, asiré pa pétèt, toutmoun ki ni lokazyon asisté a rèpa-lasa ké palé dè Mémoryal-la alantou a yo. Konsa, dòt moun osi ké pé pwofité dè sé bèl lèson-la rèpa-lasa ka anségné. Men jòdijou, pou rèpa-lasa sèvi-nou on biten, fò-nou byen désidé a ni menm imilité, menm kouraj, é menm lanmou ki Jézikri. Si nou ka fè sa, nou pé sèten kè Jéova ké rékonpansé-nou (2 Pyè 1:10, 11).