1, 2. a) Ka ki ni plis valè an vi a-w ? b) Ki vérité ki ni onlo valè pou nou, é poukisa ? (sèvi èvè sé imaj-la ki antèt a awtik-la).

KA KI ni plis valè an vi a-w ? Pou nou ki ka sèvi Jéova répons-la fasil : sé lanmityé an nou èvè-y. Nou pa vlé bokanté-y èvè pondòt biten. Nou enmé sé vérité-la ki adan Bib-la onlo, pas yo ka édé-nou ni on lanmityé solid èvè Jéova (Kol. 1:9, 10).

² Réfléchi si tousa Jéova, Gran Pwofésè an nou, ka aprann-nou adan Pawòl a-y Labib ! I ka fè-nou konnèt kijan non a-y enpòwtan é i ka palé-nou dè bèl kalité èstraòwdinè kè i ni. I ka fè-nou sav kè tèlman i enmé-nou fò, i ofè vi a Gason a-y ban nou. Jéova ka èspliké-nou ka ki Wayòm a Mési-la. I ka ban-nou on èspwa pou plita : sé wen-la ké ay viv an syèl-la, é « sélézòt mouton-la » ké viv adan on paradi asi latè (Jan 10:16). I ka aprann-nou kijan pou nou konpòwté-nou. Nou enmé sé vérité-lasa onlo, pas yo ka édé-nou rapwoché-nou dè Jéova. Yo ka ba vi an nou on sans.

3. Ès Jéova ka mandé-nou lajan pou i anségné-nou lavérité ?

 ³ Jéova sé on Dyé ki donan. Tèlman i enmé bay, i sakrifyé pwòp Gason a-y ban nou. Lè Jéova ka vwè on moun ka chèché lavérité, i ka édé-y touvé-y. I pé ké jen mandé-y lajan pou i anségné-y lavérité. On jou, on misyé yo ka kriyé Simon té vlé péyé lapòt Pyè pou i té bay pouvwa pou ba moun lèspri sen. Pyè tonbé an zo a-y. I di-y : « Fò lajan a-w disparèt ansanm èvè-w, pas ou konprann ou pé ni don gratui a Bondyé èvè lajan ! » (Akt 8:18-20). Men ka sa vlé di : « Achté lavérité » ?

4. Ka nou ké aprann asi lavérité adan awtik-lasa ?

⁴ (Li Pwovèb 23:23.) Fò-nou fè éfò pou aprann konnèt vérité-la ki an Bib-la. Fò-nou paré a fè onlo sakrifis. Dépi nou rivé « achté » lavérité é kè nou konnèt-li, fò-nou fè atansyon pou nou pa jen « vann-li », ni mété-y akoté. An-nou vwè kijan nou pé « achté » lavérité, é ki valè a-y. Konsa, lavérité ké ni lontan plis valè pou nou é nou pé ké jen vlé mété-y akoté. Nou ké konprann poukisa i mérité nou fè onlo sakrifis.

5, 6. a) Kijan nou pé achté lavérité san lajan ? Bay on ègzanp. b) Ki bénédisyon nou pé ni grasa lavérité ?

⁵ A pa paskè on biten gratui kè i pa vo ayen. An Pwovèb 23:23, yo itilizé lèmo « achté » pou tradui on mo ébré ki pé vlé di osi « rivé a ni ». Adan sé dé mo-lasa, ni lidé kè on moun ka fè on éfò, oben i ka bay on biten pou òbtyenn on dòt biten ki ni onlo valè pou-y. Men sa pa vlé di ou oblijé bay on lajan. Imajiné kè asi on mawché yo ka pwopozé « Bannann pou ayen ». Ès ou ké atann-vou a vwè bannann enn parèt asi tab a-w san fè ayen ? Non. Ou ké oblijé ay asi mawché-la pou pran sé bannann-la é menné-yo akaz a-w. Menmsi sé bannann-la gratui, fò ou fè on éfò pou rivé a ni-yo. Menmjan la, menmsi nou pa bizwen lajan pou òbtyenn lavérité, fò-nou fè éfò é sakrifis pou rivé a ni-y.

