ONSÈL tijès a bonté pé fè onlo pou trankilizé lèspri a on moun oben pou ba-y fòs é kouraj. É lè nou sav kè on moun ka sousyé-y dè nou, sa ka fè tchè an nou kontan toubònman. Piskè noutout enmé yo aji èvè bonté épi nou, kijan nou pé fè kalité-lasa grandi andidan an nou ?

On moun ki ni bonté ka fè tousa i pé, dè tou kè, pou lézòt santi-yo byen é i ka chèché a édé-yo ki lè i ka palé, ki lè i ka aji. On moun ki ni bonté, a pa on moun ki ni bèl mannyè tousèl. Sé konpasyon é on gran lanmou ki ka pousé on moun aji èvè bonté. Anplis, ou ka touvé-y adan fwi a lèspri sen kè sé krétyen-la dwèt kiltivé (Gal. 5:22, 23). Donk, an-nou vwè kijan Jéova é Gason a-y ka aji èvè bonté é kijan nou pé imité-yo.

Jéova sé on moun ki ka aji èvè bonté é ki janti èvè toutmoun, menm èvè « moun engra é moun ki méchan » (Lik 6:35). Pa ègzanp, i « ka fè solèy-la lévé asi sé méchan-la é asi sé bon moun-la, é [i] ka fè lapli tonbé asi moun ki jis é asi moun ki enjis » (Mat. 5:45). Sé pousa, menm moun ki pa ka rèkonnèt kè Bondyé sé Kréyatè a yo ka bénéfisyé dè don i ka fè pou nou rété vivan é sa ka rann tchè a yo kontan.

Sa Jéova fè pou Adan é Èv tibwen apré yo péché, sé vréman on bèl ègzanp a bonté. Prèmyé misyé-la é madanm a-y té koud « fèy a fig-fwans » pou yo fè « lenj ki té ka maré an ren a yo ». Men Jéova té sav kè yo té’é bizwen dòt kalité lenj pou yo viv andéwò a Jadendédèn-la. Pas alè, sòl-la té modi, i té kay pwodui « pikan é vyé zèb ». Donk, Jéova aji èvè bonté lè i ba-yo « lenj ki long é ki fèt èvè po a bèt pou kouvè kò a yo » (Jén. 3:7, 17, 18, 21).

Jéova ni bonté pou toutmoun, « sé méchan-la é [...] sé bon moun-la », men sa i vlé fè siwtou, sé aji èvè bonté épi sèwvitè a-y ki fidèl. Pa ègzanp, an tan a pwofèt Zakari, sa fè on zanj lapenn dè vwè kè rèkonstriksyon a tanp a Jérizalèm té arété. Jéova kouté zanj-la di-y sa i té ni anlè kè a-y, é i réponn-li èvè « pawòl ki plen bonté é pawòl ki ka bay fòs é kouraj » (Zak. 1:12, 13). I fè menm biten-la èvè pwofèt Éli. On jou, i té tèlman dékourajé kè i mandé Jéova woté vi a-y. Jéova tyenn kont dè sa Éli té ka rèsanti é i voyé on zanj pou ba-y fòs. Anplis, i di-y kè ni on biten ki sèten, sé kè i pa té tousèl. Lè i tann sé pawòl plen bonté lasa é lè Jéova bay pal-la i té bizwen la, Éli kontinyé misyon a-y (1 Wa 19:1-18). Jéova ban-nou on bèl ègzanp a bonté toubònman. Pawmi sèwvitè a-y, kilès ki imité-y pli byen ?

Pannan ministè a-y asi latè, pou toutmoun, Jézi sété on moun ki té plen bonté é ki té ni konsidérasyon pou lézòt. I pa té jen rèd èvè moun é i pa té ni on manni diktatè nonplis. Èvè plen konpasyon i di-yo : « Vin owa mwen, zòtout ki las é ki ka pòté on chaj ki lou, é an ké konsolé-zòt. [...] Pas jouk an mwen pa rèd a pòté » (Mat. 11:28-30). Tèlman bonté a Jézi té ka touché sé moun-la, yo té ka suiv-li toupatou i té kay. « Sa fè-y tèlman lapenn », kè Jézi ba-yo manjé, i anségné-yo « onlo biten » si papa-y é i géri moun ki té malad oben endikapé (Mawk 6:34 ; Mat. 14:14 ; 15:32-38).

