1-3. a) Kijan pou nou vwè sé vérité-la ki an Bib-la ? Bay on ègzanp (gadé sé imaj-la ki antèt a awtik-la). b) A ki kèsyon nou kay réponn adan awtik-lasa ?

 JÒDIJOU, ni onlo moun ki ka viré menné sa yo achté adan on magazen. Ni plis moun ankò ki ka wouvoyé alé sa yo achté asi entèwnèt. Pétèt sé pas yo rann-yo kont kè sa yo achté la ni on défo, oben i pa agou a yo. Kifè, swa yo ka mandé ba-yo ondòt, oswa yo ka mandé ba-yo lajan a yo.

² Nou pé’é jen vlé aji konsa èvè lavérité. Dépi nou « achté-y », kivédi dépi nou aprann konnèt-li, nou pa té ké jen vlé « vann-li », oben lagé-y (li Pwovèb 23:23 ; 1 Tim. 2:4). Adan prèmyé awtik-la, nou palé dè déotwa biten nou lagé pou nou pé sa « achté » lavérité. Pétèt nou pran tan asi dòt aktivité kè nou té ni. Pétèt osi nou lagé on travay ki té ka fè-nou gangné onpakèt lajan. Déparfwa, nou chanjé mannyè nou té ka viv èvè fanmi an nou oben èvè zanmi an nou, nou chanjé fason nou té ka réfléchi é jan nou té ka aji. Oben nou lagé mès é labitid nou té ni é ki pa té ka fè  Jéova plézi. Men nou sèten kè byenfé nou risivwè pas nou vin konnèt lavérité ni lontan plis valè ki tout sakrifis nou fè.

³ Pou édé-nou konprann sa on moun ki ka dékouvè lavérité ka rèsanti, Jézi pran ègzanp a on moun ki ka chèché bèl pèwl toupatou pou i vann-yo. Lè i ka touvé yonn ki ni on gran gran valè, i ka « pòté mannèv pou i vann » tousa i tini pou pé sa achté-y (Mat. 13:45, 46). Menmjan la, lè nou dékouvè lavérité, sètadi vérité-la asi Wayòm a Bondyé é tout sélézòt bèl vérité-la ki an Bib-la, nou té paré a lagé tout biten pou pé sa ni-y. Si nou kontinyé ba-y onlo valè, nou pé’é jen « vann-li ». Malérèzman, tin déotwa sèwvitè a Bondyé ki arété ba lavérité valè é yo lagé-y karéman. Sèten nou pa té’é swété sa rivé-nou ! Alò, an-nou fè kon Labib ka di, an-nou « kontinyé maché adan lavérité » (li 3 Jan 2-4, nòt pou « selon »). « Maché adan lavérité », sa vlé di mété-y an prèmyé adan vi an nou, é viv on mannyè ka montré kè sé plas-lasa nou ka bay. Men pou ki rézon é kijan on moun pé rivé a « vann » lavérité ? Ka nou pé fè pou sa pa jen rivé-nou ? É ka ki pé édé-nou ni plis volonté pou nou kontinyé maché adan lavérité ?

4. O prèmyé syèk, poukwa ni déotwa ki arété maché adan lavérité ?

⁴ O prèmyé syèk, sèwten moun ki, odépa, té dakò èvè sa Jézi té ka anségné, arété maché adan lavérité. Pa ègzanp, apré Jézi té fè on mirak pou i té pé ba on gran foulmoun manjé, foulmoun-lasa suiv-li asi lòt bò a lanmè Galilé. Lè yo rivé la, Jézi di-yo on biten ki chouboulé-yo toubònman : « Si zò pa’a manjé chè a Gason a lòm, é si zò pa’a bwè san a-y, zò pé’é ni lavi. » Olyé yo té mandé-y ka i té vlé di pa la, yo hélé é yo di : « Ki kalté vyé pawòl ésa ? Kimoun ki pé kouté sa ? » Kifè, « on bon kantité adan disip a-y viré dèyè biten yo té ja lésé, é yo pa té vlé maché èvè-y ankò » (Jan 6:53-66).

5, 6. a) Alèkilé, poukwa tin sa ki désidé kité lavérité ? b) Kijan on moun pé ka « lésé » on biten « chayé-[y] olwen » ?