⁶ (Li Izayi 55:1-3.) Adan sé vèwsé-lasa, Jéova ka édé-nou konprann ka sa vlé di « achté lavérité ». I ka konparé vérité-la èvè dlo, lèt é diven. Menmjan on dlo byen frapé ka fè-nou dibyen, sé vérité-la ki adan Pawòl a Bondyé ka rafréchi-nou. É menmjan lèt ka ba on timoun fòs é ka édé-y grandi, lavérité ka édé lanmityé an nou èvè Jéova grandi. Men an ki sans pawòl a Jéova pé kon diven ? Adan Labib, diven é lakontantman lyanné (Sòm 104:15). Sé pousa, lè Jéova ka di-nou « achté diven », i vlé di-nou kè si nou fè sa i ka mandé-nou, nou pé sèten nou ké touvé lakontantman (Iz. 55:1, nòt ; Sòm 19:8). Ou pa’a touvé sé on bèl imaj pou édé-nou konprann kè nou pé ni bénédisyon si nou ka aprann konnèt lavérité é si nou ka mété-y an pratik ! Aprézan, an-nou palé dè senk biten nou pé ni a péyé pou achté lavérité.

7, 8. a) Poukwa nou pé di kè pou aprann konnèt lavérité sa ka pran tan ? b) Ki sakrifis on jennfi ki té ka fè étid fè, é èvè ki rézilta ?

⁷ Tan an nou. Sa ka pran tan pou kouté mésaj a Wayòm-la, pou li Labib  é sé piblikasyon biblik la, pou étidyé Labib èvè Témwen a Jéova, pou préparé sé réinyon-la é pou ay adan. Pou fè sé biten-lasa, fò-nou pran tan asi aktivité ki ni mwens enpòwtans (li Éfézyen 5:15, 16 é nòt). Konmen tan sa ka pran pou rivé konnèt ansègnman dè baz ki an Bib-la ? Sa ka dépann dè chakmoun. Nou pé’é jen fin aprann asi sajès a Jéova, asi jan i ka aji é asi tousa i fè (Wom. 11:33). Prèmyé niméwo a Tou dè Gad la té ka konparé lavérité a « on ti flè » é i di konsa : « Pa kontanté-w dè onsèl flè a vérité. Si onsèl té ka sifi, Bondyé pa té ké ban-nou tousa vérité. Alò touttan ou pé tchui, kontinyé tchui. » Nou pé mandé-nou : « Ès an byen konnèt Jéova ? » Menm lè nou ké ka viv pou touttan adan paradi-la, nou pé ké jen fin aprann asi Jéova. Sa ki pli enpòwtan jòdijou, sé itilizé tan-la nou ni la byen konm i fo, pou dékouvè tout vérité nou pé dékouvè. Sé sa on jenn madanm fè.

⁸ Mariko *, on jenn Japonèz, vin rété Nouyòk, o Zétazini, pou fè étid. On jou, on sè pyonyé vin akaz a-y é i palé èvè-y dè bon nouvèl a Wayòm-la. Mariko té ja adan on rèlijyon, men magrésa i aksèpté étidyé Labib èvè sè-la. Tèlman i té enmé sa i té ka aprann, i mandé sè-la étidyé èvè-y dé fwa pa simenn. Menmsi Mariko té byen okipé èvè sa i té ka étidyé lékòl é èvè travay a-y, i pa tadé pou vin réinyon. I té ka pran mwens tan pou anmizé-y, kifè i té ni plis tan pou i té pé sa aprann konnèt lavérité. Grasa sé sakrifis-lasa, lanmityé a-y èvè Jéova vin pli solid, é an mwens ki on lanné, i pran lèbatèm. Sis mwa apré, i vin pyonyé, é jousalè i adan sèwvis-lasa.

9, 10. a) Pou on moun achté lavérité, kijan i dwèt konsidéré byen matéryèl ? b) Ka on jenn madanm lagé, é ka i ka pansé dè chwa a-y ?

⁹ Byen matéryèl an nou. Pou achté lavérité, sèwten moun lagé on travay ki té ka rapòté-yo onlo lajan, oben ki té ka pèwmèt-yo vin on gran jan dè moun adan sistèm-lasa. An-nou pran ègzanp a Pyè é André, ki té maren-péchè. Lè Jézi envité-yo suiv-li pou vin « péchè a nonm », « yo lagé filèt a yo » (Mat. 4:18-20). Sa pa vlé di kè on moun ki ka dékouvè lavérité dwèt lagé travay a-y. Sèlon Lézékriti, fò-y pran swen a fanmi a-y (1 Tim. 5:8). Pawkont, byensouvan, i ka vwè sé byen matéryèl la ondòt jan. I ka vin sav ka ki pli enpòwtan adan vi a-y. Jézi di konsa : « Arété sanblé trézò asi latè [...]. Sanblé trézò adan syèl-la plito » (Mat. 6:19, 20). An nou vwè ègzanp a on jenn madanm.