Sa ki ka montré ankò kè Jézi té on nonm plen bonté sé kè i té ka konprann sa lézòt té ka rèsanti é sa ki té dèyè do a sé santiman-lasa. I té janti èvè toutmoun ki té ka vin owa a-y épi on tchè sensè, menm lè sété a dé moman ki pa té ka aranjé-y oben lè sitiyasyon-la pa té fasil (Lik 9:10, 11). Pa ègzanp, lè on madanm ki té ka tranblé touché lenj a-y, Jézi pa babyé èvè-y. Madanm-la té fè sa pas i té ni on maladi ki té ka fè-y pèd san é i té vlé Jézi géri-y. Men sèlon Lwa-la, i pa té pwòp (Lév. 15:25-28). Pas i té ni pityé pou madanm-lasa ki té ka soufè dépi 12 lanné, Jézi di-y : « Fi an mwen, fwa a-w géri-w. Ay anpè é géri dè maladi-la ki ka fè-w soufè la » (Mawk 5:25-34). Mi on jès èstraòwdinè ki té plen bonté, mi !

Sé ègzanp-la nou sòti vwè la ka édé-nou konprann kè nou ka vwè bonté a on moun sèlon mannyè i ka aji. Sé sa Jézi montré adan istwa a bon Samariten-la. Adan istwa-lasa, on Samariten pran penn a on Juif kè yo volé, yo ba-y kou, é yo lésé près mò òbò a chimen-la. (Fò-nou sonjé kè Samariten é Juif té hay-yo.) Labonté fè Samariten-la aji. I pran swen a bobo a Juif-la é i menné-y adan on ti lotèl. Aprésa, Samariten-la ba mèt a lotèl-la lajan pou i okipé-y dè Juif-la, é i jous di-y kè i ké péyé dépans ki ké ni anplis (Lik 10:29-37).

Anplisdisa, lè on moun ka aji èvè bonté, i ni pawòl ki janti é ki ka bay kouraj. Labib ka di kè « lè on moun enkyèt, sa ka rann tchè a-y tris », men « on bèl ti pawòl ka rann tchè a-y kontan » (Pwov. 12:25). Labonté é lanmou pou sa ki byen * ka édé-nou ankourajé lézòt èvè pawòl an nou pou yo woutouvé jwa a yo. Nou ka montré kè nou ka sousyé-nou dè yo lè nou ni dé pawòl ki plen bonté. Grasa tout sé ankourajman-lasa, yo ké pé tchenbé anba éprèv a lavi (Pwov. 16:24).

Piskè Bondyé fè lézòm « pòtré a-y », yotout kapab kiltivé labonté (Jén. 1:27). Pa ègzanp, Jilyis, on ofisyé women ki té rèsponsab pou menné Pòl é dòt prizonyé a Wòm, aji èvè apòt-la « épi bonté é pèwmèt-li ay aka zanmi a-y [a Sidon] pou yo pran swen a-y » (Akt 27:3). Plita, lè bato-la koulé toupré Malt, moun ki té ka rété la aji èvè « on gran bonté » épi yo. Sé moun-la jous fè on difé pou yo pé sa chofé-yo (Akt 28:1, 2). Men, aji èvè bonté, a pa yenki fè bon aksyon on fwa konsa.

Si nou vlé fè Bondyé plézi a san pou san, fò-nou ni labonté andidan an nou é adan mannyè nou ka viv. Sé pousa Jéova ka di-nou « abiyé[-nou] » èvè kalité-lasa (Kol. 3:12). Men fò-nou rèkonnèt kè sa pa toujou fasil a fè. Poukwa ? Sé pétèt pas nou timid, pas nou pa sèten dè nou, pas ni moun ki  kont nou é ki rèd èvè nou, oben paskè nou on tijan égoyis toujou. Kanmenmsa nou pé rivé si nou ka konté asi lèspri sen a Jéova é si nou ka imité jan i ka manifèsté labonté (1 Kor. 2:12).