⁵ Malérèzman, alèkilé, ni déotwa krétyen ki fè menm biten-la. Yo désidé kité lavérité. Pétèt sé on nouvo èsplikasyon asi sa Labib ka di ki mal pasé-yo. Oben pétèt on frè, onlo moun konnèt, di oben fè on biten ki chouboulé-yo. Ni sa ki pa pran sa lè yo ba-yo on konsèy bazé asi Labib, oben yo trapé on gwo bab èvè on dòt krétyen. Ni dòt ankò ki désidé suiv apòsta oben moun ki kont lavérité. Sé konsa tin détwa adan yo ki fin pa « kité » Jéova é lòwganizasyon (Ébr. 3:12-14). Olyé yo té aji konsa, pisimé yo té suiv ègzanp a lapòt Pyè ! Lè sa Jézi di chouboulé sèwten moun, i mandé apòt a-y si yo té vlé pati osi. Men Pyè réponn-li : « Ségnè, owa kimoun nou té’é ay ? Ou ni pawòl ki ka bay lavi étèwnèl » (Jan 6:67-69).

⁶ Ni déotwa ki lésé lavérité piti-a-piti, pétèt san menm yo rann-yo kont. Lè on moun ka lésé lavérité piti-a-piti, i kon on bato kouran-la ka chayé. Dayè pou yonn, Labib ka di-nou penga nou « lésé ayen chayé-nou olwen » (Ébr.  2:1). On moun konsa, pétèt a pa vlé i vlé lésé lavérité, men piti-a-piti i ka lésé lanmityé a-y èvè Jéova fébli é i pé jous rivé a pèd-li. Ka pou nou fè pou sa pa jen rivé-nou ?

7. Ka ki ké édé-nou pa jen « vann » lavérité ?

⁷ Pou nou maché adan lavérité, fò-nou aksèpté é fò-nou kouté tousa Jéova ka di. Nou dwèt mèt lavérité an prèmyé adan vi an nou é mèt an pratik prensip ki an Bib-la adan tousa nou ka fè. Adan on priyè, wa David di : « An ké maché adan vérité a-w » (Sòm 86:11). I té byen désidé a kontinyé maché adan lavérité. Sé konsa pou nou yé osi. Sinon, nou pé koumansé ka sonjé tout sé biten la nou lagé la é nou pé jous koumansé ka rigrété déotwa adan yo. Men antankè krétyen, nou pé pa chwazi adan ansègnman a Jéova kilès nou ké suiv. Fò-nou maché « adan tout lavérité » (Jan 16:13). Adan awtik-la ki té ka vin avan la, nou palé dè senk biten kè pétèt nou lagé pou nou òbtyenn lavérité. Konnyéla, an-nou vwè ka nou pé fè pou nou pa jen viré chèché sé biten-la nou té ja lésé dèyè do an nou la (Mat. 6:19).

8. Kijan, si on krétyen ka mal sèvi èvè tan a-y, sa pé chayé-y olwen ? Bay on ègzanp.

⁸ Tan an nou. Pou nou pa lésé ayen chayé-nou olwen, fò-nou itilizé tan an nou èvè sajès. Si nou pa fè atansyon, nou pé ka pasé twòp tan ka anmizé-nou, asi entèwnèt oben ka gadé télé. Menmsi sé aktivité-lasa pa mové, yo pé pran asi tan-la nou ni la pou fè étid pèwsonèl an nou, oben pou dòt aktivité èspirityèl. Sé on biten konsa ki rivé on sè yo ka kriyé Éma a. Dépi toupiti, i té enmé chouval, é chakfwa i té pé, sé chouval i té ka monté. Men on lè, i rann-li kont kè i té ka pasé twòp tan adan sa é i fè chanjman. Ni on ègzanp ki ankourajé-y osi, sé ègzanp a Kori Wèls, ki té ka fè rodéo avan b. Aprézan, Éma ka pasé plis tan ka sèvi Jéova, é i ni plis tan pou fanmi a-y é pou zanmi a-y ki Témwen. I ka santi i vin pli bon zanmi èvè Jéova é i kontan pas i sav i ka itilizé tan a-y èvè sajès.