¹⁰ Marya té enmé jouwé gòlf dépi lè i té toupiti. Lè i té o lisé, kò a-y té tèlman bon adan ispò-lasa, yo pwopozé-y on bous pou i péyé étid a-y linivèwsité. Gòlf, sété tout vi a-y. Grasa ispò-lasa, i té’é fè onpakèt lajan pou gangné vi a-y. Aprésa, i mété-y ka étidyè Labib. I té enmé sé vérité-la i té ka dékouvè la, é i koumansé mèt an pratik sa i té ka aprann. I di konsa : « Pli an té ka mété lidé an mwen é vi an mwen annakò èvè sé prensip-la ki an Bib-la, pli an té ni lakontantman. » Marya konprann kè sa té ké difisil pou-y dè konsantré-y si lanmityé a-y èvè Jéova é anlè byen matéryèl  anmenmtan (Mat. 6:24). Pou i achté lavérité, i lagé òbjèktif-la i té ni la : i pa chèché a vin on gran jouwè gòlf. Aprézan, Marya pyonyé é i ka di kè « i ni lakontantman é méyè vi-la ki tini la ».

11. Lè on moun ka achté lavérité, ki éfé sa pé ni asi jan i ka viv èvè zanmi a-y é fanmi a-y ?

¹¹ Jan nou ka viv èvè lézòt. Lè on moun ka apliké sa i ka vwè an Bib-la, jan i ka viv èvè fanmi a-y é zanmi a-y pé chanjé. Poukisa ? Jézi fè priyè-lasa pou disip a-y : « Sangtifyé-yo èvè lavérité ; pawòl a-w sé vérité » (Jan 17:17 ; nòt). « Sangtifyé » pé vlé di osi « mété apa ». Sila ki ka aksèpté vérité-la, i apa, kivédi i séparé dè mond-lasa, pas i pa’a viv kon sé moun-la ki alantou a-y la. Menmsi i ka éséyé rété byen èvè zanmi a-y é fanmi a-y, ni sa adan yo ki pé rivé a pran distans a yo èvè-y. Yo pé jous rivé a montré yo pa dakò ditou èvè nouvo kwayans a-y. Sa pa ka siwprann-nou, pas Jézi di : « Wi, lènmi a on moun sé ké pwòp fanmi a-y » (Mat. 10:36). I pwomèt-nou osi kè kèlkèswa sa nou ka lagé pou ni lavérité, nou ké toujou gangné lontan plis anrètou ! (li Mawk 10:28-30).

12. Ka on juif té paré a lagé pou i té pé achté lavérité ?

¹² Dépi lè i té toupiti, on juif yo ka kriyé Aaron, té ka kwè kè sa pa té byen dè pwononsé non a Bondyé. Men i té vréman anvi konnèt lavérité asi Bondyé. On jou, on Témwen a Jéova montré-y kè si i té ka ajouté vwayèl anmitan a sé kat konsòn ébré la ki adan non a Bondyé, i té’é pé pwononsé-y « Jéova ». Tèlman Aaron té kontan dékouvè sa, i ay vwè sé rabi-la adan sinagòg-la pou pawtajé sa èvè yo. Men jan-la yo réyaji la siwprann Aaron. Olyé yo té kontan dékouvè vérité-lasa si non a Bondyé, yo voyé kracha asi-y é yo mété-y déwò. Fanmi a-y chanjé èvè-y. Men Aaron pa lésé tout sé biten-lasa dékourajé-y é i kontinyé aprann plis asi Jéova. I vin Témwen a Jéova é i rété fidèl tout rèstan a vi a-y. Menmjan ki Aaron, on moun ki ka achté lavérité dwèt aksèpté kè fanmi a-y é zanmi a-y viv ondòt jan èvè-y.

13, 14. Ki chanjman fò-nou fè lè nou ka dékouvè lavérité ? Bay on ègzanp.

¹³ Sa nou ka pansé é jan nou ka aji. Lè nou ka dékouvè lavérité é lè nou ka koumansé mété an pratik sa nou ka aprann an Bib-la, fò-nou paré a chanjé mannyè nou ka pansé é jan nou ka aji. Lapòt Pyè maké : « Kon dé timoun obéyisan, pa lésé anvi zò té ni an tan lontan, lè zò pa té ni konésans, pran lanmen asi zòt ankò, men [...] zòt osi vin pwòp adan tout konduit a zòt » (1 Pyè 1:14, 15). Adan ansyen vil-la yo té ka kriyé Korent, onlo moun té ni on vyé vi. Moun a vil-la ki té vlé vin pwòp an zyé a Bondyé té ni gwo chanjman a fè (1 Kor. 6:9-11). Sé konsa jòdila osi, onlo moun ni gwo chanjman a fè pou achté lavérité. Pyè palé dè yo an détay lè i maké : « Zò ja pasé asé tan konsa ka fè sa sé nasyon-la té vlé, lè zò té ka lagé kò a zòt èvè fon é toupé adan on konduit ki san rèspé, lè zò pa té ka métrizé anvi zò té ni pou lachè, lè zò té bwasonè, lè zò té kay adan bòdé apiyé, lè zò té ka bwè pou sou é zò té ka dérèspèkté lalwa  toupannan zò té ka adoré idòl » (1 Pyè 4:3).

