Lèswa avan i mò, Jézi té di sé apòt-la pa chèché a mèt-yo prèmyé douvan. I di-yo : « Sé wa-la ki antèt a sé nasyon-la ka dominé-yo, é séla ki ni otorité asi yo, yo ka kriyé-yo Byenfétè. Men zòt, fò pa zò kon yo » (Lik 22:25, 26).

Sé Byenfétè-la Jézi té ka palé la, sété kimoun ? Grasa sa yo touvé maké, pyès monné é diféran tèks moun ékri, nou sav kè aka sé grèk-la é aka sé women-la, yo té ni labitid onoré sé chèf-la é dòt moun enpòwtan ankò. Yo té ka kriyé-yo Évèwjèt oben Byenfétè, pas sé nonm-lasa té ka rann moun a épòk a yo onlo bèl sèwvis.

Ni plizyè wa yo kriyé Byenfétè. Pa ègzanp, sé chèf éjipsyen la Tolémé 3 Évèwjèt (koté 247-222 avan Jézi) é Tolémé 8 Évèwjèt 2 (koté 147-117 avan Jézi). I té ni osi sé gran chèf women la Jil Séza (48-44 avan Jézi), Ogis (31 avan Jézi-14 apré Jézi), é wa a Jidé, Gran Éwòd-la. Si yo ba Éwòd tit-lasa, sé paskè lè onlè manjé vin ra, i ba sijé a-y blé pou yo manjé, é i ba sé maléré-la lenj pou mèt si yo.

Dapré Adòlf Dèsmann, on alman ki èspésyalis a Labib, Byenfétè sété on tit yo té ka itilizé près toupatou. I di konsa : « Ou pé touvé tit-lasa fasilman, alè-alè, pliski on santenn fwa adan sa yo touvé maké. »

Donk, lè Jézi di disip a-y : « Men zòt, fò pa zò kon yo », ka i té vlé di ? Ès i té vlé di pa la kè fò pa sé disip-la té sousyé-yo dè moun a épòk a yo ? Ditoupa. I ka sanm sa i té ka palé dè sa ki ka fè kè on moun donan.

An tan a Jézi, moun-rich té ka bay lajan pou fè ispèktak é pou òwganizé jé ki té ka fèt an gran istad. Yo té ka konstwi gran jaden pou moun pwonmlé, tanp, é yo té ka soutyenn dòt biten konsa. Men yo té ka fè sa pou moun palé dè yo anbyen, pou yo vin pi popilè oben pou fè moun voté pou yo. On liv ka palé dè Labib ka èspliké : « Té ni moun ki té ka bay èvè bon tchè, men onlo té ka plito sonjé entéré politik a yo. » Sa ki té ka pousé-yo aji konsa sé pwòp entéré a yo é lèfètkè yo té anvi rivé toubònman. É sé parapòt a sé atitid-lasa Jézi té ka avèti disip a-y.

Kèlkè lanné apré, lapòt Pòl montré kè sa enpòwtan dè ni bonkè lè ou ka bay. I ékri sé krétyen Korent-la : « Kè chakmoun fè jan i désidé adan tchè a-y, san règrété oben san yo fòsé-y, pas Bondyé enmé sila ki ka bay èvè jwa » (2 Kor. 9:7).