9. Kijan sé byen matéryèl la pé pran twòp enpòwtans adan vi an nou ?

⁹ Byen matéryèl an nou. Pou nou kontinyé maché adan lavérité, fò pa nou lésé sé byen matéryèl la pran twòp enpòwtans adan vi an nou. Lè nou koumansé étidyé Labib, nou konprann kè sèvi Jéova lontan pli enpòwtan kè ni byen matéryèl, é nou té byen kontan fè sakrifis pou lavérité. Men jòdijou, pétèt nou ka vwè moun ka achté tout kalté nouvo aparèy élèktronik ki ni, é ka pwofité anplen dè tousa lajan a yo ka pèwmèt-yo achté. Pétèt nou pé koumansé ka di-nou kè nou ka raté on biten é kè sa nou ni pa ka sifi-nou ankò. Danjé-la, sé kè nou pé touvé-nou ka mèt sèwvis an nou pou Jéova akoté, pou rivé ni plis byen matéryèl. Sa ka fè-nou sonjé sa ki rivé Démas. Tèlman i té enmé mond-la, i lagé sèwvis-la i té ka fè la èvè lapòt Pòl (2 Tim. 4:10). Poukwa i fè sa ? Pétèt i té pi enmé byen matéryèl ki sèwvis  a-y pou Jéova. Pou sèvi ansanm èvè Pòl, sa té ka mandé dè fè sakrifis é pétèt i pa té vlé fè sé sakrifis-lasa ankò. Ka sa ka aprann-nou ? Pétèt avan, nou té enmé byen matéryèl. Si nou pa’a fè atansyon, lanmou-lasa pé viré adan tchè an nou é vin tèlman fò kè i pé fè-nou pèd lanmou an nou pou lavérité.

10. Pou nou kontinyé maché adan lavérité, ki biten fò pa nou lésé aji asi nou ?

¹⁰ Jan nou ka viv èvè lézòt. Pou nou kontinyé maché adan lavérité, fò pa nou lésé atitid a moun ki pa ka sèvi Jéova aji asi nou. Lè nou vin konnèt lavérité, mannyè nou té ka viv èvè fanmi an nou é zanmi an nou ki pa Témwen chanjé. Pétèt ni sa ki rèspèkté nouvo kwayans an nou, men ni sa ki montré yo pa té dakò ditou èvè-yo (1 Pyè 4:4). Asiré pa pétèt, nou ka fè tousa nou pé pou nou toujou byen èvè moun ki an fanmi an nou, é pou nou aji èvè-yo épi onlo bonté. Men nou pé’é lagé prensip a Labib pou fè-yo plézi. É kon 1 Korentyen 15:33 ka aprann-nou, sé yenki moun ki enmé Jéova nou dwètèt ni konm zanmi.

11. Ka ki pé édé-nou rézisté pou pa fè pon biten ki pa pwòp ?

¹¹ Sa nou ka pansé é jan nou ka aji. Tousa ki ka maché adan lavérité dwèt « sen », kivédi pwòp, an zyé a Jéova (Iz. 35:8 ; li 1 Pyè 1:14-16). Lè nou aksèpté lavérité, noutout pòté chanjman pou nou pé sa viv annakò èvè prensip a Labib. Ki sé piti, ki sé gwo chanjman nou fè, fò-nou véyatif pou nou pa jen bokanté vi-la nou ka menné la, ki pwòp, èvè on vyé vi. Ka ki pé édé-nou rézisté pou pa fè pon biten ki pa pwòp ? Sonjé ka Jéova bay pou nou pé sa vin pwòp an zyé a-y : vi a Gason a-y i enmé toubònman, Jézikri ! (1 Pyè 1:18, 19). Pou nou rété pwòp an zyé a Jéova, fò-nou toujou sonjé valè èstraòwdinè kè sakrifis a Jézi tini.

12, 13. a) Poukwa fò-nou vwè fèt a mond-lasa kon Jéova ka vwè-yo ? b) Dè ki biten nou kay palé aprézan ?

¹² Mès é labitid. Moun ki an fanmi an nou, kolèg travay an nou oben kanmarad lékòl an nou pé éséyé fè-nou pawtisipé adan fèt ki pa ka fè Jéova plézi. Kijan nou pé rivé tchenbé anba présyon yo ka mèt asi nou ? Ni on biten ki dwèt rété klè antèt an nou, sé pou ki rézon Jéova pa dakò èvè sé fèt-lasa. Nou pé chèché adan piblikasyon an nou pou nou sonjé ola sé fèt-lasa sòti. Lè nou ka pran tan réfléchi asi rézon Labib ka bay dè pa sélébré sé fèt-lasa, nou ka sèten kè mannyè nou ka aji « agréyab ba Ségnè-la » (Éféz. 5:10). Si nou ka mèt konfyans an nou adan Jéova é adan Pawòl a-y, sa ké édé-nou pa jen « tranblé douvan lézòm » (Pwov. 29:25).

