1. Poukwa noutout bizwen rékonfò ?

 NOUTOUT bizwen rékonfò. Nou pé ka jwenn onpakèt éprèv ki ka tèrbolizé lèspri an nou é pétèt ni dé biten ki ka désèvwa-nou. Nou pé ka soufè akòz dè on maladi, pas nou ka pran on laj oben pas nou pèd on moun nou té enmé. Ni déotwa adan nou ka sibi onlo atrosité. Anplisdisa, onlo moun ka vin dè plizanpli vyolan. Sé « tan[-la] ki rèd a sipòté » la ka montré kè nou ka viv lé « dènyé jou » é kè chak jou, nou ka vin pli pré a mond nouvo la (2 Tim. 3:1). Men pétèt ni lontan nou ka atann Jéova réyalizé pwomès a-y, é pétèt, pli sa kay, pli nou ka pran gaz. Alò, ola nou pé jwenn rékonfò ?

2, 3. a) Ka nou konnèt asi Abakik ? b) Poukwa nou kay ègzaminé liv a Abakik ?

² An-nou ègzaminé liv a Abakik. Non-lasa, « Abakik », dwèt vlé di « vlopé on moun fò an dé bra a-w ». Sé pé, lè Jéova ka rékonfòwté-nou (konsi i ka pran-nou adan dé bra a-y èvè tandrès), oben sé pé, lè nou ka fè-y konfyans é nou ka tchenbé-y fò. Menmsi Labib pa ka bay  onlo détay asi Abakik, liv a-y ka ankourajé-nou toubònman. Pwofèt-la pozé Bondyé kèsyon ki té vréman entérésan. Jéova té sav kè ti kozé-lasa té ké pwokiré-nou onlo byenfé é sé pousa i mandé Abakik maké-y (Abak. 2:2).

³ Adan Labib, sé yenki ti kozé-lasa tousèl ki ka ban-nou enfòwmasyon asi Abakik. Men liv-lasa ka fè pati a « tousa yo maké an tan lontan », « konsa nou pé ni lèspwa grasa andirans an nou é grasa konsolasyon-la ki adan Lézékriti » (Wom. 15:4). Kijan liv-lasa pé itil pou nouchak ? I pé édé-nou konprann ka sa vlé di fè Jéova konfyans. É grasa liv-lasa, nou sèten kè nou pé trankilizé lèspri an nou menm lè nou ka jwenn éprèv. An-nou pran on tan pou nou ègzaminé-y tibwen plis.

4. Ka ki té ka angwasé Abakik konsa ?

⁴ (Li Abakik 1:2, 3.) An tan a Abakik, lavi-la té rèd menm. Lè i té ka vwè jan moun alantou a-y té méchan é jan yo té vyolan, sa té ka rann Abakik tris toubònman. Lè i té ka gadé alantou a-y, sa i té ka vwè, sé kè pawmi sé Izrayélit-la, yonn té ka fè lòt bon méchansté. I té ka pozé-y kèsyon kon : « A ki moman tout méchansté-lasa ké disparèt ? Poukwa Bondyé pa ka fè ayen ? » Difètkè i pa té pé chanjé ayen, i mèt jounou atè pou mandé Bondyé fè on biten. Pétèt i konpranndèdi kè Jéova pa té ka sousyé-y dè pèp a-y ankò oben kè i té ka pran twòp tan pou i aji. Ès sa ja rivé-w dè rèsanti menm biten-la ?

5. Jéova mandé Abakik maké sa ki té ka trakasé-y. Ka sa ka aprann-nou ? (gadé prèmyé imaj a awtik-la).

⁵ Difètkè Abakik té ka pozé sé kèsyon-lasa, ès sa té vlé di kè i té pèd konfyans an Jéova é adan pwomès a-y ? Anponjan ! Abakik mandé Jéova édé-y pas i té ni dout é i té ka jwenn pwoblèm. Sa té ka montré kè i té ka fè Jéova konfyans toujou. Sitiyasyon-la té ka chouboulé Abakik. I pa té ka konprann poukwa Jéova té ka atann pou i aji é poukwa i té ka lésé-y soufè konsa. Jéova mandé Abakik maké sa ki té ka trakasé-y. Sa ka aprann-nou on biten ki vréman enpòwtan : fò pa nou pè palé Jéova dè sa ki ka trakasé-nou é dè dout kè nou ni. Sé pousa, i ka di-nou priyé-y é di-y tousa nou ka rèsanti (Sòm 50:15 ; 62:8). Pwovèb 3:5 ka ajouté : « Fè Jéova konfyans èvè tout tchè a-w é pa fyé-w a pwòp entélijans a-w ». Abakik dwèt té konnèt sé pawòl-lasa é i mété-yo an pratik an vi a-y.