Ès ni dé domenn nou té’é pé aji èvè plis bonté ? An-nou mandé-nou : « Ès an sav kouté lézòt èvè konpasyon ? Ès an ka tyenn kont dè sa yo bizwen ? Ki dènyé fwa an aji èvè bonté épi on moun ki pa fanmi an mwen oben ki pa zanmi an mwen ? » Aprésa, on objèktif nou pé ni, sé dè konnèt moun ki alantou an nou pli byen é moun a kongrégasyon an nou pli byen ankò. Konsa, nou ké pé aprann plis anlè sitiyasyon a yo é konnèt sa yo bizwen. Apré, fò-nou fè éfò, pou fè pou yo, sa nou té’é vlé yo fè pou nou si nou té an plas a yo (Mat. 7:12). Apré tousa, fò-nou sonjé kè Jéova ké édé-nou kiltivé labonté sèlman si nou mandé-y (Lik 11:13).

Lapòt Pòl di kè, adan tousa ki té ka montré kè i té on minis a Bondyé, té ni « labonté » (2 Kor. 6:3-6). Moun té ka vin owa Pòl pas i té ka montré kè i té ka sousyé-y dè yo lè i té ka palé é lè i té ka aji èvè bonté (Akt 28:30, 31). Menmjan-la, nou pé ba lézòt anvi konnèt lavérité lè nou ka aji èvè bonté épi yo. Si nou konsa menm èvè moun ki kont nou, sa pé rivé a touché tchè a yo é sa pé rann-yo pli dous (Wom. 12:20). É on jou, yo pé jous chèché a konnèt sa Labib ka di.

Adan mond nouvo la, asiré sétèn, onlo résisité ké kontan lè nou ké aji èvè bonté épi yo. Sé ké pétèt prèmyé fwa yo ké aji konsa èvè yo. Konm yo ké plen rèkonésans, yo ké anvi montré bonté a yo an rètou. Moun-la ki ké rèfizé manifèsté kalité-lasa é ki ké rèfizé édé lézòt ké pèd posibilité dè viv pou touttan adan paradi-la. Pawkont, séla ki ké aji avè lézòt èvè lanmou é bonté ké pé viv pou touttan (Sòm 37:9-11). A moman-lasa, ké ni lapé é lasékirité toupatou asi latè ! Alòskè nou ka atann bèl épòk-lasa, ki byenfé nou ni lè nou ka manifèsté labonté dépi aprézan ?

Labib ka di : « On nonm ki ni bonté ka fè limenm a-y dibyen » (Pwov. 11:17). Lè on moun ni bonté nou anvi ay owa a-y, é noumenm anvi montré-nou bon èvè-y an rètou. Jézi té di : « Sé èvè menm mizi-la ou ka pran la pou miziré, yo ké miziré ba-w osi » (Lik 6:38). Sé pousa sa pli fasil pou on moun ki ni bonté dè touvé zanmi é dè rété bon zanmi èvè yo.

Pòl ankourajé moun adan kongrégasyon a Éfèz a « aji èvè bonté yonn èvè lòt, èvè on konpasyon ki plen tandrès, toupannan yonn ka padonné lòt volontyé » (Éféz. 4:32). Lè toutmoun adan on kongrégasyon ka aji èvè bonté yonn èvè lòt, é lè chakmoun ka chèché a édé lézòt, sa ka pòté onlo byenfé. Yo pa jen ni pawòl ki rèd, yo pa ka kritiké lézòt é yo pa ka di pawòl ka piké moun pou fè yo mal. Olyé yo fè mové pawòl monté é désann asi lézòt, yo ka chèché a ni bèl pawòl pou fè lézòt dibyen (Pwov. 12:18). Konsa, kongrégasyon-la ké fò é i ké sèvi Jéova adan lajwa.

Nou ka tou konprann kè labonté sé on kalité kè moun ka vwè lè nou ka palé é lè nou ka aji. Lè nou ka manifèsté labonté, nou ka imité bèl pèwsonalité a Dyé an nou Jéova ki donan é plen lanmou (Éféz. 5:1). Anplisdisa, nou ka rann kongrégasyon an nou pli fò é nou ka ba dòt moun anvi adoré Jéova ansanm èvè nou. Alò, an-nou fè tousa nou pé pou yo di kè nou sé on pèp ki ka manifèsté labonté !