¹³ Nou vlé kontinyé maché adan lavérité pou touttan. Ka ki pé édé-nou ni plis volonté pou nou kontinyé maché adan lavérité ? An-nou vwè twa biten nou pé fè.

14. a) Si nou ka kontinyé étidyé Labib, kijan sa ké pèwmèt-nou ni plis volonté pou pa jen lagé lavérité ? b) Poukwa nou bizwen lentélijans, lasajès é ladisiplin ?

¹⁴ Prémyé biten fò ou fè, sé kontinyé étidyé Labib é réfléchi byen asi sa ou ka aprann. Toujou rézèwvé on tan pou sa. Pi ou ké étidyé, pi ou  ké enmé lavérité é pi ou ké ni volonté pou pa jen lagé-y. An Pwovèb 23:23, nou ka li : « Achté lavérité é pa jen vann-li. » Vèwsé-la ka di-nou osi : « Fè menm biten èvè lasajès, ladisiplin é lentélijans. » Apatoudi konnèt lavérité. Fò-nou mété-y an pratik. Lentélijans ka pèwmèt-nou lyanné sa nou ka aprann èvè sa nou té ja sav. Lasajès ka fè-nou aji annakò èvè konésans-la. É déparfwa, lavérité ka korijé-nou. I ka fè-nou konprann ki chanjman nou ni a fè. Lè nou ka risivwè on disiplin konsa, an-nou pòté mannèv pou nou chanjé sa ki ni a chanjé. Labib ka di kè disiplin-la ni lontan plis valè ki sa ki an awjan (Pwov. 8:10).

15. Kijan lavérité ka pwotéjé-nou, kon on senti ?

¹⁵ Dézyèm biten, fò ou byen désidé a mèt an pratik lavérité adan tousa ou ka fè. Labib ka di kè lavérité kon on senti a sòlda (Éféz. 6:14). An tan a Labib, senti a sòlda-la té ka pwotéjé ren a-y pannan sé konba-la. Men pousa, fò i té maré-y solid. Poukwa nou pé di kè lavérité kon on senti ? Si i maré solid anlè nou toulongalé, i ké anpéché-nou ni vyé lidé é i ké pèwmèt-nou pran bon désizyon. Lè nou ké jwenn éprèv oben on tantasyon, lavérité ké ban-nou plis volonté pou fè sa ki byen. Menmjan on sòlda toujou té ka vérifyé si i té byen maré senti a-y lè i té ka pati o konba, fò-nou toujou vérifyé si nou ka mèt lavérité an pratik adan tout domenn a vi an nou. Senti a sòlda-la té itil osi pou i té pé sa chayé épé a-y. An-nou vwè ka sa ka aprann-nou.

16. Si nou ka anségné moun lavérité, kijan sa ké pèwmèt-nou ni plis volonté pou pa jen lagé-y ?

¹⁶ Twazyèm biten pou-w fè : fè tousa ou pé pou anségné lézòt lavérité. Labib, « pawòl a Bondyé », kon on épé. Menmjan on sòlda ka tchenbé épé a-y fò, sé menmjan-la osi fò-w tchenbé Pawòl a Bondyé fò (Éféz. 6:17). Noutout pé fé éfò pou nou vin dé méyè anségnan, pou nou « èspliké pawòl a lavérité byen konm i fo » (2 Tim. 2:15). Lè nou ka sèvi èvè Labib pou nou anségné moun, konésans an nou é lanmou nou ni pou lavérité ka vin pli fò. É sa ka ban-nou plis volonté ankò pou nou kontinyé maché adan lavérité.

17. Poukwa lavérité ni onlo valè pou-w ?

¹⁷ Lavérité sé on bèl kado Jéova ka fè-nou. I ka pèwmèt-nou ni sa ki ni plis valè adan lavi : on bèl lanmityé èvè Pap’an nou ki an syèl la. Sé vré i ja aprann-nou onpakèt biten, men an réyalité sé koumansé i koumansé ! I ka pwomèt-nou i ké anségné-nou pou touttan. Alò, menmjan ou té ké konsidéré on pèwl ki ni onlo valè kon on trézò, sé menmjan-la pou ou konsidéré lavérité. Kontinyé fè sa Labib ka di : « Achté lavérité é pa jen vann-li. » Konsa, menmjan ki David, ou ké tyenn pwomès-la ou fè Jéova la : « An ké maché adan vérité a-w » (Sòm 86:11).