6. Poukwa sa enpòwtan kè nou priyé ?

⁶ Abakik té ka fè Jéova konfyans. Pou-y, sété Zanmi a-y, sété Papa-y. Sé pousa i désidé rapwoché-y dè-y. Abakik pa rété ka pran tèt a-y asi pwoblèm kè i té ni é i pa éséyé réglé-yo limenm a-y nonplis. Okontrè, i di-y tousa i té ka rèsanti. I sé on bèl ègzanp pou nou. Jéova « ki ka tann priyè-la », ka di-nou palé-y dè sa ki ka trakasé-nou pou nou montré-y kè nou ka fè-y konfyans (Sòm 65:2). Konsa, nou ké vwè jan Jéova ka réponn a priyè an nou. Nou ké santi Jéova ka rékonfòwté-nou, konsi i ka pran-nou adan dé bra a-y èvè tandrès é nou ké santi kè i ka gidé-nou (Sòm 73:23, 24). Kèlkèswa éprèv-la nou ka sibi la, Jéova ké édé-nou  konprann kijan i ka vwè-y. Lapriyè, sé yonn adan sé méyè mwayen-la ki ni la pou nou montré Jéova nou ka fè-y konfyans.

7. Lè Abakik di Jéova sa ki té ka trakasé-y, kijan Jéova réyaji ?

⁷ (Li Abakik 1:5-7.) Lè Abakik di Jéova sa ki té ka trakasé lèspri a-y, pétèt i mandé-y kijan Jéova té kay réyaji. Antankè Papa ki ni onlo lanmou, Jéova konprann kè Abakik té ka soufè é kè sé on èd i té ka mandé. Sé pousa, i pa fè-y pon rèpwòch. Olyé i té fè sa, i di-y sa ki té kay rivé moun ki té ka rété Jida é ki pa té fidèl. Abakik sé pétèt prèmyé moun Jéova di kè jijman a-y té toupré rivé.

8. Poukwa Abakik pa té’é jen konprann kè Jéova té’é réponn-li konsa ?

⁸ Jéova èspliké Abakik kè i té paré pou aji. I té kay sèvi èvè sé Kaldéen-la, kivédi sé Babilonyen-la, pou pini moun ki té ka rété Jida ki té vyolan é ki té méchan. Lè Jéova di sa ké rivé « pannan zò vivan », i té vlé di pa la kè jijman a-y té ké vin pannan Abakik oben sé Izrayélit-la ki té ka viv an tan a-y la té vivan toujou. Abakik pa té’é jen konprann kè Jéova té’é réponn-li konsa. Sé Babilonyen-la té brital. Yo té lontan pli vyolan ki sé Izrayélit-la, ki té konnèt prensip a Jéova. Alò, poukwa Jéova té kay sèvi èvè on nasyon méchan konsa, ki pa té ka adoré-y, pou pini pèp a-y ? Sa té kay fè Jida soufè plis ankò. Si ou té an plas a Abakik, kijan ou té’é réyaji ?

9. Ki dòt kèsyon Abakik pozé ?

⁹ (Li Abakik 1:12-14, 17.) Menmsi Abakik té ka konprann kè sété pou pini sé méchan-la kè Jéova té ka itilizé sé Babilonyen-la, kanmenmsa, sa té ka chouboulé-y. Men konm i té ni onlo imilité, i té ka konsidéré Jéova kon « Gwo-Wòch » a-y toujou (Dét. 32:4 ; Iz. 26:4). Abakik té ni konfyans adan lanmou é adan bonté a Jéova, kifè i pa té pè pozé-y kèsyon kon séla : Poukwa Jéova té’é pèwmèt kè sitiyasyon-la vin pli mové pou Jida é kè pèp-la soufè plis ankò ? Ka i té ka atann pou i aji ? Poukwa Toupuisan-la té’é rété san di ayen é té’é lésé méchansté-la pran lanmen toupatou konsa ? Jéova sé « Sen »-la é « zyé [a-y] two pwòp pou gadé sa ki mové ».