¹⁴ Pannan bon enpé lanné, Dévin é Jasmin té bwasonè. Kò a Dévin té bon toubònman adan kontabilité, men pwoblèm-la i té ni la èvè lalkòl té ka anpéché-y rété adan menm travay-la. Toutmoun té konnèt Jasmin kon on moun ki té vyolan é ki té ka fè kòlè. On jou i té sou, Jasmin kontré dé misyonè Témwen a Jéova obò a chimen-la. Yo mandé-y si i té vlé yo vin akaz a-y, simenn-la ki té ka vin la, pou étidyé Labib èvè-y. Men lè yo rivé, yo touvé ki Dévin ki Jasmin sou. Yo pa té ka pansé kè sé dé misyonè-la té ka konsidéré-yo asé pou vin vwè-yo. Men lè yo wouvin, sitiyasyon-la té chanjé : Jasmin é Dévin té présé dékouvè sé vérité biblik la. Yo koumansé mété an pratik sa yo té ka aprann on fwa menm. Twa mwa apré sèlman, yo té ja arété bwè, é aprésa yo mayé douvan lalwa. Onlo moun adan vilaj a yo konstaté chanjman yo té fè é yo désidé étidyé Labib osi.

15. Ka ki pé rèd a lagé pou achté lavérité, é poukwa ?

¹⁵ Mès é labitid. Pou sèwten moun, sa fasil dè lagé mès é labitid kè Jéova pa enmé. Men pou dòt moun, sa rèd toubònman. Yo pè jan fanmi a yo, kolèg travay a yo é zanmi a yo ké réyaji. Yo sav kè pou onlo moun, ni dé mès é labitid ki vréman enpòwtan, kon vénéré fanmi ki ja mò (Dét. 14:1). Alò, ka ki pé édé on moun lagé mès é labitid kè Bondyé pa enmé ? Sé ègzanp a sèwten sèwvitè a Bondyé ki an Bib-la é ki montré yo té ni kouraj. An-nou gadé ki ègzanp moun ki té ka rété Éfèz o prèmyé syèk lésé ban nou.

16. Ki sakrifis sèwten moun Éfèz fè ?

¹⁶ Adan ansyen vil-la yo té ka kriyé Éfèz, onlo moun té ka pratiké lamaji. Ka séla ki vin krétyen la fè ? Labib ka èspliké : « Onlo moun adan séla ki té ka fè lamaji sanblé liv a yo é yo brilé-yo douvan toutmoun. Lè yo kalkilé valè a tousa yo brilé : yo touvé 50 000 pyès an awjan. Sé konsa, on mannyè puisan, Pawòl a Bondyé kontinyé rantré toupatou é i kontinyé vin pli fò » (Akt 19:19, 20). Sé krétyen fidèl la aksèpté débarasé-yo dè sé liv-lasa, ki té ni onlo valè, é Jéova béni sakrifis a yo.

17. a) Ki sakrifis nou pé ni a fè pou achté lavérité ? b) A ki kèsyon nou kay réponn adan pwochen awtik-la ?

¹⁷ Ka ou lagé pou achté lavérité ? Noutout pran adan tan an nou pou aprann konnèt sé vérité-la ki an Bib-la. É sé sa nou ka kontinyé fè. Désèrten moun lagé on travay ki té ka rapòté-yo onlo lajan, oben yo aksèpté kè fanmi a yo é zanmi a yo chanjé jan yo té ka viv èvè yo. Pétèt osi nou lagé mès é labitid ki pa té ka fè Jéova plézi. Kèlkanswa sa nou lagé, nou sèten kè sa vo lapenn dè fè tout sé sakrifis-lasa pou rivé a ni sé vérité biblik la. Sé vérité-lasa ka édé-nou ni sa ki ni plis valè adan lavi : on lanmityé solid èvè Jéova. Lè nou ka pran tan réfléchi asi tout sé bénédisyon-la nou ka risivwè la grasa lavérité, nou pa ka rivé konprann poukwa sèwten moun té ké vlé « vann-li ». Kijan sa té’é pé rivé ? É ka nou pé fè pou pa jen fè érè-lasa ? Nou ké réponn a sé kèsyon-lasa adan pwochen awtik-la.