10. Poukwa, délè, nou pé ka santi-nou kon Abakik ?

¹⁰ Délè, nou pé ka santi-nou kon Abakik. Nou ka kouté Jéova. Nou ka li é nou ka étidyé Pawòl a-y èvè on konfyans total, kifè èspérans an nou ka vin pli solid. Anplisdisa, nou ka kouté byen sa lòwganizasyon ka di-nou asi pwomès a Bondyé. Men magrésa, pétèt nou ka kontinyé mandé-nou a ki moman sé soufrans-la ké bout. Si sé ka an nou, sa Abakik fè apré pé aprann-nou onlo biten.

11. Ka Abakik té byen désidé a fè ?

¹¹ (Li Abakik 2:1.) Ti kozé-la Abakik fè la èvè Jéova trankilizé lèspri a-y. Kifè, i mèt konfyans a-y an Jéova é i désidé atann kè Jéova aji. I montré i té byen désidé lè i di : « Sé èvè lèspri trankil an ka atann jou a malè-la » (Abak. 3:16). Ni dòt sèwvitè a Bondyé ki atann Jéova èvè pasyans osi. Ègzanp a yo ka ankourajé-nou a fè menm biten (Mich. 7:7 ; Jak 5:7, 8).

12. Ka ègzanp a Abakik ka aprann-nou ?

 ¹² Abakik té byen désidé a atann kè Jéova aji. Ka sa ka aprann-nou ? Prèmyé biten-la, sé kè kèlkèswa pwoblèm-la nou ni la, fò pa nou jen arété priyé Jéova. Dézyèm biten, fò-nou kouté sa Jéova ka di-nou grasa Pawòl a-y é grasa òwganizasyon a-y. É twazyèm biten, fò-nou atann èvè pasyans kè Jéova aji é fò-nou sèten i ké soulajé-nou a lè-la ki fo la. Si nou ka pran ègzanp asi Abakik, lèspri an nou ké trankil é nou ké pé andiré. Èspérans an nou ké édé-nou atann èvè pasyans é nou ké kontinyé ni lakontantman magré éprèv nou ka jwenn (Wom. 12:12).

13. Kijan Jéova rékonfòwté Abakik ?

¹³ (Li Abakik 2:3.) Lè Abakik désidé atann èvè pasyans kè Jéova aji, sa dwèt fè Jéova plézi. Toupuisan-la té sav byen sa Abakik té ka andiré. Sé pousa, i rékonfòwté-y èvè lanmou é i pwomèt-li kè i ké aji byento. Sé konsi i té di Abakik : « Pran pasyans, é fè-mwen konfyans. An ké réponn a priyè a-w, menmsi ou ni lenprésyon sa ka pran tan. » Jéova fè Abakik sonjé kè i té ja désidé kilè i té kay réyalizé pwomès a-y. Sé pousa, i ankourajé-y a kontinyé atann. I pa té ké atann pou ayen.

14. Ki biten fò-nou byen désidé a fè lè nou ka jwenn éprèv ?

¹⁴ Nou osi, fò-nou atann kè Jéova aji é fò-nou kouté byen sa i ka di-nou. Sa ké rann fwa an nou pli fò é sa ké trankilizé lèspri an nou lè nou ké jwenn éprèv. Jézi ankourajé-nou a pa konsantré-nou asi « tan oben épòk » Bondyé pa dévwalé-nou (Akt 1:7). Fò-nou sèten kè Jéova konnèt ki méyè moman pou i aji. Alò, an-nou kontinyé atann èvè imilité, èvè pasyans, é èvè fwa, toupannan nou ka itilizé tan an nou pou nou ba Jéova sa nou ni dè méyè adan sèwvis an nou (Mawk 13:35-37 ; Gal. 6:9).

15, 16. a) Adan liv a Abakik, ki pwomès nou ka touvé ? b) Ka sé pwomès-lasa ka aprann-nou ?

¹⁵ Jéova fè on pwomès : « Grasa fwa a-y, moun-la ki jis la ké viv », é « toutmoun asi latè ké konnèt kè Jéova ni glwa » (Abak. 2:4, 14 ; nòt pou « fidélité »). Wi, Jéova ka pwomèt moun ki ni pasyans é ki ka fè-y konfyans kè i ké ba-yo lavi étèwnèl.

¹⁶ An-nou réfléchi asi pwomès-la nou ka touvé la adan Abakik 2:4. Tèlman i enpòwtan ou ka touvé-y twa fwa adan lèt a lapòt Pòl ! (Wom. 1:17 ; Gal. 3:11 ; Ébr. 10:38). Menmsi nou an difikilté, si nou pa pèd fwa an nou an Jéova, nou pé sèten nou ké vwè pwomès a-y réyalizé. I ka ankourajé-nou a gadé pli lwen ki sé difikilté-la kè nou ni konnyéla la, é a konsantré-nou asi èspérans an nou.

17. Ka Jéova ka pwomèt-nou si nou ka fè-y konfyans ?

¹⁷ Nou ki ka viv dènyé jou a sistèm-la, nou ka touvé on ansègnman ki fò toubònman adan liv a Abakik : Jéova ka pwomèt chakmoun ki ni fwa adan-y lavi étèwnèl. Alò, kèlkèswa difikilté kè nou ka kontré oben kèlkèswa sa ki ka trakasé-nou, an-nou kontinyé konsolidé konfyans an nou an Bondyé. Grasa sa Jéova di Abakik, nou sèten kè  i ké soutyenn-nou é kè i ké sové-nou. I ka mandé-nou fè-y konfyans é atann èvè pasyans jou-la Wayòm a-y ké dirijé latè. A moman-lasa, toutmoun si latè ké adoré Jéova adan lapé é adan lakontantman (Mat. 5:5 ; Ébr. 10:36-39).

18. Kijan sa Jéova di Abakik aji anlè-y ?

¹⁸ (Li Abakik 3:16-19.) Sa Jéova té di Abakik aji anlè-y toubònman. Abakik réfléchi onlo asi biten èstraòwdinè Jéova té fè ba pèp a-y dan lèpasé, kifè sa bay plis konfyans ankò an Jéova. Konnyéla, i té séten kè Jéova té toupré aji ! Sa rékonfòwté-y, menmsi pétèt i té’é kontinyé soufè tibwen ankò. Abakik pa té ni pon dout ankò : i té sèten kè Jéova té’é sové-y ! Adan Labib, sèwvitè a Bondyé ja ni lokazyon di Jéova kijan yo té ka fè-y konfyans. Men sa ki maké adan vèwsé 18 la ka fè pawti a sé pli bèl mannyè-la yo fè sa la. Sèlon moun ki èspésyalis a Labib, sé konsi sa ki maké adan vèwsé 18 la vlé di : « Tèlman an ké kontan, an ké soté anlè akòz dè Sègnè-la ; an ké touné toupannan an ké ka dansé, pas Jéova ka fè-mwen plézi toubònman. » Nou osi, nou pé ni on konfyans konsa adan Jéova. Non sèlman i ka pwomèt-nou bèl biten toubònman pou dèmen ; men i ka di-nou osi kè i ja ka pòté bon mannèv pou réyalizé pwomès a-y.

19. Ka nou pé fè pou Jéova rékonfòwté-nou, kon i fè pou Abakik ?

¹⁹ Ni on biten vréman enpòwtan liv a Abakik ka aprann-nou, sé kè fò-nou toujou kontinyé fè Jéova konfyans (Abak. 2:4). Pousa, fò-nou konsolidé lanmityé an nou èvè-y. Kijan nou ké rivé fè sa ? 1) Toujou kontinyé priyé-y, di-y tousa ki ka trakasé lèspri a-w. 2) Kouté byen sa Bondyé ka di-w grasa Pawòl a-y é grasa òwganizasyon a-y. 3) Atann èvè fwa é èvè pasyans kè Jéova réyalizé pwomès a-y. Sé sa Abakik fè. Lè i koumansé ti kozé-la èvè Jéova i té angwasé, men lè ti kozé-la bout, i té ni plis konfyans an Jéova é i té kontan ! Si nou ka imité Abakik, nou ké santi kijan, nou osi, Jéova ka rékonfòwté-nou, konsi dé bra a Pap’an nou ki an syèl-la té ka vlopé-nou. Adan mond méchan la nou ka viv adan-y la, ou ka di ni ondòt koté ou ké pé touvé on bèl rékonfò konsa ?